Nau Ntơm 18
18
Phung bu năch khlay ngăn ma Y-Abraham
1Brah Yêhôva tâm mpơl ma Y-abraham dăch ndru tơm guyh ta Mamrê, nôk păng dôl gŭ ta mpông ngih bok, tâm mông nây trôk duh hâu ngăn. 2Y-Abraham n'gơr măt uănh, saơ pe nuyh dâk tanăp măt păng. Mhe saơ khân păng, păng nchuăt ran vơt khân păng bơh mpông ngih bok jêh ri chon mon ta neh.#Hêb 13:2. 3Păng lah: “Hơi Kôranh Brah gâp, tơlah gâp dơi geh nau yô̆ tanăp măt may, lơi ta du bơh oh mon may. 4Dăn sŏk ma gâp djê̆ dak, gay ăn khân may rao jâng, jêh nây gŭ rlu ta nâm n'hâm tơm si aơ. 5Lĕ khân may hŏ lăn hăn tât ta ngih gâp jêh, ăn gâp hăn sŏk djê̆ piăng let gay khân may sông lĭr nuih jêh nây hăn n'hot jât năp.” Phung nây lah: “Ƀư hom kơt nau may lah.”
6Y-Abraham hăn plơ̆ sĭt ndal ta ngih bok, lah ma H'Sara: “Ay sŏk gơnh hom bar jât kilô#18:6 Nrn: pe sêa, klăp lah 20 kilô. rnih ueh, pach jêh ri ƀư hom piăng let.” 7Y-Abraham nchuăt tât ta ntŭk mât mpô mpa, nhŭp du mlâm kon ndrôk rah lay, jao ma oh mon gay ƀư puăch gơnh ro. 8Păng djôt dak toh ndrôk, dak toh srat jêh ri puăch ndrôk kon hŏ jan jêh, thai tanăp măt phung nây. Tâm nôk khân păng sa, păng nơm dâk pah kan ta nâm tơm si gay vơt ndơ sa.
Brah Ndu mbơh nau deh Y-Isăk
9Phung pe nuyh nây ôp Y-Abraham: “Ntŭk gŭ H'Sara ur may?” Păng ơh: “Ri, păng dôl gŭ tâm ngih bok.” 10Du huê tâm phung nây lah: “Klăp lah yan aơ năm taơ, nanê̆ gâp mra plơ̆ tay ta aơ ndrel ma may, jêh ri nôk nây taơ H'Sara, ur may, mra geh du huê kon bu klâu.” H'Sara gŭ iăt nau ngơi nây ta bôk mpông ngih bok, pakơi khân păng.#Rôm 9:9.
11Y-Abraham ndrel H'Sara lĕ ranh da dê jêh, năm lĕ âk. H'Sara mâu hôm dơi deh kon đŏng ôh. 12Yor nây, H'Sara gơm jêh ri mĭn êng: “Lĕ ranh ngăn kơt gâp aơ, hôm dơi dơn nau maak nây đŏng bơh? Lơ hô đŏng, kôranh gâp hŏ ranh jêh.”#I Pê 3:6. 13Brah Yêhôva ôp Y-Abraham: “Mâm ƀư H'Sara gơm jêh ri mĭn: ‘Geh ngăn lĕ ranh jêh kơt gâp aơ hôm e dơi geh kon bơh?’ 14Geh lĕ moh ntil nau jêr ir kŏ tât Brah Yêhôva mâu dơi ƀư? Tât yan lĕ tâm nal, năm taơ Gâp mra plơ̆ tay ma may, jêh ri H'Sara mra geh du huê kon bu klâu.”#Luk 1:37. 15Yor klach yor ri H'Sara dun pô aơ: “Hŏ geh gâp gơm!” Ƀiălah Păng lah: “Ngăn ay gơm jêh!”
