Luka 10

Yesu Eŋe Ŋei 72 Biraonge

1Pakiso, Yesu eŋe eŋine baŋ mat suwaine me nigatne ariwareke, eya ŋei 72 ma wakonone more, eŋe etkeka etkeka alakane matko matko arikei wane biraonge. 2So eŋe eŋine dokoine eya edane rake, “Euwo ŋara loutne mo wele more posimaike, ŋo ŋara wele mama wane so pei peik wane urata ŋei yemo loutne midakaka, eya wane ŋei eŋe dalino ŋara wele peikwarekei? So eya wane ŋine ŋara wele mama wane meŋenkau, ŋara eu welaine oŋom urata ŋei ŋara wele peikkei wane ma wakone biraoniyake. 3Ŋine ariu! Na ŋine kasi qotkoine eŋane keuweno bira-ŋunmaile, 4Ŋine kine kine iwa yale misuk maikei, wesi me numa kite me kiye kawet. Ŋine dumao ari ŋei ŋerep korop maratonbi paki mo kaiwe maine me sakoka rarapko yau yaup misuk edanikei. 5Naso maneo ŋine urum mane waikei wane, ari more alakane mat welaine edanikei, ‘Mat iwa wane kotino ŋei ŋerep ŋinano peyamŋo payake!’ 6Ŋei peyamine maneŋo urum yewa geki, ŋinane peyam don eya maine eŋano payake. Ŋo, ŋei peyamine maneŋo urum yewa mi geki, ŋinane peyam don eya yeine koso ŋinŋino zingeyake. 7Ŋine urum me mat peyamine eya wekuwoka mesikei, mat welaine eŋe ŋine kine kine ŋibonbi maine nekei. Onoka wane? Ŋo urata ma more lewine ŋei eŋe maine mayake. Urum weku yewa wane kotinoka mesikei, ŋine urumgo urumgo misuk lolike gekei. 8Naso maneo ŋine mat suwaine maneo ari lotke more, ŋei ŋerep qesononbi edo raikei, maine iwa saket mere pa wiye okanbi, mat yewa metpi, so eŋe ŋara kine kine ŋibonbi nekei. 9Mat yewao ŋine zoma ŋei ma menaŋone more, iwa yale edane raikei, ‘Kaisaleŋo dalino waremaike, eya mo ŋinane osoŋino lotkemaike.’ 10Ŋo, ŋine mat mane edo ŋinane don mi dere more ŋinerop mi mesikei wane rauso, eya ŋine duma keuno okora iwa yale edanikei, 11‘Ŋene mat wane nalek kiyezo ŋine saukŋem ketki, ŋine masi iwa ka more iwa yale desikei, ŋene masi iwa okanŋem mo Kaisaleŋo ŋinerop eya mo ŋaba okanmaike, ŋo, ŋine dere detsoroke detluke detpi, Kaisale wane qeli ewe zonom so qeli qelaŋan, eya mo ŋinane osoŋino lotkemaike.’ 12Na wet qelot don ŋidangale, yemo iwa yale, naso qoi qoino eyamo baŋ, Kaisaleŋo wano wanok urata ma more, Sodom eŋane yamo sot wane turuŋ so wikile eya eŋe nigtne so ewekine eboniyake, ŋo ŋei ŋerep iwa ŋinane sot so borikinane turuŋ eyamo zok umatne so manerop eŋe baŋ mawa more ŋiboniyake!”

Mat Natne Mali Malip Midaka

13Yesu eŋe koso rake, “Korazin mat wane ŋei ŋerep ŋine qom borikine zok, so Betsaida mat wane ŋei ŋerep ŋine yaleka qom borikine, Yuda ŋei ŋerep eyaŋo naŋane masi togole ka more, wet dereretene mi maingekoi. Tire mat so Sidon matko, ŋei ŋerep eŋano naŋane masi togole yale ŋei maneŋo mane maki rap, yemo eŋe yalewaka qom borik okane, eya ka more kite qatokine me maloku supanagu more zepe solaeno tau metpi rap. Masi yewa yale eŋe ŋei ŋerep korop sikanonikei, mo eŋe soteenane qom borik maratka more sotene eya ŋadek-kamami. 14Naso kutno, Kaisaleŋo ŋei ŋerep korop wanok oniyake, Tire mat so Sidon mat ŋei ŋerep eya wikile nigatne eboniyake, ŋo, ŋine Korazin so Betsaida Yuda welaine, Kaisaleŋo baŋ wikile zok manerop eboniyake. 15Ŋo Kaperneyam welaine, ŋine wamo Kaisaleŋo ŋibuki qeliwo wa arikei me? Midakaka, Kaisaleŋo ŋine gerep sorao biraŋungi kesikei.”

