Nau Ntơm 19
19
Nau tih phung bunuyh ƀon Sôdôm
1Kêng măng, bar hê tông mpăr tât ta Sôdôm; nôk nây Y-Lot dôl gŭ ta mpông ƀon. Lah Y-Lot saơ bar hê tông mpăr tât, Y-Lot dâk hăn vơt jêh ri chon mon chŭn muh măt ta neh. 2Păng lah: “Ơ kôranh gâp ơi, dăn veh lăp ta ngih oh mon khân may, bê̆ch măng jêh ri rao jâng, jêh nây ôi taơ dĭng khân may dâk ơm ôi hăn trong.” Ƀiălah bar hê tông mpăr lah: “Mâu ôh, măng aơ hên mra gŭ padih mpâr ƀon nây.” 3Y-Lot nchâp ngăn rĭ dĭng bar hê tông mpăr veh lăp tâm ngih păng. Y-Lot ndrăp ndơ sông sa, gŭch nđông piăng let mâu geh ndrui, jêh ri bar hê tông mpăr sông sa.
4Ƀiălah nôk bar tông mpăr ê hŏ ôh lâng săk bê̆ch, geh phung bu klâu ƀon Sôdôm, lĕ rngôch bunuyh ntơm bơh mom ndăm tât bu ranh, mâu ka ƀah du huê, văch nchueng jŭm ngih nây. 5Khân păng kuăl Y-Lot jêh ri ôp: “Hŏ phung bu năch lăp tâm ngih may măng aơ? Leo hom khân păng tât ta aơ gay hên sông sa bê̆ch ndrel ma khân păng.”#Phat Dôih 19:22-24. 6Y-Lot luh padih mâp khân păng, nchăng ro mpông pakơi păng, 7jêh ri lah: “Dăn ma phung nâu oh lơi ƀư ôh nau djơh nây! 8Aơ gâp geh bar hê kon druh ê hŏ geh sai, gâp jao khân păng ma khăn may, tĭng nâm khân may ŭch ƀư. Ƀiălah lơi dĭng ƀư ôh du ntil nau đah bar hê bunuyh ri, yorlah khân păng hŏ tât veh khâl ƀĭt lĭt ta ngih gâp.” 9Phung nây nter: “May du ntŭk êng hom! May tât ta nây knŏng gŭ njưh ƀât lât ta aơ, ƀiălah mâm aƀaơ ŭch jêng tay kôranh phat dôih! Hên mra ƀư mhĭk ma may âk lơn đŏng ma đah bar hê ri.” Jêh nây khân păng nklơ̆ Y-Lot dŭt dăng jêh ri rduh gay mbang chah mpông.
10Ƀiălah bar hê tông mpăr nây yơr ti mphâk Y-Lot lăp tâm ngih, nchăng mpông, 11jêh nây rmal phung bu klâu padih mpông, ntơm bơh mom ndăm tât bu ranh, ƀư chieh măt da dê, kŏ tât khân păng lĕ huăr jêh joi mpông ƀiălah mâu dơi.#II Hađăch 6:18.
Ƀon Sôdôm jêh ri Gômôrơ dơn nau ƀư rai
12Bar hê tông mpăr ôp Y-Lot: “May hôm geh bunuyh êng đŏng gŭ ta aơ? Klay may, phung kon bu klâu, kon bu ur jêh ri mbu moh may geh tâm ƀon aơ jêng mpôl may, leo hom lĕ rngôch du luh bơh ntŭk aơ. 13Hên ntơm ƀư rai ntŭk aơ, yorlah nau vơh vơl phung ƀon lan tâm ƀon aơ hŏ tât ta Brah Yêhôva, jêh ri Păng hŏ đă hên hăn gay ƀư rai lơi ƀon aơ.” 14Pônây Y-Lot hăn luh padih mbơh ma phung klay dăch nđăp đah kon bu ur păng: “Du luh hom gơnh oi tă ntŭk aơ, yorlah Brah Yêhôva mra ƀư rai ƀon aơ.” Ƀiălah phung klay păng mĭn Y-Lot ngơi lôr.
15Ƀhit ang, bar hê tông mpăr ntrŭt Y-Lot: “Leo hom ur jêh ri bar hê kon bu ur may gŭ ta aơ hăn gơnh, klach lah khân may tưp khĭt ndrel ma nau tâm rmal ƀon aơ.” 16Yor nau yô̆ nđach Brah Yêhôva rĭ dĭng tâm nôk Y-Lot hôm bem ir, bar hê tông mpăr hŏ kuăn ti mphâk păng, ur păng jêh ri bar hê phung kon bu ur păng du luh bơh ƀon nây.#II Pê 2:7.
