Luka 12

Yesuŋo Isi Ŋei Eŋane Girem Don Rake

1Ŋei ŋerep magu suwaine tausen yalewaŋo sari lewage more, esosop-nagu kiyeeneŋo rakukum nagukoi. Pakiso, Yesuŋo mikepka dokoine edane rake, “Ŋine Kaisale papa togon welaine ŋei, Parisi, eŋane don kelokenane diyam maikei, isisienane ramaile. 2Kine kine kaweunerop pamaike, yewa mo boaŋ kaweune lalage didiwo wakon wareyake, ŋo kine kine sane pamaike, yewa mo boaŋ didiwo wakongi detka warekei.

3Yalewa wane mo, ŋine don kine kine sanka panaman koto ra okanmami, yewa mo boaŋ kaiwe suwaino wakongi desikei, ŋo, ŋine urum koto mere more don kine kine saŋepka rau, ŋei ŋerep keteno ket okanmaike, yewa mo boaŋ mat sobego okora ra suwakei.”

Ŋei Ŋerep Eŋe Ŋei Weku Wane Kaetoniyake

4“Kimakopne, na iwa yale ŋidanbe, ŋine solaŋine qeu seukeyake, ŋo siluŋ eya wane ŋadino kine kine natne umatne maine mi okanŋungei, ŋei yewa eŋane misuk kaet ŋuniyake. 5Na ŋei weku sikan ŋunikale, eŋane yemo kaet ŋuniyake, yemo Kaisale eŋane welekatne kaet ŋuniyake, eŋe kepe sola qeki seukki, eya wane ŋadino baŋ oŋa oŋa gerep sorao birakaki kesiyakane zonom weneŋ ma gemaike. Na welekatne ŋidanmaile, eŋane kaet-ŋuniyake!

6Naŋimde nigatne mete mane yewa wesi takitne etkeŋo mi qole okanmami me? Pakimo eŋano ŋine mane Kaisaleŋo eŋane mi nigetka okanmaike. 7Ŋo, ŋinane leweŋine zounane zaleine yemo mo dapotwareke, eya wane ŋine misuk kaet okangei, ŋinane leweŋineŋo yemo wawaine, naŋi nigatne eŋane lewetene yuwankamaike!”

Yesu Eŋetine Ra Wakon Ra Wakon So Bisopka Bisopka Eya Wane Don

8“Koso mane ŋidanbe, mane eŋe ŋei ŋerep eŋane kaitko, naŋane eŋetne ra wakoniyake, Ŋei Wawainane Gipoleŋo yalewaka Kaisale aŋelokoune eŋane kaiteno eŋetine ra wakoniyake. 9Ŋo, ŋei mane eŋe ŋei ŋerep eŋane kaitko na bisop naniyake, eŋe Ŋei Wawainane Gipoleŋo yalewaka Kaisale aŋelokoune eŋane kaiteno bisop kayake.

10Ŋei mane eŋe Ŋei Wawainane Gipole don borikine olasike, eŋe Kaisaleŋo sot turuŋine qeliŋka niget kayake, ŋo ŋei mane eŋe Asu Koboboine don borikine olasiyake, eŋe Kaisaleŋo sot turuŋine yewa mi qeliŋka niget kayake.

11Ŋo ŋaba eŋe ŋibu ari more, Yuda wane lewa lewaŋ urumgo, me ware ware eŋano, me ŋei waom eŋano, dongo biraŋunbi, don daleo raikei ra more dere mezet misuk okanikei. 12Naso yewao don raikei, yewamo Asu Koboboineŋo kito ŋiboniyake.”

Ŋei Wesi Aboŋ Gorop Eŋane Don Saeŋine

13Ŋei ŋerep magu eŋane keuweno ŋine ŋei maneŋo Yesu olale rake, “Kito ŋebo ŋebon, tatneŋo magasane mete zamot yewa bonep magemaike, eya wane ge olatnom natne na matoke niniyake.”

14Yesuŋo olale rake, “Ŋeiwae, maŋo na ŋinane wano wanok ŋei bira nangane, ŋinano wano wanok urata maikale, me etke ŋirane aboŋ keuwoka mapoke ŋiponikale?”

