Luka 9

Yesu Eŋe Dokoine 12 Biraonge

1Naso yewao, Yesu eŋe dokoine 12 edora more qeduguongi, eŋe eŋine tungo maine asu qotkoine esopone more, zoma ŋei ma menaŋonikei wane zonom ebone more biraonge. 2Kaisale eŋe dalino waremaike, eya Yesu eŋe dokoine ra qelaŋane, so zoma ŋei ma menaŋonikei wane done edange. 3Eŋe iwa yale edane rake, “Ŋine kine kine iwa yale misuk ma arikei, toka, numa kite, ŋara, wesi, takot mane. 4Ŋine mat maneo ari lotke more, ŋei ŋerep qesononbi, edo raikei, maine iwa saket mere pa wiye okanbi, mat yewa wane kotinoka mere pa wiye okanikei. 5Ŋo mat maneo edo ŋinane don mi dere more, ŋinerop mi mesikei wane rauso, ŋine mat yewa qelige more, kiye ŋino nalek yewa saukeu ket metki so, eŋe masi eya ka more eŋe desikei, Kaisaleŋo mo eŋerop ŋaba okanmaike.”

6Pakiso, dokoine eŋe matko matko ari more, mat louloutne eyao kisi maep don ra qelaŋane more, zoma ŋei ma menaŋ-ongoi.

Herot Eŋe Dere Qeka Okange

7Naso yewao, Yesu eŋe kine kine maki wakone arike, eya kepe ware ware Herot eŋe detware more, dere qeka okange, eya wane ŋei ŋerep natne eŋe Yesu wane rakoi, Yohane doku tau tauŋo mo wisikae wiyeke. 8Ŋei ŋerep natne eŋe rakoi, Elaiya eŋe wakonge, ŋo ŋei ŋerep natne eŋe rakoi, Kaisale wane qelit ŋei propet sogine gekoi, eŋano ŋine maneŋo wisikae wiyeke. 9Ŋo, Herot eŋe rake, “Yohane doku tau tau eya mo sogine noŋo ebine kitatkole, ŋei iwa eŋe kine kine ma wakongi detmaile, eŋe ma?” Herot eŋe numa mane Yesu marat kayakane ziyaŋkake.

Yesu Eŋe Ŋei Ŋerep 5,000 Ŋara Gumeonge

10Pakiso, Yesu wane dokoine eŋe mo matko matko ariwarekoi, eŋe zinge sariso, koso Yesu wano lewage more, don kisi urata kine kine makoi, so kisi maep don magu edangoi, eya wane olatwarekoi. Olatpi qoekiso, Yesu so dokoine enŋeneka Betsaida matko arikoi. 11Ariuso, ŋei ŋerep magu eŋe don dere more mogatone arikoi, eŋe Yesu wano ariuso, eŋe maratongiso, Kaisaleŋo dalino waremaike, eya Yesu eŋe edane more, zoma ŋei ŋerep ma menaŋonge.

12Kepe zinge kere qoeyakane okangiso, dokoine 12 eŋe Yesu wano sari olale rakoi, “Kepe iwa ŋei midaino, ge magu iwa edane biraonnom, eŋe mat osop mere arimami, yewao ari more, ŋara so kulu papa marat kaikei.”

13Ŋo Yesu eŋe iwa yale edange, “Ŋido ŋara ebonikei!”

Eŋe mainge rakoi, “Ŋei nau! kasap nigatne 5 so zawon etke pamami, ŋene maine ari magu suwaine eŋane ŋara qolekene me? Ŋedannom desikene.” 14Ŋei 5 tausen yewa metkoi.

Yesu eŋe dokoine edane rake, “Ŋine ŋei ŋerep maguine maguine mapoke biraonbi, pese ket touk kutno metpi, magu weku ŋei ŋerep 50 okaniyake.”

