Lukas 18
18
Seŋ zi siŋka maini midini ɗif zi ɗûklûti sariya gaiɗi muni na war greŋ
1A miɗiɗi seŋ zi siŋka maini ktai, buri a hitriɗi ɓa aga e siiwi kûreɗ-kûreɗ, e kiyi kai. 2A muɗa: War fuŋ n'abai ktai, ɗif zi ɗûklûti sariya a na fu, a huna Alaw kai, jaani gaini ɗif kaalai. 3Muni na war greŋ ktai te na fu war fuŋ n'abai hanɗa lai, te halasi sini kureɗ te miɗini ɓa: Zna pa war sariya n'arba gaiɗi gawŋa ta. 4Azi viya a ɗiya siɗi kai, amma asakal par a hiina a muɗa: Ta ɗa, mu huna kai, jaaŋa gaini ɗif kaalai sme, 5amma burini huwyi na muni hanɗa te na huwyaŋa ɗa, pɗem ɓa mu zitiɗi sariya ɗa ta, kapai siɗi maa ɵa blaŋ yuvai paŋ aŋ kayaŋa mada kir kai. 6Epiɗ-ɗai a muɗa: Ɵini wala na ɗif zi ɗûklûti sariya na jre kai ɗa, a na muɗaŋ ɗa. 7Alaw aga a zitiɗi sariya wiiɗi nagai n'a viriɗi, n'e ɗa e ɗûûli amai sini duvuk gaini girvudi paŋ ɗa kai ɗi? Aga a hiniɗi ca aŋ bayai ɗi? 8Aga a ziɗi sariya witaw tar. Amma won hlai na Ahini ɗif aga a halasi ɗa, aga a navasi yimi midiɗi yai tiɓ hek ɗi?
Seŋ zi siŋka maini midini ɗif na Farise gaini ɗif zi tar
9Yesu a muɗa seŋ zi siŋka maini hanɗa siɗi nagai n'e tili siɗi ɓa e ɗa jre gara arni Alaw, n'e miisiɗi na zamai. 10Ɗai sulu e hili amai warni tempel aŋ siiwi, na ktai ɗa a Farise, ktai ɗa a ɗif zi tar lai. 11Farise ɗa a ɗiya amai zaw a siiwa gaini warni maini hanɗa nɵa: Alaw, mu zuku tese, buri mu na maiɗi ɗai na gaŋ ɗa nɵa kai, n'e hili wala, na jrekai kai, na maɵarakai, zaw maini ɗif hanɗa nɵa kai. 12Mu tika sai azi sulu war kosko, mu sa doogoni wazagaiŋa paŋ edi lai. 13Ɗif zi tar ɗa, ni a ɗiyasi edi gaigai par, a dara a yima arni amai war hlai n'amai ɗa kai, amma a ɵawa tini didikni a muɗa: Alaw, hiina haw buriya ta na tuwur gara ɗa. 14Nɵa mu miɗiki Ɗif hanɗa, a waya aha warni dalamni sek ɗa, a za aŋ ɗif na jre ta a suwa ɗif na Farise ɗa. Buri asiya ɗi paŋ na kola sini amai ɗa aga a hosa azumai, n'a hosa sini azumai ɗa aga a kola amai.
Yesu gaiɗi aliyagoi n'agogoi
Mat. 19.13-15; Mark. 10.13-14
15Ɗai e kiɗinisi aliyagoi n'agogoi gaiɗi akoɗokokai paŋ kapai a tika tini midiɗi aŋ ɓikiɗi, ɗaini zi hitri won hlai n'e tili hanɗa e ɓiriɗi. 16Amma Yesu a sa miɗi buri e kiɗinisi, a muɗa: Hiniɗi aliyagoi n'agogoi e hilisi sa, ki ɗiliɗi kai, buri pai n'Alaw te wiiɗi ɗai na maiɗi nagai nɵa ɗa. 17Jre mu miɗiki Asiya ɗi paŋ n'aga a yimiti pai n'Alaw maini Ahiyagwi n'agwi ɵa kai ɗa, aga a niya warɗi kai zaŋ.