15Pakiso eŋe koso takotke korop edane rake, “Deŋine nat nat potkei, so diyamŋine ma more, kine kine natne eya wane bailalaŋ misuk okanikei, ŋei aboŋ ŋine suwaine ŋine gege togon ŋine yemo aboŋ yewa ŋine mi marat kayake.”

16Pakiso, Yesuŋo don saeŋine mane iwa yale edange, “Ŋei aboŋine suwainane kepe mane pake, yewao ŋara kine kine loutne suwake. 17Pakimo, ŋei wae eŋe oŋomka kiyeke more iwa yale wetkeke, ‘Na ŋarane mosikalane matine mane mi metmaike, eya wane na daleo okanikale?’ 18Yale ra more rake, ‘Na iwa yale okanikale, na ŋara urum mane yewa lalagewe ketki, koso suwaine maikale. Ma more yewao ŋara so aboŋne natne weneŋ mosikale. 19Pakimo, na wetneŋo iwa yale raikale, ge aboŋ kine kine korop pa ginmaike, koma zok loutne yewa wane rokop, eya wane ge mere zonom manom, ŋara ne more doku nenom, paki eya wane batne okannom!’ 20Ŋo Kaisaleŋo yemo olale rake, ‘Ge ŋei qelaŋine! Ukude ruwo iwao ge seukkene, pakimo, aboŋ kine kineŋone iwa ma gume sakone, eyamo maŋo peikeyake?’ ”

21Pakiso, don qoi qoino Yesuŋo rake, “Ŋei natne kepeo ge more, solaenane aboŋ kine kine zok loutne yalewa gume wa okanmami, ŋo Kaisale wane kaitko kotoenane moriyan yemo mida.”

Kaisale Detlukakei

22Pakiso, Yesuŋo dokoine edane rake, “Na iwa yale wane ŋidanmaile, ŋine ŋaraŋo kaŋine qesiŋkaki, gege me takot laplapŋo solaŋine kawetka more gege, yewa wane dere mezet zok misuk okanikei. 23Ŋaraŋo wele mi okanmaike, gegeŋo yemo wele okanmaike. Takot laplapŋo wele mi okanmaike, solaŋo yemo wele okanmaike. 24Ŋine naŋimde gawe onbi, eŋe ŋara mi ebot okanmami, me ŋara mau urumgo mi wa okanmaike, eŋe ŋara urumene mida, so aboŋ kine kine mot mot wane urumene mida, ŋo siluŋ Kaisaleŋo ŋara gumeon okanmaike! Ŋei ŋerep ŋido naŋi yuwan onmami. 25Ŋinano ŋine mane maŋo dere mezet okangi paki, nasoine ma kiroroine more koma natne koso ge ariyake? 26Ŋine kine kine nigatne yalinane qeka more mo onoka wane kine kine natnane dere mezet okanmami? 27Eki zubaine saleyalekine zurak okanmami, yewa onbi, eŋe ŋaraenane urataine mi ma okanmami, me takot laplapene edomka mi qetut okanmami, ŋo na ŋidanbe detpi! Solomon, Yuda ŋei waom suwaine, eŋe takot laplappine kibinerop bira geke, ŋo siluŋ eki saleyalekine kibi maep korop zurak okanmami, yaline mane mi bira geke. 28Touk zubaine iwa eŋe ukude yalewa zurakmaike, ŋo qaekino wamo buratke okanmaike, pakimo kitaremo, gerepko birau wa ze okanmaike. Touk yauwine yaline eŋe siluŋ Kaisaleŋo takotene biraon okanmaike. Pakimo ŋinane takot laplap mi ma wakoniyake ramami me? Yai, mali malipŋine nigagatne!

29Ŋine eya wane zok wetŋine kopusutne motki, misuk raikei, onoka ŋara nekene, me onoka doku nekene. 30Kepe iwa wane qelaŋ ŋei ŋerep ge arimami, edo kine kine yalinane ra okanmami. Ŋine kine kine yalinane ŋaŋaemami, eya mo ŋinane Magaŋineŋo mo detmaike, 31eya wane turuŋine eyamo ŋine Kaisale wane bango kine kine maine pamaike, eya wane wetŋine suwaine motpi payake, pakimo ŋado Kaisaleŋo kine kine iwa eyamo boaŋ ŋiboniyake.

