LUKAS 12
12
Jesus Etope-taido Mana Eti-menii
1Me umina te gakimake#12:1 beribu-ribu kotuu timakijake okei kede akadaime tai. Jesus etope-taidoopa tiga oowegaate mana, „Parisi bageeja ka ejajawe-tai maida make ko ikii akaato munii, kou ko matabe dimi kodo.
2Apumita agijo ena ma beu, ewaida te kaita mana kodo, daana boonita mana ena ma beu, epi te kija mana kodo.
3Okai kouja ikii bunita duba wegata mana kodo awe tapa juwidoke taita, daana ikii kugu duba make gapa duba kitigi wegata mana owaimouda make pitokidoke taita.
4Ani kitii, ei, noogeima, má jato wagimakijake wadoutouga tumaana ma te kei timakija bagee weda te egai.
5Kodeja ikii weda egaja me kitiipiga: Okai kidi weda egai, okai wagijake kadaga bodija duba eemigimakija me kidi. Maa kou ani kitii, okai kidi weda egai.
6Beu, mee? piipaa ida idibi mijo mege wija age kaa tija. Daana Ugatame pekaida idaana ma adaku te tija.
7Kodeja ikiija migouda ka ijo epa gakimakita. Weda te gai. Piipaa wedaba ma ko ikii ke ibo age kojoka.
8Daana ani kitii: Me jumaapa naawega-tai me gakita me Joka maija Ugatame jaetigo-tai jumaapa mana jawegaitagi.
9Kodeja meija me jumaapa beu puga natipi, Ugatame jaetigo-tai bagee jumaapa beu puga etaita.
10Daana meija me Joka akaije mana mutoona godapi, ipa ejaikija; kodeja meija Rohulkudus eduwapi, ipa te ejaikija.
11Okei sembahjang owaapa ma, maki jakimake-tai jumaapa ma, boko petai jumaapa ma ganeuto kigopai ko, kawe dani wo etija juwa, daana má mana wegaja juwa gaagaa te tai.
12Rohulkudus kodaa okai kou gaa kodo ikii etija mana kodo kitopaitagi kouja.”
Dimi Beu Tonawi Me
13Me wedaba jupi kodaa me idaana ka eteete mana, „Ei, Kuduu, ani keneka naitaija nijajaikita agijo oowudi naaetii,” etii.
14Kodeja Jesus eteete mana, „Kowaa ke, meija boko kijapetai ma, kijawudii ma najaikita?” etii.
15Tijake okeepa eteete mana, „Epeepite gai. Kibigi dimi utoma kodoopa make akaato munii. Me umi-tou tija kodo okaija edepedeido maida epijadaa ko beu kouja,” etii.
16Tijake ena dani awe-tai manaida eteete mana, „Tonawi me idaana ka makiida weta agijo wedaba podomijawii.
17Tijake okai kegepa duba dimi gajake kei teete mana, ’Ani magijo kei tai? Ani taida ka gojawitaido ko makiida ma peu kouja,’ wegai.
18Tijake wegaate mana, ’Ani kou kei taipiga. Anija makijaida kebajawijake euga ibo migiita, tijake anija uta ma edepedeido ma makiita.
19Tijake ani akaato kei taita mana, Kowaa ke, aki taun inoudo maida make enaa agijo ewaga makeege. Ojaa todou, nai ma, ideide tai ma to, etiita kodo ko’ gai.
20Kodeja Ugatameja eteete mana, ’Kowaa ke, dimi beu me! Ito kii uno ki maija akija dimi mana beu ma ko beu kaamotii. Tijake aki epeepi timakeetege agijoudo meija motiitai?’ etii.
21Okai kou dani akaato maida edepedeido tigi atii bagee, kodeja Ugatame jumaapa tonawi beu,” etii.
Umi-tou Tija Maida Make Gaagaa Mana
22Etope-taidoopa Jesus eteete mana, „Okai kouja ani kitii: Ikiija umi-tou tija maida make ko gaagaa te tai, kawo ka naija agijo ko nai juwa, má maida ka makii agijo juwa, manaido kodo.
23Naija agijo ma ko umi-tou tija kodo ko ibo kouja, daana makii agijo ma ko má jato ko ibo.
24Buna bedo dimi gaawe tai. Okei pi kigii tai na beu, uta duwai na beu, makijaida na beu, kodeja Ugatameja emunai. Bedoudo kodo ma ko ikii ke epaago umina.
25Meime ikii jupi gaagaa to tijake euga ume-wo tija?
26Kou danite kou mijo mana kodo kaga ki-toojogo ko, magijo ka joko ka manaido gaagaa?
27Pi kodo epeepite gai, ejaiga kodo. Okei kei tai na beu, daana gaa gonai na beu. Kodeja ani kitii, Suleman kipi maija diiti pagaadagaida ko, kei pi kei ena ma ena dani beu.
28Kodeja kou danite Ugatameja gei tapa ka ba wagi diiti awipi ko, ito naago kidi tojake aweetaa naago bodija jookogai agijo kodo, beu ma ko beu, ikii agijo kijamakii, kowaa kei, epaapate maakodo gai beu bagee.
29Kojoka ikii naine agijo te ubai, daana gaagaa te tai.
