Sawltakte 11
11
Jerusalem Pawlpi ah Peter Thu ko kikna
1Judea ngam bup a om sawltakte, le thu um dangte in, Gentile te zongh ii Pathian kammal a saanna thu za uh hi. 2Peter sia Jerusalem ah a cia ciangin, Gentile te vunteap atna a deite in, Peter ngamtatna sit uh a, 3“Vunteap at ngawl Gentile te inn ah zintung in, an ngawngawn nekhawm nu hi!” ci hi. 4Tua ahikom Peter in thupiang teng sia a patna panin son hi:
5“Joppa khua ah thu ka nget laitakin mukholna khat ka nei hi. Van panin puanza bang na khat a king li pan kilen in, a kikhiasuk ka mu a, tuaciang ka kungah hong tawlnga hi. 6Pha takpi ma in a sung ka en a, innsa, ngamsa, le awmtaal in a vak nganhingte le ngam vacimte ka mu hi. 7Tuaciang aw khat in hong paupui a, ‘Peter awng, tho in; hite ngo in a, ne in!’ hong ci hi. 8Ahihang keima in, ‘Ne peuma bua tong Topa awng! Biakna taw kisai a nin le a thiang ngawlin a kisepte sia, ka kam sungah tum ngeingawl lai hi,’ ka ci hi. 9Tua aw taw vantung panin, hong pau leleau a, “Pathian thiansua sate sia bang po ahizong, a thiang ngawlin ngaisun heak in,” hong ci hi. 10Hi bangin thumvei hong kilak a, a khakbel ciangin, vantung ah kidok to kik hi. 11Tua hun laitak lian in, Caesarea pan a hong kipaisak mihing thum sia, ka zintunna inn ah hong theng hi. 12Thaa in, amate taw haisaang ngawlin, ka tonkhop natu hong sawl hi. Joppa khua a thu uppui luk teng zongh in, Caesarea ah hong zui a, ka vekpi in Cornelius inn ah ka tum uh hi. 13Vantunglalang khat a inn ah na ding a, ama in, ‘Joppa khua ah mihing pawlkhat paisak ta'n a, Simon Peter kici khat sia samsak ta'n. 14Ama in nang le na innkuanpui theampo ngupna na nga natu kammalte hong son tu hi,’ ci in son hi. 15Tuabangin thuson ka kipat ciangin, Thaa Thiangtho sia eite tungah a masa a hong pai bang tatakin, amate tungah tuaksuk hi. 16Tuaciang ‘John in tui taw hong baptize hi. Ahihang no sia Thaa Thiangtho taw hong ki baptize tu hi,’ a ci Topa kam sia ka phawk hi.#Sawl 1:5 17Topa Jesus ih up ciang ei tungah letsong hong kipiak bangin, Pathian in tua letsong sia Gentile te tung zongh ah pia hi, ci in thiangtho takin kimu hi; tua ahile kei sia akua hi a, Pathian nasepna a khaktan zo tu pa, hi na khi ziam!” ci hi.
18Hi thu a zaak uh ciangin, Peter sia mawsak nawn ngawlin, Pathian pok uh hi. “Tua ahile Pathian in, Gentile te tung zongh ah, kisii kik natu le nuntak natu hunpha pia zo hi!” ci uh hi.
Antioch Khua ah Pawlpi
19Stephen a suamlup zawkciang vawtsiatna hangin a kithethaang thu umte pawlkhat sia Phoenicia, Cyprus le Antioch dongin pai uh a, Jew te tung bek ah thuhil uh hi.#Sawl 8:1-4 20Ahihang Cyprus le Cyrene pan a, thu umte pawlkhat in Antioch khua ah pai in, Gentile te tung zongh ah Topa Jesus Lungdamna Thupha hil uh hi. 21Topa vaangletna sia amate taw kop a, mihing tam mama in thu um in, Topa sangah kiheak uh hi.
22Hi thupha Jerusalem Pawlpi dong theng a, tua ahikom amate in, Barnabas sia Antioch khua ah paisak hi. 23Ama a thet ciang, Pathian ii a mite thupha a piakzia mu ahikom ama lungdam a, Pathian tungah thin tak lung tak taw a thumaan natu in, amate theampo hanthawn hi. 24Barnabas sia mihing pha khat hi a, Thaa Thiangtho le upna taw kidim in, mihing tam mama Topa kung then hi.
25Tua zawkciangin Barnabas in Saul zong tu in, Tarsus khua ah pai hi. 26A zon pa a mu zawkciangin Antioch khua ah paipui a, amate nii in, pawlpi mite taw kum khat bup omkhawmin, Pawlpi mihon khat hilcianna nei hi. Tuabangin Antioch khua ah thu umte sia Tapidawte ci in kina masabel hi.
27Tua hun laitakin, kamsaang pawlkhat in Jerusalem pan Antioch ah pai uh hi. 28Amate sung panin, Agabus min nei khat hong ding a, simleitung theampo ah kialpi a tun natu Thaa vaangletna taw ama in sonkhol hi. (Kumpilianpa Claudius maan hun laitakin, tua kialpi tung hi.)#Sawl 21:10 29Nungzuite in amate hi zawk zaza tek, Judea ngam ah a teang a thu up puite atu a neisate puak tu in, khensat uh hi. 30Tubang ahi zawkciangin, a sum uh sia, Pawlpi upate ii nga tu in, Barnabas le Saul khut tungah thaak uh hi.
Valgt i Øjeblikket:
Sawltakte 11: SCB2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Siyin Chin Bible © Bible Society of Myanmar, 2016