Qeliwo Riwe Moriyan

32Lamakopne magu nigatne, ŋine misuk kaet okangei, magaŋine eŋe eŋine bango kine kine qeli ewe zonomine pamaike, eya mo ŋiboniyakane batne okanmaike.

33Ŋine aboŋ kine kineŋine yewa ŋei natne ebonbi, eŋe wesi ŋibonikei, pakiso, wesi yewa mapoke, aboŋene midaine eya ebonikei. Pakiso, ŋinŋine eyamo wesi kite mane bara warakine midaine, yewa maratkaikei, so qeliwo qoli zaliŋine gege togon, irima ŋosok mi kiti kitine, yewao ŋei edo kobu mi maikei so zau edo kim ki barak mi okanikei, yewa marat kaikei. 34Qeliwo asu wane gege aboŋ pamaike, yewaoka naso baŋem wetŋine motpi payake.”

Qelit Medep Wet Wisika Gege Eŋane Don

35“Ŋine eweke more, laplapŋine ramukei, pakiso, waroŋine togoleka abonbi ari kitoki, so kiwaŋine kuwakkei. 36Pakiso, qelit medep edo suwaineene eŋe ŋei ŋerep etke meteetne aukeik wane ŋara soep suwaine mau wa okoramaike. Yewao ŋine qelige zinge sariki kaikei wane tomaka okanmami, ŋine yalewa okangei, eŋe sariki paki, madetko yatoki mo, dokoine eŋe eŋane madet ikopka lalaŋgei. 37Ŋei suwaine yewa eŋe zinge sari more, qelit dokoine yewa ongi eweke more wisika mesikei, pakimo, qelit medep eŋe zok oi bakom okanikei! Na welekatne ŋidanbe, eŋe laplapine ramu more waroine abongi ari kitokimo, qelit dokoine edangi, ŋara zakeo sari mesikei, pakimo oŋom ŋara gumeoniyake. 38Eŋe ruwo banino me kepe qae qaewo sari more ongi, qelit dokoine eŋe eweke more wisika gekei, eŋe oi bakom zok okanikei! 39So iwa weneŋ desikei, ŋei mane mat mane wane welaine, eŋe kobu mama ŋei maneŋo sariyakane nasoine mo detmaike, pakimo matinane diyamine maki kobu mama ŋei yewaŋo eŋane mat koto mi ra barake wayake. 40Pakimo eya wane ŋine yalewaka ewekkei, onoka wane, Ŋei Wawainane Gipole naso maneo ŋine raikei, ‘Eŋe mi sariyake,’ yale ra more mi detkau, eŋe baŋ sariyake.”

Qelit Medep Aŋa Tewe Tewek Me Aŋa Bira Wira

41Petoroŋo rake, “Waom, ge don saeŋine iwa ŋeneka ŋedanmaine, me ge ŋei ŋerep koropze ŋedanmaine?”

42Rakiso, Waomŋo rake, “Qelit ŋei aŋa tewe tewekinerop so dereretine maine yewa ma? Qelit ŋei yewa eŋe suwaineineŋo ware ware birakaki, dokoine natne yewa wareoniyake, so naso kutnoka ŋaraene matoke eboniyake. 43Suwaineine eŋe zinge sari more kaki, qelit ŋeiine eŋe urataine make, yalewaka maki kaki paki olatki, eŋe oi bakomine suwaine okaniyake! 44Na welekatne ŋidanbe detpi. Ŋei suwaine yewa eŋe qelit ŋeiine eya ware ware suwaine birakaki aboŋ kine kineine wareyake. 45Ŋo, qelit ŋei wane wetineŋo yemo iwa yale wetkeyake, ‘Suwainene eŋe ikopka mi sariyake, eŋe naso kiroine ge more, mo boaŋ sariyake.’ Yale raki paki, kiyeke qelit ŋei natne engu more, ŋerep weneŋ enguyake, engu more ŋara neyake, so doku togole ne more qelaŋ qelaŋ qeyake. 46Yale okane gekimo, naso maneo ŋei suwaine yewa eŋe koso zinge sariyake. Qelit mama eŋane ware ware yewa eŋe suwaineine naso dango sariyake, eya mo mi detmaike, so mi tomaka okanmaike, eŋe nigetkaki, qewoloŋ gegeki, suwaine eŋe ikopka lotke more, tiŋ tuŋ kitare aŋa bira wira eŋane keuweno birakaki eŋerop wikile suwaine geyake.

