Nau Ntơm 17
17
Brah Ndu dơn nau tâm rnglăp đah Y-Abram
1Rnôk Y-Abram geh sĭn jât msĭn năm, Brah Yêhôva tâm mpơl đah păng jêh ri lah ma păng: “Gâp jêng Brah Ndu Geh Lĕ Nau Brah; ăn may hăn hom tanăp măt Gâp jêh ri gŭ rêh ueh sŏng srăng ngăn. 2Gâp mra ƀư nau tâm rnglăp đah may, jêh ri ăn noi deh may bĭk rơ̆ âk râk.” 3Y-Abram chŭn muh măt ta neh. Brah Ndu lah ma păng: 4“Mpeh ma Gâp, aơ jêng nau tâm rnglăp Gâp ƀư đah may: May mra jêng chô yau ma âk phung ƀon lan. 5Bu mra mâu hôm ôh kuăl may jêng Y-Abram,#17:5 Abram ntĭt jêng “mbơ̆ khlay yơk”. ƀiălah amoh kon mra jêng Y-Abraham#17:5 Abraham ntĭt jêng “mbơ̆ ma lĕ rngôch phung ƀon lan”. yorlah Gâp njêng jêh may jêng mbơ̆ ma âk phung ndŭl mpôl.#Rôm 4:17. 6Gâp mra ăn may geh bĭk rơ̆ dŭt âk, tă bơh may mra luh âk phung ƀon lan, jêh ri phung hađăch mra luh tă bơh may đŏng. 7Gâp mra njêng nau tâm rnglăp đah may jêh ri đah noi deh kon sau may bơh rô̆ aơ tât rô̆ êng; yorlah aơ jêng nau tâm rnglăp n'ho ro gay Gâp jêng Brah Ndu may jêh ri mpeh noi deh may.#Luk 1:55. 8Gâp mra ăn ma may jêh ri phung kon sau may neh may gŭ aƀaơ aơ, jêng lĕ n'gor Kanaan, jêng drăp ndơn n'ho ro. Gâp mra jêng Brah Ndu khân păng.”#Kan 7:5.
Rƀŭn nau koh ntâu
9Brah Ndu lah ma Y-Abraham: “May nơm yơh jêh ri noi deh may djôt prăp nau Gâp tâm rnglăp ntơm bơh rô̆ aơ tât rô̆ êng. 10Aơ jêng nau Gâp tâm rnglăp gay ăn may djôt prăp, jêng nau tâm rnglăp vah vang Gâp đah may jêh ri tâm ban đŏng đah phung kon sau may nar kăndơ̆: Nây jêng lĕ rngôch phung bu klâu tâm phung khân may dơn nau koh ntâu.#Kan 7:8; Rôm 4:11. 11Ăn khân may dơn siăt ntâu ta chiông ndơ chrach, jêh ri nau nây mra jêng nau mbên ma nau tâm rnglăp vah vang Gâp đah khân may. 12Tâm lĕ rô̆, ăp nuyh bu klâu tâm khân may, nđâp lah păng deh tâm ngih mâu lah bu rvăt ma prăk bơh phung bu năch, mâu jêng ôh kon may nơm, jêh deh pham nar mra dơn koh ntâu da dê. 13Lĕ bunuyh deh tâm ngih nđâp ma bunuyh bu rvăt ma prăk mra dơn koh ntâu da dê. Yor nây, nau Gâp tâm rnglăp ta săk jăn khân may jêng nau tâm rnglăp n'ho ro. 14Mbu nơm bu klâu mâu geh ôh koh ntâu, jêng mâu dơn siăt ntâu ta chiông ndơ chrach, pôri bu mra ngluh lơi păng bơh phung ƀon lan, yorlah păng chalơi nau Gâp tâm rnglăp.”
Brah Ndu ton ăn Y-Isăk ma Y-Abraham jêh ri H'Sarai
15Brah Ndu lah ma Y-Abraham: “Bi ma H'Sarai, ur may, may lơi hôm kuăl ôh păng H'Sarai yorlah amoh păng H'Sara.#17:15 Sara: Rplay samƀŭt aơ tâm nau ngơi Hêbrơ nâm ntĭt jêng “kon bu ur hađăch”. 16Gâp mra ăn nau ueh uĭn ma păng, jêh ri tă bơh păng Gâp mra ăn ma may du huê kon bu klâu, Gâp mra ăn nau ueh uĭn ma păng, păng mra jêng mê̆ ma âk phung ƀon lan; phung hađăch ma âk phung ƀon lan luh tă bơh păng da dê.” 17Y-Abraham chŭn muh măt ta neh, gơm jêh ri mĭn êng tâm nuih n'hâm păng: “Du huê bunuyh lĕ du rhiăng năm hôm dơi geh kon đŏng lah? H'Sara lĕ sĭn jât năm mâm hôm dơi deh?” 18Y-Abraham lah ma Brah Ndu: “Ndă ma Y-Ismaêl dơi geh nau ueh uĭn tanăp măt May!” 19Brah Ndu lah: “Mâu geh kơt nây ôh, H'Sara, ur may mra deh du huê kon bu klâu, jêh ri may mra ntơ amoh păng jêng Y-Isăk.#17:19 Y-Isăk: Rplay samƀŭt aơ tâm nau ngơi Hêbrơ nâm ntĭt jêng “gơm”. Gâp mra njêng nau tâm rnglăp đah păng, jêng nau tâm rnglăp n'ho ro đah phung kon sau păng. 20Bi ma Y-Ismaêl, Gâp iăt jêh nau may mbơh sơm. Aơ, Gâp mra ăn nau ueh uĭn ma păng, ƀư ma păng bĭk rơ̆ dŭt âk. Păng mra jêng chô yau ma jât ma bar kon hađăch, jêh ri Gâp mra ƀư ma păng jêng du phung mpôl băl toyh. 21Ƀiălah Gâp mra njêng nau tâm rnglăp đah Y-Isăk, H'Sara yơh mra deh ăn ma may tâm yan aơ năm pakơi taơ.” 22Lôch jêh ngơi, Brah Ndu Y-Abraham jêh ri gŭ klơ trôk.
23Tâm nar nĕ yơh, Y-Abraham koh ntâu ma Y-Ismaêl, kon bu klâu păng, jêh ri lĕ rngôch phung bu klâu, nđâp lah păng deh tâm ngih mâu lah bu rvăt păng ma prăk, di nâm nau Brah Ndu hŏ ntĭnh jêh ma păng. 24Y-Abraham geh sĭn jât msĭn năm nôk dơn nau koh ntâu; 25bi ma kon păng jêng Y-Ismaêl geh jât ma pe năm nôk păng dơn koh ntâu. 26Y-Abraham jêh ri Y-Ismaêl dơn ndrel nau koh ntâu tâm nar nây. 27Ăp bu klâu êng, mâu lah păng deh tâm ngih, mâu lah bu rvăt păng ma prăk bơh phung bu năch, dơn koh ntâu ndrel Y-Abraham da dê.
Zur Zeit ausgewählt:
Nau Ntơm 17: CMO2023
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023 United Bible Societies. All rights reserved.
