Sawltakte 2
2
Thaa Thiangtho Hong paina
1Pentecost ni hong thet ciangin, thu um theampo mun khat ah kikhawm uh hi.#Thiam 23:15-21; Thkna 16:9-11 2Thakhat thu in, van pan a nging khat hong om a, vui nasia tak a vak ngawp ciang, a luum himhum bang hi in, amate tona inn buppi sia tua a nging taw kidim hi. 3Tuasia ciangin amate in leei taw a kibang meikuang mu uh a, tua munah a om mihing khat sim sia, tua meikuang in thutha hi. 4Amate sia Thaa Thiangtho taw kidim uh a, Thaa ii a pausak bangin, kampau dangte taw pau uh hi.
5Tua laitak leitung theampo pan hong pai biakna kin Jew te Jerusalem khua ah teang uh hi. 6Hi awnging sia a zaak uh ciangin, mihon khat hong kikhawm uh hi. Amate liinglawng ngawp uh hi. Banghang ziam cile thu umte ii pauna sia, amate tek ii kam taw za uh hi. 7Lamdangsakna taw amate in hi bangin ci uh hi. “Tu a bangin a pau mihingte sia Galilee mite ahi hi. 8Tua hikasap amate pau sia, eima kam tek taw ih zaak sia bangbang ziam? 9Eite sia Parthia, Media le Elam pan hikale, Mesopotamia, Judea le Cappadocia pan, Pontus le Asia pan, 10Phrygia le Pamphylia pan, Egypt le Cyrene taw a kinai Libya pan, pawlkhat Rome pan, 11Jew le Gentile te Jew biakna a suakte, tuaciang eite pawlkhat sia Crete le Arabia pan — hi napi ih mihing sim in eima kam tek taw Pathian nasep lianpi a sepna ih za tek hi!” 12“Hisia in bang thu ziam?” ci in lamdangsakna le lungdamna taw khat le khat kidongh uh hi.
13Ahizong pawlkhatte in thu umte sia nunau a, “Hi mihingte in zukham hi!” ci uh hi.
Peter ii Thu Sonna
14Tuaciang Peter in a dang sawltak sawm le khat te taw ding a, mihonte tungah nging takin thuson hi: “Jew minampuite le Jerusalem ah a teang note theampo awng, hong ngai tavun, hisia in bang thu ziam ci sia hong sonsak tavun. 15Hi lai a, mihingte sia no upmawk bangin, zukham hi ngawl hi. Tu laitak sia zingsang nai kua hi pheang hi. 16Tua hi zaw ngawlin, hisia in kamsaangpa Joel ii sonsa thu hi a:
17‘Hisia in ni tawpkhak
sang ciangin
ka vawt tu thu ahi hi,
Pathian in ci hi:
Ka thaa ka buak tu hi.
Na tapate le na tanute in,
keima thu thangsak tu uh hi.
Na khangnote in
mang mu tu uh hi;
Na khanghaamte in,
mang man tu uh hi.#Jol 2:22-32
18Hi hi, pate zongh numeite zongh
ka naseamte ngawngawn tung zongh ah
tua ni ciangin,
ka thaa ka buak tu a,
tuaciang amate in
keima ii thu thangsak tu hi.
19Van ah a lamdang laknate
ka vawt tu a,
leitung ah a lamdang nate
ka piangsak tu hi;
chisan, meikuang le meikhu ciikte
hong om tu hi:
20Ni hong mial a hong zing tu hi.
Tha in chi bangin san tu hi.
A lian a minthang Topa Ni
hong thet ma in,
tuabang hong piang tu hi.
21Tua zawkciangin, huna ngen a,
Topa a biakpui peuma
kingum tu hi,’ ci hi.
22“Hi kammalte ngai vun. Israel mipuite awng! Nazareth mi Jesus sia Pathian in ama tungtawnin a vawt nalamdang laknate le a lamdangte theampo hu in Pathian piak thunei pa tatak ahi hunlam kilangh hi. Noma mama in zongh, hi thu he nu hi, banghang ziam cile hi mun note sungah hi thu piang hi. 23Pathian in ama thuneina le tupna taw Jesus sia no khut sungah ki aap tu in zeak zo hi; tuaciang mimawte in, ama sia thinglamtee tungah na kilhsakna uh taw note in ama na thatlum zo uh hi.#Mt 27:35; Mk 15:24; Lk 23:33; Jn 19:18 24Ahihang Pathian in ama sia, a thite kawm pan phong kik a, thina vaang panin suaktasak hi, banghang ziam cile, thina in ama thong sungah a khumcip tu sia suak thei ngawl hi.#Mt 28:5-6; Mk 16:6; Lk 24:5 25Tua ahikom, David in ama huvau ah,
‘Topa sia a tawntungin
ka mai ah ka mu hi;
ama sia ka kungah om ahikom,
ngim ka nga buatu hi.#Ps 16:8-11
26Hi thu hangin lungdamna taw
ka kidim a,
tuaciang ka kammalte in
lungdamna taw kidim hi.