15Dokoine eŋe ŋei ŋerep mapoke biraonbi qoekiso, 16Yesu eŋe kasap mete mane so zawon etke ma more qeliwo potki waki Kaisale wane bakom kito more, kasap so zawon eya mapoke more, dokoine ebongi, damo qe ŋei ŋerep magu yewa ebonwarekoi. 17Paki, ŋei ŋerep magu yewa eŋe korop neu ŋatene qe rokoponwareke. Pakiso, dokoine eŋe ŋara nekoi wane tutule eya qedugu more rosa 12 yale mau ket watke more metke.

Petoro Eŋe Yesu Wane Kine Ra Qelaŋange

18Naso maneo, Yesu eŋe Kaisale meŋenkake, dokoine eŋe eŋano sari maratkau, so Yesu eŋe qesonone rake, “Ŋei ŋerep magu eŋe naŋane ma noramami?”

19Eŋe iwa yale mainge olale rakoi, “Natne edo ge Yohane doku tau tau goramami, ŋo natne edo ramami, ge Elaiya, ŋo, natne edo ramami, Kaisale wane qelit ŋei propet mo sogino gekoi, eŋano ŋine mane eŋe mo koso wisikae wiyeke.”

20Yale rauso, eŋe koso enŋene qesonone rake, “Ŋo, ŋidom, yemo naŋane kine dalino ramami?”

Petoroŋo mainge olale rake, “Ge Mesiya! Kaisaleŋo biragange!”

Yesu Eŋe Seuke More Koso Wisikae Wiyeyakane Rake

21Yale raki so Yesu eŋe Petoro wane don eya ŋei ŋerep mane koso edo yau yaup mi edanikei wane ratogole rawet-onge. 22Rawet-one more, Yesu eŋe koso edane rake, “Ŋei Wawainane Gipole wikile suwaine desiyake. Yuda ŋei suwaine, so mosop ŋei ŋetne so Kaisale wane papa togon welaine ŋei, eŋe korop ŋadekka more qeu seukeyake, ŋo kaiwe mama karewe yale pa more, koso Kaisaleŋo ma wirikkaki, wisikae wiyeyake.”

23Yesuŋo dokoine korop edane rake, “Ŋine natne na mogat nanikei wane raso, ŋine ŋinŋine simileŋine eya korop mau ketwarekiso, ŋine wikile desikei wane eweke ariuso, eŋe na nekukei, yale waka ŋine baŋ ŋingukei. 24Ŋei mane eŋe wikilane kaetkaki, solaine ma walukeyakeo, eŋe gege wane numaine siuk lukayake. Ŋo ŋei mane eŋe naŋane ra more seuke-yakeo, ŋei yewa eŋe gege togon marat kayake. 25Ŋei mane eŋe kepe aboŋ kine kine korop ma geyake, eya eŋe seuke more, gege bile maine mi maratkayake, i midakaka! 26Ŋei mane eŋe naso iwao ŋei ŋerep magu yewa eŋane keuweno ŋine, eŋe nae so naŋane kisi maep don rayakane gamu gamu okane geyakeo, Ŋei Wawainane Gipole eŋe ŋado Magakŋo eŋine tungo birakaki, aŋelo magu eŋerop qeli qeliŋka more sarikei, naso yewao eŋe ŋei eya don koboine baŋ maine mi olasiyake. 27Na welekatne ŋidanmaile. Ŋine natne mi seuke more wisikaka ge kau, Kaisaleŋo dalinora togole more wetke so waremaike, naso yewao eya baŋ wakongi kaikei.”

Yesu Sola Tanikine Mane Wakonge

28Soda weku qoekiso, Yesu eŋe Petoro, Yohane, Yakop ebukiso, enŋeneka bonaga maneo meŋenkaikei wane wa arikoi. 29Yewa meŋenkaki, Yesu wane kait tanikine qeinge more, kine mane okange, so lap lapine korop libe libe qe qelaŋane teine okange. 30Pakiso eyaka ŋei etke ere wakonbik, so Yesurop don aukoi, yemo Mose so Elaiya wakonbik, so 31erane qelaŋanetne suwaine zok wakonge, mo sogino Kaisaleŋo Yesu wane ra more eŋe Yerusalem mat suwaino seukeyakane birakake, eya Mose so Elaiya so Yesu aukoi. 32Petoro so kimatkine eŋe mo kulu pakoi, ŋo qelaŋan eyaŋo ma wirikongi wiye more, Yesu qelaŋanine so ŋei etke eŋerop okorakoik, eya ongoi. 33Ŋei etke ere okora Yesu birakauk, Petoroŋo Yesu olale rake, “Waomze! Ŋene iwa metŋem wekumane zok okanmaike, yale wane, ŋene siluŋ maine seli kise karewe maikene! Mane geŋane, mane Mose wane, mane Elaiya wane.” Petoroŋo eŋe kait masi eyaka more siminkaki, yaup rake.

