Luka 14

Yesuŋo Ŋei Mane Kiye Mete Suwa Suwa Okankake Yewa Ma Menaŋkake

1Qezarek naso maneo, Yesuŋo Parisi ŋetne mane wane matko ŋara neyakane arike, pakiso ŋei ŋerep eŋe Yesu wane diyamine seleleine makoi. 2Pakiso ŋei mane kiye mete suwa suwa okankake, yewa eŋe Yesu wane osino sarike. 3Sarikiso, Yesuŋo ŋei wae kaki paki, Kaisale papa togon welaine ŋei, Parisi so Skribe qesonone rake, “Ŋenze ra rokop don yewaŋo maine detŋongi, qezarek nasoo ŋei ŋerep zomarop ma menaŋ onikene me mida?”

4Ŋo eŋe don mane mi rakoi, pakiso Yesu eŋe ŋei wa metino ma menaŋkaki, pakiso birakkai arike. 5Pakiso, eŋe edane rake, “Ŋinano ŋine mane eŋe gipole me bulamakauine mane doku lomgo qezarek nasoo kesiyake, pakimo ŋine qezarek nasoo wane maine ikopka mi ma birau sayake me?”

6Don eya wane yalewaka turuŋine eŋe eweke more, maine mi mainge olatkoi, eŋe ŋaŋaekoi.

Sola Mawamawa Mi Okane More Ketkele Gekene

7Yesu eŋe ongi, ŋei natne eŋe ŋara zakeo ŋara nekei wane sari metmet kaitko lewine yewaka nogane mesikei wane okanbi, Yesuŋo one more don rokop mane iwa yale rokop kito more edange, 8“Ŋei maneŋo ŋei ŋerep etke meteetne aukeik wane okanbik newanŋungi eŋane zakeo ŋara nekei wane, ari more met met kaitko lewine metmaike, yewao misuk mesikene. Urata welaineŋo geŋane wawaine ŋei wele mane mo weneŋ newankake. 9Pakimo, baŋ welaine ŋara zake ŋirit narek newanŋurike, eŋe sariki pakimo geŋane iwa yale rayake, ‘Metmet kaitko lewine iwa mo ŋei wele wawaine iwa oŋo metkep.’ Pakimo, ge gamu maratkanom, pakimo metmet ketkele, yewao ket mesikene. 10Ge epa kebu welaineŋo newangangi, ari more metmet ŋei kaitko wawaino mesikenane, turuŋine eya mo ge metmet ketkele yewao mesikene. Pakimo, kebu welaineŋo geŋano sariki paki rayake, ‘Iwa sanom kimane sa more metmet kaitko lewine iwao metnom.’ Yewaŋo yemo geŋano bakom suwaine lobo natne eŋane kaiteno wakoniyake. 11Ŋei mane eŋe oŋomka eŋetine mawaki, yemo Kaisaleŋo maket birakayake, ŋo ŋei mane eŋe oŋomka eŋetine maket biranagu more, ketkele det nagumaike, eya wane Kaisaleŋo mawa birakayake.”

12Pakiso, Yesuŋo waom ŋei kebu welaine eya olale rake, “Ge kepe oŋa bango me rarapko ŋara newan onikenane okane more, geŋone kimakopŋone, ŋon tatŋone, weŋem sota-wekopŋone me ŋei aboŋene suwaine, yewa korop misuk newan-onikene. Onoka wane eŋe baŋ turuŋine yalewaka newan-ganikei, eŋe yalewa oken okane more, kine kine ebonnom nekei, eya wane turuŋine eŋe baŋ makoke ginikei. 13Ge epa waom manom paki, yemo ŋei ŋerep ket qeqine wanap, aboŋene midaine, mat popokine, kiye wawetene qoi qoine so deene pilik pilikine mala ŋei ŋerep ŋaune me ŋanomine seuseune yewa teba-ongene. 14Paki Kaisaleŋo ge baŋ mosopganiyake, onoka wane ŋei yaline edo baŋ lewet maine mi qole-ganikei, eya wane turuŋine yemo baŋ ŋei koboine seuseuwo ŋine wiyekei, naso yewao Kaisale eŋe oŋom qole-ganiyake.”

Epa Waom Suwaine Eya Wane Don Rokop

15Ŋei mane ŋara zakeo mere ŋara weneŋ nekoi, oŋo don iwa detki paki, Yesu olale rake, “Ŋei ŋerep eŋe Kaisale wane gege togon mat ma wakonge pamaike, eya wane kotino mere ŋara zakeo nekei, eŋe wet pesek manerop desikei!”

