Sawltakte 10
10
Peter le Cornelius
1Caesarea khua ah Rome kumpite ngalkap ahi “Italy Ngalkapte” kici ngalkap honkhat sungah ngalkap bu a seam Cornelius kici khat om hi. 2Ama sia biakna kin khat hi; ama le a innkuan bupin Pathian bia uh hi. Ama in Jew mizawngte a hu thei za in hu a, tuaciang tatsat ngawlin Pathian tungah thungen hi. 3Ni khat nitak nai thum bang hun mahiat in, ama in mang mu a, hi sitset in a muna ah Pathian vantunglalang khat in, “Cornelius awng!” ci hi.
4Ama in launa taw vangtunglalang sia salh a, “Topa awng, bang ziam?” ci hi.
Vantunglalang in, “Pathian in na thungetna le, a zawngte na hunate hangin lungdam a, na thunget na te uh hong zo tu kithoai hi. 5Tu in mihing pawlkhat Joppa ah paisakin, Simon Peter kici mihing pa samsak ta'n. 6Ama sia tuipi hui ah a teang savun vawt Simon inn ah zintung hi,” ci hi. 7Tua zawkciangin, vantunglalang in paisan hi, tuaciang Cornelius in a inn sung a naseamte nii le biakna a kin, ama aituam a cing ngalkap khat sam hi. 8Thupiang teng amate tungah son in Joppa ah paisak hi.
9A zing ciangin, amate Joppa khua nai a thet laitak Peter in thungen tu in sun hun laitakinnkhum tungah kaato hi. 10Ama in a ngilkial ahikom an ne nuam zo hi; tuabangin an neak tu a kivawt saan laitak ama in mukholna nei hi. 11Van kihongin mu a, bang ziam maw puanzapui bang khat, king li panin kikhai in lei ah kikhiasuk khat mu hi. 12A sungah nganhing namcin le awmtaal a, a vak theite le ngam vacimte om hi. 13Aw khat in ama munah, “Peter awng tho in; hite ngo lum in a, ne in!” ci hi.
14Ahihang Peter in, “Ne mama bua tong, Topa awng! Biakna taw kisai, a thiang ngawlin a kikoite le nin hi a kici sate ne ngawl het tu khi hi,” ci hi.
15Tua aw taw ma in paupui kik a, “Pathian ii thiansak sate a nin in ngaisun heak in,” ci hi. 16Hisia thumvei vaset a kici zawkciangin, van ah kila to kik hi.
17Peter in a mukholna sia huvau ii khiakna lungmangin a om laitakin, Cornelius sawltakte in Simon inn mu uh a, kongbiang ah ding uh hi. 18“Hi sungah, Simon Peter a kici zin khat hong tung ziam,” ci in dongh uh hi.
19Peter in a mukholna sia ii khiakna bangbang peuma ahi katawm, ci in tel tu in a hanciam laitak Thaa in, “Ngai in! hi lai ah pasal thum in nang hong zon saan laitak hi. 20Tua ahikom kithoai in a, tuaksuk in. Tuaciangin amate taw kithawl tu nakna heak in, banghang ziam cile amate in keima sawl ahi hi,” ci hi. 21Tua ahikom Peter tuaksuk a, pasalte munah, “Na zon uh sia keima khi hi. Bang vai a hong pai nu ziam,” ci hi.
22“Ngalkap bu Cornelius in kote hong sawl hi,” ci hi. “Ama sia Pathian a bia mihing pha khat hi a, Jew te theampo in zakta uh hi. Pathian vantunglalang khat in, ama tungah na son tu thute a zaak thei tu in nang hong sap tu in sawl hi,” ci hi. 23Peter in amate sungtang tu in sam a, zan khat ngiaksak hi.
A zing ciang kithoai in amate taw ding uh hi; tuaciangin Joppa pan nungzui pawlkhat taw zong, paikhawm uh hi. 24A zing ciangin, Caesarea khua theng uh a, tua munah ama ii a sam mealheakte le a muan a ngualtamhte taw Cornelius in ngak hi. 25Peter sia inn sung tum tu a kithoai ciangin Cornelius in muak a, a peang ah bokin ama mai ah a kun hi. 26Ahihang Peter in dingsak hi. Ama in, “Ding in, keima sia mihing khat ma hi lel khi hi,” ci hi. 27Peter sia Cornelius taw thuson kawmin, inn sungah a tum ciangin, mihing tam mama kikhawm mu hi. 28Amate tungah, “Na heak tek uh hi a, Jew te khat sia Gentile te khat ii inn ah a haw tu ahizong, kithawl tu ahizong a biakna in oai ngawl hi. Ahihang Pathian in mihing khat pawpo biakna taw kisai in, thiang ngawl hi, nin hi, ka ci ngawl het natu in hong lak hi. 29Tua ahikom nong samsak uh ciangin nial ngawlin kong pai hi. Tua ahiciang nong sapna thu sia banghang ziam ci in kong dongh hi,” ci hi.
