यूहन्ना 11

लाजरसके मौत

1बेथानियाँ गाँवमे लाजरस नामके एकटा आदमी रहै जे बहुते बेमारी पडी गेलै रहे। लाजरसके बहिनके नाम मरियम आर मार्था रहै। 2यी उहे मरियम छै जे पाछु प्रभुके पैरीमे गमकौव्वा तेल ढारीके ओकर पैरीके आपन केश ल्याके पोछल्कै रहे। एकरे भ्या लाजरस बेमारी रहै। 3इहे ल्याके यी दोनो बहिन येशूके यी खबर भेजल्कै, “हे प्रभु! जकरा तुहें प्रेम करैछ, ऊ बेमारी छै।” 4यी खबर सुनिके येशू कहैल्कै, “यी बेमारीके अन्त मौत नैहैतै, मगर यी बेमारी इहे ल्याके भेलै कि परमेश्वरके महिमा प्रकट हुऐ। ताकी एकरे द्वारा आदमीसब हमे, परमेश्वरके बेटाके भी महिमा कर्तै।” 5येशू मार्था, ओकर बहिन मरियम आर लाजरसके बहुते प्रेम कर्ते रहै। 6तैय्योपर लाजरस बेमारी छै सुनिके भी येशू जते रहै ओत्ते आरहौ दी दिनतक रुकी गेलै। 7दी दिनके बाद ऊ चेलासिके कहैल्कै, “ले, आब अपनासब फेर यहूदिया प्रदेशमे घुमिके चल” (बेथानियाँ जते लाजरस रहते रहै उटा यहूदिया प्रदेशके एकटा गाँव रहै)। 8चेलासब ओकरा कहैल्कै, “गुरुजी, कुछु दिन पहेला ही यहूदी आदमीसिके अगुवासब तोरा पत्थल ल्याके जान मारैके कोशिश कर्ते रहौं आर कि फेर तुहें ओथै जैले चाहैछ?” 9येशू जबाब देल्कै, “कि दिनमे बार घण्टा नैहैछै? दिनमे घुमफिर करेवाला आदमीके ठेस नैलागैछै, कहिनेकी ऊ सुरुजके उजेत देखैछै। 10मगर जे कोय रातके अनहारमे चलैछै, ओकरा ठेस लागैछै, कहिनेकी ओकरलगत उजेत नैहैछै।” 11एतनें कहेलके बाद येशू फेर ओकरासिके कहैल्कै, “आपनसिके दोस्त लाजरस निनमे छै, मगर हमे ओकरा निनसे जगाबैले ओत्ते जैबै।” 12चेलासब ओकरा कहैल्कै, “प्रभु! यदि ऊ निनमे छै ते ऊ जल्दीये ठीक भ्याजैतै।” 13येशू लाजरसके मौतके बारेमे कहैल्कै रहे, मगर चेलासब सोचल्कै कि ऊ सच्कोरे निनमे छै। 14सेल्याके येशू ओकरासिके साफ-साफसे बतैल्कै कि, “लाजरस मरि गेलै छे। 15तुहेंसब विश्वास कर कहिके तोरसिके लाभके लिए हमे ओत्ते नैहुऐके कारणसे खुश छियै। आब चल, अपनासब ओकरलगत चल।” 16तब थोमा नामके चेला, जे “जोडमा” भी कहलैते रहै ऊ दोसर चेलासिके कहैल्कै, “या, अपनासब भी गुरुजीके संगे मरैके लिए चल।”

