Lukas 14
14
Yesu a zuula ɗif zamai na veglek war mefeŋ ni Sabbat
1War mefeŋ ni Sabbat, a halasi aŋ suma ahani ktai arbaɗi abaiɗi Farisekai, nagai e tiki hangalɗi sini ta. 2-3Ɗif na azini gaini hitili a na fu mini zaw, Yesu a zilbiɗi ɗai n'e siɗi gadai gara gaiɗi Farisekai lai a muɗa: Gadai na wimu ɗa a sa futi ɓa ku zuula ɗif war Sabbat, zawku zuula kai ɗi? 4E bi miɗi liyik, asakal par a yima ɗif zi veglek, a zuulaŋ a tikini pini lai. 5Asakal par a miɗini: Arbaki ɗa, ɗif na ahini zaw, ahini garini zaw, a kɵa li war kalaŋ war mefeŋ na wiini Sabbat ɗa, aga a yimaŋsi amai tizaw kai a na ɗi? 6E kiɗi e wiyini seŋ midini hanɗa kai.
Piyi aŋ simni edi asakal
7Yesu a muɗa seŋ zi siŋka maini siɗi ɗai n'e yikisi miɗi fet, buri a tiliɗi ɗa, e piyi ɗa a hlai n'amai avut, a miɗiɗi: 8Won hlai na ɗif a yukuku li miɗi fet na wiini tiki ɗa, ku hala ku sumna amai avut kai, buri ɓa, ɵa kai ɗa, ɗif na hormani a suwuku a za ɗi. 9Nɵa ɗif n'a yikikisi ɗa, a halasi a muɗuku ɓa; hinini balamku wiini ɗif ɗi ɗa, nɵa wiyi na e wiyikusi asakal ɗa aga ku tika siyer. 10Amma won hlai na e yikuku li miɗi fet ɗa, ku hala ku sumnasi edi asakal par kapai ni n'a yikukusi a halasi li ɗa, aga a muɗuku ɓa: Mariya halasi amai avut sek. Nɵa aga ku nava kol wuzani arɗi nagai n'e ɗa e simi gaiku paŋ. 11Buri nɵa asiya ɗi paŋ n'a kola sini amai aga a hosa azumai, asiya ɗi paŋ n'a hosa sini azumai ɗa aga a kola amai lai.
Ku yikiɗi miɗi fet ɗa, e ɗi na murgakai ɗa
12A miɗini wiini ni n'a yikaŋsi ɗa ɓa: Won hlai na ku da simi n'abai li mini fet ɗa, koo ɓa girvudi, koo ɓa koskoi, ku yikiɗisi mini fet ɗa e ɗi marmakaiku gaiɗi tawalakaiku gaiɗi zagalakaiku gaiɗi ɗai na ɵimaku zi farai ɗa kai, ɵa kai ɗa nagai lai aga e yukuku mini fet kapai ku nava vrakku lai. 13Amma won hlai na ku da simi li miɗi fet ɗa, ku yikiɗiɗi ɗa, e ɗi na murgakai, na gaɓaramai, na höyökai gaiɗi na malvanai lai. 14Ɵeɗ muduku buri wala n'e vurguŋku gaini aŋ kai, nɵa aga ku nava vrakku war ɵiyi n'amai na wiiɗi na jre ɗikat.
