Luka 16

Wesi Aboŋ Ware Ware Borikine Eŋane Don Rokop

1Yesuŋo don mane iwa yale dokoine edange, “Baliŋa ŋei mane geke, eŋe eŋane wesi aboŋ ware wareine mane geke, pakimo ŋei natne eŋe baliŋa ŋei wano sari ware ware wane solaino don qe more rakoi, ‘Ware wareŋoneŋo wesiŋone mo matali waremaike.’ 2Rau dereso, baliŋa ŋei waomŋo ware warewa oraki sariki qesonka rake, ‘Daleo wane geŋane don iwa detmaile? Ge ari naŋane aboŋ geŋane meto pamaike, yewa wane zaleine korop dapot warekene, ge koso naŋane ware ware mane mi gekene.’

3Pakiso ware ware wa eŋe iwa yale wetkeke, ‘Suwainene eŋe mo ware ware uratao ŋine esopnaniyake, na daleo okanikale? Na sere maine mi kitomaile, na ŋei ŋerep natne ŋara so wesi meŋen onikalane gamu nanmaike. 4Na detmaile, na siluŋ naso iwao kimakopne qesiŋonikale, eya wane waomne eŋe na esop naniyake, ŋo naŋane kimakopne eŋe na maine qesiŋnangei.’

5Eŋe yale dere more urata ŋei kimakoune edora more, suwaineinane sotaene eŋano pake, yewa edoraki, eŋano sarikoi, mane eŋe alakane sariki, eŋe ŋei alakane sarike, qesonka rake, ‘Ge naŋane waomnano sotaŋone darap qolekene?’ 6Eŋe mainge rake, ‘Na sotne kelok mitmit 100 dram qolekale.’ Ware ware eŋe olatke, ‘Sotaŋone ekap iwa mo qeu pake, ge ma mere 50 dram qekene.’ 7Pakiso eŋe ŋei mane qesonka rake, ‘So, ge sotaŋone darap?’ Eŋe mainge rake, ‘Na sotane wan tausen kaura bet wit woune.’ Ware ware eŋe olatke, ‘Sotaŋone ekap iwa pake, ge 8 handret kaura bet qekene.’

8Kine kine eya wakonge, eya ŋei waom eŋe dere more ware ware wane masi isisine ka more, eweine kitoke. Kine yewa onoka wane, kepe ŋei ŋerep eŋe kepe wane wesi aboŋ urata detlukonmami, so edo ŋine ŋei ŋerep qelaŋane ŋine qelaŋan wane urata mogare mamami, edo yewa yuwanŋunmami.”

9Pakiso, Yesu eŋe takotke edange, “Na weneŋ ŋidanmaile, ŋine kepe wane wesi aboŋ ŋineŋo ŋei ŋerep ketkele qesiŋonikei, boaŋ wesi aboŋŋine eya siukeyake, naso yewao Kaisaleŋo ŋine qeli gege togongo mauluk ŋuniyake. 10Ŋei maneŋo kine kine yauwine koboboine ma gemaikeo, eŋe kine kine suwaine koboboine ma geyake. Ŋei maneŋo kine kine nigatne isisine ma gemaikeo, eŋe kine kine suwaine masi isisine ma geyake. 11Ŋine kepo wesi aboŋ mi wareluk kamamiwo, ŋine qeli wane aboŋ wele mi warelukkaikei. 12Pakiso, ŋine ŋei mane wane aboŋ mi wareluk kaikeiwo, Kaisaleŋo ŋinane biŋek mi ŋiboniyake.

13Ŋei maneŋo ŋei suwaine etke erane qelit qeqe urata maine mi mayake, eŋe ŋei mane qaisikkayake, ŋo mane wane maine siminkayake. Eŋe ŋei weku mogatkayake, ŋo mane eya detki, ŋei yauwine okaniyake. Ŋine Kaisale so wesi aboŋ eya maine mi mogat osikei.”

14Pakimo, Kaisale papa togon welaine ŋei, Parisi, eŋe don eya dere more Yesu wane tenikkakoi, onoka wane eŋe kepe wane wesi eya wane zok manerop siminonge, 15Ŋo Yesuŋo edange, “Ŋine ŋei ŋerep kaiteno kine kine koboine mamami, ŋo Kaisale eŋe ŋinane wet dereretŋine detlukmaike, ŋei ŋerep eŋe kine kine one more, weku mane detmami, ŋo Kaisaleŋo kine kine eya yemo one more detki yauwine okan okanmaike.

