LUKAS 11
11
Sembahjang Mana Jesus Etopai
1Kigeena Jesus maki enaida sembahjang teetigo. Okai sembahjang tijawijake etope-tai idaana ka eteete mana, „Ei, Tuhan, sembahjang nitopai, Jahja maija etope-taido etopita danite,” etii.
2Tijake Jesus eteete mana, „Ikii sembahjang tipa ko, kii dani tai: Ei, Naitai, akeeka ibo awii. Akija jakimakita makiida mei.
3Naago gakita naija agijo tiki tiki niimai.
4Iniija peu awitaido ipa nijaikai, inii maija peepu nitai bagee utoma ipa ejaikai kouja. Gaado tapa ti nimejawii.”
5Tijake eteete mana, „Meime ikii jupi wanee jupiida ogemeepa uwijake eteete mana, ’Ei, noogei, goti kemo wido naimidou;
6noogei ita jaweetigo aneepa meegi kouja, daana ani meniine ko tumaana agijo ma beu topa,’ etii.
7Tijake okai owaa duba make wo eteete mana, ’Ani gaagaa te natijawii. Damo jekamidoke, daana ani jokaane ani ma uno umeete. Ani kaniine ko taanigomake,’ etii.
8Ani kitii, ogeme kouja meniine taanigoupagi kodeja, okai umina ediimigoo to tigoo kouja, wadoutouga anigojake okaija gai peu daniija meniipagi.
9Ani kitii, ediimidowei, ikii motiita no. Ubadowei, ikii domakaita no. Damo tugu-tugu tidowei, damo kijakebadoke taita no.
10Ediimija bagee utoma motii kouja, daana ubaja bagee domakai, daana damoutoopa tugu-tugu tija bageepa damo jakebadoke taita.
11Ikii jupi kawi ka nakame kiija jokame goti ediimipi mogo menii? Juwa, udi ediimipi, udi komouto ugenija menii?
12Juwa, bedo napo ediimipi jina menii?
13Okai kouja kou danite ikii peu bagee ikii jokaaneepa enaa agijo menii epi kipa, beu ma ko beu, epaawado ka Ikiitai ediimija bageepa Rohulkudus meniitagi.”
Akaije Akaate Uguwo Te Tomake
14Manaawo enija Jesus emigimakeetigo. Enija podomidoke tijake manaawo me kidi mana godai, tijake meido kede ego takuu-takuu tai.
15Kodeja me ino wegaate mana, „Okai enija ukauto Baalzebul kodaa enijaido jaemigimakeigi kou ko,” wegai.
16Daana me ino egaado teete kodo, epa maida make dou beu agijo doune ediimai.
17Kodeja okeija dimi kodo okai epi kouja eteete mana, „Jakimakita maki gakita okai akaato akaije ti-toojogo peu kaita; daana me uguwoona okai akaato akaije ti-toojogo wudepapa tidoke tai.
18Kou danite Teege akaato akaije ti-toojogo okaija jakimakita makiida kawe dani tijake toja? Ikiija ka eneega kouja, ani Baalzebul ka enijaido eemigimakeiga mana kodo.
19Ani ki Baalzebul ka enijaido jaemigimakipa ko, ikiija jokaane kedaa meima ka eedadijake jaemigimakai ko? Okai kouja okei kede boko kipetaitai.
20Kodeja Ugatameja bidaidaiga ani enijaido jaemigimakipa ko, Ugatameja jakimakita makiida ikeepa keega.
21Bida jago me idaana mapega ma to-taida do-toojogo, edepedeido mobu tou.
22Kodeja euga bida jago me idaana igipugi etijake daba ejaikipi, okaija dimi kotopijawita mapega ko japitakijake aagijo taagijouja wudijawii.
23Ani jato kai beu me kidaa ani akaije natai. Daana ani ma kotuu naatai beu me kidaa kigipapa tijawii.
24Enija me duba make podomidoke tijake uwo beuda jawina tai, ee duwaineida ubaate. Okai dou beu tijake wegaate mana, ’Ani jaikidokeetega owaapa wo uwiine,’ wegai.
25Okai dakii tijake jimu demakijake diiti awi-toojogo dou.
26Okai uwijake okai ma ko umina peu enija pituwo ebukigojake oomei. Okai ma enaimo woujo kijake tou. Kii me kidi tika kodo ma ko muumai jato umina peu.”
27Okai kou mana wegaatigo kotuu timakita bagee jupi jagamo idaana kuutakaa eteete mana, „Ideide no, aki modo kadokita me, daana aki ama kanita me kodo.”
28Kodeja Jesus eteete mana, „Beu maa kou, ideide no, okei Ugatameja mana juwijake jakimakai bagee,” etii.
