Sawltakte 15
15
Jerusalem ah Kikhopna
1Judea panin, Antioch ah mihing pawlkhat hong pai a, thu umte tungah, hi bangin hilcian tu in hong kipan in, “Moses thukham om bangin, na vunteap uh na at bua uh le, ngupna na nga thei buatu uh hi,” ci uh hi.#Thiam 12:3 2Paul le Barnabas in hi thu huvau ah, amate taw nasia takin, kinial uh hi. Tua ahikom Paul, Barnabas le Antioch khua a om pawlkhat, Jerusalem ah hi thu taw kisai in pai a, sawltakte le upate taw kimu tu in, khensat uh hi.
3Pawlpi ii sawlna taw amate a pai hi a, Phoenicia le Samaria kaantan in, a pai uh ciangin, Gentile te ii Pathian sangah a kikhealna thu ko uh hi. Tua thu in thu um theampo, nasia takin lungdamsak hi. 4Jerusalem a thet uh ciangin, pawlpi in amate vai na dawn uh a, sawltakte le pawlpi upate tungah amate tungtawnin Pathian ii a sepna theampo son uh hi. 5Ahihang Phariseete pawlsung panin, thu um mi pawlkhat ding a, “Gentile te in, vunteap a at uh kul tu hi. Moses Thukham a nit natu son kul tu hi,” ci uh hi.
6Sawltakte le pawlpi upate, hi thu huvau kikum tu in, kisitua uh hi. 7Ngei ma a kinial zawk uh ciang, Peter ding a, “Ka suapuite awng, khuangei pek lai in, Gentile te ii a zaak thei natu le a up thei natu in, Lungdamna Thupha hil tu in, no sung pan Pathian in keima hong teal ahi hunlam sia na heak uh hi.#Sawl 10:1-43 8Tuaciang, a kuama po ii thinsung a tel Pathian in, Gentile te a saanna, a lakna in ei tungah hong piak bangma in, amate tungah Thaa Thiangtho pia hi.#Sawl 2:4; 10:44 9Ama in ei le amate hong doi tuan ngawl hi. Amate in um ahikom a mawnate maisak hi. 10Tua ahile eite ih hizong, taanghpupite ahizong, a puak zawk ngawl vanhte thu umte nungzaang ah suanhin, banghang tu in Pathian ze et sawm nu ziam? 11Suak ngawl hi! Eite in zongh amate bangma ih um a, Topa Jesus thuthiamna taw ngupna ih nga hi,” ci hi.
12Paul le Barnabas in Pathian ii amate tungtawn a, Gentile te sungah, nalamdang laknate le a lamdang theampo a sep a vawt a ko uh a zaak uh ciangin, a pawl bup thim dide in om uh hi. 13A son tu teng a man zawkciangin, James hong pau a “Hong ngai tavun, suapuite awng! 14Amate sung panin, ama atu minam tuam khat a laakna taw Pathian in Gentile te a thinbotna a lak phitna thu sia, Simon in a son zawk bek ahi hi. 15Kamsaangte kammalte zongh hi thu taw kisi siat hi. Laithiangtho in hi bang ci hi.
16‘Hisia zawkciangin Topa in
kong heak kik tu ci hi,
tuaciangin David kumpi ngam
ka pua pha kik tu hi.
A lalcipna pan ka sa kik tu a,
ka thahatsak kik tu hi. #Amo 9:11-12
17Tuaciangin midang theampo le,
keima neisa tu in
ka sapsa Gentile mi theampo in
kei hong zuan tu hi ci in,
18hi thu taangh tawngh laipek pan
a hesak Topa in son hi.’
19James in, “Kei ngaisutna ah, Pathian sangah a kiheak ahi Gentile te, ih buaisak ngawl tu sia thupi ka sa hi. 20Tua hi ngawl zawin, amate tungah lai ih thaak tu a, milim biakna in a kizak hu in a thiangtho ngawl ante a neak ngawl natu; numei le pa khialna panin, a kikep natu; nganhing a tawl kimeaklumte sa a neak ngawl natu le sachi neak ngawl natu, lai thaakin ih son tu hi.#Pu 34:15-17; Thiam 17:10-16; 18:6-23 21Banghang ziam cile, Moses Thukham sia Sabbath ni simin, synagogue te ah khuangei hialma kisim zo a, ama kammalte sia khua sim ah kihil zo hi,” ci hi.
