LUKA 1
1
1Aba gideaba ng'asheesu ning'waar fuga saang'a nea goorootooschi, aba iita ng'asheega ghayi sisin aba dageascheedeanya, 2gawuurji gidaghayi goondaneasa muushoodiga dea ea aba heeda fuga rukwiida ng'asheanda, 3Ak ea naadaayi eara aniini gideaba ghwahit, ak ea neasikteawi muuchi gidaghayi ng'eata ng'asheesu seaniin aba beanata, ak geang'oorneey ng'asheesu nea ghaadoabiiwji Diofiloheeda mureeda, 4abeeda gay nala huumeanda aba badayda ng'asheega ghayi sibean sirukuneeyi.
Geerugu jeata Yohaneeda Abaatiisachi
5Damanda waseewa Herode sugoocheanda Yudeya, abeeda gwanda ashoohoocheanji siguura Sakariya, bea gharmucheanda Abiya, nea gwandeawa gatmoadaanyi bea haweega Haruni, nea gheawungaaschi geeguura Elisabeti. 6Nea abeeda saawa ea doobiiweadi aba madeeda ASEETA, nea ghoang'waay muuchi diigheanyeeka sean ea huumeanyeeka Ng'utamiida nea meerukunana badahuuka ng'asheega munyas. 7Abeeda ea mandeawana baleanda aba gideaba Elisabeti soonooda nea niwoosiidi sean. 8Nea aba damanda sineewa gadiyeeda ashoohoocheanduumeeda aba madeeda ASEETA nea abeeda ea galanyeanda sineewa gadiyeeda lugoadaanyi, 9aba seareedida bea gissiniida ashoohoodiga gadiyeedean, inyeesa ghwaloat ASEETA siida gawa jeeda gheeda sibata ASEETA bea Ng'utamiida ghaghwarda geeta siing'andiita. 10Nea aba damani siing'andiida gheedean abeeda gwanda Eemeesean daghata gheeda ghamwaash ASEETA. 11Hean goobeersa Malaykajeanda#1:11 Malaykajeanda: Giijasoocheanda ASEETA leabu humng'eeda. Ng'utamiida ak ghamiinaada aba murdeeda geatinda dugwa bea heeda wagiida siyiina geeta siing'andiita. 12Daah Sakariya gwahirbaban nea ghabeal. 13Ak gwayeesha Malaykajeanda, “Adibeali, Sakariya, aba gideaba siyiiy gidimwaashi, nea eara Elisabeteeda was gatmoadaang'u gaygwajiilneey baleanda, ak gaygureewana gheawungaaschi Yohana.
14Ak gay hoosana nea ging'weelayi muuchi,
nea eara fuga saang'a gaygahoosassa jeataanyi;
15aba gideaba gaygwaheedu aba madeeda Ng'utamiida,
Mayghwali difaayi ghana gichea gooboogit,
ak gajeanyiit Guroorooda Ghaydit,
ghang'eada jeeda ghaamwat.
16Ak gaygooguumsa orjooga saang'a bea Israeli Ng'utamiida was ASEETA nyaawa,
17ak Gaygoosheedeawa aba jeeda guroorooda ea uurda Eliya,
ak ghwayam gurooruunatka ghweaniga gagal diibiga,
nea fuga mandeawana mureeda ghoadaw weaghuumeeda doobiiwnata,
ak gwasissa Ng'utamiida fuga hideadi.”
18Ak gwayeesha Sakariya malaykajeanda, “Gaydajeeng'daaydaan ng'asheanji? Aba gideaba aniini naawaasiichi nea eara gatmoodeanyu ea niwaasiit.” 19Ghwasha Malaykajeanda nea gwayeesha, “Aniini geawooschi Gabrieleeda miinaada aba madeeda ASEETA, ak geecheaknean headaang'u deaneey Giijasi miyiin. 20Asi ng'ula, gayghwaroat ghuutaang'u ea ea mudamuusa baloola ea ghwahita eaweeda jea ghang'ataawa ng'asheesu, aba gideaba mimwasi ng'asheegeasu jea gwasa aba damanda nyaawa.” 21Nea gafuriida buuneeda Sakariya, ghahamng'eanyi sean aba gideaba nishing'da aba jeeda gheeda sibata ASEETA. 22Hean nea gwardu jarooda, ghwaraay goobalool buuneeda, ak gwajeeng'u buuneeda gideaba siihiimsa gil aba jeeda gheeda sibata ASEETA; goobaloola geatinga nea niroat ghuuta. 23Duulean galandaanyi bea gadiyeeda, gawa gheanyi. 24Ng'ata eawoojisu ng'ay ghwadurmwaniit gatmoadaanyi siguura Elisabeti, ak ghafuy geaw sheemuut nea gwayi, 25“Nih gissinnean Ng'utamiida aba eaweeda ng'uleewanean ak gageandeawean rearga aba jeeda buuneeda.”