16“Ra rokop don kine kine Moseŋo qeke, so kine kine Kaisale wane qelit ŋei edo qekoi, eya pa sari mageki Yohane wane naso bomileke, Yohane doku tau tau nasoine bomileki sari lotkeke, naso yewao Yohaneŋo Kaisaleŋo daline waremaike so eŋane gege togon numa, so qeli ewe zonom eya wane kisi maep don ra qelaŋange, so ŋei ŋerep koropŋo Kaisale wane gege togon numa togogole soringe wakesikei wane okanmami so natneŋo mo waket warekoi. 17Ŋo qeli so kepe siukeikwo, Mose wane ra rokop don nigatnemde mane mi siukeyake.

18“Ŋei mane eŋe ŋanomine qeliŋka more, ŋerep mane mayake, eŋe sotine maratkayake, so ŋerep maneŋo eŋe ŋaune qeliŋka more, ari ŋei mane mayakeo, eŋe sot maratkayake.”

Ŋei Aboŋine Suwaine So Lazarus Erane Don Kisi

19“Naso maneo, ŋei waom wesi aboŋine suwaineropŋo geke, eŋe takot laplapine weku mane kibinerop. Eŋe epa waom ma kaiwe baŋem met mageke. 20Naso yewao, ŋei mane aboŋine midaine, kubetinerop geke, ŋei eya eŋetine Lazarus, eŋe ŋei aboŋine suwainane mat wane madetko pa mageke. 21Eŋe ŋei aboŋine suwainane ŋara sisine neyakane simile dere pa mageke metki, so kasi eŋe sari more Lazarus wane kubet soŋine bozeka maŋkoi.

22“Pakiso ŋei aboŋine midaine eŋe seukki, so aŋelo edo ŋei eya tewekka wa more, qeli wane epa waom pamaikeo, Abraham wane wazaino birakau metke, ŋo ŋei aboŋine suwaine eŋe seukki, so kimakoune dukkau, eŋe ari 23gerep sorao ket okorake. Yewao eŋe wikile suwaine dere more, deine potki waki Abraham wane wazaino Lazarus metki kake. 24Eya wane eŋe Abraham boka ora olale rake, ‘Magane, Abraham, ge naŋane wetŋone borikep! Ge Lazarus birakanom, eŋe zoliwineŋo doku qe more sari naŋane belakamne uwakayakeo, na siluŋ zonom nigatne maikale, na wikile zok suwaine gerepko iwa detmaile!’

25Ŋo Abrahamŋo olatke, ‘Giponne, ge det sorokkene, Kaisaleŋo ge kepe aboŋ wekumane ginge, ŋo Lazarus eŋe kine kine qotkoine mange, ŋo ukude Lazarus eŋe kine kine wekumane detmaike, so ge wikile detmaine. 26Ge ro suwaine kiroine keuzo iwa ka maine, na nat iwa metmaile, so ge nat yewa metmaine. Na geŋano yewa zawo yuwane maine mi ukale, so ŋei natne eŋe nat yewa maine mi zawo suwaine pamaike, yuwane eya u more koso iwa sarikei.’ 27Ŋei aboŋine suwaine eŋe Abraham olale rake, ‘Na magane Abraham ge koso meŋengamaile, ge Lazarus maganane matko birakanom arikep! 28Yewao, eŋe naŋane tatne so ŋolekopne metemane gemami, eŋe girem don edaniyakeo, eŋe iwa mi sari more wikile desikei.’

29Abraham eŋe mainge rake, ‘Don kine kine Mose so Kaisale wane qelit ŋei propet, eŋe qekoi, eya tatŋone so ŋonŋone eŋe girem don eya edan okanmami, eŋe don eya maine detpi.’ 30Ŋei aboŋine suwaineŋo olatke, ‘Yale mida! Eŋe ŋei mane seuseuwo ŋine, wisikae wiye more ari edaniyakeo, eŋe maine sotene eya ŋadekkaikei.’

31Ŋo Abraham eŋe rake, ‘Eŋe Mose so Kaisale wane qelit ŋei propet eŋane don mi desikeiwo, eŋe ŋei seuseunane don edangi dere maine mi malipkaikei. Eŋe yewa baŋ dere ŋadekkaikei.’ ”

Zur Zeit ausgewählt:

Luka 16: onsNT

Markierung

Kopieren