येशू लाजरसके मौतमे से जिन्दा बनैल्कै

17जब येशू आर ओकर चेलासब बेथानियाँ गाँवमे पहुँचलै, तब येशूके यी पता चल्लै कि लाजरसके चार दिन पहलहै सारामे राख्ल गेलै छे। 18बेथानियाँ गाँव यरूशलेम सहरसे लगभग तीन किलोमिटरसे कम दूर रहै। 19आर बहुते यहूदी आदमीसब लाजरसके मरला पर ओकर बहिन मार्था आर मरियमके हिम्मत दियैके लिए ओकरसिकते ऐलै रहे। 20येशू आबैछै कहिके सुन्लके बाद मार्था येशूके रस्तहैमे भेट करैले गेलै। मगर मरियम घरहैमे रहलै। 21तब मार्था येशूके कहैल्कै, “हे प्रभु, तोरा एत्ते होना रहौं तब हमर भ्याके मौत नैहैतियै। 22मगर एखनिहौं हमे जानैछियै कि, तुहें परमेश्वरसे जे माँग्भ, परमेश्वर तोरा देतहौं।” 23येशू ओकरा कहैल्कै, “तोर भ्या फेरसे जिन्दा हैतौ।” 24मार्था ओकरा कहैल्कै, “हमे जानैछियै कि, न्यायके दिनमे जब सभे मर्ल आदमीसब मुर्दासे जिन्दा भ्याके उठ्तै, तखनी उहो मुर्दासे जिन्दा भ्याके उठ्तै।” 25येशू ओकरा कहैल्कै, “मुर्दासे जिन्दा करेवाला आर जीवन दिएवाला हम्हीं छियै। जे कोय हमरापर विश्वास करैछै, यदि ऊ मरि भी जैतै ते जितै। 26आर जे कोय जिन्दा छै आर हमरापर विश्वास करैछै, ऊ कहियो नैमर्तै। कि तुहें यी बातमे विश्वास करैछैं?” 27मार्था जबाब देल्कै, “हँ, प्रभु! हमे विश्वास करैछियै, तुहें ही संसारमे आबेवाला परमेश्वरके बेटा, ख्रीष्ट छह।”

28यी कहिके ऊ आपन बहिन मरियमके बोलाबैले गेलै, आर ओकरा अलगसे लज्याके कहैल्कै, “गुरुजी आबी गेलै छे, ऊ तोरा बोलाबैछौ।” 29यी बात सुनिके तुरन्ते मरियम उठिके येशूके भेट करैले गेलै। 30तखनतक येशू गाँवमे नै पहुँचलै रहे, मगर ऊ ओथै रहै जते मार्था ओकरसे भेट कैल्कै रहे। 31तब ऊ यहूदी आदमीसब जे मरियमके संगे घरमे रहै, आर ओकरा हिम्मत देते रहै, ऊसब देखल्कै कि ऊ तुरन्ते उठ्लै आर बाहार जैछै। सेल्याके ऊसब ओकर पाछु-पाछु गेलै, यी सोचिके कि ऊ कानैके लिए सारामे जैछै। 32जब मरियम येशू भेल जगहमे पहुँचलै ते, येशूके देखिके ओकर पैरीमे गिरिके कहैल्कै, “हे प्रभु, तोरा एत्ते होना रहै तब हमर भ्याके मौत नैहैतियै।” 33जब येशू मरियम आर ओत्ते आबेवाला यहूदी आदमीसिके कान्ते देखल्कै, तब ऊ बहुते व्याकुल भेलै। 34आर फेर गहरा दुःखके साथ ओकरासिके पुछल्कै, “तुहेंसब ओकरा कते गाडलहैं छे?” ऊसब जबाब देल्कै, “प्रभु आबिके देख।” 35तखनी येशू भी काने लाग्लै। 36सेल्याके यहूदी आदमीसब कहैल्कै, “देख, ऊ लाजरसके कतनें ढेर प्रेम कर्ते रहै।” 37मगर ओकरासिमेसे कुछु आदमीसब कहैल्कै, “अनराहके दृष्टि दिएवाला यी आदमी लाजरसके भी मरैसे बचाबे सक्तियै।” 38येशू फेर बहुते व्याकुल भ्याके सारामे गेलै। यी सारा एकटा गुफामे रहै। ओकर मुख एकटा बडका पत्थल ल्याके बन्द कैल रहै। 39येशू कहैल्कै, “उटा पत्थल हटा।” मगर लाजरस जे मरि गेलै रहे ओकर बडका बहिन मार्था ओकरा कहैल्कै, “हे प्रभु, एखनतक ते ऊ गेन्हाबे पाबै, कहिनेकी ओकरा मर्ल चार दिन भ्यागेलै छे।” 40येशू ओकरा कहैल्कै, “कि हमे तोरा नैकहैलियौ छे, तुहें विश्वास कर्भैं ते परमेश्वरके महिमा देख्भैं?” 41तब ऊसब पत्थल हटैल्कै। आर येशू उप्पर महर देखिके कहैल्कै, “हे परमेश्वर पिता हमे तोरा धन्यवाद दैछिहौं, कहिनेकी तुहें हमर बिन्ती सुनी लेलह छे। 42हमे जान्ते रहियै कि तुहें सभे दिन हमर बिन्ती सुनैछ। मगर एत्ते खडा भेल भीडके लिए हमे बडका आवाजसे यी कहैलिहौं छे, ताकी तुहें हमरा भेज्लह छे कहिके यी सभेको विश्वास करे सकै।” 43आर यी सभे बात कहिके येशू जोरसे पुकारीके कहैल्कै, “लाजरस, बाहार निक्लीके या।” 44तब मर्ल लाजरस उठिके सारासे बाहार निक्लीके ऐलै। ओकर शरीर एकटा लम्बा कफनके कपडासे लपेटल रहै आर चेहरा दोसर कपडासे लपेटल रहै। येशू ओकरासिके कहैल्कै, “एकर कफनके कपडा खोली दहैं आर एकरा चले-फिरे दहैं।”