Geerugu jeata Yesu
26Sheedeaba lah goojeakta ASEETA malaykajeanda siguura Gabrieli gawa mujiineeda Nasareti mida ng'eanyiida Galilaya, 27hichpa hudi miyeasat siguura Mariya, anyeari siisi siguura Yosefu bea dooshagi sea sugoocheanda siguura Dawdi. 28Ghwahidu headaanyi ak gwayeesha, “Seayu ang'iing'eeda siitaw dagheerjeanduumeeda ang'iing'i gindeayi sea Ng'utamiida!” 29Hean gwadeawiit muuchi aba ng'asheanji ak gooteemsheesa seayoani giduurji. 30Gwayeesha Malaykajeanda, “Adibeali Mariya, aba gideaba nigoonyi ASEETA dagheerjeanduumeeda. 31Asi ng'ula, gaygweayiida ak Gayjiila baleanda, ak gayguureewana gheawungaaschi Yesu.
32Nea gajeahaw, ak gajeeguura Orjeeda ASEETA haw mida humng'eeda;
nea gayghoadaw Ng'utamiida was ASEETA hoorgeeda sugoocheanduumeeda Dawdi was ghwaan,
33nea gayghoahaaghwa gheeh Yakobo ea ghoah gweanyeeka manda muudeanooda;
nea sugoocheanduumeadaanyi ea maygwanda muudeanooda.”
34Gwayeesha Mariya malaykajeanda, “Gayghoawataan ng'asheanji nea aniini ea meandeawani siyeeda?” 35Gwayeesha Malaykajeanda,
“Gaygwashuubeeseey Guroorooda Ghaydit,
nea uurda ASEETA haw gaygookwealseey jirooneeda;
aba sareani baleanda jea eeji gajeeguura siida ghaydit,
Orjeeda ASEETA.
36Asi ng'ula, buweacheandaang'u was Elisabeti eara niny nigweayiit aba jeeda woosindaanyi ak gaygwaji baleanda; nea nih ea sheedeaba lahi; nea niny abeeda geeguura soonooda. 37Aba gideaba manda ng'asheanda jea ghwaraay ASEETA.” 38Gwayeesha Mariya, “Ng'ula, aniini geawooschi soomjeanda Ng'utamiida, nung' gwasa aba heedeanyu ng'asheanji inyaashiin.” Ak ghabeawa headaanyi Malaykajeanda.
Mariya gabareasa Elisabeti
39Askwearjoojigiga ghang'eat Mariya ak ghwalamwajaada gawa ng'eanyiida heayeeniiga jeeda mujiineeda Yuda. 40Ak gawa jeeda gheeh Sakariya ak googeachi Elisabeti; 41Iiy Elisabeti giigeacheeda Mariya, ghwadanghan baleanda mida jeadaanyi ak geanyiit Elisabeti Guroorooda Ghaydit 42goojuur aba ghuuta haw nea gwayi, “Sigoonyi ghawooda aba jeeda gadeemga, ak ea siitaw ghawooda dea jea jiila! 43Gayghoawdaani aba heedeanyu, gideaba ghwahidu heedeanyu gheamata Ng'utamiideanyu? 44Aba gideaba ng'ula, iyaayiinyi ghuuta seayoadaang'u ghwadanghan baleanda mida jeedeanyu aba ng'weelooda. 45Ghang'wana siida jea ghamwas gideaba gay gwasa ng'asheega rukusa Ng'utamiida.”
Sarmeeda Mariya bea duumsheesiinda
46Gwayi Mariya,
“Jeedeanyu ghoaghaambiit Ng'utamiida,
47Nea guroroodeanyu gahoosasa ASEETA was lealnoocheandeanyu
48Aba gideaba nidaah nyoota uurda soomjeandaanyi.
Asi ng'ula, ghang'eada ghamneawa gaygaguureewean jeacheenga sean dea sing'usha;
49Ak ea nisinnean siida siitaw ghawooda hoauur ng'asheega hees muuchi,
ak gheawungaaschi ea ghaydit.
50Nea baydeaydaanyi gwanda heeda buuneesean awal gheang'daanyi
ghang'eada jeacheenga ea gagul jeacheenga.
