Lukas 17
17
Wala n'a ka ɗif aŋ za tuwur
Mat. 18.6-7; Mark. 9.42
1Yesu a miɗiɗi wiiɗi ɗaini zi hitri: Gaini dewele wala n'a ka ɗai aŋ za tuwur ɗa aga a za, amma gir gara burini ni n'a za sini par ɗa. 2E rigiti wulani na ɗa te funi na guma aŋ wiŋ agoɗom warni yem-ra n'abai a suwa n'a ka ktai arbaɗi n'agogoi hanɗa war tanai ɗa. 3Ki giɗimi siki pɗem.
Hinini tuwur
Mat. 18.15, 21-22
Na ɓa tawalku a za tuwur li ɗa ku gadaŋ, na ɓa a bunda payaini li gamai ɗa, hinini tuwurni ɗa. 4Na ɓa a za tuwur suku azi muguzak war yuvai, na ɓa a wayasi suku azi muguzak aŋ muɗa: Aga mu bunda hiiniɗa gamai ɗa, ku hinini meefeŋni ɗa.
Yimi
Mat. 17.19-20
5Apostelai e miɗini wiini Epiɗ-ɗai: Ku riya yimiyi amai a suwa. 6Epiɗ-ɗai a wiyiɗi seŋ: Na ɓa yimiki aŋ maini Seneve ɵa ta ɗa, ki kiɗi ki miɗi sini luwuŋ Sikomor hanɗa ɓa: Hurɗa amai, hala ku pa warni yem n'abai; aga a gada piki lai.
Ɗif zi sɗa n'a za sda n'a sa tini ɗa
7Arbaki ɗa, ɗif na ɗifni zi sɗa a na, aŋsi edi aŋ hirim, zaw aŋ giɗima farai ɗi, na ɓa, a wayasi li edi par, n'aga a miɗini ɓa: Halasi sumna azumai dam aŋ suma ɗa asiya ɗa? 8Aga a miɗini ɓa: Daɗasi simi, wa sapaku zi sɗa suku, saɗasi simi ɗa, mu suma, mu ca lai. Aga a miɗini ɵa kai! 9Aga a zini tese wiini ɗif zi sɗa hanɗa buri ɓa a zini wala n'a miɗini miɗini ɗi? 10Nɵa, tiki lai, won hlai na ki zi li sɗa n'a sa tiki aŋ zi ɗa, ki miɗi ɓa: Tiyi mi ɗi ɗai zi sɗa kadai meere, mi zi ɗa a n'a sa tiyi aŋ zi ɗa.
Yesu a zûûliɗi ɗai na dugomai doogo
11War morkoini na Yeruzalem sek ɗa, a vuga arbaɗi Samariya gaiɗi Galeliya. 12Won hlai n'a na niya aha warni fuŋ sek ɗa, ɗai na dugomai doogo e hilisi mini, e ɗiyi edi gaigai par, 13e ɗûûli gaini wulaɗi amai, e miɗi: Yesu, Epin-gezayi, hiina haw buriyi. 14Won hlai n'a tiliɗi, a miɗiɗi: Ki hili, ki siŋki siki arɗi paakai zi ɓaka. Hlai n'e ɗa e hili, e bindi hilu.
15Ktai arbaɗi, won hlai n'a tala ɓa a zuula ta ɗa, a wayasi miɗini ezini, a kola Alaw gaini gdaŋni, 16a bla sini azumai ezini Yesu, a pa arni azumai, a zini tese lai. Ni ɗa a ɗif na Samariya par. 17Yesu a zilba a muɗa: E bindi hilu gaini doogoɗi paŋ kai ɗi? Na ɵeeŋe ɗa e ɗa wata ɗa? 18Na a wayasi aŋ sa kol sini Alaw ɗa a ɗif n'edi par hanɗa? 19A miɗini: Faka amai, hala wiiku, yimiku a kuruku li.
Giziɗi pai n'Alaw
20Farisekai e zilbiŋ: Paini Alaw aga te halasi kaswata ɗa? A wiyiɗi seŋ: Paini Alaw te halasi ɗa maini wala n'arɗi ɗai sini ca nɵa kai. 21Ɗai aga e miɗi kai ɓa: T'aŋ na, t'aŋsi na. Aga a za ɗa nɵa kai, buri ɓa pai n'Alaw te na arbaki ya.
Mefeŋ na wiini ahini ɗif
22A miɗiɗi wiiɗi ɗaini zi hitri: Mefeŋ aga a gizi, war mefeŋ ni ɗa, aga ki piyi aŋ tili mefeŋ ktai na wiini gizini ahini ɗif, amma aga ki tiliŋ kai.
Mat. 24.26-27; Mark. 13.21-22
23Aga e miɗiki ɓa: Aŋsi na, zaw an na, ki hili woni kai, ki liwi woni kaalai, 24buri maini wilɗi n'a wulɗa war gal ktai par haa sini na zamai ɗa nɵa, gizini Ahini ɗif war mefeŋ n'a wayasi warni ɗa, aga a za nɵa lai. 25Amma aga a sɗa gir viya haw, pinziba n'a na tiyana hanɗa aga e biliŋ edi lai.
Mat. 24.37-39
26Wala n'a za war mefeŋ ni Nowa ɗa, aga a aza war mefeŋ na wiini gizini Ahini ɗif nɵa lai. 27War mefeŋ ni ɗa, ɗai e ɗi ka e simi, e ci, e si aliɗi edi, e tiki lai haa sini mefeŋ na Nowa a niya warni hulum n'abai, yem n'abai a halasi a biɗi paŋ.
28Aga a za maini war mefeŋ na wiini Lot lai, ɗai e ɗi ka e simi, e ci, e wirisi wazagai e cikiliŋ edi, e pi luwaŋai, e rgi dalam lai. 29Amma mefeŋ na Lot a niyasi edi warɗi Sodoma par ɗa, faŋ z'afu gaini sufre a ɵasi amai par, a biɗi paŋ. 30Mefeŋ na Ahini ɗif aga a siŋkasi sini edi warni ɗa, aga a za ɗa nɵa lai.
Mat. 24.17-18; Mark. 13.15-16
31War mefeŋ ni ɗa, ni n'a na amai midini daba zi mili, na ɓa wazagaini a na amlai ɗa, a niyasi azumai aŋ mulaŋ kai. 32-33Hini midiki a kɵa gaiɗi munini Lot, ni n'a paya aŋ kurɗa suŋfani ɗa aga a baŋ, amma ni n'aga a ba suŋfani aga a kurɗaŋ.
Mat. 24.40-41
34Mu midiki, duvuk ni ɗa, ɗai sulu n'e fini warni li ktai, ktai aga a tika edi, na ktai aga a hina, 35falakai sulu n'e ɗa siri ktai, na ktai aga te tika edi, na ktai aga te hina, 36maɵagai sulu n'aga e hirmi edi war vowai, na ktai aga a tika edi, na ktai aga a hina lai. 37Ɗai zi hitri e zilbiŋ e miɗi: Aga a za nɵa wata ɗa? Yesu a waya seŋ a miɗiɗi: Hlai na kopoŋ aŋ woni ɗa, bagasakai aga a tapa woni kap.
Zur Zeit ausgewählt:
Lukas 17: MUSGUM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
