Luka 11

Yesuŋo Meŋen Meŋen Kito Ebonge

1Kaiwe maneo, Yesu eŋe maneo ari more meŋenkake. Meŋenkaki qoekiso, dokoine eŋano ŋine maneŋo Yesu olale rake, “Waom, Yohaneŋo dokoine meŋen meŋen kito ebonge, ge yalewaka kito ŋebonnom ŋene meŋen-kaŋem.”

2Yesuŋo edane rake, “Ŋine iwa yale meŋen-kaikei,

‘Magaze, geŋane eŋetŋone koboboine mawakaikene, koto baŋem kepe baŋem Waom okan ŋonnom, 3Kaiwe baŋem ŋara zuwageŋem, ge ŋebonikene.

4Borikinezane turuŋ qeligenom. Ŋene yalewaka ŋei borikine okan ŋonmami, eŋane turuŋ qeliŋmaine. Ŋei Borikineŋo ŋene liwek ŋonmaike, ge mapik ŋonikene.’ ”

5Pakiso, Yesuŋo dokoine edane rake, “Ŋinano ŋine maneŋo ruwo banino kimainane matko ari more, ma wirikka more olale rayake, ‘Kima, kasap karewe ninnom, 6naŋane kimane mane numa gemage sari naŋano lotkemaike, pakimo, na eŋane ŋara mane mi motpe metmaike!’ 7Pakimo kimaŋone eŋe mat kotoka mere rayake, ‘Ge de ma wirik mi okan ŋonnom! Madet mo kito more, mo nae so ŋanom medewekopne ŋene mo papazo pawaremaine, na maine mi wiye more kine kine ginikale.’ 8Ŋo ge sorinka magenom eŋe baŋ giniyake. Pakimo daleo? Na ŋidanbe detpi, mat welaine eŋe kima kima wane wiye more kasap mi giniyake, yemo eŋe baŋ siluŋ aŋa sorin so qebi qebin-ŋonane wiye more, kine kine zuwaŋ maine, yewa baŋ giniyake.

9“Eya wane na ŋidanbe detpi, Kaisale meŋenkau, kine kine ŋiboniyake, ma zuwaŋ okane more, wele maratkaikei, madetko yatou lalage ŋiboniyake. 10Meŋenka okanmaikeŋo kine kine mayake, ma zuwaŋ okanmaikeŋo wele kayake, madetko yatomaike, eŋe lalage maniyake. 11Me ŋinano ŋine mane eŋe gipoleŋo zawon wane raki, koma qotkoine maine mi maniyake. 12Me tiyak wounane raki, wame golaŋ maine mi maniyake. 13Pakimo, ŋine ŋei bori worine yalineŋo gipon borasokop ŋine ŋara aboŋ mai maine ebone, gumeon okan okanmami, ŋo Magak qeliwo rokop mane gemaikeŋo meŋenka okanmami, eŋe Asu Koboboine ŋiboniyakane, oko bakom yemo similerop so wet korop zok manerop okan okanmaike!”

Ŋei Eŋe Yesu Wane Rakoi Eŋe Belzebulŋo Qesiŋkaki Asu Qotkoine Esoponmaike

14Yesuŋo ŋei mane asu qotkoineŋo kotino ketki, done midaine geke, eŋane kotino ŋine asu qotkoine yewa esopkaki saket arike. Arikiso, ŋei yewa eŋe kiyeke more don rake, pakiso ŋei ŋerep magu suwaine eŋe ka more oŋaene qaeke. 15Pakiso, ŋei natne eŋe Yesu wane rakoi, “Eŋe Belzebul, asu qotkoine eŋane ŋetneene, oŋo zonom mangi, asu qotkoine yewa esopongi saketmami.”

16Ŋo ŋei natne eŋe liwekka more, eŋe weleka Kaisale wane urata mamaike me daleo kine eya ma wakongi, kaikei wane so raki, qeliwo masi tanik mane wakoniyakane olatkoi. 17Eŋe yale okanbiso, Yesuŋo wetenane kine dere more edane rake, “Kepe mane eŋe mapok nagu maguine maguine ari edomka kawali yakuwi, mi kirowoniyake. Weŋem sotak eŋe edomka mapok nagu more, wiriu etke okaniyake. 18Ŋo, Ŋei Borikinane magu eŋe mapoke magu etke okane more, etomka kawali yakuwik, urataetne daleo togole more payake? Pakimo, ŋine naŋane ramami, eŋe Belzebulŋo zonom mangi, asu qotkoine yewa esop onmaike. 19Na Belzebulŋo welekatne zonom ningi, asu qotkoine yewa esopongaleo, yemo ŋinŋine dokoŋine eŋe maŋo qesiŋongi, asu qotkoine yewa esop onmami? Ŋinŋine dokokop ŋine edo kine ŋine ma wakon onmami, yemo ŋine sot okanmami! 20Mida! Na yemo Kaisale wane zomongo asu qotkoine yewa esopon okanmaileo, Kaisale wane zonom qeli ewe zonomine so gege togon numa mo ŋinano sarimaike.