16Yesu eŋe dokoine koso edange. “Ŋei maneŋo ŋinane don desiyakeo, eŋe naŋane don desiyake. Ŋo ŋei maneŋo ŋinane don waulukeyakeo, eŋe naŋane don baŋ yalewaka waulukkeyake. Eŋe na wauluk naniyakeo, eŋe Kaisaleŋo biranangi ketkole, eŋe waulukkeyake.”

Dokoine 72 Yesu Wano Zinge Arikoi

17Ŋei 72 eŋe Yesu wano zinge ari bakom kito mawa-nagukoi, so olale rakoi, “Waomze! ŋene masi togole kine mane kine mane ra makone, so asu qotkoine yale waka geŋone eŋetŋone edane more, esoponŋem arikoi!” 18Yesu eŋe eŋane don eya mainge edane more rake, “Mo sogino na Ŋei Borikine, eŋe qeliwo ŋine ketki kakole! 19Detpi! Na ŋine naŋane tungo biraŋune, more naŋane zonom eya ŋibonbe mo mawarekoi, eya wane ŋine koma so wame golaŋ maine kuteno gesokkei, eŋe maine ŋidotpi mi seukkei, ŋine ŋabaze Ŋei Borikine eŋane zonomine maine korop yuwankaikei. Ŋei ŋerep me osom me kine kine wakoniyake, eyaŋo ŋine maine mi matali ŋuniyake. 20So ŋine asu borikineŋo donze mo dere tewekmaike, yale rau paki, mawa mawaine me batneka misuk okanikei. So yale mida. Ŋine eŋetŋine mo qeliwo, Kaisaleŋo gege togon wane ekapko qeke, eya wane yemo maine batne okanikei.”

Yesu Eŋe Magainane Bakomine Kitoke

21Naso yewao, Asu Koboboineŋo Yesu wane kotino watke rokopkaki so bakom suwaine kito more rake, “Magak! Ge qeli so kepe wane Waom okanmaine! Na bakom golatmaile, ge ŋei kibi urum mi gekoi, eŋane dereretene medep nigatne yale, eya geŋone masi so kineŋone sikanon okanmaine. Ŋo, ŋei dereretene wawaine so suwaine eya geŋone kine so masi tanikŋone, eya mi sikanone more mawaluke mot-onokanmaine. O, Magak, masi eya yemo ge geŋone simile so dereretŋonane okan okanmaine.”

22So Yesu eŋe koso takotke more dokoine edane ra qelaŋanmaike, “Magak, eŋe na kine kine korop ninwareke. So, ŋei maneŋo Kaisale wane Gipole mi detlukkamaike. Magak Kaisale eŋe oŋom eŋineka Gipole detlukkamaike. Ŋei maneŋo Magak Kaisale eŋe yalewaka mi detluk-kamaike. Kaisale wane Gipole eŋe oŋom eŋineka Magak detluk kamaike. Eya wane Kaisale wane Gipoleŋo ŋei mane eŋe eŋane simile kaki, eŋe oŋomka maine Magak sikan-kayake.”

23Pakiso, Yesu eŋe dokoine eŋano zinge more, eŋe enŋeneka edange, “Kine kine iwa wakongi kamami, eya ŋei eŋe kaikei, yemo ŋei eŋe bakom suwaine kitokei, 24Ŋo Kaisale wane qelit ŋei propet so ŋei waom lou loutne sogino gekoi, eŋe kine kine iwa ŋine kamami, eya kaikei wane onge, ŋo eŋe mi kakoi, eŋe ŋaŋaekoi. Kine kine iwa wakongi, ŋine detmami, eya eŋe desikei wane okange, ŋo eŋe ŋaŋaekoi so mi detkakoi.”

Samariya Ŋei Maine Mane Eŋane Don Kisi

25Naso maneo, Kaisale papa togon welaine ŋei mane, Skribe, eŋe Yesu wano ari liwek kayakane okange, so iwa yale qesonkake, “Kito ebo ebon, na daleo okane more gege togon maikale?”