येशूके मारैके षडयन्त्र

(मत्ती २६:१-५; मर्कू १४:१-२; लूक २२:१-२)

45येशूके कैल यी काम देखिके बहुते यहूदी आदमीसब, जेसब मरियमके भेट करैके लिए ओत्ते ऐलै रहे, ओकरासिमेसे बहुते यहूदी आदमीसब येशूपर विश्वास कैल्कै। 46मगर ओकरासिमेसे कुछु यहूदी आदमीसब फरिसी समूहके आदमीसिके लगत जैके येशूके कैल कामके बारेमे बत्या देल्कै। 47तब प्रमुख पुजारीसब आर फरिसी समूहके आदमीसब यहूदी आदमीसिके महासभाके बैठैल्कै आर कहैल्कै, “आब हमेसब कि करियै? कहिनेकी यी आदमी ते बहुते चमत्कार करैछै। 48यदि हमेसब ओकरा अहिने कर्ते रहैके अनुमति देबै ते सभेको ख्रीष्टके रुपमे ओकरापर विश्वास करे लाग्तै आर रोमी सेनासब आबिके परमेश्वरके मन्दिर आर हमरसिके आदमीसिके नाश करि देतै।” 49ओत्ते परिषदके सदस्यसिमेसे एकझन कैयाफा नामके आदमी रहै, जे उटा सालके प्रधान पुजारी रहै। ऊ ओकरासिके कहैल्कै, “तुहेंसब कुछु भी नैजानैछैं। 50आपनसिके सभे आदमीसब खतम हुऐसे बरु जनताके लिए एकटा आदमी मरैमे तोरसिके कल्याण छौ कहिके तुहेंसब नैबुझैछैं?” 51यी बात ऊ आपन इच्छासे नैकहैल्कै रहे, मगर उटा सालके प्रधान पुजारीके रुपमे, ऊ यी भविष्यवाणी कैल्कै कि येशू पुरा इस्राएलीसिके लिए मर्तै। 52मगर खाली ओकरसिके ही नै, ऊ परमेश्वरके आरहौ सन्तानसिके लिए भी मर्तै जे यी संसारमे अलग-अलग जगहमे छिरियैल छै, ताकी ओकरासिके एक जगहमे जमा करे सकै। 53सेल्याके उहे दिनसे यहूदी अगुवासब एक भ्याके येशूके जानसे मारैले षड्यन्त्र रचे लाग्लै। 54ओकरसिके षड्यन्त्रके कारण उहे समयसे येशू यहूदी आदमीसिके बीचमे खुलिके घुमना-फिरना बन्द करिदेल्कै। आर ऊ ओत्तेसे आपन चेलासिके संगे सुनसान जगहके नज्दिक एफ्राइम गाँवमे जैके रहे लाग्लै। 55यहूदी आदमीसिके निस्तार पावनके समय नज्दिक ऐल रहै, आर गाँव-गाँवसे बहुते आदमीसब पावनसे पहेला रिती-रिवाजके मुताबिक अपने आपके शुद्ध करैके लिए यरूशलेम सहरके मन्दिरमे गेलै। 56ऊसब येशूके खोज्ते रहै आर ओत्ते परमेश्वरके मन्दिरमे खडा भ्याके, ऊसब आपसमे एक-दोसरसे पुछे लाग्लै, “तोरासिके केरं लागैछौ? ऊ पावनमे ऐतै या नैऐतै?” 57प्रमुख पुजारीसब आर फरिसी समूहके आदमीसब येशूके गिरफ्तार करैके लिए यी आदेश देल्कै कि यदि ऊ कक्रहौ मिलै ते, ऊ तुरन्ते ओकरासिके यी बातके खबर करै।

Valgt i Øjeblikket:

यूहन्ना 11: KYVNT

Markering

Del

Kopiér