Tuaciang kei sia
a thithei ka hi hangin,
muanmawkna sungah,
thin muangin
ka tawlnga tu hi,
27banghang ziam cile,
nang in ka thaa sia
mithite khua ah
nong nusia buatu hi;
nang in na naseampa,
thaan sungah a muatcip tu in
nong oai buatu hi.
28Nuntakna lampi nong lak zo a,
tuaciang nangma nong ompuina in,
lungdamna taw nong kidimsak tu hi,’ ci hi.
29“Suapuite awng, a minthang ih taanghpupi David kumpipa thu sia thiangtho takin, ka son kul hi. Ama sia thi in kiphum hi. Ama thaan zongh tuni dongin, eima kungah om nginge hi. 30Ama sia kamsaang khat hi a, David ii suan sung pan khat sia, David bangma in kumpi khat a suasak natu, Pathian ii kamciam a piaksa ahi hunlam ama in he hi.#Ps 132:11; 2 Sa 7:12-13 31David in Pathian ii a vawt tu khat mukhol zo ahikom, Messiah thaw kikna thu, hi bangin son hi.
‘Ama sia mithite khua ah
kinusia ngawl hi.
a pumpi thaan sungah
muat ngawl hi.’
32Pathian in hi Jesus mama mithite sung pan phong a, ko theampo in hi thu ah tetti ka pang uh hi. 33Ama sia Pathianziatsang ah to tu in kiphong a, ama in, a Pa kamciam bangma in, Thaa Thiangtho saang hi. Tuaciangin tu a na mu uh na zaak uh sia, ama letsong kote tungah hong buaksuk sia ahi hi. 34Banghang ziam cile vantung ah a kaato pa in David hi ngawl hi, ama in,
‘Topa in ka Topa tungah:
Hi sung ka ziatsang ah,#Ps 110:1
35Na ngalte na peang nuai ah
peang ngakna bangin
kong koisak mateng in,
hong to ta'n,’ ci hi.
36Tua ahiciang Israel mite theampo ii telthiang tu thu in, hi Jesus thinglamtee tungah na kilh uh pa sia, Topa le Messiah tu a, Pathian vawt sa ahi hi!” ci hi.
37Tua mihingte in hi thu a zaak uh ciangin, nasia takin a thin uh ngim a, Peter le sawltak dangte munah, “Suapuite awng, bang law tu khu ziam?” ci uh hi.
38Na mawnate uh hong kimaisak a, Pathian ii tel, Thaa Thiangtho na saan natu in, note khat sim in, na mawnate pan kikheal nanak vun a, Jesus min taw tui kiphum tavun, 39banghang ziam cile Pathian kamciam sia, no le na tate le, a khualana ah a omte atu in a kivawt hi a, tuaciangin Topa Pathian ii ama kungah a samsa theampo atu ahi hi,” ci hi.
40Peter in amate tungah zolna le hanthotna kammal tam mama zangh a, “Hi mihing seksolte ii thuak tu daan pan suakta tavun!” ci hi. 41Mihing tam mama in a thuson um a, tui kiphum uh hi. Tua ni in mihing tulthum bang pawlpi sungah kibelap hi. 42Amate in a hun neite uh sia, sawltakte tung pan thusinna in zangh a, kipawlna sung, pawl anneakkhopna le thungetna sungah kihel tek uh hi.
Thu Umte sungah Nuntakna
43Nalamdang laknate le a lamdang tam mamate, sawltakte tungtawnin kivawt a, hi thu hu in mihing theampo in lamdangsakna taw kidim uh hi. 44Thu umte theampo in kithawl vadiam in, a neisate khat le khat kihawm in, om suak uh hi.#Sawl 4:32-35 45Amate in a neisate zuak a, mihing khat sim ii a kitaangsapna babang taw kizui in, a sum hawm uh hi. 46Kipawlkhawm in Biakinnpi ah ni sim kikhawm uh a, lungdamna le kiniamkhiakna thin taw inn ah an zongh nekhawm uh hi, 47Pathian pokin mihing theampo ii diksakna zongh nga uh hi. Topa in ni simin, ngupna nga mihing amate pawl sungah belap hi.
Valgt i Øjeblikket:
Sawltakte 2: SCB2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Siyin Chin Bible © Bible Society of Myanmar, 2016