Sawltakte 17
17
Thessalonica khua ah
1Paul le Silas in Amphipolis le Apollonia kaantan in khualhaw a, synagogue khat omna Thessalonica khua theng uh hi. 2Ama ii hun a zak ngei tawntung bangma in, Paul in tua synagogue ah pai hi. Tua munah Sabbath ni thum sung Laithiangtho sisanh in, mipite taw thu kikum a, 3Messiah in ngim thuak tu a, thina panin tho kik tu hi, ci in Laithiangtho taw kipsakin sonthiang hi. Paul in, “No tungah kong pualaak hi Jesus sia Messiah ahi hi,” ci hi. 4Amate sung panin pawlkhat in um a, Paul le Silas te pawm uh hi; tuabang ma in Pathian a bia Greek te honkhat le numei lampui tam mama te zongh in um a pawm uh hi.
5Ahihang Jew te in eang a, lamdung ah a vakthap mihing mannung ngawl pawlkhat khawmtua in, mihing ngilo nuam honkhat piangsak hi. Amate in a khuathing in buaisak uh a, Paul le Silas zongin mipite mai ah a kaikeak thei natu in Jason ii inn sim uh hi. 6Ahihang amate a mu ngawl uh ciang, Jason le thu um dang pawlkhat khuapi thuneite mai ah kai a, “Hi mite in mun theampo ah nawngkaisak uh hi! Tu zonghin amate ei khua ah hong pai uh a, 7tuaciang Jason in, amate sia ama inn ah keam hi. Amate theampo in, Kumpilianpa ii thukhamte paltan a, Jesus a minnei kumpipa dang khat om hi ci uh hi,” ci in au uh hi. 8Hi kammal teng taw khuapi sungah mihonte le khuapi thuneite buaisak uh hi. 9Thuneite in Jason le a dang teng a suatak natu in, a kisamh za sum piasak a, tua zawkciangin amate paisak uh hi.
Berea khua ah
10Khuazan po ciang, thu umte in Paul le Silas sia, Berea khua ah puak uh hi. A thet ciangin, amate synagogue ah pai uh hi. 11Tua khua mite in Thessalonica khua mite sangin ngaisun kaak thei zaw uh hi. Amate in lawpna lian taw thusonte ngai in, Paul thusonte maan tatak ziam ci in a heak natu in ni simin Laithiangtho en uh hi. 12Amate sung pan mihing tam mama in thu um a; Greek te a ci thei numei tam mama le Greek te pasal tam mama zongh in um uh hi. 13Ahihang Thessalonica ah a om Jew te in, Pathian kammal sia Bereate tung zongh ah, Paul in hil zo hi ci in, a zaak uh ciangin, hong pai a, mihing ngilo nuam honkhat hol hi. 14Thu umte in thakhat thu in, Paul sia tuipivaal ah puak uh hi; ahihang Silas le Timothy te ngeal Berea ah taam uh hi. 15Paul a thate in Athens dong zui uh a, tua zawkciang Berea ah heak kikin, Silas le Timothy in, a manlang thei zaza in, a del natu Paul ii kam vaithak teng son uh hi.
Athens khua ah
16Silas le Timothy ngakin, a om laitak Paul in Athens khua ah milim biakna a dim in om a mu ciangin Paul sia nasia takin a thinkiam hi. 17Tua ahikom Jew te le Pathian a bia Gentile te taw synagogue sung le, ni simin hong pai pawpo taw zongh mipi kikhopna leitual ah Paul in thu kikuppui hi. 18Epicurean syate le Stoic syate zongh in, ama taw thu kinial uh hi. Pawlkhat in, “He ngawl napi, a kihesak hisia pa in, bang teng son nuam ziam,” ci in dongh hi.
A dangte in, “Ama ii son sia, ngamdangte pathiante hi tuak hi,” ci in zo kik hi. Banghang hi bangin ci ziam cile, ama in Jesus thu le a thaw kikna thu a hil hang ahi hi. 19Tua ahikom amate in Paul sia Areopagus kici Athen te ii council kikhopna munah paipui a, hi bangin ci uh hi, “Hi hilna thak na sawson sia, he nuam khu hi. 20Thu pawlkhat na son kong zaak uhte sia, ko atu in tumdang ahikom, a khiakna he nuam tu khu hi,” ci uh hi. 21(Banghang ziam cile, Athens khua mi theampo le tuak ah a teang ngamdangmite in, thuthak sonna le zaakna taw a hun theampo zangh nuam uh hi.)
22Khuapi council kikhopna mai ah Paul ding a, “Athen te awng, na theampo sungah biakna lamsang kin mamate na hi hunlam ka mu hi. 23Banghang ziam cile na khuapi sung kaantan in, ka pai a, na biakna munte ka et ciangin, ‘A kihe ngawl Pathian khat Atu,’ ci in biaknatau khat tungah, lai ki at ka mu hi. Tua ahiciang na heak ngawl bul na biak uh Pathian sia, tu in a thu kong thansak sia ahi hi. 24Leitung le a sung a om theampo a vawt, Pathian sia vantung le leitung ii Topa hi a, mihing khutte taw a kivawt biakinnte sungah a teang bua hi.#1 Kum 8:27; Is 42:5; Sawl 7:48 25Mihingte ii ama atu ih sepsakna pan, ih piak thei tu na khat zongh, ama atu in a kitaangsamh bua hi, banghang ziam cile mihing theampo atu nuntakna, husanna le na theampo ama ii hong piaksa hi zaw hi. 26Ama in mihing khat panin, mihing nam theampo bitphua a, leitung buppi ah teangsak hi. Ama in amate teen natu a hunte le a munte see kholsa in koi hi. 27Mihingte ii ama a zon thei natu le ama a mu thei thaak natu in hi bangin vawt hi. Ahizong a tatakin Pathian in ei khat pawpo kung panin khuala ngawl hi; 28mihing khat in,
‘Ama sungah ei ih nungta a,
ngamta in ih om hi’ a ci bangma ahi hi.
Noma ii la phua
pawlkhat zongh in,
‘Ei zongh ama tate ih hi hi’ ci hi.
29Ei sia Pathian ii tate ih hi zawk nungsang in, ama pianzia sia mihingte pilna le thiamna taw a kivawt khamh, ngunn le suang milim khat pawpo bangin ih ngaisun buatu hi. 30Mihingte ii ama ih heak ngawl lai hunte, Pathian in heak ngawl bawl hikale tu hun ciang, mihingte a vekpi in mun theampo ah, amate tatsiatnate pan a kikheal natu ama in thupia hi. 31Banghang ziam cile ama in, leitung bup ah thukhaikim thu taw, ama ii tealsa mihing khat zangh in, thu a khen natu in, ni khat, ciangtan sa in koi hi. Hi thu a maanna thu sia, tua pa thina panin a thawsak kikna taw mihing sim tungah a lak zo hi!” ci hi.
32Thina panin a thawsak kikna huvau, Paul ii son a zaak uh ciangin, pawlkhat in nunauna in nei uh a, ahihang a dangte in, “Hi thu huvau na son sia za kik nuam lai khu hi,” ci uh hi. 33Tua ahikom Paul in kikhopna nusia hi. 34Pasal pawlkhat in ama pawmin thu um uh hi, tuate sungah council mi ahi Dionysius om a; Damaris a kici numei khat le a dang pawlkhat zongh kihel hi.
Valgt i Øjeblikket:
Sawltakte 17: SCB2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Siyin Chin Bible © Bible Society of Myanmar, 2016