Sawltakte 4
4
Council mai ah Peter le John Thu kisit
1Peter le John mihingte tungah thu a son laitakin, thiampite pawlkhat, biakinn cingte a ukpa le Sadducee te pawlkhat amate kungah theng uh hi. 2Amate lungkim ngawl hi, banghang ziam cile, mithite thaw kik tu thu a kilanghsakna in, Jesus sia thina pan tho kik zo hi, cina thu sawltakte nii in mihingte tung a hil hu ahi hi. 3Tua ahikom amate in, sawltakte nii manin, ni niam zo ahikom a zing ciang dong thong sungah khum uh hi. 4Ahihang a thuson a za mihing tam mama in um a, thu um mi tulnga bang khang hi.
5A zing ciangin Jew lampuite, upate le Thukham hil syate, Jerusalem ah kikhawm uh hi. 6Amate in Thiampi Lianbel Annas, Caiaphas, John, Alexander, le Thiampi Lianbel ii innkuanpui dangte taw kimu uh hi. 7Amate in sawltakte sia a mai ah dingsak a, “Hi sia bangbangin seam nu ziam? Note in bang vaang nei a, akua min zangh nu ziam?” ci in dongh uh hi.
8Thaa Thiangtho taw a kidim Peter in zo a, “Minamte lampui le upate awng, 9peangzaw pa tungah thupha vawtna le ama a kidamsakna hu in, kote tuni in, thu sit thuak ka hi uh le 10no teng le Israel mi theampo in hi mihingpa sia thinglamtee tung na thalup, Pathian ii thina pan a phok kik Nazareth mi Jesus Christ min taw dam thiang in hi sung note mai ah hong ding ahi hunlam na heak uh kul tu hi. 11Jesus sia laithiangtho in hi bangin a ci pa ahi hi.
‘No inn sate ii
na nil uh suang sia,
a theampo sung pan
a thupibel suang suak hi.’#Ps 118:22
12Ngupna sia ama bek tungtawnin kinga thei hi; leitung bup ah eite hong ngum thei tu in, Pathian piaksa midang khat zongh om ngawl hi,” ci hi.
13Council upate in, Peter le John sia mihing thawthong hi a, pilna nei ngawl hi napi, tuza in a hansanna sia lamdang sa uh hi. Tuasia ciangin amate ngeal sia Jesus ii kitholpui ngeite ahi hunlam phawk uh hi. 14Ahizong amate in bangma a ci thei bua uh hi, banghang ziam cile a kidamsakpa sia, Peter le John taw tua munah dingkhawm in a om mu uh hi. 15Tua ahikom amate Council zum pan pusuak tu in sawl a, tua zawkciang amate sungah, kikum uh hi. 16“Hi mite bang law tu hi ziam?” ci in amate kidongh uh hi. “Jerusalem a teang mihing sim in, hi a lamdang mama nalamdang lakna amate in vawt uh hi, ci in he siat zo uh a, ih nial thei bua hi. 17Ahihang mihingte sungah, hi thu a kizel ngawl natu in, Jesus min suang a, a pau kikik nawn ngawl natu amate tawngin thupia tawng,” ci uh hi.
18Tua ahikom amate sam a, sungtangsak kikin, Jesus min taw thu a son ngawl natu, a hil ngawl natu in thupia uh hi. 19Ahihang Peter le John in zo kik a, “Pathian mai ah — note thu kong nit tu le, Pathian thu ka nit tu uh, koisia maan zaw ziam, noma tek in khensat tavun. 20Banghang ziam cile ka mu sa uh, ka zaaksa uh thute son ngawlin, ka om thei buatu uh hi,” ci uh hi. 21Council te in, nasia seseam in a kidop natu in, tawng a, thu a piak zawkciang suaktasak hi. Amate daan piak tu suak thei ngawl hi, banghang ziam cile mi theampo in thupiang sa sia tungtaang ah Pathian pok kim uh hi. 22Hi nalamdang lakna ahi a kidamsak pa sia kum sawmli vaal pha zo hi.
Thu umte in Han natu Thungen
23A kisuataksak po ciang Peter le John sia a pawlte kungah heak kikin, thiampi liante le upate ii son teng son uh hi. 24Thu umte in a zaak uh ciang, Pathian tungah hi bangin thungen khawm uh hi: “Vantung, leitung le tuipi le a sungah a om theampo ii Topa le Bitphuapa!#Pu 20:11; Neh 9:6; Ps 146:6 25Thaa Thiangtho tungtawnin, kote taanghpupi David, na naseampa tungah hi bangin na ci hi.
‘Banghangin Gentile te sia
a thin uuk ngawp ziam;
banghangin mihingte in
a vaal thawthongin vaihawm ku ziam?
26Leitung kumpite in
amate le amate kithoai kholin,
tuaciangin ukpite kikhawmtua a,
Topa le ama ii Messiah langpan uh hi.’ #Ps 2:1-2
27Banghang ziam cile Herod le Pontius Pilate in hi khuapi ah Gentile te le Israel mite taw kisitua in, a thiangtho na Naseampa Jesus, Messiah tu a, na vawt pa sia langpan takpi uh hi.#Mt 27:1-2; Mk 15:1; Lk 23:1,7-11; Jn 18:28-29 28Nangma vaangletna le na deina taw tuabangin piang hen ci a, na khensat sa theampo a taangtun natu in, amate kisitua uh hi. 29Tu in Topa awng, amate hong tawnnate, na za in a, ko na naseamte in, na thu hangsan tak ka son thei natu in, hong piangsak ta'n. 30Cidamna a pian natu in, na khut hong vaan ta'n a, nalamdang laknate le, a lamdang vawtte, a thiangtho na Naseampa Jesus min taw a kisep thei natu, hong thukim ta'n,” ci uh hi.
31A thunget a man uh ciangin amate kikhopna mun sia kingawk hi. Amate sia Thaa Thiangtho taw kidim a, Pathian thu sia hanna taw son tu in kipan uh hi.
Thu umte in A neisa Theampo Kumkhawm
32Thu umte pawl sia thinkhat lungkhat in, om uh hi. Kuama in kei aituam neisa hi, a ci om ngawlin, a neisa uh theampo khat le khat kihawm vadiam uh hi.#Sawl 2:44-45 33Sawltakte in Topa Jesus thaw kikna thu, vaangletna lian taw, tetti pang uh a, Pathian in thupha tam mama amate theampo tungah buak hi. 34Amate pawl sungah kitaangsapna a nei kuama a om bua hi. Lo neite le inn neite in, zuakin a nga uh sumte paipui a, 35sawltakte tungah aap uh hi. Tuaciang, tua sumte mihing sim in, a kisapna uh bangin, hawm tek uh hi.
36Tuaciang, Cyprus ah a suak, Levi mi Joseph, sawltakte ii Barnabas a nak pa (a khiakna “hanthawnpa”) 37in, a neisa lo khat zuakin, a sum teng paipui a, sawltakte tungah aap hi.
Valgt i Øjeblikket:
Sawltakte 4: SCB2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Siyin Chin Bible © Bible Society of Myanmar, 2016