LUKA 2

Jeata Yesu

(Mat 1:18-25)

1Askwearjoojigiga ghoadayda Gaysari Agusto diigheanda nea gwayeesha, ang'waara mooneeda buuneassean mida jeeda ng'eanyiida. 2Ng'oordi dea madeeda, nea gwanda sugoocheanduumeeda Shaamu Gireniyo. 3Gaba siisi weah eang'waar aba mujiineeda ng'eang'da nyaawa. 4Hean ghwascheang'da Yosefu ghabeawa Galilaya, nea ghabeawa mujiineeda Nasareti, ak gawa Yudeya, ea ghwahita mujiineeda Dawdi, siguura Betlehemu, aba gideaba gaba dooshta Dawdi, 5Gawa eang'waar sea Mariyayda was huda anyeari, nea abeeda ea gweayiideat. 6Damanda mideewa hooweani ghwahita damanda jea gwajiila. 7Gwaji duweacheadaanyi was orjeeda ak gookwealsa hang'weaka jeepcheanduumeeda ak gooluul aba jeeda daghwalda leeha dugwa beega, aba gideaba mwanyasa heeda jea gwalla aba ghooriida rabasta.

Jeagiischoodiga ea malaykajeega

8Nea aba damandida abeeda gwanda ng'eanyiita Jeagiischoodiga fur gisilga nyaawa eawa. 9Gabussa saawa Malaykajeanda Ng'utamiida, ak ghoabwaay murdajeega nyaawa sean giigheambiita Ng'utamiida, ak ghang'ut muuwda. 10Ak gwayeesha Malaykajeanda, “Adoabeali; ang'ula geayeaneegwa giijasta miy bea hooseaneega jea gwahissa buuneesean. 11Aba gideaba eanean aba mujiineeda Dawdi siji aba badahuukeagwa, lealnoocheanda, niny Gristoyda was Ng'utamiida gil. 12Nea gwadeagooda jea adaaha ea nihi; gajadaaha baleanda siikwealsa hang'weaka jeepcheanduumeeda nea geeluul aba jeeda daghwalda leeha dugwa beega.” 13Deagheata gwandeayi sea malaykajeanji lugooda saang'a bea humng'eeda ak gwaduumsheesa ASEETA nea gwayi,

14“Giigheambiita gaba ASEETA mida humng'eeda,

ak aba ng'eanyiida ghoah hoyyoo aba heeda fuga ahoosan!”

15Iidu nea nibiikta Malaykajeega humng'eeda, gwayeeniissa geat Jeagiischoodiga, “Asi eeweaya Betlehemu eadaaha gidabunu, rukuneasa Ng'utamiida.” 16Gaweay nea ghwalamwajaada ak geanyasa Mariya ea Yosefu heeda mida baleanda nea gwalil aba jeeda daghwalda leeha dugwa beega. 17Daah gwarukuta gidagwachi sirugu aba badaydeaba jeebi; 18ghahamng'eanyi fugiga sean iiyiiy gidarukusa jeagiischoodigean. 19Nea Mariya goong'ooysa jeadaanyi ng'asheesu seaniin, nea gooteemsheesa geaw. 20Iidu gabiikta jeagiischoodiga nea ghoaghaambiit nea gwaduumsheesa ASEETA aba ng'asheega siyiiy ea gea sidaah, gawuurji gisirukusiinda.

Yesu geeng'assa gheawunga

21Ng'ata eawooji sis nea siyaat ghasmeahooda geeguura Yesu, gheawunga ghayi ng'assa malaykajeanda nea mii ghwanyas ghaamwat gweayuumeeda.

Yesu geayaat gheeda sibata ASEETA

22Iimuchu nea ghwahita damanda nyaawa bea giimiinnooda gawuurji ginyaashta deaweedeeda Musa, hean geayaat niny Yerusalemu ak geataw Ng'utamiida 23(gawuurji gissing'oarda aba jeeda deaweedeeda Ng'utamiida, “Gilinyoo ea orjeeda was duweacheeda gil gajeeguura siida ghaydit bea Ng'utamiida”) 24ak ghoadayda haleanjeeda sisapa geadi gawuurji gidanyaashta deaweedeeda Ng'utamiida, “was bakpakchooji iyeenya ghana dayi iyeenya bea ghariibajeanda.” 25Nea abeeda gwanda Yerusalemu, siisi siguura gheawungaaschi Simon, nea siisi abeeda ea doabiiwaat, nea gabada ASEETA, nea goomuuku hawdeayda fuga Israeli, nea gwanda badaydaanyi Guroorooda Ghaydit. 26Nea ea nigeawiit goohiimsa Guroorooda Ghaydit gideaba mayghami nea miighwadaah Gristoyda Ng'utamiida. 27Ak ghwaat Guroorooda Ghaydit gawa jeeda gheeda sibata ASEETA; nea ghwaat ghwaan ea ghaamwat Yesu jeeda gheeda nea geehinda giduurji ng'asheega deaweeda, 28ghoang'waay aba geatingaaschi ak gabadiischeesa ASEETA nea gwayi,

