यूहन्ना 12

बेथानियाँ गाँवमे येशूके स्वागत

(मत्ती २६:६-१३; मर्कू १४:३-९)

1निस्तार पावनके छ दिन पहेला येशू बेथानियाँ गाँवमे ऐलै, जते ऊ लाजरसके मुर्दासे जिन्दा कैल्कै रहे। 2येशूके सम्मान करैके लिए ऊसब भोजके इन्तजाम कैल्कै। मार्था सेवा-सत्कारके काममे लाग्ल रहै। आर लाजरस येशूके संगे भोजन ख्यावालासिमेसे एकटा रहै। 3तब मरियम आधा लिटर जतनें शुद्ध किमती जटामसीसे बनैल गमकौव्वा तेल आनिके येशूके पैरीमे लगैल्कै, आर ओकर पैर आपन केश ल्याके पोछल्कै। गमकौव्वा तेलके सुगन्धसे पुरा घर भरि गेलै। 4प्रभु येशूके पाछु धोखा दिएवाला चेला यहूदा स्करियोत कहैल्कै, 5“यी गमकौव्वा तेल तीन स चानीके सिक्कामे बेचिके उटा पैसा गरिबसिके देतियै ते हैतियै।” 6यहूदा यी बात यी ल्याके नैकहैल्कै कि ओकरा गरिबसिके चिन्ता-फिकिर रहै, ऊ एरं कहैल्कै रहे कहिनेकी ऊ चोर रहै। पैसाके थैली ओक्रहै राखैले देल रहै आर ऊ थैलीसे पैसा चोराबै। 7येशू कहैल्कै, “एकरा कुछु नैकहैं, ऊ समयसे पहेला ही हमर शरीरके दफ्नाबैके तैय्यारीके लिए यी करैछै। 8कहिनेकी गरिबसब ते सभे दिन तोरसिकेलगत रहतौ, मगर हमे सभे दिन तोरसिकेलगत नैरहबौ।”

9जब आदमीसब सुनल्कै कि येशू ओत्ते छै तब यहूदी आदमीसिके एकटा बडका भीड ओत्ते ऐलै। ऊसब खाली येशूके नै मगर लाजरसके भी देखैले ऐलै रहे, जकरा ऊ मर्लमेसे जिन्दा बनैल्कै रहे। 10तब प्रमुख पुजारीसब लाजरसके भी जान मारैके योजना बनाबे लाग्लै। 11कहिनेकी लाजरस मुर्दासे जिन्दा हुऐके कारणसे बहुते यहूदी आदमीसब यहूदी आदमीसिके अगुवासिके अस्वीकार कर्ते रहै आर येशूमे विश्वास करे लाग्लै रहे।

यरूशलेम सहरमे येशूके आदरपूर्वक स्वागत भेलै

(मत्ती २१:१-११; मर्कू ११:१-११; लूक १९:२८-४०)

12दोसर दिन पावनमे आबेवाला आदमीसिके बडका भीडके पता चल्लै कि येशू यरूशलेम सहरमे आबेवाला छै, 13तब आदमीसब खजुरके ठ्यार ल्याके ओकर स्वागत करैले जोर-जोरसे हल्ला करिके जय-जयकार कर्ते निकल्लै,

“परमेश्वरके स्तुति कर! धन्य परमेश्वरके सामर्थ्यसे आबेवाला इस्राएलीसिके महाराजा।”

14येशूके एकटा गधाके बच्चा मिल्लै आर जहिने ही ऊ यरूशलेम सहरमे ऐलै, ऊ ओकरापर बैठ्लै। जेरं धरमशास्त्रमे लिख्ल छै, ओहिने ही भेलै:

15“हे यरूशलेम सहरके आदमीसब, नैडर।

देख, तोर राजा गधाके बच्चामे सवार भ्याके आबैछौ।”

16येशूके चेलासब तखनी ते यीसब बात बुझे नैसकल्कै। मगर जब येशू मुर्दासे जिन्दा भेलके बाद महिमामे प्रवेश कैल्कै, तब ओकरासिके सभे बात याद ऐलै कि जे कुछु भी येशूके संगे भेलै उटा ठीक ओहिने भेलै रहे जेरं कि धरमशास्त्रमे कहेल गेलै रहे। 17जे आदमीसब ऊ समयमे येशूके संगे रहै जखनी ऊ लाजरसके सारासे बोल्याके मुर्दासे जिन्दा बनैल्कै रहे ऊ आदमीसब दोसर आदमीसिके यी बातके विषयमे बतैते रहै। 18बहुते आदमीसब येशूसे भेट करैके लिए ऐलै, कहिनेकी ऊसब यी चमत्कारके बारेमे सुनल्कै रहे। 19फरिसी समूहके आदमीसब आपसमे कहे लाग्लै, “देख, हमेसब कुछु नैकरे सकैछियै, देखैछैं, पुरा संसार ओकर पाछु चले लाग्लै छे।”

