Sawltakte 16
16
Timothy in Paul le Silas taw Kop
1Paul in Derbe le Lystra khua Timothy kici Tapidaw khat ii teenna ah khualhaw suak hi. A nu zongh Jew minam Tapidaw khat hi a, ahihang a pa sia Greek te ahi hi. 2Lystra le Iconium khua thu umte theampo in Timothy sia phat son tek uh hi. 3Paul in Timothy tonpui nuam ahikom a vunteap atsak hi. Ama in tuabang a vawtsak sia, banghang ziam cile, tua munah a teang Jew theampo in Timothy ii pa sia Greek ahi hunlam he uh hi. 4Amate in khuate kaantan in a pai uh ciangin, Jerusalem a sawltakte le pawlpi upate ii a khensat zui tu ngeinate thu umte tungah pia uh a, tua ngeinate a zui natu in sawl hi. 5Tua ahikom Pawlpite upna sungah kithakhosak vaial a, mihing zongh ni simin khangto hi.
Troas ah Paul ii Mukholna
6Amate in Phrygia le Galatia ngamte kaantan in, khualhaw uh hi, banghang ziam cile, Asia ngamkhen sungah amate ii thuhil tu Thaa Thiangtho in a oai bua hi. 7Mysia ngamngi a thet uh ciangin, amate in Bithynia ngamkhen sungah, pai tu in kithoai hi. Ahihang Jesus ii Thaa in a oai bua hi. 8Tua ahikom Mysia ngam kaantan in khualhaw a, Troas khua ah amate paisuak uh hi. 9Paul in tua zanin a mukholna sungah Macedonia te pasal khat a ding mu in, ama tungah “Macedonia ngam ah hong pai ta'n a, hong hu ta'n!” ci in hesuak ngen hi. 10Paul in hi mukholna a mu zawk po ciang, Macedonia ah pai tu in, ka kithoai uh hi, banghang ziam cile Pathian in, Lungdamna Thupha sia tua mun mite tungah hil tu in hong sam zo hi, ci in ka khensat uh hi.
Philippi Khua ah Lydia ii Kikhealna
11Troas panin teambaw taw ka ding uh a, Samothrace tuikulh kan in, a zing ciangin Neapolis ka theng uh hi. 12Tua mun panin lei lam taw Philippi ah ka pai uh a, tua khuapi sia Macedonia ii ngamkhen masabel sia ii khuapi ahi hi. Tua in Rome kumpite ukna ngam khat hi si hi. Tua munah ni tam mama ka taam uh hi. 13Sabbath ni in khuapi puasia ah pusuak in, ngun hui ah Jew te thungetna mun khat om tu ka ngaisutna munah ka pai uh hi. Ka to uh a, tua munah a kikhawm numeite thu ka sonpui uh hi. 14Thu hong ngaite khat sia Thyatira khua pan Lydia hi a, ama in puan sandup zuak nu khat ahi hi. Ama in Pathian a bia numei khat hi a, Paul thusonna teng a ngai tu in, Topa ii a thinsung a honsak nu ahi hi. 15Ama le a innkuanpuite in tui a kiphum zawkciangin, ama in ko hong sam hi, “Kei sia Topa a um tatak mihing khat ci in na khensat uh le, hong pai tavun a, ka inn ah hong taam tavun,” ci hi. Ama inn ah ka pai natu in hong zol hi.
Philippi Thonginn sungah
16Ni khat thungetna munah pai tu in ka pai uh laitakin maisang a hong piang pheang tu, thu a sonkhol thei doai ngilo vei innteang naseam numei khat taw ka kisi uh hi. Mai lamsang thu tu a sonkhol theina taw a tote atu sum tam mama thalawsak hi. 17Ama in Paul le ko hong zui a, “Hi mite in A saangbel Pathian naseamte hi! Note bangbangin kingum thei tu ci thu amate in hong thangsak hi!” ci in au hi. 18Ni tam mama sung hi bangin, Paul a thin uuk dong au a, Paul a thin uuk ciang kingeilee in, doai munah, “Jesus min taw numei nu sung pan na pusua natu thu kong pia hi,” ci hi. Tua hun lian laitakin, doai in numei nu sung panin pusuak hi!