21“Pakimo, ŋei togole mane eŋe tebe kowakine ma more, eŋine matinane diyamine ma warekaki, aboŋ kine kineine maineka payake. 22Ŋo, silu? Ŋei togogole maneŋo sari ge more yuwan-kaki paki, tebe kowakine kawali wane aboŋ yewa korop omakaware more, ŋei natne matoke eboniyake.

23“Ŋei mane eŋe kima mi okan naniyakeŋo, eŋe ŋaba okan naniyake, ŋo ŋei mane eŋe qesiŋnane more, lama mi qeturaŋ-oniyakeŋo, lama esop-ongi, yau yaup ariwarekei.”

Asu Qotkoine Eŋe Koso Zinge Sariyake

24“Asu qotkoine maneŋo ŋei mane wane kotino ŋine sakesiyake, saket more ari kepe yaup papaino mat mane maratka ma mere kito okanbe ra, mat wane zuwage arike, ari mageki boriki, oŋomka iwa yale rayake, ‘Na koso matne qelige sarile, yewao zinge ariwe.’ 25Yale raki pakimo, koso zinge ariyake, ari kakimo, mat yewa mo sino kito maulukwareu, dun dun payake. 26Pakimo, eŋe koso zinge ari more, asu zok qotkokoine sewen (7), eŋine yale mida, eŋe zok bori worine, eŋe ebuki sari mat wekuwoka mere kito okangei. Pakimo, ŋei yewa eŋe alakan nigatnemde borike, wane naso yewao yemo zok manerop borilukmaike.”

Wet Pesek Wele

27Yesu eŋe don yale ra okorakiso, ŋei ŋerep magu suwaine eŋane keuweno ŋine ŋerep maneŋo boka olale rake, “Ŋerep pa geu more, ŋamu gumegange, eŋe oi bakomŋone okaniyake!”

28Rakiso, Yesuŋo olale rake, “Mida! ŋei ŋereppa Kaisale wane don dere more, tewek okanmami, edo maine oi bakomine okanikei!”

Ŋei Natne Eŋe Yesuŋo Masi Togole Maki Kaikei Wane Sorinkakoi

29Ŋei ŋerep magu suwaine eŋe Yesu wano sari watke metpi, Yesuŋo iwa yale edange, “Naso iwa wane ŋei ŋerewekoune eŋe ŋei ŋerep qotkoine! Eŋe masi togole kaikei wane qeson okanmami. Ŋo, na masi togole mane mi sikanonbe kaikei, weku Yona wane masi togole eyamo sikanongale. 30Numa yewaka, Kaisale wane qelit ŋei, Yonaŋo Niniwe matko ŋei ŋerep magu eŋane qakaene okange, ŋo naso iwao ŋei ŋerep magu gemami, ŋinane qakaŋine yemo, Ŋei Wawainane Gipole okanmaike. 31Wano wanok nasoo, yemo qelaŋ ŋerep waom Seba kepe nat paromine raiwo okenŋine, oŋo ŋei ŋerep magu naso iwao gemami, eŋerop wiye okora more kine ŋine tilekeyake. Onoka wane, ŋerep yewa eŋe kepe nat paromine lolike sari more, ket more Solomon wane dereret wele yewa detke. Ŋo kine kine maneŋo Solomon manerop yuwankamaike, yemo iwa na ŋidanmaile. 32Wano wanok nasoo, Niniwe matko ŋine qelaŋ ŋei ŋerep eŋe boaŋ wiye okora more, naso iwao ŋei ŋerep gemami, eŋerop kineene tilekkei. Niniwe ŋei ŋerep eŋe Yonaŋo don edangi, dere more borikineene qeliŋgoi, eya wane eŋe wetene maingekoi, ŋo, na ŋine ŋidanmaile, kine kine mane iwa, yewaŋo yemo Yona manerop yuwankamaike!” Eya mo Yesu eŋe eŋine rake.

Wet So Sola Wane Kiwa

33“Mane eŋe lam kuwake more, kine kine qekatno mi motki okora okanmaike, me laseŋo mi kito raukki met okanmaike. Mida! Eŋe zake kutno kitoki, mere mat kotino qelaŋangi, ŋei eŋe qelaŋan yewa ka more mat koto maine wa okanmami. 34Deŋone yewamo wet so solaŋonane kiwaine, deŋone maine mesiyakeo, wet so solaŋone yewa korop qelaŋanŋo wakesiyake, ŋo, deŋone borimaike, yemo wet so solaŋone eyamo korop panaman kitomaike, 35eya wane ge kotoŋono qelaŋan pamaike, yewa panaman kitoyakane diyamine maikene. 36Ge wet so solaŋone korop yewa qelaŋanŋoka rokopke paki, wet so solaŋone sisine mane mi panaman kitomaikeo, yemo wet so solaŋone yewamo korop lam wane qelaŋane yale qelaŋan wareyake.”