येशू आपन मौतके भविष्यवाणी कैल्कै

20ओत्ते कुछु यूनानी आदमीसब रहै जे निस्तार पावनके दौरान आराधना करैके लिए यरूशलेम सहरमे ऐलै रहे। 21ऊसब गालील जिलाके बेथसेदा गाँवमे रहेवाला फिलिप लगत जैके बिन्ती कैल्कै, “हे हौ, हमेसब येशूके दर्शन करैले चाहैछियै।” 22फिलिप जैके अन्द्रियासके यी बात बतैल्कै, आर तब अन्द्रियास आर फिलिप दोनो झन जैके येशूके यी बात बतैल्कै। 23येशू ओकरासिके कहैल्कै, “हमे, आदमीके बेटाके महिमा प्रकट हुऐके घडी आबी गेलै छे। 24हमे तोरासिके सच कहैछियौ, जबतक गहुमके दाना माटीमे गिरिके मरै नैछै, तबतक ऊ असकल्ले रहैछै। मगर जब उहे दाना माटीमे गिरिके मरि जैछै ते, बहुते फल दैछै, हमरसंगे भी अहिने हैतै। 25कहिनेकी जे यी धर्तीपर आपन जीवन बचाबैके कोशिश कर्तै, ऊसब सच्चा जीवन नैपाबे सक्तै। मगर तुहेंसब जे हमर कारण आपन जीवन दैछैं, कहियो खतम नैहुएवाला जीवन पैभैं। 26कोय अगर हमर सेवा कर्तै ते ऊ हमर चेला बनक आर तब जते हमे छियै हमर सेवक भी ओथै रहतै। जे कोय हमर सेवा करैछै, हमर पिता ओकर कदर कर्तै।”

27“एखन हमे बहुते व्याकुल छियै। हमे कि कहियै? कि यी कहियै, ‘हे परमेश्वर पिता! पिडाके यी समयसे हमरा बचाब?’ नै, हमे एरं नै कहबै कहिनेकी इहे कष्ट सहैके लिए हमे यी संसारमे ऐलियै छे। 28हे परमेश्वर पिता प्रकट कर कि तुहें कतनें महिमामय छह।” उहे समयमे स्वर्गसे एरंको आवाज ऐलै, “हमे प्रकट कैलियै छे कि हमे कतनें महिमामय छियै आर हमे एकरा फेरसे प्रकट कर्बै।” 29ओत्ते जमा भेल आदमीसिके भीड यी आवाज सुन्ते रहै, ऊसब कहैल्कै, “यी बादलके गडगडाहट रहै।” दोसर कुछु आदमीसब कहैल्कै, “कोनो स्वर्गदूत येशूके संगे बोल्लै छे।” 30मगर येशू ओकरासिके जबाब देल्कै, “यी आवाज तोरसिके सहायता करैके लिए बोल्ल गेलै, हमर नै। 31संसारमे आदमीसिके फैसला करैके लिए परमेश्वरके समय आबी गेलै छे। येशूके द्वारा यी संसारके शासक शैतानके शक्तिके नाश करैके समय ऐल छै। 32मगर जब हमरा यी धर्तीपर से उठैल जैतै, तब हमे सभे आदमीसिके आपन लगत खिच्बै।” 33ओकर मौत केरंके हैतै कहिके, से बात संकेत दियैले ऊ एरंको कहैल्कै रहे। 34तब भीडके आदमीसब ओकरा पुछल्कै, “ख्रीष्ट सभे दिन जिन्दा रहतै कहिके हमेसब विधि-विधानसे सुन्लियै छे। फेर तुहें यी केरंके कहे सकैछह कि, हमे, आदमीके बेटा उप्पर उठैल जैबै? यी आदमीके बेटा के छै?” 35येशू ओकरासिके कहैल्कै, “आब कुछु देरतक उजेत#१२:३५ उजेत एत्ते येशूके “उजेत” संगे तुलना कैल गेलै छे। तोरसिके बीचमे छौ। जबतक उजेत तोरसिके संगे छौ तबतक आगु बढ्ते र, कहीं एरं नैहौ कि अनहार तोरासिके घेरी लौ। जे अनहारमे चलैछै, ऊ नैजानैछै कि ऊ कते जैछै। 36जबतक उजेत तोरसिके संगमे छौ, उजेत पर विश्वास कर ताकी तुहेंसब उजेतके सन्तान बने सक्हैं।” येशू यी बात कहिके ओत्तेसे चल गेलै, आर खुदके ऊसब आदमीसिसे नुक्याके राखल्कै।