Y-Abraham mbơh sơm kơl ma phung ƀon lan Sôdôm
16Phung nây dâk, du bơh ntŭk nây jêh ri uănh mpeh Sôdôm. Y-Abraham hăn ndrel đŏng gay njŭn khân păng. 17Brah Yêhôva lah: “Mâm Gâp dơi pôn đah Y-Abraham nau Gâp bơi ƀư? 18Nanê̆ Y-Abraham mra jêng du mpôl băl toyh jêh ri geh nau dăng ktang; lĕ rngôch phung ƀon lan klơ neh ntu tă bơh păng da dê mra geh nau ueh uĭn. 19Gâp săch jêh păng gay ntĭm nti ma phung kon sau jêh ri noi deh păng nar kăndơ̆ gĭt djôt prăp trong Brah Yêhôva, ƀư nau sŏng srăng jêh ri nau di, gay ăn Brah Yêhôva ƀư n'hêl nê̆ nau Păng hŏ ton jêh đah Y-Abraham.” 20Brah Yêhôva lah: “Nau vơl phong ma ƀon Sôdôm jêh ri Gômôrơ dŭt nteh ngăn, nau tih tâm lĕ ƀon nây dŭt jru ngăn! 21Ăn Gâp jŭr gay uănh khân păng geh ƀư nâm nau hŏ vơl nter tât jêh ma Gâp lah mâu. Geh mâu lah mâu Gâp mra gĭt.”
22Pôri, ntơm bơh nĕ phung nây hăn mpeh ƀon Sôdôm, ƀiălah Y-Abraham hôm e dâk tanăp măt Brah Yêhôva. 23Y-Abraham hăn văch dăch jêh ri ơh: “Brah Ndu mra ƀư rai lĕ phung sŏng srăng nđâp ma phung djơh mhĭk ƀơh? 24Ntĭt lah tâm ƀon nây geh prăm jât nuyh sŏng May ăt mra ƀư rai lĕ đŏng ƀơh? Mâu lah May mâu yor ma prăm jât nuyh phung sŏng srăng tâm ƀon jêh ri yô̆ an ma ƀon nây? 25May mâu ôh ƀư kơt nây! Mâu lah May ƀư rai phung sŏng ndrel ma phung djơh mhĭk, uănh phung sŏng srăng tâm ban ma phung djơh mhĭk ƀơh? Mâu ôh Kôranh Brah mâu ƀư kơt nây! Nơm phat dôih lĕ rngôch neh ntu mâm mâu ƀư ma nau di?” 26Brah Yêhôva lah: “Tơlah Gâp dơi joi geh prăm jât nuyh sŏng srăng gŭ ta ƀon Sôdôm, Gâp mra yô̆ an lĕ ƀon yor ma phung nây.”
27Y-Abraham ngơi tay: “Nđâp tơlah gâp ơm jêng bơh ndruyh neh, ăt janh ngơi đah Kôranh Brah: 28Tơlah nkhêp tâm prăm jât nuyh sŏng srăng mâu ôh rĭng prăm nuyh mâm ƀư? Yor mâu tŏng prăm nuyh May mra ƀư rai lĕ ma ƀon bơh?” Păng lah: “Tơlah Gâp dơi joi tâm ƀon nây geh puăn jât prăm nuyh, Gâp mâu ôh mra ƀư rai ƀon nây.”
29Y-Abraham lah tay: “Ntĭt lah tâm ƀon nây knŏng geh puăn jât bunuyh sŏng srăng mâm ƀư?” Păng lah: “Yor ma puăn jât bunuyh nây Gâp mâu ôh mra ƀư rai.”
30Jêh nây Y-Abraham ngơi tay: “Dăn Kôranh Brah lơi ji nuih, ăn gâp ngơi tay: Ntĭt lah tâm ƀon nây geh knŏng pe jât nuyh mâm mêh?” Păng lah: “Tơlah Gâp dơi joi geh pe jât nuyh, Gâp mâu ôh mra ƀư rai ƀon nây.”
31Y-Abraham lah: “Gâp janh ngơi ma Kôranh Brah: Tơlah geh knŏng bar jât nuyh dơm mâm ƀư?” Păng lah: “Yor phung bar jât nuyh nây, Gâp mâu ôh mra ƀư rai ƀon nây.”
32Y-Abraham ngơi tay: “Dăn Kôranh Brah lơi ji nuih, ăn gâp ôp đŏng du tơ̆ aơ dơm: Tơlah geh knŏng jât nuyh dơm mâm ƀư?” Păng lah: “Yor ma jât nuyh nây Gâp mâu ôh mra ƀư rai ƀon.”
33Lôch jêh lah đah Y-Abraham, Brah Yêhôva dâk hăn, bi Y-Abraham plơ̆ sĭt ta ngih bok păng nơm.
Zur Zeit ausgewählt:
Nau Ntơm 18: CMO2023
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023 United Bible Societies. All rights reserved.