Yesuŋo Kaisale Papa Togon Welaine ŋei Parisi So Skribe Don Edange

37Yesu eŋe don raki qoekiso, Parisi maneŋo ŋara eŋerop neyakane newankake. Pakiso, Yesu eŋe ari eŋerop zakeo metkoik. 38Yesu eŋe metine mi sau sauk, ŋara zakeo wa mere ŋara nekoik wane Parisiŋo kaki mi menaŋge. 39Pakiso, Waomŋo olale rake, “Parisi ŋine laseŋine so kapŋine solaineka sauk okanmami, ŋo, kotoŋino yemo kobu, bailalaŋ, so borikineŋo watke pamaike. 40Ŋine qelaŋ ŋei! Kaisale eŋe kine kine solaineka make, ŋo, kotino wa mo weneŋ mi make me? 41Ŋine siluŋ lase ŋine so kap kine kine ŋine kotino metmaike, yewa aboŋene midaine, eŋe ebon-warekeiwo, yemo ŋinano kine kine korop Kaisale wane kaitko libe qewareyake.

42“Yai, Parisi, ŋine kaet ŋungep me? Ŋine kine kine yauwine siweŋ arerewa, garem kumusi so zaguk natne 10, yewa ŋine maine Kaisale man okanmami, ŋo kine kine wele ra makoboe, so wetŋo Kaisale malipka malipka, yewamo mi okan okanmami. Ŋine iwa okanbi paki, mane wa weneŋ okangeiwo, yemo menageyake.

43“Yai, Parisi, ŋine kaet ŋungep me? Ŋine Yuda lewa lewaŋ urumgo kito met met lewine ŋei ŋerep kaitkoka mesikei wane ra okanmami, so sobeŋ suwaino ŋei ŋerep edo ŋune more mawa ŋunikei wane wetŋine suwaine pamaike. 44Yai, Parisi, ŋine kaet ŋungep me? Ŋine deŋesere mane zariŋine midaine, ŋei ŋerep eŋe mi dereret keuwoka gesoke arimami, yale.”

45Yesuŋo yale rakiso, Kaisale wane ra rokop don welaine ŋei, Skribe, maneŋo olale rake, “Kito ŋebo ŋebon, ge don yewa ranom ŋene weneŋ ŋengumaike!”

46Pakiso, Yesuŋo mainge olatke, “Yai, Skribe ŋine weneŋ kaet-ŋungep me? Ŋine aboŋ umatne suwaine ŋei ŋerep eŋane kuteno motpi, edoka urata suwaine tewek okanmami, ŋo ŋidom meteŋine mane bira more, aboŋ umatne yewa mi qesiŋone tewek okanmami. 47Yai, Skribe, ŋine kaet ŋungep me? Ŋabokopŋine eŋe Kaisale wane qelit ŋei engu matali okan onwarekoi, ŋo ŋine propet eŋane deŋesereene kibi ma okanmami. 48Ŋine yale okane more, ŋabokopŋine masi qotkoine okangoi, eya wane detpi menaŋ okanmaike, yewa ŋidomka ŋei ŋerep sikan onmami, ŋabokopŋine eŋe Kaisale wane qelit ŋei enguwi seukkoi, ŋo ŋine deŋesereene kemgo maulukkoi. 49Kine yalewa wane, Kaisaleŋo mokaka Kaisale wane qelit ŋei eŋane weteno motki, don iwa yale qekoi, ‘Na boaŋ eŋano qelit ŋei so aposolo biraonbe arikei, pakimo eŋe boaŋ natne engukei, ŋo natne engu esoponbi arikei.’ 50Pakimo, mokaka qeli so kepe kito epotke, yewao ŋidoka Kaisale wane qelit ŋei engu sakoi, eya wane turuŋine eyamo ukude naso iwao ŋei ŋerep gemami, eŋano makokeyake. 51Mokaka, Abel seukke, yewa ŋine sari mage Zekaraiya, eŋe Kaisale wane zake so Kaisale wane Urum Kobekine, yewa wane keuwetno qeu seukke. Na welekatne ŋidanbe detpi, kawali yewa qe sarikoi, eya wane turuŋine eyamo ukude naso iwao ŋei ŋereppa gemami, ŋinano korop makok wareyake!

52“Yai, Skribe, ŋine kaet ŋungep me? Ŋine dereret urum madetine qeko qekok wane kiine ma waluke magemami, ŋine ŋinŋine eyamo madet lalage waket okanmami, pakiso, ŋei ŋerep natne edo wakesikei wane okanbiso, ŋine leŋon okanmami!”

53Pakiso, Yesu eŋe mat qelige erinat waketke, waketkiso, Kaisale papa togon welaine ŋei, Parisi so Skribe eŋe Yesu solaino qe more don gereune rakoi, so qeso qeson loutne qesonka liwek-kakoi. 54Liwekka more aŋaineŋo don mane ra mataliki ka more dongo birakaikei wane lom kiririŋ makoi.

Zur Zeit ausgewählt:

Luka 11: onsNT

Markierung

Kopieren