34Pakiso, eyaka kezoŋ mane sari qekatongi, so kaetonge. 35Kezoŋ koto don mane iwa yale rake, “Yewa naŋane medep! Eŋe don kine kine ŋidaniyake, ŋine derelukkei! Eya wane na eŋe birakakole!”

36Don eya qoekiso, Yesu eŋe eŋineka okorake, okora more dokoine eŋe ŋei ŋerep mane kine kine eya wakonge, eŋe mi ra qelaŋan-ongei wane rawet-onge.

Yesu Eŋe Medep Asu Qotkoinerop Ma Menaŋkake

37Kepe qaeki Yesu eŋine so dokoine karewe bonagao ŋine ket ari, magu suwaine maratongoi. 38Ŋei ŋerep magu keuweno ŋine ŋei mane eŋe Yesu boka olatke, “Kito ŋebo ŋebonze! Na meŋen ganmaile, naŋane giponne qesiŋkanom! Eŋe naŋane giponne wekuku! 39Asu qotkoineŋo medep iwa wane kotino naso baŋem waket okanmaike, paki naso baŋem eŋe boka kito qotkoine zok okan mageyake, paki qise more, mekalekatine libeka aŋainoka saket qakki. Asu qotkoine eyaŋo zok manerop matalika okanmaike, so eŋe birakayakane rokop mi okanmaike! 40Na geŋane dokoŋone edo asu qotkoine eya esop kaikei wane togogoleka meŋenonbe, eŋe ŋaŋaemami.”

41Yesu eŋe don yewa dere more, ŋei ŋerep edane rake, “Ŋine korop mali malipŋine mida! Ŋine masi koboine mau, kuŋ qegoŋine okanmaike. Na naso darap ŋinerop gekale? Ma naso na umatŋine tewekale?” Yesu eŋe ŋei eya olale rake, “Ge medepŋone yewa naŋano ma sarinom.”

42Medepine eŋe sariki, asu qotkoineŋo qeki kepo ket rasuke, Yesu eŋe kaki paki, asu qotkoine esopka more, medep ma menaŋka more, medep eya magainano birakake. 43Ŋei ŋerep korop eŋe Kaisale wane ewe zonomine suwaine eya kau, oŋaene qaeke.

Yesu Eŋe Seuke More Wisikae Wiyeyakane Atak Mane Koso Edange

Pakiso, Yesu eŋe kine kine maki wakongi, ŋei ŋerep eŋe oŋaene qaekiso aukoi. 44Naso yewao, Yesu eŋe dokoine edane rake, “Na kine kine iwa ŋidanmaile, misuk nigetŋuniyake, ŋei edo Ŋei Wawainane Gipole ŋei ŋaba eŋane meteeno birakakei!” 45Ŋo, dokoine eŋe don eya wane kine mi detlukkoi, Kaisaleŋo don eya wane kine motkeke, eya wane eŋe mi detluke more, koso qesonka detlukkei wane kaetongi dere qeka okane more yeine qeliŋgoi.