17Lah bar hê phung tông mpăr hŏ njŭn jêh khân păng luh padih, tâm bar hê khân păng geh du huê ngơi: “Nchuăt du hom gay rklaih nau rêh khân may, lơi dĭng uănh ôh pakơi jêh ri mâu đŏng dơi nsrŭng ta ăp ntŭk tâm neh lâng! Nchuăt hom hao klơ yôk klach lah khân may mra khĭt!” 18Y-Lot lah: “Hơi kôranh, mâu dơi ôh! 19Aơ, oh mon may hŏ geh nau yô̆ tanăp măt may, jêh ri may lĕ mpơl nau ueh toyh ngăn ma gâp, rklaih an jêh nau rêh gâp. Ƀiălah gâp klach mâu hŏ dơi năn nchuăt ta klơ yôk, nau mhĭk ban tât jêh ri gâp khĭt. 20Ri, geh du ƀon jê̆, dăch ta nây đŏng, dơi năn du krap. Dăn kôranh ăn gâp krap tâm ƀon nây, knŏng du ƀon jê̆ dơm, gay nau rêh gâp dơi klaih.” 21Tông mpăr ơh: “Ơ, gâp dơn đŏng nau may dăn aơ, jêh ri gâp mâu mra ƀư rai ôh ƀon may lah nây. 22Nchuăt hom gơnh oi du krap ta nây, yorlah gâp mâu dơi ƀư ôh lah may ê hŏ tât ta nây.” Yor nây, ƀon aơ bu rnha ƀon Sôar.#19:22 Sôar: Tâm nau ngơi Hêbrơ, rplay ngơi aơ geh bâr nau ngơi tâm ban rplay ngơi nâm ntĭt jêng “jê̆”. 23Nôk nar luh ƀli bơh klơ neh, Y-Lot tât jêh ta ƀon Sôar.
24Brah Yêhôva ƀư ăn mih luh mô ŭnh jêh ri ŭnh Brah Yêhôva bơh klơ trôk tŭp ta Sôdôm jêh ri Gômôrơ,#Mat 10:15; 11:23-24; Luk 10:12; 17:29; II Pê 2:6. 25ƀư rai bar ƀon aơ, lĕ n'gor neh lâng, nđâp ma lĕ rngôch bunuyh gŭ tâm ƀon nây jêh ri dĭng lĕ tơm si gơ̆ rêp hon ta klơ neh.
Ur Y-Lot jêng meh gâng boh
26Ƀiălah ur Y-Lot n'gĭl uănh pakơi rĭ dĭng jêng du mlâm meh gâng boh.#Luk 17:32.
27Ang ôi taơ, Y-Abraham dâk ơm ôi jêh ri hăn tât ta ntŭk păng hŏ gŭ tanăp Brah Yêhôva. 28Păng uănh mpeh ma Sôdôm jêh ri Gômôrơ, jêh ri lam n'gor neh lâng, păng saơ nhhŭk ŭnh bơh neh hao klơ tâm ban ma nhhŭk du mlâm ŭnh năk toyh ngăn.
29Nôk Brah Ndu ƀư rai lĕ ƀon tâm neh lâng, ntŭk Y-Lot dôl gŭ, Păng kah gĭt ma Y-Abraham rĭ dĭng hŏ rklaih jêh Y-Lot du luh bơh nau ƀư rai nây.
Ntơm saơm phung Môap jêh ri phung Ammôn
30Y-Lot mâu nănh gŭ ôh tâm ƀon Sôar, rĭ dĭng păng ndrel ma bar hê kon bu ur păng hŏ hao klơ yôk. Păng gŭ tâm trôm lŭ ndrel bar hê kon bu ur păng. 31Nur lah ma oh păng: “Mbơ̆ he lĕ ranh jêh, tâm nkual aơ mâu hôm ôh geh bu klâu dơi gŭ ndrel ma he tĭng nâm nau vay neh ntu. 32Lŏng, ăn he n'hơk mbơ̆ he ma ndrănh, jêh ri he bê̆ch nsum đah păng, gay ma he prăp mpôl ntil păng.” 33Yor ri, tâm măng nây bar hê oh nur n'hơk mbơ̆ khân păng ma ndrănh, jêh nây i nur bê̆ch nsum đah mbơ̆ păng, ƀiălah Y-Lot mâu gĭt ôh ndah jŏ păng hăn bê̆ch, mâu đŏng dơi gĭt ndah jŏ păng dâk. 34Ôi taơ, i nur lah ma oh păng: “Aơ, măng ndơh gâp lĕ bê̆ch nsum đah mbơ̆ jêh. Ăn he n'hơk păng ma ndrănh măng ta oi, ay mra bê̆ch nsum đah păng, gay ma he prăp mpôl ntil bơh mbơ̆ he.” 35Măng nây, bar hê oh nur n'hơk mbơ̆ khân păng ma ndrănh, jêh nây oh păng hăn bê̆ch nsum đah mbơ̆, ƀiălah Y-lot mâu gĭt ôh ndah jŏ păng hăn bê̆ch, mâu đŏng dơi gĭt ndah jŏ păng dâk. 36Pôri, lĕ bar hê kon bu ur Y-Lot ntreo đah mbơ̆ khân păng da dê. 37Nur păng deh du huê kon bu klâu, rnha Y-Môap.#19:37 Môap: Tâm nau ngơi Hêbrơ, rplay ngơi aơ geh bâr nau ngơi tâm ban lĕ rplay ngơi “tă bơh mbơ̆ gâp nơm”. Nây jêng chô yau phung Môap tât nar aơ. 38Oh păng deh đŏng du huê kon bu klâu ntơ moh păng Y-Ben-Ami.#19:38 Ben-Ami: Tâm nau ngơi Hêbrơ, rplay ngơi aơ nâm ntĭt jêng “kon bu klâu ndŭl mpôl gâp” mâu lah “kon bu klâu phung ƀon lan gâp”, jêh ri geh bâr nau ngơi tâm ban rplay ngơi nâm ntĭt jêng “phung Ammôn”. Nây jêng chô yau phung Ammôn tât nar aơ.
Zur Zeit ausgewählt:
Nau Ntơm 19: CMO2023
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023 United Bible Societies. All rights reserved.