Ego Takuu-takuu Agijo Ediimai
29Meido okaapa kotuu umina ti-toojogo, Jesus mana godaate go-motii, eteete mana, „Kii tuma ki peu tuma. Dou beu agijo ubaigai, kodeja dou beu agijo tumaana ma te emuwakaita, kodeja tikauwa ka gokobaki tijawiidaiga wegai tita me Junus kidi to.
30Ninewe bageepa Junus dou beu agijo kita danite, kou dani maija me Joka kidi, kii tumaapa ewaa kai.
31Jamaato ka maki jakimakita jagamo kodo boko petai naago kii tuma ki ma enaida anigojake ewidogaita; okai maki momogiida make Sulemanja dimi boko mana jajuwiine mei kouja; daana beu maa kou, jakai kiija Suleman ma ko ibo topi.
32Boko petai naago Ninewe ka bagee kii tuma ma enaida anigojake ewidogaitai; Junus mana japitokijake tedemita kouja; daana beu maa kou, jakai kiija Junus ma ko ibo topi.
33Me ka lampu etakijake ogauto juwa, kakate mijo juwa, te makija. Kodeja lampu make-tai wado makija, wadoujo kija bagee awe kodo do-tita tijake.
34Akija má jato ka lampu kou ko akija peka kodo. Akija peka enaa kipa ko, akija má jato maija aweida to. Kodeja kou danite peka peu kipa, akija má jato maija bunita to.
35Okai kouja umina douto-tai, ikii duba ka aweida kodo bunita kidoke na kojoka.
36Kou danite akija má jato ko aweida kijake bunita ena ma beu ki-toojogo, umina aweida to, lampu ka kaganimakai danite.”
Jesus Parisi Bagee Ewidogai
37Jesus mana oowegaatigo Parisi me idaana okai ma enaimo no-tijake mei etii. Tijake okaapa woujo kijake okai ma enaimo naine animakai.
38Parisi me kidi ego takuu-takuu, okai nai beu gaa gane witogai beu kouja.
39Tijake Tuhan eteete mana, „Ikii Parisi bagee uwaawe ma dokouda ma tapouda witogai, kodeja tugouda kodo bokomai ma, peu ma ka ebetume.
40Ei, ikii dimi beu bagee! Beu, mee? tapo jato ewaa awita me kidaa tugo jato ko maija ewaa awita.
41Kodeja ikii tugouda ka ko ojaa menijawii, tijake utoma ko jimubeu kaita.
42Peu kojoka! kowaa kei, Parisi bagee. Ikii selasih ma, inggu ma, mijo naapoudo utoma gaatijago didee meneiga kouja. Kodeja boko petai mana ma, Ugatameja ipa bokouto ma, ikii inimugi tijawii. Kei umina beu kai peu kodaa, joko ka na te jaikijake.
43Peu kojoka! kowaa kei, Parisi bagee. Sembahjang owaa duba ibo animakaida ide kouja, daana akaada te-taida me ka ibo kijaike-tijake.
44Peu kojoka! Ikii ewaida beu ka me oka dani bukaa. Me ewoudaiga kou maida ita uwii.”
45Kapogeije epi me idaana wo eteete mana, „Ei, Kuduu, kou dani mana wegajake inii maija niwidogai,” etii.
46Tijake Jesus eteete mana, „Ikii na peu kojoka, ei, kapogeije epi bagee. Udo kugouto dokii kaga me maida jadokijawii kouja. Tijake ikii kede kipo ka kipa maija te winikidou.
47Peu kojoka! Ikii tikauwa ka gokobaki tijawiidaiga wegai tita bagee kede emakitaida jakei tai, ikiija aijaane ka wagimakita bagee kede.
48Kou danite ikiija aijaane ka kei tita mana ikii jawegajake juma dege-dege etai. Okei kede wagijake ikii ke emakitaida epeepi jatai.
49Okai kouja Ugatameja dimi boko ka wegata mana, ’Ani gokobaki tijawiidaiga wega-tai bagee ma, eti-awita bagee ma ebadikumiita. Tijake okei me ino ko wagimakaitai, daana me ino ko peepu etaitai.’
50Gokobaki tijawiidaiga wega-tai utoma ka emo kodo maki ewaa awitaida make uwijawita kodo, kii tuma maida jadokijawetijake;
51kou ko, Habilja emo kidiipa make kii kidi Zakaria kidi ka emo to, jo-menijaida ma Ugatameja owaa ma utuuja wagimakita me kidi. Beu maa kou ani kitii, kii tuma maida utoma kodo jadokijawii to.
52Peu kojoka! kowaa kei, kapogeije epi bagee. Epi kai bokouto kodo ikii doke-uwita kouja. Ikii kede wadoujo te kijake wadoujo kaine bagee jamo jajekamijawii.”
53Kouda make uweetigo kapogeije epi bagee ma Parisi bagee ma gaagaa etijawiine go-motii, daana mana wedaba apaapu etai.
54Okaija godaja mana maida ejaki-motiine tijake ewanai.
Zur Zeit ausgewählt:
LUKAS 11: EKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