Gentile Thu Umte tungah Laithak
22Tua zawkciangin, sawltakte le pawlpi upate in pawlpi mi bup taw kikum a, Paul le Barnabas taw Antioch ah pai tu in, pawl sung pan mihing pawlkhat a teal natu khensat uh hi. Amate in Barsabbas kici Judas le Silas teal uh hi. Amate ngeal sia thu umte ii a zatak mama ahi uh hi, 23amate in hi laithakte puasak uh hi:
“Ko sawltakte le pawlpi upate, na suapuite in Antioch, Syria le Cilicia a teang Gentile suapuite theampo tungah, kipaupuina lai kong thaak uh hi. 24Eima pawl sung panin, mihing pawlkhat in, amate ii sonna taw no hong thinngimsak, hong nawngkaisak tu in, hong pai hi, ci in za khu hi; ahihang hi bangin hong ngamtat natu in, ko tung pan amate in bangma sawlna nga ngawl uh hi. 25Tua ahikom ka kikhawm uh a, thataak pawlkhat tealin no kungah paisak tawng, ci in ka thukim siat uh hi. Amate sia ih it ih lawmte ahi Barnabas le Paul taw hong paikhawm tu hi, 26amate sia Topa Jesus Christ nasepna atu, a nuntakna uh a bo tu a lauhuai dongin, a kipumpiakte ahi hi. 27Tua ahikom, Judas le Silas kong paisak uh hi. Amate in lai taw kong at uh teng, kam taw hong son tu uh hi. 28Thaa Thiangtho le ko ii thukimna pan, hi zui tu a kul ngeinate ngawl buang a dang vanhngit kong suan nuam bua uh hi: 29milim biakna ah a kipiasa an peuma na ne heak vun; sachi na ne heak vun; a tawl a kimeaklum nganhingte sa na ne heak vun. Numei le pa khialna panin, na kikeam tavun. Hi teng na tang zo po le uhte pha tu hi. Dam tek tawng.” ci in at uh hi.
30Thataakte kipaisak a, Antioch khua theng uh hi. Tua munah thu umte pawl bupin kikhawm a, a laithak sia pia uh hi. 31A laithak a sim uh ciangin, hanthotna kam in, amate lungdamna taw kidimsak hi. 32Amate mama kamsaang ahi Judas le Silas in, thu umte taw ngei ma thuson khawm uh a, thin letna le tha ngana neisak uh hi. 33Tua munah hun tawmvei a zak zawk uh ciangin, thu umte in amate thinnuam takin tha kik uh a, amate in pai tu a sawlte kungah heak kik uh hi. 34Ahihang Silas in tua munah taam tu in khensat hi.
35Paul le Barnabas in, Antioch ah hun tawmvei sung zangh uh a, mi dang tam mama taw kikop in, Topa kammal hilcian in thuhil uh hi.
Paul le Barnabas Kikhen
36Tawmvei zawkciang Paul in Barnabas tungah, “Heak kik tawng i, Topa kammal ih thuhilna khua sim ah a om ih suapuite munah haw kikin, amate bangbang om ziam, ci in dawp tawng,” ci hi. 37Barnabas in, John Mark sia amate taw tonpui nuam hi. 38Ahihang Paul in, tua pa a kaizot tu sia suak a sa bua hi. Banghang ziam cile, a nasep man dong, ompui ngawlin, John Mark in amate sia Pamphylia ah nusia in heak kik hi.#Sawl 13:13 39Amate nasia takin kinial a, kikhen uh hi: Barnabas in Mark samin Cyprus zuan tu in, teambaw taw ding hi. 40Thu umte in Topa ii a thuthiamna sungah a kepcing natu in, a aap zawkciang, Paul ahile Silas teal a, ding hi. 41Ama in Syria le Cilicia kaantan in pai a, pawlpite tha kho sak hi.
Valgt i Øjeblikket:
Sawltakte 15: SCB2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Siyin Chin Bible © Bible Society of Myanmar, 2016