Luka 13

Ŋei Wet Mi Maingekei, Eŋe Umat Maratkayake

1Naso yewao, ŋei ŋerep natne yewa gekoi, eŋe Pailatŋo, Galili ŋei natne Kaisale wane soe soep mire geuso enguke, eya wane don kisi Yesu olatkoi. 2Pakiso Yesuŋo dere more edane rake, “Galili ŋei eŋe numa yalewa oken seukkoi, eya wane ŋine iwa yale wetkemami, Galili ŋei iwa eŋane soteneŋo Galili ŋei natne korop eŋane sotene yuwankamaike? 3Yale midakaka! Na ŋidanmaile, ŋine wetŋine mainge more sot turuŋŋine yewa mi ŋadekkaikeiwo, yemo eŋe okangoi, yale ŋine korop seukwarekei. 4Ŋo ŋei 18, mokaka Siloam matko mat mane kiroroine yewaŋo dumene ket enguke, eya wane ŋine wetke raikeiŋo, ŋei yewa eŋane sot turuŋeneŋo ŋei ŋerep natne Yerusalem gemami, eŋane sot turuŋ yuwankamaike? 5Yale mida! Na ŋidanlukmaile, ŋine wetŋine mi maingeu paki, borikine ŋine yewa mi ŋadek kaikeiwo, yemo eŋe okangoi, yale ŋine korop baŋ seukwarekei.”

Eki Mane Wele Midaine Eya Wane Don Rokop

6Pakiso, Yesuŋo don rokop iwa yale edange, “Ŋei maneŋo wain euine kotino eki mane pik motki suwake, pakimo eŋe ari wele wane kaki mane mi qeke. 7Pakiso, eŋe eu wane urata mama ŋei eŋe olale rake, ‘Kanom, na koma karewe iwa sari more, kawe pik eki iwaŋo wele mane mi qeki wele wane zuwagewe borike, kitonom ketkep! Eŋe onoka wane okora more kepe kelokine yaup wane waraŋ waremaike?’ 8Rakiso, eu ware wareŋo olale rake, ‘Suwaine, qeliŋkanom, eŋineka koma weku iwa okoraki, na kino lom ma lolikewe pakimo, wele qeyakane bulamakau kaeneŋo lom yewa more more somekale. 9Pakimo, pik eki yewa eŋe koma weku eya wane kotino wele manerop maine qeyake, ŋo wele mi qeyakeo, yemo ge maine kitonom kesiyake.’ ”

Yesuŋo Qezarek Naso Ŋerep Mane Ma Menaŋkake.

10Qezarek Naso maneo, Yesuŋo Yuda wane lewa lewaŋ urumgo edange.

11Ŋerep mane yewa metke, eŋe asu qotkoinŋo kotino ket more ma pelekkaki, zomainerop okane geki koma 18 okange, yalinane romone setne qoukki maine koboine wiye mi okora okange. 12Yesuŋo ŋerep eya kaki paki ora more rake, “Ŋerep, zomaŋone mo midamaike!” 13Yale raki pakiso, metine ŋerep wane lewino motkiso, esatkamde ŋerep eŋe romone koboeki, wiye more Kaisale bakomine kitoke.

14Yesuŋo Qezarek Nasoo ŋerep yewa ma menaŋkake, eya wane Yuda wane lewa lewaŋ urum wane ware ware, maneŋo sotine osiki aŋage boka more ŋei ŋerep edane rake, “Kaiwe urata mama 6 pamaike, yewao ŋene urata maine ma okanmaine, wane naso yewao yemo maine sariu, ma menaŋ-ŋuniyake, ŋo qezarek naso yemo misusuk!”

15Rakiso, Waomŋo don iwa yale olatke, “Ŋine isi ŋei nau! Ŋinano ŋine maneŋo qezarek nasoo oŋo siluŋ bulamakau me donkiine sengo ŋine maine siwotka more, ma saket more ma ari doku gumekayake. 16Ŋo ŋerep iwa yemo Abraham wane ŋaboine Ŋei Borikineŋo mulapŋo wokomkaki koma 18 metmaŋki, mulap yewa maine noŋo qezarek nasoo mi siwot kaikale me?” 17Yesuŋo don turuŋine edange, yewaŋo ŋabakoune zok enguki gamu onwareke, ŋo ŋei ŋerep wele korop, eŋe yemo Yesuŋo masi kine kine weku mane maki kakoi, eya wane wetene menaŋge.

Nemuyap Woune Eya Wane Don Rokop Edange

18Yesuŋo qesone rake, “Kaisale eŋe dalino waremaike, gege togon wane numa yewa tanikine dalino? Na onokakao rokop don mosikale? 19Eŋe yemo nemuyap woune nigagatne yale, ŋei maneŋo woune yewa ma more, ma ari romeino motki, mere wiri suwa wa more eki suwaine okange, pakimo naŋi eŋe qoginane kutno matene ma okanmami.”

