Luka 15

Lama Siuk Siukinane Don Rokop

1Naso maneo takis mama so borikine mama loutneŋo Yesu wane don desikei wane sarikoi. 2Pakiso, Kaisale papa togon welaine ŋei, Parisi so Skribe eŋe kiyeke more detpi boriki, Yesu wane rakoi, “ Ŋei iwa eŋe borikine mama kima okanon okanmaike, so eŋerop weneŋ mere ŋara ne okanmaike!” 3Pakimo, eya wane Yesuŋo don rokop mane iwa yale edange,

4“Ŋinano ŋine mane eŋe lamakoune 100 okorakei, pakimo yewa ŋine weku siukeyake, siukkimo, lama welaine eŋe daleo okaniyake? Eŋe qeliŋongi, lama 99 yewa ŋaraene ne okorau mo, eŋine lamawa mane siukike, eya wane zuwage ari mage maratkayake. 5Maratkayake, naso yewao welaine eŋe zok wet pesek suwaine dere more lamaine yewa ma biraki wokine kutno wayake. 6Wakimo, teweke matko ma ariyake, ariki paki, kimakoune so matkoune edoraki sari lewageu edane rayake, ‘Na wet pesek suwaine detmaile, lamane siukkeo ŋine koso maratkamaile, eya wane ŋene bakom kitoŋem!’ 7Na ŋidanbe detpi, rokop yalewaka weti qeliwo eŋe bakom okanikei, yemo ŋei 99, eŋe menaŋgoi, ŋo wetene zok mi maingelukkei. Ŋo siluŋ borikine mama wekukurapŋo wetne maingemaike, yemo oi bakom suwaine weti qeliwo wakoniyake.”

Wesi Siu Siukine Eya Wane Don Saeŋine

8“Me ŋerep maneŋo wesi setne 10 ma geyake, yewa ŋine weku siukki mo, ŋereppae eŋe daleo okaniyake? Eŋe kiwa kuwakki lawekimo qelaŋango maine sino kitoki paki, yewao yewao kauluke zuwaŋmage ari marat-kayake. 9Maratka more, kimakoune so matkoune edoraki sari lewageu edane rayake, ‘Na wetne zok pesemaike, wesine setne weku siukike, eya mo marat kamaile, eya wane ŋene bakom kitoŋem!’ 10Na ŋidanbe detpi, rokop yale waka Kaisale wane aŋelokoune eŋe borikine mama wekukuŋo wetne maingeki, oi bakom suwaine okanikei.”

Medep Mane Magaine Qeliŋka More Arike Eya Wane Don Kisi

11Yesu eŋe koso takotke more rake, “Ŋei mane eŋe gipoletkine etke gekoik. 12Gipole nigatneŋo magaine olale rake, ‘Magak, wesi aboŋba naŋane biŋek, yewa ukude mapoke ninnom.’ Rakiso ŋei wae eŋe wesi aboŋ yewa keuwoka mapoke gipole nigatne eya mane mange. 13Kaiwe urata mama ewekine mere, so gipole nigatne eŋe kine kine kakiine natne yewa matoke qolewareke, pakiso wesiine yewa ma so matine eya qelige, so kepe mane abaran yewao ari geke. Ge more wawaine okane more, wesi yewa korop qakki ariwareke. 14Ari mage mida lelemaike, rakimo kepe wa geke, yewao bodi kakapa suwaine wakone, kepe mat yewa rokopke pake, pakiso medeppae eŋe mo eya wesi aboŋine midaine metke. 15Mere ari kepe mat yewa wane welaine ŋei mane eŋano urata mayakane wakonge. Pakiso, ŋeiwaeŋo birakaki ari berek sengo berewekoune wareonge. 16Berek eŋe bese wane solaine neu, ŋei eŋe yalewaka bese wane solaine yewa neyakane wetemaŋke, ŋo ŋei maneŋo ŋara mane mi mangi neke. 17Ŋado wetine lotkeki, detwareki paki rake, ‘Maganane urata mama ŋeikoune korop, eŋe ŋara zok suwaine neu ŋatene qemaike, ŋo na iwa mere zok ŋara wane seukmaile, 18eya wane na baŋ wiye more maganano ariwe paki olale raikale, Magak, na borikine mawe, Kaisale ŋabakamaike, so ge weneŋ ŋaba ganmaike, 19na ŋei maine mida, eya wane ge naŋane giponne misuk raikene, ge urata mama ŋeiŋone yale biranannom gekale.’ 20Yale raki pakiso, wiye more magainano zinge arike.

Ari mat osino osino raki, magaineŋo mo potki ariki kake, ka more wet borikŋo kotino watkeki, biririke ari meteretkine biraki ariki, gipole masatka more lulukike.

21Pakiso gipoleŋo olatke, ‘Magak, na borikine mawe, Kaisale ŋabakamaike, so ge weneŋ ŋabaganmaike, eya wane na koso geŋane giponŋone misuk norakene.’ 22Ŋo magaineŋo yemo qelit ŋeikoune edoraki sariu edane rake, ‘Ikop ariu! Ari naewo ŋine takot musele kiroine mane ma sari, birakau ketkep. So metino siliwa zale mane birau wetekimo, kiyeretkino kiye tabe weneŋ birau wakep. 23Pakimo, ari bulamakau medeune mane kelokinerop yewa qe more mitpi, epa waom ma neŋem paki, bakom kitoŋem! 24Medep iwa eŋe mo seukkeo ŋine, koso siluŋ marat kamaine.’ Yale ra edangiso, epa waom ma neso, oi bakom kiyeke okangoi.

25Gipole suwaine eŋe naso yewao euwo geke, yewao ŋine koso zinge sari mat osino okora, eŋet so wagom yewa detke. 26Dere more qelit ŋei mane oraki sariki qesonka rake, ‘Iwa daleo okanmami?’ 27Qelit ŋeiŋo olale rake, ‘Geŋane ŋonŋone mo matko zinge sarike, pakimo magaŋoneŋo bulamakau medeune kelokinerop mane qemaike, gipole kine kine maneŋo mi matalikake, maineka sarike, eya wane, magaŋitneŋo raki okanmami,’

28Tatine suwaine eŋe sotine osiki mat koto mi wake, pakiso magaineŋo saket more, mat koto wayakane wetkelik kake. 29Ŋo gipoleŋo yemo done turuŋine olale rake, ‘Detnom, na koma loutne urata ŋei yauwine yale qelitŋone qe sarikole, donŋone mane mi qekole, ge onokaka mane ningone? Ge noniŋ mida mane mi ninnom qe more kimakopne eŋerop epa waom ma neŋem paki, oi bakom okangone, midakaka! 30Ŋo giponŋone iwa eŋe yemo wesi aboŋŋone korop yewa wenip ŋerep eŋerop ge more, mataliwareki mida leleki, koso zinge matko sarikimo, ge bulamakau medeune kelokinerop yewa eŋane qemaine!’ 31Yale rakimo, magaineŋo mainge olale rake, ‘Giponne, ge yemo naso baŋem narop iwa ge okanmaine, yalinane mo kine kine naŋano pamaike, eya mo geŋane okanmaike, 32Ŋo ŋene yemo epa waom ma neŋem paki oi bakom okanikene, ŋonŋone mo seukkeo ŋine, koso siluŋ wisikaemaike, eŋe mo siukkeo ŋine, koso siluŋ wakongi marat kamaine.’ ”

Zur Zeit ausgewählt:

Luka 15: onsNT

Markierung

Kopieren