19A tote in amate sum nga natu lampi bo ahi hunlam a phaw uh ciangin Paul le Silas sia pummat uh a, mihon kikhopna tual thunei upate mai ah kai uh hi. 20Rome kumpi uliante mai ah paipui uh a, “Hi mite in Jew te hi a, koma khuapi sungah buaina piangsak hi. 21Amate in ko thukham a langpan ngeinate hil uh hi; ko sia Rome ngammite khu hi, hi ngeinate saang thei ngawl, zangh thei ngawl tu khu hi,” ci uh hi. 22Mihon zongh in, Paul le Silas a ngal vawtte sangah pang uh hi.
Tua zawkciang uliante in, Paul le Silas te ii puan laaithapsak a, saat tu in thupia uh hi. 23Nasia takin, a kisaat zawkciang amate sia thonginn sung denna in kinei a, thong ukpa munah kho bikbek in a kalh natu thupia hi. 24Hi thupiakna a nga ciangin, thong ukpa in, amate sia thonginn sungsang doituam sungah, khumin, a peangte thingkol bulsak hi.
25Zankim hun ciangin, Paul le Silas in Pathian tungah thungen in, biakna late sa in om a, thongtaak dangte in ngai uh hi. 26Thakhat thu in, nasia tak zinliing a, thonginn phungkawng tawdap theampo dong ngawk hi. Thakhat thu in, kongkhapi theampo kihong a, thongtaak theampo tung pan thikkolte peal siat hi. 27Thong ukpa khanglo a, thong kongkhapi theampo kihong sa in, a om a mu ciang, thongtaak theampo suakta siat zo sa hi; tua ahikom, ama le ama kithatlum tu in, a namsau dok hi. 28Ahihang Paul in, a aw nei za taw oksan in, “Nangma le nangma bangma kilaw heak in! Hi sungah kote om siat khu hi!” ci hi.
29Thong ukpa in meivak khat ngen a, thonginn doituam sungah tai kawm in tum a, Paul le Silas te peang ah liingin bok hi. 30Tua zawkciang, amate ngeal pusua in, “Tote awng, ngupna ka nga natu in bang vawt tu khi ziam?” ci in dongh hi.
31“Topa Jesus um in, tuaciang, nang hong kingum tu hi — nang le na innkuanpuite ngupna na nga tu uh hi,” ci uh hi. 32Tuaciang amate in ama le ngualdang ama inn ah a omte tungah Topa kammal hil uh hi. 33Tua zan tua hun mama in, thong ukpa in, amate pusuapui in, a liamna mate silsak hi; tuaciangin ama le a innkuan bupin tui kiphum paih uh hi. 34Ama in Paul le Silas a inn ah ciapui a, anvaak hi. Ama le a innkuanpuite in lungdamna taw kidim uh hi, banghang ziam cile, tu in amate in Pathian um zo uh hi.
35A zingsang ciangin Rome kumpi thuneite in, palik bute paisak a, “Tua mihingte pusua vun,” ci in thupia uh hi.
36Tua ahikom thong ukpa in, Paul munah, “Uliante in nang le Silas hong kisuataksak natu thu hong pia hi. Pusuak thei tu nu hi, tua hi a, thinnuam in na pai tavun,” ci hi.
37Ahihang Paul in palik bute munah, “Ko bangma khialna lian nei ngawl khu hi. Ahihang mihonpite mai ah velna thuak khu hi — ko sia Rome ngammite hi khu hi! Tua zawkciang thonginn sung denna in hong kinei hi. Tuaciang tu leleau in a thimtham in, hong suaktasak nuam nu ziam. Suak thei ngawl tu hi! Rome uliante amate mama hi sungah hong pai hamtang tahen a, hong pusuaksak tahen,” ci hi.
38Palik bute in hi kammal teng, Rome uliante munah ko uh hi; tuaciang amate in, Paul le Silas sia Rome ngammi ahi hunlam a zaak uh ciangin, amate lau uh hi. 39Tua ahikom amate pai in, Paul le Silas te tungah pakaai uh hi; tua zawkciang, thonginn sung pan pusuak in khuapi a nusiat natu in sawl uh hi. 40Paul le Silas in thonginn nusia in, Lydia ii inn zuan uh hi. Tua munah thu umte taw kimu uh a, hanthotna kammalte a son zawkciang nusia uh hi.
Valgt i Øjeblikket:
Sawltakte 16: SCB2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Siyin Chin Bible © Bible Society of Myanmar, 2016