51Ak ea niihiimu uurda aba geatindaanyi,
nea Ghoadabwaarda fuga ghwarjajeega aba jeesinga nyaawa,
52Ak ea niirareang'na fuga mideawa uurjeenga hoorgajeega nyaawa bea sugoocheanduumeeda,
ak goodiing'u fugiga mandeawana uurjeengean;
53Ninyiit fuga bearji jalooda aba haleanjeeda miyaas,
nea meanang'oodiga gaweay nea ghwadalaada.
54Ak ea niweat soomjeandaanyi was Israeli,
aba giipkeata baydeaydaanyi,
55gawuurji gidaghayi rukusiinda ghweanigaasa,
ea Abrahamu ea jeataanyi aba gweanyeeka manda muudeanooda.”
56Gwandeayi niny sea Mariya ea goosha sheeh samwagu, iimuchu gabiikta gheanyaawa.
Jeata Yohaneeda Abaatiisachi
57Iidu nea ghwahita damandaanyi bea jeata gwaji Elisabeti baleanda. 58Iiy giischeewdaanyi ea buweadeagaaschi gideaba nibwayda Ng'utamiida Elisabeti gang'weela sean. 59Eaweeteaba sis geayaat baleanda ghasmeahooda; ak ghwanyawa gajeeng'assa gheawunga ghwaan siyi Sakariya, 60ak gwayeesha ghaamwat, “Manda; gajeeguura Yohana.” 61Ak geeyeesha, “Aba buweadeagaagu manda siida sing'assa gheawung'su.” 62Iidu geeng'wachsa geadi ghwaan gwarugu gheawunga gasa gang'assa. 63Gamus eeyeasa beehiida jea ghang'waar, ak ghang'waar gideaba, “Gheawungaaschi Yohana.” Ghahamng'eanyi sean. 64Deagheata ghwajaat ghuuta nea gootina ng'ushapta ak gabadiischeesa ASEETA. 65Hean ghang'ut muuwda giischeewda nyaawa sean. Ak gageawiit iiteaba ng'asheesu aba heayeeniga sean mida ng'eanyiida Yudeya; 66Fuga sean iiy iiteaba ng'asheesu gaba nih ang'ooysa jeadaanyi nea gwayi, “Jeebi gayghoah siida uurjiin?” Aba gideaba geatinda Ng'utamiida gwanda badaydaanyi.
Ramooraneeda Sakariya
67Nea Sakariyayda was ghweanda baleanda geanyiit Guroorooda Ghaydit ak ghwaramoaran nea gwayeena,
68“Duumsheesiinda gaba Ng'utamiida was ASEETA Israeli,
aba gideaba nibwareasa ak gwalealu buuneadaanyi,
69nimiinda gujaweeda lealnooda
aba jeeda gheeda soomjeandaanyi was Dawdi,
70Gawuurji gidaghayi rukuteayda aba ghuuta sibangaaschi ghaydidi ghang'eada garayi,
71ak gajeelealnaneasa heeda weajoodigaasa,
ea geatinga fuga sean sideasa;
72ak gayghabwayda ghweanigaasa aba gidaheeleesa,
nea ghoapkaat neajeadaanyi ghaydit,
73ak gweaksa habeawooda Abrahamuheeda was ghweandeanya,
74ak gagooneasa
gideaba gajeelealnaneasa geatinga weajoodigaasa,
ak geaghadoawanyi nea meawali gil,
75aba ghaydidanda ea doobiiwnata galeagasean aba madeadaanyi aba jeeda eaweagaasa sean.
76Nea ang'iing'i baleanda, gajeeguureeweey sibaneeda ASEETA haw;
aba gideaba gajasheedeawana Ng'utamiida sissiina naweadingaaschi,
77Nea gwarukusa fugaaschi ghwanal fughareeda lealnooda
aba samsiinda aba geandeayda riing'eega nyaawa,
78Aba baydeayda ASEETEANYA,
niirearseasa weeshinda leabu humng'eeda,
79ak gayghoabwaay fuga sean mida jeeda misaneeda haw bea jirooneeda miyeeda,
ak ghoadoabiiw geeshangaasa eayaada naweeda miy bea hoyyoo.”
80Ak gwahissa heeda baleanda nea ghwanyas uurda aba guroorooda, nea goobiita dareapcheeda ea ghwahita eaweadaanyi jea goohiimsiina geaw fuga Israeli.
Zur Zeit ausgewählt:
LUKA 1: BG15
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible in Datooga © Bible Society of Tanzania, 2015.