30Kei utoma makiida ka ojaa bageido utoma bopi kepai agijo kouja. Kodeja kou agijoudo ikiija gai peu kodo Ikiitai epi kidi.
31Kodeja okaija jakimakita makiida bopi kepajawii, tijake kei utoma ikeepa kijaawii.
32Weda te gai, kowaa kei, mijo domba imouto kidi, Ikiitai kidi ideide ma jakimakita makiida kinijawiine.
33Ikii maida ka agijoudo kaa tijake ojaa to menii. Peu te kija potó ewaa awii. Daana beu te kija ka tonawi agijo epaawado. Oma bagee wadoujo te kijaida, daana jina ka maija te nojaida.
34Ikiija tonawi agijo to-taida kodaa ikiija dimi tadu atii kouja.
Douto-tai Me ma Doutou Beu Me ma
35Ikiija piti tagi atiwei, daana pito ko wíí tijawei.
36Daana ikii kii dani tiwei, me idaana waka bukitaida make meineegi gaa jakei te-tai me edoutoote dani bukaa. Okai mejake damo tugu-tugu tipi okei egaa kodo damo jakeba-tita tijake.
37Ideide no, kei te-tai bagee utoma okeija ibo meitagiida edoutojake edomakai bagee. Ani maa kou kitii, okai kidaa piti tagi atijake naine animakiwei etiitagi; daana eedadaine mei.
38Wijaago doutou wagi juwa, widaago juwa, mejake kou dani edomakipi, kei te-tai bagee kede ideide no!
39Kodeja gai, oma me meipagi gaa owaa ipuwe me epi naako, okai douto-toja, owaa te jakeba-tijake.
40Ikii na epeepi timakai. Ikii ewouda gaa me Joka meitagi kojoka,” etii.
41Tijake Peterus eteete mana, „Ei, Tuhan, ena dani awe-tai mana kodo inii gaagoo eneege, mee? utoma bagee gaagoo,” etii.
42Tijake Tuhan eteete mana, „Enanauto ma dimi jago ma owaa douto-tai me ki meime? owaa douto-tijake jajaikaitagi me, okeija naija agijo didee menija gaa oowude-tita.
43Ideide no! kei te-tai me kidi kei jate-tai me meitagiida okai kou kei teetigo edomakipi ko.
44Beu maa kou ani kitii, okaija aagijo taagijo douto-tijake jajaikaitagi.
45Kodeja kou danite kei te-tai me kidi kegepa duba kii dani mana wegapi: ’Anija kei jate-tai me mei ipee,’ tijake kei te-tai jame jagamo wageete go-motii, daana nojake utaadijo uneune kipi,
46edoutou beu naago, daana gai beu wagi kei te-tai me kidi ibo kidi medoke tijake umina wegedege etijawijake ena peu bagee ma enaimo jamo ejaikaitagi.
47Okaija ibo ka dimi kodo epi kodeja epeepi te tijake kei tai beu me kidi kopa nakuu timakai.
48Kodeja ewo me kidi wagija mana kei tipi, okai mijo gaa to wagii. Umina menijawita meepa make beu ma ko beu umina joko ediimai kouja. Daana agijo wedaba maida jaekegajawita me, beu ma ko beu, wedaba joko ediimija.
49Ani meta ko makiida bodija pii atiine, daana umina ideide kodaa, bodija kodo ito kou wíí ti-toojogo ko.
50Ani baptis tai mana muto topa ani baptis natija, daana ani umina duwaa-duwaa, wo tiki atitaida to.
51Ani meta ko makiida muka-muka mejawiine nagaaga, mee? Ani kitii: Beu, kodeja akaije.
52Ito make wado owaanaapa me ida idibi akaije akaate taitai; me ida wido ka me ida wija akaije akaate tai, daana me ida wija ka me ida wido akaije akaate tai.
53Nakame ka jame joka akaije ootai, daana jame joka ka nakame akaije ootai. Ukame ka jagamo joka akaije ootai, daana jagamo joka ka ukame akaije ootai. Daana jagamo akabaakaija akaije akaate tai.”
54Tijake kotuu timakita bageidoopa Jesus eteete mana, „Uwai jato duguu meetigo ikii dopa ko, ikiija ka wegai ko, ’Edi weipiga’. Tijake kou kei tidoke tai.
55Daana bou puu ti-toojogo ikiija wegai ko, ’Tani umina kaipiga’. Tijake kou kei tidoke tai.
56Kowaa kei, matabe bagee! Ikii maki ma epa ma dou epi. Kawe dani tijake ito kii wagi ka kei teete mana kodo boko petai ewo?
57Magijo ka ikii kede enaa agijo boko te duwajawii.
58Akaije kateegi me ma enaimo boko peta-tai jumaapa auweetigo gaa, ita maida make okaapa make pipikadoke taine gaado tai, boko peta-tai jumaapa kaumigou na kojoka, daana boko peta-tai kidaa douto-tai meepa kaekegajawii, daana douto-tai kidaa wanee owaa duba kaemigai.
59Ani katii, aki kouda kodaa make te podomaitage, ebé jamenijawiitageida to.”
Zur Zeit ausgewählt:
LUKAS 12: EKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
