LUKAS 14
14
Gemoo Jakita Me Beu Jaawita
1Sabbat naago kodaa pika-tai ka Parisi me idaana ka owaapa Jesus naine uwijake okei ewanai.
2Okai jumaapa gemoo jakita me toojogo.
3Tijake Jesus kapogeije epi bagee ma, Parisi bagee ma egaado tai, eteete mana, „Pijo, mee? Sabbat naago me didi beu jaawii,” etii.
4Kodeja okei gabo tou. Tijake me kidi ejakijake didi beu jaawii, tijake uwe-tita ejaikai.
5Tijake okeepa eteete mana, „Meime ikii jupi sapi juwa, keledai juwa, uwo komo duba gootipi, Sabbat naago egaa kodo wado te egoja, mee?” etii.
6Kodeja okai kou mana kodo okei wo etii kaga.
7Mei etita bagee kede wado ka animakaida witokeete Jesus jadojake ena dani awe-tai mana oowegai, eteete mana,
8„Me ka waka bukeete buka nooteida mei kitipai, enaa animakaida taanimakai. Aki ma ko euga ibo ejaikita me manaatai na kojoka.
9Ikai wija mana kitita me kidi akeepa jawijake, ’Kii touda me kidi jajaikai’ katiipagi kojoka. Tijake aki ego ma mijouto animakaipage.
10Kodeja mei kati-toojogo mijouto animakai. Mei katita me mejake akeepa ’Ei, noogei, wado dani tidou’ kate-tita. Tijake aki ma enaimo animakeete bagee ibo kajaikaitai.
11Akaato ibo awita me kidi daba kaitagi kouja, daana akaato mijo awita me kidi ibo kaitagi.”
12Tijake mei etita me kidiipa Jesus eteete mana, „Aki wanee juwa, agapi juwa, buka nope ko, akoogei ma, aki keneka ma, aki ma bagee ma, aki watija ka tonawi bagee ma mei te etii. Okei na mei katijake abu kapaitai kojoka.
13Kodeja aki buka nope ko, daba bagee ma, tineena peu kita bagee ma, bado ekogadaa tita bagee ma, peka wanee bagee ma mei etii.
14Tijake aki ideide taitage. Okei abu kapai kaga kouja. Enaa bagee anigoutai naago abu kapai,” etii.
Ibo Buka Nai Ena Dani Awe-tai Mana
15Okai ma enaimo noote bagee me idaana kou mana kodo juwijake eteete mana, „Ideide no, Ugatameja jakimakita makiida buka naine tijake manaa-tita bagee kede!” etii.
16Tijake Jesus eteete mana, „Me idaana ibo buka naine tijake me ewaa dani mei etita.
17Naine jato jakei te-tai me kidi mei etita bageepa ebadikumii, eteete mana, ’Ito kou mewei. Utoma tiki keega no.’
18Tijake okei utoma ena kidi dani to e mana te mana gou. Edoga kidaa eteete mana, ’Ani mude edaaga. Ani do-uwii ko beu kai peu kojoka najaikai kadiimai,’ etii.
19Me idaana ma eteete mana, ’Ani sapi ida gaati edaaga. Ani gaado uwiine kojoka najaikai kadiimai,’ etii.
20Me idaana ma eteete mana, ’Ani ito kou waka bukipa kojoka te jawimake,’ etii.
21Tijake jakei te-tai me kidi joko mejake okaija ibo kidiipa kou mana kodo eti-menii. Tijake owaa ipuwe me emoge umina gajake jakei te-tai me kidiipa eteete mana, ’Egaa uwijake kii maki okogo ka ibo ita ma, mijo ita ma, uwina tijake daba bagee ma, tineena peu kita bagee ma, peka wanee bagee ma, bado ekogadaa tita bagee ma oomei,’ etii.
22Jakei te-tai me kidi eteete mana, ’Ei, Ibo, akaa eneege dani kei teega, daana owaa gouda,’ etii.
23Tijake ibo kidi jakei te-tai me kidiipa eteete mana, ’Uwijake ibo ita ma, okogoopa ma bida peu manaa-tai, anaa owaa tipi ke-tita.
24Ani kitii kouja, anija mei etita bagee ena ma anija buka nai kodo igi te wagidou,’ etii.”
Akaato Jamo Jaikai Mana
25Me umina wedaba Jesus eepei. Okeepa wouga kijake eteete mana,
26„Me idaana aneepa mepi ko, tijake nakame ma, ukame ma, jagamome ma, jokaane ma, kenekaane jame jagamo ma, daana akaato kidi maija be te egapi ko, anija etope-tai te kimake.
27Meija okaija pija boko te dokijake te naapepi ko, anija etope-tai te kija.
28Meija ikii jupi, wado mige amo mige tita owaa migiine gajake age gakimakaine animakai tiga te tija, wo ewogijawii ko tiki taita, mee? tijake.
29Beu kipa, kabo makijake muumai tijawii kaga kijake dota bagee utoma ewitinaitai,
30eteete mana, ’Jee! Kii me kidi migiine go-motijake boko te duwamake.’
31Juwa, kawi ka maki jakimake-tai kidi joko ka maki jakimake-tai ma jape makiine tijake dimi gaine animakai tiga te tija? Me sepuluh ribu ma uwijake jape dua puluh ribu ma meete kidi akado taine, mee? tijake.
32Beu kipa, joko ka kidi poto topi gaa, dagi duwai mana ediimaine me ebadikumii.
33Okai kouja, meija ikii jupi okai ipuwe aagijo taagijo te jaikidokipi, anija etope-tai te kija.
34Diga enaa, kodeja diga kodo igi beu ki-toojogo, kawe dani tijake digaigijo awija?
35Maki ma makoo ma maida epa beu, kodeja emigimakai to. Juwe-tijake gapa jago bagee juwii to tai,” etii.
Zur Zeit ausgewählt:
LUKAS 14: EKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