16Pakiso, Yesuŋo olatke, “Ŋei maneŋo epa waom suwaine maki paki ŋei ŋerep loutne newanonge. 17Epa waom nekei wane naso mo bomilekiso, epa waom welaineŋo qelit mamaine mane talekaki ari ŋei ŋerep edane rake, ‘Sariu, ŋara kine kine mo zakeo pamaike!’ 18Yale ra edangi, eŋe korop mode mode don weku weku rakoi. Ŋei maneŋo qelit mama olale rake, ‘Na kepe mane qolile, eya wane na maine mi arikale, na ari kepe qolile yewa kaikale, siluŋ detnom misuk boriyake.’ 19Pakiso, maneŋo olale rake, ‘Na bulamakau 10 qolile, eya wane ari liwekone onikale, na maine mi arikale. Ge siluŋ misuk detnom boriyake.’ 20Pakiso, maneŋo wamo olale rake, ‘Na ŋerep musele mele, eya wane na maine mi arikale. Ge siluŋ misuk detnom boriyake.’

21Pakiso qelit mama eŋe zinge ari more suwaineine yewa korop olatwareke, pakiso matpae wane welaine eŋe sotine osiki, qelit mamaine olale rake, ‘Ge mat iwa wane kotino numa suwaino so nigatno ikopka lolike ari, ŋei ŋerep wesi aboŋene midaine, mat popokine, kiye meteene seuseune so deene pilik pilikine yewa ebunom sariwareu!’ 22Mi azongiso qelit mamaŋo zinge sari more rake, ‘Suwaine, na geŋane don teweke mo okanwarile, ŋo siluŋ met met sotakine yaup pamaike.’ 23Pakiso, suwaineŋo qelit mamaine olale rake, ‘Ge numa suwaino ari more eu wane sen pamaike, yewa mogare ari ŋei ŋerep ebunom, sari naŋane mat watke warekei. 24Na iwa yale ŋidanmaile, ŋei wa newan-ongole, eŋano ŋine koropŋo naŋane ŋara yewa mi nekei!’ ”

Ŋene Detluke More Yesu ŋadino Mogare Arikene

25Ŋei ŋerep magu suwaineŋo Yesu ŋadino mogare arikoi, pakimo Yesuŋo zinge edane rake, 26“Ŋei maneŋo na mogat-naniyakane ramaike, eŋe ŋine simile korop, nabok, magak, ŋanom, medep, gipon, boraso, me weŋem sotak, kiaro baro kepe mat me bisnis korop, eŋe eya korop qelige ŋadek-wareyake, ŋo na maine mogat-naniyake. Ŋo eŋe eya wane simile dere eya malipka geyakeo eŋe naŋane mi geyake so mogat-naniyake. Ŋo na eŋane simile mane naŋano mi payake, na eŋe maine detka more ŋadek-kakale.

27Ŋei mane eŋe kaiwe baŋem kibeŋ qabeŋine eya wane wikile mi dere teweke, naŋane ŋadeno mogatnane sariyake, eŋe naŋane medep mi okaniyake.

28Ŋo ŋinano ŋine mane eŋe mat kiroroine mane mayakane wetkeyake, eŋe mikepka pese mere lewine darapŋo eŋe maine qesiŋka more maki wiyekeyake, eya wane wesi so zaleine ma wakoniyake, paki eŋe kayake, wesi maine mat yewa maki wiye qoeyakane rokop okanmaike. 29Ŋo eŋe mikepka yale mi okane more, ŋado bosiŋ mi biraki qoeyakeo, eyamo mat yewa maine mi maki qoeka, pakimo ŋei loutneŋo kau paki tenikkaikei. 30Pakimo, iwa yale raikei, ‘Ŋei iwa eŋe matpae kiyeke make, ŋo maine mi maki qoemaike!’

31Ŋei waom mane eŋe kawali ŋeikoune 10,000 yalewa, ŋo ŋei waom mane eŋe kawali ŋeikoune 20,000 edo engukeiwane sariu, ŋei waomba kawali ŋeikoune 10,000 ka, eŋe mikepka pese mere dere makoboeyake, eŋe maine togole more, ŋei waom mane kawali ŋeikoune 20,000 yewa engu esoponiyake, me mida. 32Ŋo eŋe kaki mi kopkeyakeo, yemo eŋe ŋei waom mane eŋine so kawali ŋeikoune eŋe qei abaran gemami wane, eŋe qelit mane raongi ari ŋei waom mane olatpi ere qedugu more, peyam wane done qeson-kaki aukeik.” 33Yesuŋo takotke raki qoeke, “Rokop yalewaka ŋinano ŋine maneŋo aboŋ kine kineine mi ŋadekka wareyakeŋo naŋane medep mi geyake.”

Kiwet Zonomine Midaine

34“Kiwet eŋe kine kine maine, ŋo eŋe koso simile midaine okaniyake, eya mo daleo okane more, maŋem eŋe koso similerop okaniyake, 35kiwet yalineŋo euwo kepe kelokine mosiyakane mi qakkene, so bulamakau kaenerop maine mi qeturaŋgene, eya kepe wane kelokine mosiyakane mi qakkene, ŋene yeine qakŋem numao ari okanmaike, ŋei mane eŋe ketneropŋo don iwa wane kine desiyake!”

Zur Zeit ausgewählt:

Luka 14: onsNT

Markierung

Kopieren