29“Ng'utamiida, biisiina siksiina soomjeandaang'u gabiissa gawa nea ghwaat hoyyoo,

gawuurji ginyah ng'asheandaang'u;

30aba gideaba gheanyangeasu nidaah lealeanoadaang'u

31ghayi iisini nea ghwadaah buuneesean,

32Weeshinda jea ghoabwaay eemoojiga,

ak ghoah giigheambiita aba heeda fugaagu was Israeli.”

33Hean eara Ghwaan ea ghaamwat ghahamng'eanyi aba gissirgu aba badaydaanyi; 34Gang'usha Simon saawa nea gwayeesha Mariyayda was ghaamwat,

“Ng'ula, jeebi gajeenung' ghoah giibeedeayda ea ng'eedooda fuga saang'a bea Israeli,

ak gayghoadaw gwadeagooda jea ghaheawa buuneeda

35(nea jeadaang'u gayghwalach barda)

nea ng'asheega jeesinga fuga saang'a gajeataajiit.”

36Ghayi gwanda gatmooni was sibaneeda, siguura Ana, was hudeaba Fanueli, bea eemeeni siyi Asheri; ak ea niwaasiit muuchi, ghayi geaghi nea miyeasat ak gwandeawa siyeeda gweanyeew ispwa, 37goobiida masinung'weanduumeeda gweanyeew seedam ea aang'waan. Nea mii gwaheeli gheeda sibata ASEETA, nea gagadoowani nea gooluulda geaw nea gamoora ASEETA eawa ea askweari. 38Gwardu aba damandida ak gabadiischeesa ASEETA, ak goobaloola niny ng'asheega sean bea fuga amuuku lealnooda Yerusalemu.

Biikteayda Nasareti

39Iidu nea niihiit sinooda ng'asheega sean gawuurji ginyaashta deaweedeeda Ng'utamiida, gabiikta Galilaya, mujiineeda nyaawa was Nasareti. 40Gwahissa heeda baleanda nea ghwanyas uurda, ak geanyiit weaghuumeeda; nea gwandeawa dagheerjeanduumeeda ASEETA.

Orjeeda was Yesu aba jeeda gheeda sibata ASEETA

41Nea Ghwaan ea ghaamwat gabadiini gilakweay Yerusalemu aba damanda ghweelmeeda Basaaka. 42Iidu nea nihita gweanyeew damaniyeenya, ghwascheang'da gawuurji gideajusu bea gealaan; 43duulean ghweelmeeda, damanda biikteawa, geepuussa bwadaw orjeeda was Yesu aba Yerusalemu nea ghwaan ea ghaamwat ea majeeng'na. 44Gearar gideaba gwanda jeeda bareanda ak gaweay ea gamikta, geang'eat ghuuta gasooda aba jeeda buweadeega ea fuga sinal; 45ama duu nea mudu eanyas, geebiikta Yerusalemu nea geegaseadayi. 46Muchu nea ning'ata eawooji samwagu geanyasa jeeda gheeda sibata ASEETA, nea goopteada aba bugusta giinealshoodiga, nea gooleeysiit nea goonyeariida ng'asheega; 47nea fuga sean iiy ghahamng'eanyi iisidaa gidabwaraayda uhuuda ea gisheahiida ng'asheega siinyaash. 48Sidaah niny geahamng'eanyi; ak gwayeesha ghaamwat, “Orjeeda, ghwasaan anda gihindineasa? Ng'ula, aniini ea gweanu sinyarji aba gasoadaang'u.” 49Hean gwayeesha saawa, “Ghwasaan anda googaseadayean? Neada ea moanali gideaba gamiisean giibinda jeeda ghooriida Bwaabwa?” 50Nea saawa ea majeeng'na ng'asheanda rukusa. 51Ghwararang'aada goodeayi ea ghwahita Nasareti, nea gwasissa mureeda; nea ghaamwat ghwayiin jeadaanyi ng'asheesu seaniin.

52Gwahissa heeda Yesu aba weaghuumeeda ak goohoosan ASEETA ea buuneeda.

Zur Zeit ausgewählt:

LUKA 2: BG15

Markierung

Kopieren