Sawltakte 3
3
Peangbai Pasal khat Kidamsak
1Ni khat Peter le John sia thunget hun, nitak nai thum in Biakinn ah pai uh hi. 2Kongpi Hoi kicina munah a khan tawntung peangzaw pasal khat om hi. Biakinnpi ah a pai mite ii tung pan sum ngen tu in ama sia nisimin tua kongpi hui ah puakin kikoi hi. 3Peter le John sungtang tu a mu ciangin, bang khat po ama a piak tu in, ngen hi. 4Amate in pasalpa sia a tangtan in salh uh a, Peter in, “Hong en ta'n!” ci hi. 5Tua ahikom amate tung pan, na khat pawpo nga tu in, kimuanmawkna taw en hi. 6Ahihang Peter in, “Sum le paai nei ngawl khi hi, ahizong ka nei sia hong pia tu khi hi: Nazareth mi Jesus Christ min taw thoto in lampai in, ci in thu kong pia hi!” ci hi. 7Tua zawkciangin a khut ziatsang pan len in, dingsak hi. Thakhat thu in, pasalpa peangte le a siakmitte hat hi; 8ama sia kilawn in, a peang taw ding a, lampai tu in kipan hi. Tua zawkciangin, amate taw Biakinnpi sungah tum a, lampai in, kilawn in, Pathian pok hi. 9Mihon bup in, tuabang kalsuan a, Pathian a pok laitakin, mu uh hi. 10“Kongpi Hoi” kici Biakinn tumna a, khutdaw ngenpa ahi hunlam, a heak uh ciangin, ama tungah thupiang sia lamdang sa mama uh hi.
Biakinnpi sungah Peter Thusonna
11Tua pasalpa in Peter le John lenin, a om laitak, tua munah a om mihing theampo in Solomon ii Talaap a kicina mun dong del uh hi. 12Peter in mipite a mu ciangin, “Israel mipuite awng, banghangin hi tungtaang ah lamdang sa in, ko sia hong salh ngengu nu ziam? Ko ii vaangletna, ahibuale Pathianzia ka neina uh taw, hisia pa lampaisak thei hong sa nu ziam? 13Abraham, Isaac le Jacob te ii Pathian, ih taanghpupite ii Pathian in, a Naseampa Jesus sia Pathian piak minthanna pia hi. Noma in ama sia Jew lampuite tungah na aap uh hi. Pilate in ama suaktasak tu in, a khensat zawkciang zong, Pilate mai ah na nial uh hi.#Pu 3:15 14Ama sia thiangtho a, pha hi napi na nial uh a, ama taangin, mihing thatpa khat Pilate ii suatak a piak tu in, na ngen zaw uh hi.#Mt 27:15-23; Mk 15:6-14; Lk 23:13-23; Jn 19:12-15 15Tua hi a, nuntakna a pia pa, note in na thatlum uh hi. Ahitazong, Pathian in ama thina panin, phongto a, hi thu huvau ah, kote in tetti ka hi uh hi. 16Ama' min ii vaang in hi peangzaw pa thahatna pia hi. Na mu uhte le na heak uhte sia, ama ii min upna taw a kivawt hi; Na mu tek siat uh bangma in Jesus a upna in, ama damsak ahi hi.
17“Tu in ka mipui Israel te awng, note le na lampuite ii, Jesus tungah na ngamtat uhte, tel ngawl vai ahi hunlam hong he khi hi. 18Pathian in nidang lai pekin, kamsaang theampo ii muk panin, Messiah in a thuak kul tu hi, ci in a thu thangsak khol zo hi; tuaciang hi bangin tungsak hi. 19Tua ahiciang kisiik kik vun a, Pathian kung zuan vun, tua hile na mawnate hong kimaisak tu hi. Tuabang na hi uh le, 20Topa hong ompuina panin, thahatna hong piang tu hi, tuaciangin, no atu a kiteal kholsa Messiah ahi Jesus sia ama in hong paisak tu hi. 21Pathian kamsaang thiangthote ii khuangei hunlai a, a sonkhol sa bangma in, na theampo a kithaksua siat dong, ama in vantung ah om hamtang tu hi. 22Banghang ziam cile Moses in, ‘Na Topa Pathian in kei hong paisak bangma in, kamsaang khat hong paisak tu a, ama sia noma mite sung pan khat hi tu hi. Ama ii sep tu hong son thu theampo na ni tu uh hi.#Thkna 18:15-18 23Mihing khat pawpo in, tua kamsaangpa ci bang a ni ngawl sia Pathian mite sung pan kituam khenin kisusia tu hi’ ci hi.#Thkna 18:19 24Tuaciangin Samuel le ama zawkciang hong piangte pan kipan, thu son tu a nei kamsaang theampo in tu hun dongin a piang tawto thute son lai hi. 25Kamsaangte tungtawn a, Pathian kamciamte note atu ahi hi. Pathian le na taanghpupite thuciamna a siimte na hi uh hi. Pathian in Abraham tungah, ‘Na suan, na paalte tungtawnin, leitung mihing theampo thupha ka pia tu hi,’ ci hi. #Pian 22:18 26Tua ahikom note theampo in na ngitlo nate pan kikheal a, thupha hong piak thei natu in, Pathian in a Naseampa teal in note kungah hong sawl masa hi,” ci hi.
Valgt i Øjeblikket:
Sawltakte 3: SCB2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Siyin Chin Bible © Bible Society of Myanmar, 2016