LUKAS 13
13
Tedeme-tijake Etopita
1Okai kou gaa kodo me wija wido mejake Galilea bagee mana muto Jesus eti-menii. Okeija jo-meneete agijo ma okei kedaa emo ma Pilatusja takabaka timakai.
2Tijake Jesus wo eteete mana, „Ikiija ka gai ko, joko ka Galilea bagee ma ko okei umina peu bagee egaaga, mee? okei kou dani didi gaduwata kouja.
3Ani kitii: Kou dani ko beu. Kodeja ikii te tedemipa ko, ikii utoma kou danite peu kaita.
4Juwa, me ida waguwo ma gaati Siloam ka wado mige amo mige tita owaa kodo okei maida bogomijake etagimita, ikiija gai ko okei joko ka Jerusalim makiida tota bagee ma ko umina peu egaaga, mee?
5Ani kitii: Kou dani ko beu. Kodeja ikii te tedemipa ko, ikii utoma kou danite peu kaita,” etii.
Uta Beu ka Ara Uta Uti Ena Dani Awe-tai Mana
6Okai kii ena dani awe-tai mana oowegai: „Me idaana ara uta uti kodo buda uta taida weta. Pija maida uta ubaate uwigojake uta dou beu.
7Tijake buda uta mune-tai meepa eteete mana, ’Dododou, taun wido kii pija maida uta ubaine megoo, kodeja dou beu. Magijo taine maki peu kai? Kobimigii.’
8Etijake wo eteete mana, ’Ei, Ibo, ito kii taun kidi maija naajaikai, ani kou watija maki jugee tijake makoo makiine kojoka.
9Tijake wadoutouga uta gopa ko enaa. Beu kipa kobikumi te,’ etii.”
Taun Waguwo ma Gaati Didi Tita Jagamo
10Sabbat naago Jesus sembahjang owaanaapa etopeetigo gaa
11jagamo idaana enija edojake dibuwe teete taun waguwo ma gaati umita toojogo. Okai matoka kodumidoke tijke doodoo kai kaga.
12Jesus edojake jagamo kodo manaa-tijake eteete mana, „Kowaa kau, akija dibuwe maida make aki pipikadoke,” etii.
13Okai maida gane jamakijake okai kou gaa kodo okai matoka doodoo kijake Ugatame muta etuwai.
14Kodeja sembahjang owaa douto-tai me kidi boko gai, Jesus Sabbat naago beu jaawita kouja, tijake meidoopa wo eteete mana, „Naago benumi kei tai pijo naago topai. Okai kou naago kodo mejake didi beu kijaawii, Sabbat naago ko beu,” etii.
15Kodeja Tuhan wo eteete mana, „Kowaa kei, ikii matabe bagee! Beu mee? ikii me gakita Sabbat naago sapi juwa, keledai juwa, mune-taida make eukajawijake uwoopa ouwii.
16Kodeja kou jagamo kodo, Ibrahimja ekebata me, Teege ka taun waguwo ma gaati egadimimakita kodo, beu mee? okai Sabbat naago buda jaekegajawija?” etii.
17Kou mana wegaatigo akaije ootai bagee ego gai, kodeja meido utoma okaija umina enaa kei tijawita agijo utoma ideide tai.
Sesawi Pi ma, Ejajawe-tai Agijo ma
18Kou wadoutouga Jesus eteete mana, „Ugatameja jakimakita makiida magijo dani bukaa? Daana ani magijo ma ena dani awii?
19Kou ko sesawi miteena dani bukaa, me idaana motijake taida wejawii. Ejajake pija uti kijake epa bede maki bede ka bedoudo kago maida geka migii,” etii.
20Kigeena ma eteete mana, „Ugatameja jakimakita makiida ani magijo ma ena dani tijawii?
21Kou ko goti ejajawe-tai agijo dani bukaa. Jagamo idaana motijake tepong ebijadou wido duba awijake utoma ejajawii,” etii.
Epaawado ka Jakimakita Makiida Wadoujo Kai
22Kou danite Jesus maki okogo ibo ma mijo ma uwina tai. Okai meido etopeetigo, Jerusalim doodouga uwii.
23Me idaana eteete mana, „Ei, Tuhan, me wija dani to ajii tai bagee, mee?” Etijake wo eteete mana,
24„Tipi damo wadoujo kaine epeepi tiwei. Ani kitii kouja, me wedaba wadoujo kaine kibigi gaitai, kodeja wadoujo te kimake.
25Owaa ipuwe me joonidoke tijake damo jekamijawii, tijake ikii juwouda joonidaa tijake damoutoopa tugu-tugu tigoo, kei teete mana, ’Ei, kowaa ke wou, inii damo nijakebai.’ Etijake okaija wo kitiitagi mana, ’Ikii kaija make meega ani ki ewo no.’
26Tijake ikii kou dani eteete go-motiita, eteete mana, ’Aki pekaida inii nootege, daana iniija makijo ka ita maida aki nitopina teetege.’
27Tijake okaija kitiitagi mana, ’Ikii kaijaiga meega juwa ani ki ewo. Aneepa make uwijake tei, ikii peu kei te-tai bagee utoma.’
28Okai kouda kodaa jege ma egaagede ma to touda; Ibrahim ma, Isak ma, Jakub ma, tikauwa ka gokobaki tijawiidaiga wegai tita bagee utoma Ugatameja jakimakita makiida ikii edojake, daana ikii kede juwouda keemigimakita kodo.
29Okei awii jato uwai jato, waikaato wakaato make mejake Ugatameja jakimakita makiida buka naine animakaitai.
30Juwei! Nemouga ka bagee me ino okei tiga kaitai, daana okei tiga bagee me ino nemouga kaitai.”
Jerusalim Maida Jege Tita
31Okai kou gaa kodo Parisi bagee wija wido mejake eteete mana, „Kiija make uwii, Herodes kagiine kojoka,” etii.
32Tijake Jesus wo eteete mana, „Ego jago jina kidi naaeteuwii, Juwidou, ani enijaido eemigimakai ma, didi bagee beu jaawii ma, ito naago ma aweetaa ma. Tijake widaago naago anija kei teete kodo boko duwajawii.
33Ani ita uwii to tigoo, ito naago ma, aweetaa ma, wijaume ma. Jerusalim wakouto make ko gokobaki tijawiidaiga wega-tai me idaana ma te wagija kouja.
34Ei, Jerusalim, Jerusalim, gokobaki tijawiidaiga wega-tai bagee wage-tai kodo, daana okaapa ebadikumita bagee mogo ka wagigoo te-tai! Kigi magoo aki jokaane aneepa ebukaine kodaa, ajam uka nakaido aa mijo eboomimakai danite, kodeja ikii be gai.
35Beu maa kou, ikiija owaa ko kijajaikidokijake diitu daatu tidoke. Ani kitii, ikii wadaato te nadouta, tijake ikiija ka ’Tuhan eka dubaiga meete me kidi muta etuwai’ eniitaida to.”
Zur Zeit ausgewählt:
LUKAS 13: EKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