Yesu gaini ɗif zi farai
Mat. 19.16-30; Mark. 10.17-31
18Ɗif n'abai ktai a zilbaŋ a muɗa: Api zi hitri na pɗem, aga mu za ɗa a mada, kapai mu nava suŋfa n'a vada kai ɗa? 19Yesu a miɗini: Ku yikaɗa na pɗem buri mada? Ɗif na pɗem aŋ kai, sai Alaw ktai. 20Ku sɗa seŋ zi gadai n'a muɗa ɓa: Ku za maɵara kai, ku fuɗa ɗif kai, ku hala wala kai, ku muɗa zaida z'eles kai, apuku gaiɗi amuku ku kûlûɗi amai lai ɗa, ku sɗaŋ ya ɗi? 21A waya seŋ a muɗa: Mu zaŋ warni gawlaŋa par. 22Won hlai na Yesu a ɵina hanɗa a miɗini: Wala a hina muku ktai pal, hala ku wura wazagaiku paŋ edi, ku ɓûrwiɗi faraini wiiɗi na murgakai, nɵa aga ku nava godai amai warni fuŋ-n'Alaw, asakal par ku halasi ku tapasi pa. 23Won hlai n'a ɵina hanɗa, a kwima gara buri faraini a na fu abai gara. 24Won hlai na Yesu a talaŋ gaini kwimi a muɗa: A gir gara buriɗi ɗai zi farai aŋ niyi warɗi pai n'Alaw. 25Buri ɓa niyi na war baŋani lepre ɗa a wala zi gir burini ɵigini, amma niyini ɗif zi farai warɗi pai n'Alaw ɗa a wala zi gir a suwa pra. 26Nagai n'e ɗa e ziɓiri seŋni ɗa e miɗi: Na ɓa ɵa ɗa aga a kora ɗa asiya ɗa? 27Yesu a wiyiɗi seŋ: Wala n'a za gaini ɗif kai ɗa, Alaw a kiɗa a zaŋ.
28Peter a muɗa: Tiyi ɗa, mi hinisi wazagaiyi paŋ edi aŋ tipi puku. 29Yesu a miɗiɗi: Jre mu miɗiki, ɗif a hinasi dalamni, zaw munini, zaw tawalakaini, zaw tamaini, zaw alini edi buriɗi pai n'Alaw, 30n'aga a nava viya a suwa warni mefeŋ na girna kai ɗa aŋ kai, war mefeŋ na wuzamu ɗa a suŋfa n'a vada kai lai.
Yesu a muɗa edi azi n'ag'aŋ hu, miɗini mrini gaini ɵiyini n'amai
Mat. 20.17-19; Mark. 10.32-34
31A yikiɗi na doogo pi sulu sini a miɗiɗi: Mu ɗuma hulumu amai a Yeruzalem, wala paŋ na ɗai na mini Alaw e ɗûŋ miɗini Ahini ɗif paŋ ɗa aga a va amai. 32Buri aga a sa edi war tiɗi pinzibaɗi ɗai na kdai, aga e zini yewere, aga e zini gir, aga e pûrfini teenek sini, 33aga e ɵiɓiŋ gaini daɓala, asakal par aga e fiɗiŋ edi, amma war mefeŋ n'ag'aŋ hu ɗa, aga a ɵiyasi amai. 34Amma e ɵini seŋ n'a muɗaŋ ɗa kai, buri ɓa ezini a na fu wuzani arɗi gaini ŋûyi cok, e siɗi wala na Yesu a muɗa miɗini kai.
Yesu a zuula ɗif na melveŋ a Yeriko
Mat. 20.29-34; Mark. 10.46-52
35Won hlai n'a halasi gobi siɗi Yeriko, ɗif ktai na melveŋ a na fu ɵimaɗi futi dam aŋ siiwa. 36Won hlai n'a ɵina vugumni eziɗi ɗai n'e ɗa vigi ɗa, a zilba ɓa: A za na ɗa a mada? 37Ɗai e wiyini seŋ: A vuga na ɗa a Yesu na Nazaret par ɗa. 38A ɗuula a muɗa: Yesu, tuku na war pinzibani David, ku hiina haw buriya. 39Nagai n'e ɗa edi avut ɗa, e ɓiriŋ kapai a ba, amma a ɗuula gaini gdaŋni a suwa pra a muɗa: Tuku na war pinzibani David, ku hiina haw buriya. 40Yesu a ɗiya zaw, a sa miɗi buri e kiŋnisi, won hlai n'a cosi sini gobi a zilbaŋ a muɗa: 41ku dara ɓa mu za suku ɗa a ma ɗa? A waya seŋ a muɗa: Epiɗ-ɗai, mu firiya ɓa mu tala. 42Yesu a miɗini: Arku ɗa a mala edi, yimiku ɗa a zuuluku li. 43Tizaw tar arni a mala edi, a hala pini Yesu, a kola Alaw lai. Ɗai paŋ hlai n'e tili hanɗa e tiki piɗi e kûli Alaw lai.
Zur Zeit ausgewählt:
Lukas 18: MUSGUM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