30Cornelius in, “Tu nung ni thum lai tubang hun nitak nai thum hun khawngin ka inn ah thu ka ngen hi. Thakhat thu in a tee vakil puan a silh pasal khat ka mai ah hong ding a, 31‘Cornelius awng! Pathian in na thungetna hong za a, ngual na hu thongna teng hong musak zo hi. 32Mihing pawlkhat Joppa ah paisak in a, a min tatak Simon Peter kici, pasal khat sia samsak ta'n. Ama sia tuipi hui a teang savun vawt pa Simon kici khat ii inn ah tung hi,’ hong ci hi. 33Tua ahikom thakhatin kong samsak a, na dikna hangin nong pai hi. Tu in Pathian mai ah ko teng na om ung, Topa ii nang son a hong sawl po ngai tu in hong ngak khu hi,” ci hi.
Peter Thusonna
34Peter sia thuson tu hong kipan a, “Tu in Pathian in mihing theampo a kibangin ngaisun hi ci in ka phawk hi.#Thkna 10:17 35Ama a biate le a maan a ngamtate sia, bang minam po ahizong ama in saang hi. 36Israel te tungah a puak thu na heak uh hi, mihing theampo ii Topa ahi, Jesus Christ tungtawnin kilemna Lungdamna Thu thansakna ahi hi. 37Tuiphumpa John in tui kiphumna thu a hil zawkciang Galilee ngam pan Israel ngam bup sungah thu lian a piang sia, na heak uh hi. 38Nazareth khua mi Jesus tungah Pathian in Thaa Thiangtho le vaangletna a buak thu huvau tel nu hi. Ama in mun theampo ah pai in, thupha vawt a, Doaimangpa vaangletna nuai ah a om theampo damsak hi. Banghang ziam cile Pathian sia ama taw omkhawm hi. 39Israel te ngamsung le Jerusalem ah a sep a vawt theampo tungtaang ah, kote in tetti ka hi uh hi. Amate in ama sia thinglamtee tungah kilh in, thisak uh hi. 40Ahihang Pathian in a ni thum ni ciangin, thina pan thosak a, ama kilanghsak hi, 41ahihang mihing theampo tungah hi ngawlin, Pathian ii tetti tu a hong teal sate, thina panin a thaw kik zawkciangin, ama taw an nekhawm tui dawnkhawmin a om kote tungah hong kilangh hi. 42Tuaciang ama in, lungdamna thu sia mihingte tungah a hil tu le a thisate le a nungta laite tungah thukhen tu in, Pathian in ama a aap hunlam tetti pang tu in ko hong sawl hi. 43Kamsaang theampo in ama huvau sonsiat uh hi. Ama a umte theampo mihing sim in ama min vaangletna taw a mawnate kimaisak tu hi ci in son uh hi,” ci hi.
Gentile te in Thaa Thiangtho Saang
44Tuabangin Peter a papau laitakin, thu ngai theampo tungah, Thaa Thiangtho tuaksuk hi. 45Peter taw Joppa khua pan hong pai, Jew thu umte in, Gentile te tung zongh ah, Pathian Thaa Thiangtho letsong a buak sia lamdang sa uh hi. 46Banghang ziam cile amate in, kam tumdangte taw pau in, Pathian letna pok uh hi. Peter in, 47“Hi mite in, eima saan bangma in, Thaa Thiangtho saang zo uh hi. Tua ahile amate tui taw ki baptize tu, akua in khaam thei tu ziam?” ci hi. 48Tua ahikom Jesus Christ min taw, a ki baptize natu in thupia hi. Tua zawkciangin, ni tawmvei amate kungah a taam lai natu in, Peter tho uh hi.
Valgt i Øjeblikket:
Sawltakte 10: SCB2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Siyin Chin Bible © Bible Society of Myanmar, 2016