Lukas 15
15
Yesu gaiɗi ɗai na tuwarai
1Ɗai zi tar gaiɗi na tuwarai e tûrûsi sini aŋ ɵini mini. 2Farisekai gaiɗi ɗai n'e ɗû wazagai ɗa e ŋûriyi e miɗi: A yimiɗi na tuwarai sini a suma gaiɗi lai.
Seŋ zi siŋka maini midiɗi adumi na te ba edi, te nava
3-4A miɗiɗi seŋ zi siŋka maini hanɗa, a muɗa: Arbaki ɗa, ɗif na adumaini miya ɗaw, ktai arbani te ba edi ta, a hina na doogo doogo ɵeeŋe pi ɵeeŋe ɗa edi war basga, a hala a piyiti na te ba edi ɗa, haa a nivitisi kai ɗa asiya ɗa? 5Won hlai n'a niviti li, a tikiti amai wulani, a waya aha war dalamni gaini firiyi. 6A yikiɗi marmakaini gaiɗi ɗai na ɵimaɗi paŋ a miɗiɗi ɓa: Ki firiyi gaya, buri mu niviti adumiŋa na te ba edi jek. 7Nɵa lai, mu miɗiki Firiyi n'abai aga a za war fuŋ-n'Alaw burini ɗif na tuwur ktai n'a bunda payaini gamai a sûwiɗi na doogo doogo ɵeeŋe pi ɵeeŋe na jaaɗi sini bindi na gamai kai ɗa.
Seŋ zi siŋka maini midiɗi sulai na te ba edi
8Muni, na sulaiɗi doogo, na ktai arbani par te ba ta, te tika afu warni lampa, te doogo hlai edi, te piyiti gaini hangal haa te niviti kai ɗa, te muni na wata ɗa? 9Won hlai na te niviti li ɗa, te yikiɗisi marmakaiɗi gaiɗi nagai na ɵimaɗi paŋ ahaɗi, te miɗiɗi ɓa: Ki firiyi gaya buri mu niviti sulai na te ba edi jek. 10Nɵa lai mu miɗiki, firiyi n'abai aga a za wuzaɗi ɗai zi ɵeŋ na war fuŋ-n'Alaw burini ɗif na tuwur na ktai n'a bunda payaini gamai ɗa.
Seŋ zi siŋka maini miɗini ahi n'a ba edi, n'a nava
11-12A muɗa pra: Ɗif ktai alini na maɵagai sulu, n'agwi a miɗini wiini epini nɵa: Apa, ku saŋa galni farai n'a sa aŋ wiya ɗa, api a ɓurwa faraini arbaɗi. 13Mefeŋ agwi asakal par, ahini n'agwi a wura wazagaini edi, a tika morkoi midini afti na gaigai, woni a ba faraini paŋ edi war vilimi. 14Won hlai n'a ba faraini paŋ edi li, wiyamai n'amai te za midini afti ni ɗa, a bunda, wala n'a sumaŋ maa aŋ kai. 15A hala sini ɗif ktai na midini afti ni ɗa aŋ paya sda, ɗif a ɵinaŋ edi war basga aŋ giɗima hohoni, 16a paya futi aŋ va warni gaini wazagai na hoho a sumaŋ ɗa, amma ɗif a siŋni kai. 17Won hlai na hinini a wayasi sini li ɗa, a muɗa gaini warni maini nɵa: Ahani apa ɗa, ɗai zi sɗa simi a sûwiɗi gaini suwai, amma ta won na dam, wiyamai a fuɗaŋa ɗa maɵa maɵa ɗa? 18Aga mu hala, mu hala sini apa mu miɗini ɓa: Apa mu za tuwur sini Alaw, suku tuku lai. 19Mu kiɗa mu yika aŋ ahiku kir kai, yimaŋa maini ktai n'arbaɗi ɗaiku zi sɗa nɵa. 20A faka amai aŋ hala sini epini, won hlai n'aŋsi warɗi futi par gaigai hai, epini a talaŋ, hinini-haw a yimaŋ burini, a lawa mini, a kɵa amai wulani, a sisiɓa mini lai. 21Ahi a miɗini wiini epini: Apa, mu za tuwur sini Alaw, suku tuku lai, mu kiɗa mu yika aŋ ahiku kir kai. 22Amma api a miɗiɗi wiiɗi ɗaini zi sda: witaw hili kinisi dawra na pɗem gara ɗa, wiŋni sini, wini adoŋo tini, harabak ezini lai. 23Hili, kisi ahi ɵe na nur nur, ki fiɗiŋ, mu lumuŋmu, mu zumu fet. 24Buri ahiya hanɗa a na fu gaini mri su, tiyana a ɵiya ɵiya, a na fu gaini bi ta, tiyana a nava li. E tiki piɗi aŋ zi fet.
25Ahini n'abai ɗa a nasi fu edi warni vowai, won hlai n'a wayasi edi par, a ŋasi gobi aha sini fuŋ ɗa, a tala a tuwa ɗa, a yama gaini didimi. 26A yika ktai arbaɗi ɗai zi sɗa a zilbaŋ burini wala n'a za ɗa. 27Ni a miɗini: Tawalku a wayasi aha wai, apuku a fuɗa ahi ɵe na nur nur buri a wayasi sini nga. 28Nɵa a za hiy, a dara a niya aha kai. Epini a niyasi anene mini aŋ siiwaŋ buri a niyaɗi aha. 29Nɵa a wiyini seŋ wiini epini a muɗa: Buza viya mu na zuku sɗa maini bege ɵa, mu ha amai midini gadaiku duk kai, amma ku saŋa ka ahini hek ktai nɵa buri mu firiya gaiɗi mara nɵa duk kai. 30Amma ahiku na aniŋ ɗa, won hlai n'a cosi ɗa, ni n'a ba faraiku paŋ edi piɗi zawarai; burini ni ɗa, ku fuɗa ahi ɵe na nur nur su. 31Epini a miɗini: Ahiya, ku na gaya kureɗ, wazagaya paŋ ɗa a wiiku, 32amma na mu zumu fet, mu firiyumu lai na ɗa a futini, buri tawalku hanɗa a na fu gaini mri su, tiyana a ɵiya ɵi. A na fu gaini bi ta, tiyana a nava jek.
Zur Zeit ausgewählt:
Lukas 15: MUSGUM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