Seŋ zi siŋka maini midiɗi fet n'amai
Mat. 22.1-14
15Asakal n'a ɵina seŋ hanɗa ya, ktai arbaɗi nagai n'e ɗi fu aŋ simi gaini a miɗini: Ɵeɗ miɗini ni n'aga a suma warɗi pai na wiini Alaw. 16A wiyini seŋ a muɗa: Ɗif ktai a da simi n'abai miɗi fet, a yikasi ɗai viya lai, 17war sarti na wiini simi ɗa, a ɵina ɗifni zi sɗa aŋ muɗa wiiɗi ɗai n'e yikiɗisi ɗa ɓa: Hilisi paŋ, a zizina li. 18Amma nagai paŋ maini ɗif ktai ɵa, e tiki piɗi e miɗi ɓa: Aga e kiɗiɗi kai. N'avut a miɗini: Mu wura vowai kaai, tiyana mu hala na ɗa aŋ talaŋ, za barka yima seŋŋa ɗa. 19Na zamai a muɗa: Mu wura garakai jaɓ jaɓ ɵim, mu hala fu aŋ tetemaŋ, za barka yima seŋŋa ɗa. 20Na zamai a muɗa: Mu tikiti muniya na ɗa gobi na, mu kiɗa mu halaɗi kai. 21Ɗifni zi sɗa won hlai n'a wayasi ɗa, a miɗini seŋ hanɗa paŋ wiini epin-gezani, nɵa epin-gezani a za hiy, a miɗini wiini ɗifni zi sda: Witaw, hala warni futi n'abakai na war fuŋ n'abai ɗa gaini n'agogoi lai, ku yikiɗisi na murgakai, na geɓeremai, na malvanai, na höyökai lai won na. 22Ɗifni zi sɗa a muɗa: Epin-geza, na ku muɗa gaini ɗa, mu zaŋ ya, hlai a va kai ɗaai. 23Epin-gezani a miɗini: Hala edi kawye, edi ezini ɵagakai lai ku siika miɗi ɗai buri e hilisi kapai dalamŋa a va gaiɗi ɗai. 24Buri mu miɗiki Nagai na mu yikiɗisi avut ɗa paŋ ɗa, ktai n'arbaɗi n'aga a tika simiŋa mini aŋ kai.
Hina paŋ edi aŋ tika futi pini Yesu
Mat. 10.37-38
25Firiɗi ɗai viya e tipi pini woɗi futi, a bunda arni duɓani a miɗiɗi: 26Na ɓa ɗif a dara a halasi sa, amma a bula gaw sini epini, zaw emini, siɗi munini, zaw siɗi alini, siɗi tawalakaini na maɵagai gaiɗi na falakai, zaw sini suŋfani dama kai ɗa, a kiɗa aŋ za aŋ ɗif zi hitri na wiya kai. 27Asiya ɗi paŋ n'a luba dagrani aŋ halasi pa kai ɗa, a kiɗa a za aŋ ɗif zi hitri na wiya kai.
28Buri ɓa, arbaki ɗa, ɗif n'a dara a rga poriyo n'a sumna azumai aŋ tala gdaŋni haw kai ɗa asiya ɗa? Na ɓa a kiɗa a vadaŋ, zaw a vadaŋ kai ɗi ɗa? 29Kapai won hlai n'a tora eziɗi dilimi li azumai, na ɓa gdaŋni a kiɗa a vada sɗa kai ɗa, nagai n'e tiliŋ paŋ e zini yewere, e miɗi kai ɓa: 30Ɗif hanɗa a tika pini aŋ rga, amma sɗa ɗa a ɵa edi gaini kai ɗa kai. 31Pai na ɗai pini dubu doogo, n'a dara a hala aŋ hitima gaini pai na ɗai pini dubu caaɓa, n'a sumna azumai aŋ talagdaŋni wuzani hlai kai ɗa, a pai na wata ɗa? 32Na ɓa, a tala gdaŋni a kiɗa kai ɗa, a ɵina ɗai sini maini won hlai n'aŋsi gaigai par hai aŋ paya ɵeɗ gaini. 33Nɵa lai, asiya asiya ɗi paŋ n'arbaki, n'a bula edi sini wazagaini n'a na ɗa kai ɗa, a kiɗa a za aŋ ɗif zi hitri na wiya kai.
Humu na lemni aŋ kir kai
Mat. 5.13; Mark. 9.50
34Humu ɗa a wala na pɗem, amma na ɓa a ba lemni edi li ɗa, aga a bunda pɗem zamai ɗa gaini a mada? 35A kiɗa a zina pini afti kir kai, a zina pini zilgit kaalai, e pûkûŋ ɗa edi. Ni na ɵimani zi ɵeŋ a na, a pɗem ɓa a ɵina.
Zur Zeit ausgewählt:
Lukas 14: MUSGUM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