47Qelit mama eŋane ware ware mane eŋe suwaineineŋo kine kine mayakane olatmaike, yewa mo detmaike, ŋo mi eweke more, suwaineineŋo okaniyakane me mayakane ramaike, yewamo mi okan okanmaike, eŋe aŋaine biramaikane kumunam suwaineŋo qe more makoboe-kayake. 48Ŋo qelit mama eŋane ware ware mane eŋe suwainane don dere ŋaŋae more qewoloŋgi, kumunam suwaineŋo qeqe wane rokop, ŋo siluŋ nigatneŋo qe more makoboe-kayake, ŋei mane eŋe kine kine manerop yoboneka man maneo, yemo eŋe weleine yoboneka maingeyake.”

Yesu Wane Uratao Ŋei Ŋerep Poripkekei

49“Na kepo gerep puwanbe zeyakane ketkole, pakimo na gerep yewa esatka lawe zeyakane qomne zok nanmaike! 50Na doku mane tauketane raraine, ŋo mi tauwe paki, wetne umaremaike. 51Ŋine naŋane wetke ramami, na kepo peyam ma wakoniyakalane ketkole? Na ŋidanbe, peyam mida, na ŋei ŋerep ma poripone wakongalane ketkole, 52eya wane naso iwao kiyekke more, iwa yale wakoniyake, ŋei ŋerep mete mane, matene weku pamami, eŋe poripkekei. Poripke more karewe wa edo etke wa ŋaba osikei. Ŋo etke wa eto karewe wa ŋaba ongeik 53Magakopene edo gipolekopene ŋabaonikei, ŋo gipolekopene edo magakopene ŋabaonikei. Nagakopene eŋe borasokopene ŋabaongei. Sele ŋerep eŋe atolekopene ŋaba onikei, ŋo atolekopene eŋe sele ŋerep ŋaba onikei.”

Masi Mane Wakonbe Raki Naso Detlukene

54Yesu eŋe yale waka ŋei ŋerep takotke edane rake, “Ŋine kezoŋ kau, kepe deine ketmaike okenka saki esatka, ra okanmami, ‘Koya mo qeyakane okanmaike,’ rauso, koya eŋe qe okanmaike. 55Ŋo detpi, momo suwaine raiwoken ŋine sariki, dere more ra okanmami, kepe mo gereweyakane okanmaike, rauso kaiwe sirik okanmaike. 56Isi welakoune! Ŋine kepeo so qeliwo masi daleo wakonmaike, eya wane kine eya mo maine detmami, ŋo, ukude naso iwa gemaine, eya wane kine mo onoka wane mi detluk okanmami?”

Ŋei Mane Mulap Urumgo Biraganbe Rakiso Eŋerop Don Au Makoboekeik

57“Ŋine onoka wane ŋidomka mi detluke more, numa koboine ma wesakmamik? 58Ŋei mane eŋe dongo bira-ganiyakane geuki arikeik, numao ari more, ŋei yewa olatnom ŋitomka esat mide don sot yewa auye ra makoboekeik. Pakiso, eŋe wano wanok ŋei wane kaitko misuk geu arikiso, oŋo tebe ŋei wane metino bira-gangi, tebe ŋeiŋo mulap urumgo bira-ganiyake. 59Eso, na golatpe, ge mulap urumgo ŋine esatka mi sakesikene. Ge yewaka mere more, sota ŋone korop suwaine so nigatne yewa weneŋ makok-warenom, qoeki sakesikene.”

Zur Zeit ausgewählt:

Luka 12: onsNT

Markierung

Kopieren