Lukas 16
16
Seŋ zi siŋka maini midini ɗif zi giɗimi wazagai na yel
1A muɗa siɗi ɗaini zi hitri ɓa: Ɗif zi farai ktai, ɗifni n'abai na miɗini wazagaini a na fu, amma seŋ a pa sini ba a na ba wazagai ɗa edi. 2A yikaŋ a miɗini: Mu ɵina labar na meefeŋ muduku koo, zaŋa gaglai midini sɗa na mu saŋ war tuku ɗa, wuzamu sek ɗa aga ku za sda hanɗa kir kai. 3Abai na midini wazagai a hiina a muɗa: Aga mu za ɗa a mada, epin-geza a firiya a tikaŋa edi warni sdaŋa par, hirim ɗe gdaŋŋa a ɵaŋ kai, siiwi ɗe a tala siyer. 4Yawwa, mu nava hiini n'aga mu za gaini li kiɗi; kapai won hlai n'a waɗa li edi war sdaŋa par ɗa, ɗai zamai e yimiŋa siɗi. 5Nɵa, a yikiɗi ɗai na tumuŋni epin-gezani aŋ midiɗi ɗa ktai ktai paŋ, a miɗini wiini n'avut: Tumuŋni epin-geza aŋ muduku ɗa gama ɗa? 6A wiyini seŋ: Tuntuli miya ɗaw na wiini emel, a miɗini: Tika maktuɓ zi tumuŋ ɗa, sumna azumai, ku ɗo ɓa: doogo doogo ɵim. 7A miɗini wiini na zamai: Na wiiku gama ɗa? A miɗini: Algama sak miya ɗaw. A miɗini: Tika maktuɓ ɗa, ɗo doogo doogo mitwis. 8Epin-gezani abai na midini wazagai na meefeŋ ɗa a kolaŋ buri a za sda maini ɗif zi yel ɵa. Buri ɗai na warɗi yai hanɗa yalakai war sdaŋi na gaiɗi marɗi ɗa e sûwiɗi alini gaglai ɗa.
Farai na jre kai gaini farai na jre
9Ta mu miɗiki ɓa, ki zi marmai gaiɗi ɗai gaini farai na wiiɗi yai hanɗa, kapai won hlai n'a mula li tiki par ɗa, Alaw a kiɗa a yimiki sini war hlai si simni n'a vada kai.
10Ni n'a kiɗa a giɗima wazagai n'agogoi woɗi futini ɗa, a kiɗa a giɗima n'abakai woɗi futini lai. Amma ni n'a kiɗa a giɗima wazagai n'agogoi woɗi futini kai ɗa, a kiɗa a giɗima wazagai n'abakai woɗi futini kaalai. 11Na ɓa tiki ki ɗa jrekai warni sɗa na ki ziŋ gaini farai na wiiɗi yai hanɗa kai ɗa, n'aga a siki farai na gaini futini ɗa asiya ɗa? 12Na ɓa tiki ki kiɗi aŋ giɗimi wazagai n'a sa gaini si war tiki kai ɗa, n'aga a siki na wiiki mal ɗa asiya ɗa? 13Bege n'a sɗa aŋ za sda piɗi epin-gezakai sulu aŋ kai, aga a bla gaw sini na ktai, a firiya na zamai ɗa. Ɵa kai ɗa a tapa gaini na ktai a miisa na zamai ɗa. Ki kiɗi aŋ zi aŋ bagakai na wiini Alaw gaini Mamun lai kai. 14Farisekai n'e diri farai gara e ɵini seŋni paŋ, e yimi seŋni aŋ wala zi dawaŋ. 15A miɗiɗi: Tiki, ki yiki siki aŋ ɗai na jre kai, amma Alaw a siɗiti t'agul. Wala n'a tala arɗi ɗai kol gara ɗa, arni Alaw a wala na hihir.
16Haa sini mefeŋ na wiini Yohana ta, a suma ɗa a gadai gaini seŋ na wiiɗi ɗai na mini Alaw. Won hlai ni par, labar na pɗem na wiiɗi pai n'Alaw a na ɓaka, ɗif paŋ a ɓurta aŋ niya aha gaini gdaŋ. 17hlai n'amai gaiɗi yai ɗa aga a vada edi, amma wala na ɗef na war gadai na wiini Musus aga a vada edi kai.
18Asiya ɗi paŋ n'a biditi munini aŋ tikiti na zamai ɗa, a za maɵara; Asiya ɗi paŋ n'a tikiti muni na te badasi pini mofaɗi par ɗa a za maɵara lai.
Seŋ zi siŋka maini midini ɗif zi farai gaini Lasarus
19Ɗif ktai a na ka a ɗif zi farai, A wa sini ɗa a sapa na faraini abai gaini zi leŋ na gaini futini lai. Mefeŋ paŋ ɗa, aŋ war firiyi, a suma gaini futini lai. 20Ɗif na murga ktai na sini paŋ a wuruk, a na fu mini magalani waŋ, e yikiŋ ɓa: Lasarus. 21A firiya ɓa a va warni gaini kolkoɗai n'a yakasi sini tabelni ɗif zi farai ɗa par, amma hirgakai n'arbani hlai yaw ɗa, a halasi a hana ɗa a mini wuruk na sini ɗa. 22Mefeŋ ktai ɗif na murga a mra, ɗai zi ɵeŋ na war fuŋ-n'Alaw e tikiŋ, e kiŋ e simniŋ ɵimaɗi Abraham war hlai n'amai. Ɗif zi farai ɗa a mra lai, e piŋ. 23A mala arni edi ɗa, a sɗa sini war hlai zi simni na wiiɗi ɗai zi mri, war gir pra. A tala Abraham edi gaigai par gaini Lasarus ɵimaɗi dam. 24A ɗuula a muɗa: Apa Abraham, ku hiina haw buriya, ku ɵinasi Lasarus aŋ jiba tini arni yem kapai a tikitiŋa midiɗi alsiŋa ta, kapai sa a ɵaɗa, buri mu na sɗa gir arni afu gara. 25Amma Abraham a waya seŋ: Ahiya, hina muduku a kɵa ɓa, tuku ku nivitisi pɗemiku ya midiɗi yai, amma Lasarus ɗa a sɗasi gir viya, tiyana won na ɗa, ni a nava arai zi pi, amma tuku k'aŋ war gir. 26Pra, waŋ n'abai a na arbamu, kapai a hiniɗi nagai na e diri won na par e hiliɗi siki sek ɗa kai, na siki par e hilisi siyi sek kaalai. 27Ɗif zi farai a muɗa: Nɵa mu siiwuku, apa, buri ku ɵina Lasarus aha war dalam na wiini apa, 28buri tawalakaya na maɵagai e ɗa ɵim, a hala a za zaida siɗi buri nagai lai e hilisi won hlai hanɗa kai. 29Abraham a waya seŋ: Musus gaiɗi ɗai na mini Alaw e ɗasi arbaɗi, pɗem ɓa e ɵini miɗi. 30Ɗif zi farai a miɗini pra: Apa Abraham, na ɓa ktai arbaɗi ɗai zi mri par a hala siɗi ɗa, aga e bindi payaiɗi gamai. 31Abraham a miɗini: Na ɓa e ɵini mini Musus gaiɗi ɗai na mini Alaw kai ɗa, koo ɓa ɗif a ɵiyasi amai arbaɗi zi mri par tekeɗeɗi aga e yimi seŋni kai.
Zur Zeit ausgewählt:
Lukas 16: MUSGUM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