यहूदी आदमीसिके अविश्वास

37ओकरसिके समनामे बहुते चमत्कार देखैलके बावजुद भी ऊसब येशूपर विश्वास नैकैल्कै। 38यी सेल्याके भेलै ताकी यशैया परमेश्वरके वक्ता जे कहैल्कै रहे ऊ बात सच भ्याजै। ऊ कहैल्कै:

“हे प्रभु, कोय भी आदमीसब हमरसिके सन्देशपर विश्वास नैकैल्कै,

आर कोय नैबुझैछै कि यी तोर पराक्रमी सामर्थ्य रहै।”

39ऊसब विश्वास नैकरे सकल्कै, कहिनेकी यशैया परमेश्वरके वक्ता धर्मशास्त्रके दोसर जगहमे लिखल्कै छे कि,

40“परमेश्वर ओकरसिके आँखके अनराह करिदेल्कै छे ताकी ऊसब देखे नैसकै,

आर ओकरसिके दिमाग बन्द करिदेल्कै ताकी ऊसब बुझे नैसकै।

नैते ऊसब हमर तरफ घुमि जैतियै आर हमे ओकरासिके ठीक क्या देतियै।”

41यशैया परमेश्वरके वक्ता यी बात इहे ल्याके कहैल्कै कहिनेकी ऊ येशूके भविष्यके महिमा देखल्कै रहे, आर उहे बातसब ऊ वर्णन कैल्कै। 42एतनें भेलके बाद भी यहूदी आदमीसिके अगुवासिमेसे बहुते यहूदी आदमीसिके अगुवासब येशूपर विश्वास कैल्कै, मगर फरिसी समूहके आदमीसब ओकरा यहूदी आदमीसिके सभाघरसे निकाली दियैके डरसे खुलिके आपन विश्वासके प्रकट नैकैल्कै। 43कहिनेकी ओकरासिके परमेश्वरके द्वारा मिलेवाला आदरसे बढिके आदमीके द्वारा मिलेवाला आदर बेसी प्यारा रहै।

विश्वास नैकरेवाला दोषी ठहर्तै

44येशू आदमीसिके भीडके जोरसे कहैल्कै, “जे कोय हमरापर विश्वास करैछै, ऊ खाली हम्रहै पर नै मगर हमर भेजेवाला परमेश्वरपर विश्वास करैछै। 45जे हमरा देखैछै, ऊ हमरा भेजेवालाके देखैछै। 46हमे उजेत बनिके यी संसारमे ऐलियै छे, ताकी हमरापर विश्वास करेवाला आदमी अनहारमे नैरहै। 47जे कोय हमर बात सुनिके ओकर पालन नैकरैछै ओकर न्याय हमे नैकर्बै। कहिनेकी हमे यी संसारके आदमीसिके न्याय करैले नै ऐलियै छे, मगर संसारके आदमीसिके बचाबैके लिए ऐलियै छे। 48जे हमरा स्वीकार नैकरैछै आर हमर वचन ग्रहण नैकरैछै, ओकर न्याय करेवाला हमर वचन छै जे हमे कहैलियै छे, उहे वचन संसारके अन्तके दिनमे ओकर न्याय कर्तै। 49कहिनेकी हमे खुद आपन अधिकारसे कुछु नैकहैलियै छे, मगर परमेश्वर पिता जे हमरा भेजल्कै छे, उहे हमरा आदेश देल्कै छे कि हमरा कि कहना छै आर केरंके कहना छै। 50हमे जानैछियै कि ओकर आज्ञापालन करना कहियो खतम नैहुएवाला जीवनके तरफ ल्याजैछै। सेल्याके हमे तोरासिके उहे बताबैछियौ जे परमेश्वर पिता हमरासे कहैछै।”

Valgt i Øjeblikket:

यूहन्ना 12: KYVNT

Markering

Del

Kopiér