Yis Wane Don Rokop

20Yesuŋo koso manerop qesonone rake, “Kaisaleŋo dalino waremaike, yewa wane gege togon wane numa na onokakao rokop mosikale? 21Eya yemo yis yale, ŋerep maneŋo yis nigatne yewa ma more, palauwarop suwaine liwage motki, mere more suwa piwiwige waki, kasap mit okanmaike.”

Madet Qeka Qekaine

22Yesu eŋe ari more, mat suwaino so mat nigatno ŋei ŋerep don kito ebonma ebonma ari mage, Yerusalem matko ariyakane arike. 23Arikiso, ŋei maneŋo qesonkake, “Suwaine, ŋei ŋerep weku wekuŋo mane qeliwo waikei me?”

24Yesuŋo dere more edane rake, “Ŋine sorin borin okane togole more, gege togon madet qeka qekainoka wakesikei, onokawane na ŋidanmaile, ŋei ŋerep loutneŋo waketkei wane soringekei, ŋo siluŋ mi wakesikei, natne ŋaŋaekei. 25Gege togon matpae wane welaine eŋe boaŋ wiye more madet legeyake. Pakimo, ŋine mat ŋadino okora kiyeke madetko quŋ quŋ kito more raikei, ‘Suwaine, madet lalagenom uŋem!’ Raumo, eŋe boaŋ ŋidane rayake, ‘Na ŋine mi detŋunmaile, ŋine diya ŋine sarimami!’

26Rakimo, ŋine koso olale raikei, ‘Ŋene ŋara so doku gerop weneŋ mere nekone, ge ŋenane matko don kito ŋebongone!’ 27Pakimo, eŋe koso manerop ŋidane rayake, ‘Na ŋaŋaeŋunmaile, wiye ariwareu! Ŋine korop borikine mama nau!’ 28Eŋe ŋine qeinat mat ŋadino esopŋungi ket more, wetŋine koya saki koyasuruk suwaine aroke more, ŋet warik warik ki okorau paki, potpi waki onbi, Abraham, Isak, Yakop so Kaisale wane qelit ŋei propet korop weti qeliwo Kaisaleŋo qeli gege togon ma wakonwareke, eya wane kotino mesikei! 29Pakimo, ŋei ŋerep korop boaŋ sariwarekei, natne kepe sasainoken ŋine natne kepe ketmaike oken ŋine. Sariware more, Kaisaleŋo kine kine wekumane ma wakonwareke, eya wane kotino zakeo mere nene maep nekei. 30Pakimo, naso iwao ŋei ŋerep kepeo ŋado kitomami, eŋe qeliwo lewine alakangei, ŋo lewine kepeo alakanmami, eŋe qeliwo ŋado kitokei.”

Yesuŋo Yerusalem Mat Wane Arokke

31Naso weku yewaoka, Kaisale wane papa togon welaine ŋei, Parisi natne Yesu wano sari more olale rakoi, “Ge mat iwa qelige, mat maneo ikop arinom, Herot eŋe gekuki seukkenane okanmaike.”

32Yesuŋo edane rake, “Ŋine ari kasi borikine zubaine isisine, Herot yewa iwa yale olatpi, ‘Detmaine, na ukude so qaeki asu qotkoine esoponbe saket ariu, zoma enerop yewa ma menaŋonmaile, ŋo qene kaiwe mama kareweo yemo uratane mawe qoeyake.’ 33Na siluŋ ukude, qaeki so qene yemo mo eya numane arikale, eŋe Kaisale wane qelit ŋei mane mat natneo maine mi qekoi, mida! Eŋe siluŋ Yerusalem matko weku yemo qeu seukeyake.

34O, Yerusalem welaine! O, Yerusalem welaine! Ŋine Kaisale wane qelit ŋei engu more, ŋinano biraongi yewa weneŋ wesiŋo engu waremami! Naso loutne na meteneŋo motpe ŋei ŋerew-ekopŋine koraut-ŋunikalane okangole. Tiyak ŋerepŋo medewekoune qim-gimineŋo mapulake motki koraut-ŋonge, yale na qim-giminane bango met okanmami, na ŋine koraut ŋunikalane, ŋo ŋine eya wane bauŋine wake. 35Detmami! Kaisaleŋo matŋine mo komu komune qeliŋkayake, na ŋidanbe, ŋine koso na mi nanikei, ge mage naso mane bomileki, yewao ŋine iwa yale raikei, ‘Waom wane tungo sarimaikane, eŋe Kaisaleŋo mosop-kakep!’ ”

Zur Zeit ausgewählt:

Luka 13: onsNT

Markierung

Kopieren