26Yesu eŋe mainge qesonka rake, “Kaisale wane ekapko ra rokop donŋo daleo ramami? Ge ekap eya mane dapore detlukka ra qelaŋanmaine?”

27Ŋei eya eŋe don mainge olale rake, “ ‘Ŋine wet dereretŋine korop so oŋa oŋa ŋine korop so zonomŋine korop Waom Kaisaleŋine eŋane simin ŋungi ma qotkau!’ So ‘Ŋine ŋidomka wetŋineŋo ma qotnagu gekei, yale waka ŋei ŋerep korop wetŋineŋo ma qotonikei.’ ”

28Yesu eŋe mainge olale rake, “Ge koboboine ramaine, ge kine kine eya makoboe more, gege togon marat kaikene.”

29Ŋo, Kaisale papa togon welaine ŋei eyaŋo eŋine eŋetine ma wa nagu Yesu qesonkake, “Ŋene ŋei ŋerep wetzeŋo ma qot-ongene, eya mo ma okankaikene?”

30Yesu eŋe iwa yale don kisi mane mainge olale rake, “Naso maneo, ŋei mane eŋe Yerusalem mat suwaine qelige more, Yeriko matko ariyakane ariki, so kobu ŋei natneŋo ŋei mane ma qe more, laplapine ra barake qeliŋkau, seukeyakane okange.

31Paki naso yewao, Kaisale wane mosop ŋei, pris mane eŋe ari kaki ŋei eya numao pake, ŋo eŋe yuwanka more wazaino duma natka ket qe wazae ka more arike, 32yale waka, ŋei mane Lewi tegoo ŋine dumao ket more, ŋei eya ka more, duma natka ket wazainoka arike. 33Ŋo ŋei qelaŋ, Yuda ŋadino ŋine mane eŋe Samariya matko ŋine sari, ŋei eya kaki paki, qomine borike, 34eŋe eŋano ari more, kubetine kelok so wainŋo sauke more, laplapŋo piseke, pakiso eŋe ŋei eya eŋine horsi kutno mawa biraka iwenka ari more, lobo urum maneo biraka more warekake. 35Qaeki, eŋe wesi silwa etke ma more, lobo urum ware ware mane, mane more olatke, ‘Ge ŋei eya warekaikene, na mat maneo ari urata ma more, iwa zingekale, ge eŋane ra more, aboŋ so ŋara koso takotke qolekene, eya na iwa zinge sari maine qole ganikale.’ ”

36Yesuŋo don kisi iwa raki qoekiso, eŋe koso Kaisale papa togon welaine ŋei eya qesonka rake, “Ge ranom detpe, kobu ŋei eŋe ŋei qekoi, ŋei eya eŋane kimaine ma? Pris me Lewi me ŋei qelaŋ, Samariya matko ŋine?”

37Kaisale papa togon welaine ŋei eŋe mainge rake, “Samariya qelaŋ ŋei, eyaŋo eŋe qesiŋkake.”

Yesuŋo eŋe olale rake, “Ge ari eŋane masi mogat kaikene.”

Yesu Eŋe Marta So Mariya Erane Matko Kulit Geke

38Pakiso, Yesu eŋine so dokoine eŋe numaene arikoi, arimage mat maneo lotkeu, so yewao ŋerep mane, eŋetine Marta, oŋo marat one more yai ososok okanone more iwenongi matko waketkoi. 39Eŋe qaine mane, eŋetine Mariya eŋe Yesu wane kino pese ket mere don maine kisi me qeli ewe zonom wane kine eya kito olatki detke. 40Marta eŋe urata suwaine maki paki, dere mezet okange, pakiso Yesu wano ari olale rake, “Waomne, qaneŋo mi qesiŋnangi, naeka zok urata suwaine mamaile, eya mi kamaine me? Ge olatnom sari qesiŋ nangep!”

41Waomŋo mainge olale rake, “Marta, Marta! Ge umat kine kine loutne eya wane zok dere mezet okanmaine. 42Ŋo, ge kine kine weku eya wane, yemo niget ganmaike. Mariyaŋo yemo yeye weku mane eya wane wetkemaike, wane mo ŋei maneŋo eŋano ŋine maine mi omakkayake.”

Zur Zeit ausgewählt:

Luka 10: onsNT

Markierung

Kopieren