MARKO 16
16
Duunooda Yesu
(Mat 28:1-8; Luk 24:11-12; Yoh 20:1-10)
1Ng'ata ghweelmeeda Sabaato ghang'eat geaba Mariyayda siguura Magdalena ea Salome ea Mariyayda was gheamata Yakobo gaweay ghwasha nagheeda ng'andit jea ghwayeasha musta Yesu. 2Hean iimuchu nea gudugoorearu aseeta eaweeda madeeda bea wiikajeanda gaweay Gadeemsu ea ghwahita heeda bung'eeda. 3Gaweay nea gabalooleada aba naweeda nea gwayeesha geat, “Ghamneawa gayghoarakghrakghta ng'eaha lagheaneedida haw bea ghuuta shoomanda bung'eedean?” 4Ghoang'wearda ak ghwadaah lagheaneedida nea sigeanda, (Nea mii lagheana gil gidahaw muuchi.) 5Duu gwasik ghuuta shoomanda bung'eeda ghwadaah Gheareemaneeni akwa hang'deesh nea goopteada aba meatkweeda geatinda dugwa, Ghahamng'eanyi muuchi. 6Hean gwayeesha Gheareemaneeni gadeemgiga, “Ada ghahameegwa ng'eanyi. Ghaanali beadi oogaseadayi Yesuheeda Nasareti, singoorsa uhuuda beehiida. Siisi niduudu eara hiji mudugwanda. Ang'ula heeda siyiin. 7Asi agooga aweayeena oatawa iidi giinealangiga ikaaschiin ea Betaro gideaba niisheedeawaneegwa gawa Galilaya. Iyoahiti hoowa gajadaakta gidaghayi rukuteayda.” 8Ng'ata Ghabeawa hoowa bea bung'eedean nea gwasalda, aba gideaba niboadan ak ea ning'ut muuwda nea ghahamng'eanyi. Eamudu gwarukusa sih ng'ashaan aba gideaba nibeal muuchi.
Yesu gwaroonyi Mariyayda siguura Magdalena
(Mat 28:9-10; Yoh 20:11-18)
9Ng'ata duunooda Yesu nea beashata eaweeda madeeda bea wiikajeanda gil goohiimsa geaw Mariyayda siguura Magdalena, was gatmooda ghayi aruuteawa Yesu saseeda meangeeniga asispwa. 10Gawa Mariyayda Magdalena, ak gawa gwarukusa fuga eawoojisu mideaydooschi Yesu, nea abeeda aba damandida fugiga gooyeawda nea gagutu heareega. 11Iidu nea Ghwayiiy gideaba Yesu ea majeek ea gideaba nidaah Mariyayda Magdalena ea meamwasa.
Yesu gwaroonyi giinealan iyeenya
(Luk 24:13-35)
12Hean iimuchu goohiimsa geaw Yesu giinealan iyeenya nea niyamwa deakta. Abeeda Giinealang'su gaweay madamnyeanda. 13Eara Saawa gaweay ak gwarukusa suurja. Earapeadi sirukusean ghanyea mamwasa.
Yesu gwaroonyi giinealan damwanagi
(Mat 28:16-20; Luk 24:36-49; Yoh 20:19-23; Gad 1:6-8)
14Iidu aba huuydeanda goohiimsa geaw Yesu giinealan damwanagi hita Yesu nea gweagiischi. Goowoowsa Yesu saawa muuchi aba hang'ooynacheeka iheenga nyaawa, ea gideaba mamwasa ng'asheegiga bea fuga eadu iita duunoadaanyiin. 15Hean gabiissa gwayeesha, “Aweayeena ng'eanyiisean ak goorukwiidi Giijasta Miy aba heeda buuneassean. 16Nea siida mwas ak geepaatiisan gayghaghu, nea siida mamwasa gajeergweaksa. 17Ak abeeda eara gwadeagooda gaygoodeaydooschi fugiga mideawa masaweegean, aba gheawungeasu gaygooruuta meangeeniga ak gaygabaloola iit nuut. 18Nea eara ghoang'waay ichipkeega ghana eara eabiiw siida gichea ghabwar, ea manda gili jea gwahissa. Nea inyeessa Gayghoang'waay iheenga fuga miyeani ak gaheaba”.
Yesu gawa humng'eeda
(Luk 24:50-53; Gad 1:9-11)
19Iidu Ng'utamiida was Yesu goobalool saawa amahit, geanung' gawa humng'eeda goobiida meatkweeda geatinda dugwa bea ASEETA. 20Hean gaweay giinealanga ng'eanyiisean nea gwarukwiida Giijasta Miy. Gwasin Ng'utamiida gadiyeeda sea saawa ak goomajeek Giijasi aba gwadeagooda adeaydooschi saawa.
Zur Zeit ausgewählt:
MARKO 16: BG15
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible in Datooga © Bible Society of Tanzania, 2015.