Yesu Wane Dokoine Edo Don Auye Kitat Okan Nagu More Rakoi, “Maŋo Ŋei Suwaine”

46Naso maneo Yesu wane dokoine eŋe iwa yale kiyeke don auye kitat nagu okangoi, “Tego iwa ŋenano ŋine maŋo ŋetneze okaniyake.” 47Yesu eŋe eŋane wet dereretene dere ka more medep, nigatne mane keuweno ma more birakaki okorake. 48Pakiso eŋe dokoine edane rake, “Ŋei mane eŋe naŋane dereso, naŋane tungo medep nigatne iwa yale mapik kayakeo, eŋe na yalewaka mapik nane okanmaike. Ŋei mane eŋe na mapiknan okannmaikeo, eŋe Kaisaleŋo biranangi ketkole, eya eŋe yalewaka mapikka okanmaike. Ŋinane keuwo ŋine ŋei mane eŋe ŋinane ketkele geyakeo, eŋe ŋetne okanmaike.”

Ŋei Mane Mi Ŋaba-ŋoniyakeo, Eya Eŋe Maine Ŋenane Kimaze Koboine Okaniyake

49Pakiso, Yohaneŋo olale rake, “Waomze, ŋene kaŋem, ŋei maneŋo geŋane eŋetko ra, asu qotkoine esopkake, pakimo, ŋenane ŋadezo mi mogatŋone sarikimo, ŋene rawet kamaine.”

50Yesuŋo Yohane so dokoine natne edane rake, “Ŋine misuk rawet kaikei! Ŋei mane mi ŋaba ŋunmaike, eya eŋe ŋinane kimaŋine okanmaike.”

Samariya Wane Ŋei Ŋerep Edo Yesu Mawalukkakoi

51Kaisaleŋo Yesu maki qeliwo wayake nasoine mo bomile sariki so, Yesu eŋe dereretine maki togoleki, Yerusalem mat suwaino ariyakane okange, 52pakimo dokoine natne eŋe biraongi alakane arikoi, eŋe Samariya mat wane nat paromine mat mane yewao kine kine mawalukkaikei wane biraonge. 53Ŋo mat eya wane ŋeiine eŋe Yesu mateno mi wakesiyakane onge, yemo iwa yale, Yesu eŋe Yerusalem mat suwaino ariyakane okange, eya wane ŋei ŋerep eŋe Yesu mi qesiŋkaikei wane, ra wetkakoi. 54Pakiso, Yesu wane dokoine Yakop so Yohane ere masi eya wane detpik mi menaŋgi olale rakoik, “Waomze, ŋere Kaisale maine meŋenkate, eŋe ŋei ŋerep eya gerepŋo matalioniyake me?”

55Yesu eŋe erano zinge ra wetotkiso, 56Yesu eŋine so dokoine eŋe mat eya qelige koso mat maneo arikoi.

Ŋei Natne Eŋe Yesu Mogatkaikei Wane Rakoi

57Yesu eŋine so dokoine Yerusalem arikei wane numao arikoi, ariu ŋei mane eŋe sari Yesu olale iwa yale rake, “Ge mat yewao me yewao arikeneo, na weneŋ mogat ganikale.”

58Yesu eŋe mainge rake, “Tengo eŋe giweo pamaike, so naŋi eŋe matino pamaike. Ŋo, Ŋei Wawainane Gipole, eŋe yemo mat urum papaine midaine.”

59Yesu eŋe ŋei mane olatke, “Ge na mogat nannom!”

Ŋo ŋei eyaŋo rake, “Waomne detnannom alakan na matno magane dukka more baŋ zinge sari more mogat ganikale.”

60Yesuŋo mainge rake, “Ŋei eŋe gege togon mida, eŋe maine ŋei seuseuneŋo seuseune kimaene dukkaikei. Ge Kaisaleŋo dalino waremaike, eya wane don goŋo ari ŋei ŋerep ra qelaŋan onikene.”

61Ŋei mane eŋe Yesu iwa yale olatke, “Na ge mogat ganikale, ŋo gemaine na bira nannom alakan ari weŋem sotakne maulukone more, koso sari mogat ganikale.”

62Ŋo, Yesu eŋe mainge olale rake, “Ŋei maneŋo seki wane wiliŋa mayake, ŋo, eŋe zinge ŋadino pot okanmaikeo, ŋei yalineŋo Kaisale wane urata maine mi wareyake so mayake.”

Zur Zeit ausgewählt:

Luka 9: onsNT

Markierung

Kopieren