Sawltakte 9
9
Saul Kikhealna
(Sawltakte 22:6-16; 26:12-18)
1Tua hun laitak Saul in Topa nungzuite suamlup tu in nasia takin tawng tawntung hi. Thiampi Lianbelpa kungah pai a, 2Topa Lampi a zui pate le numeite a mu peuma man khawmin Jerusalem ah a ciapui thei natu, Damascus khua synagogue ukte a lak tu ama thu a kisonna lai ama in ngen hi.
3Damascus ah a pai lam in, khuapi a thet dektak ciang, thakhat thu in van pan a taang khat in, ama kiimkot theampo taan hi. 4Ama lei ah puk a, tuaciang aw khat hi bangin za hi. “Saul! Saul awng! banghangin kei hong vawtsia ni ziam?”
5“Akua ni ziam Topa?” ci in dongh hi.
“Kei sia nong vawtsiat pa Jesus ka hi hi,” ci hi. 6“Ahihang, tho in a, khuapi sungah va pai ta'n, Tualai ah na vawt tu a kul teng hong kison tu hi,” ci hi.
7Saul taw khual a haw khawmte in, kam khat zongh pau ngawlin, ding uh hi; amate in awnging za ahihang, kuama a mu bua uh hi. 8Saul sia lei panin thoto a, a mit hak ahihang bangma a mu thei bua hi. Tua ahikom amate in, a khut pan len in, Damascus khua sung zotpui hi. 9Ni thum sung ama in khua a mu thei bua a, tua hun sung teng in, ama in an hikale tui hikale neak a nei bua hi.
10Damascus ah Ananias kici Tapidaw khat om hi. Ama in mukholna nei a, Topa in ama munah, “Ananias awng!” ci in biakpui hi.
“Hi sungah om ing, Topa” ci in zo hi.
11Topa in ama munah, “Lampi Tang kicina munah, pai tu in kithoai in a, tuaciangin Judas inn ah Tarsus khua mi Saul kici khat va kan ta'n. Ama sia tu laitakin thunget saan hi, 12tuaciangin ama mukholna sungah Ananias kici pasal khat hong pai a, khua a mu thei kik natu in, ama tungah a khut ngak sia mu zo hi,” ci hi.
13Ananias in zo kik a, “Topa awng, mihing tam ma in, hisia pa thu hong son a, Jerusalem ah na mite tungah a cizat huai ama ngamtatna theampo hong kison hi. 14Nang hong biate theampo a mat thei natu in, thiampi liante tung pan, thu ngana taw, Damascus khua ah hong pai hi,” ci hi.
15Topa in ama munah, “Va pai ta'n, banghang ziam cile, ama sia Gentile te sung, kumpite sung le Israel mite sungah, ka min hong kiheak natu in, ka naseam tu in, ka teal zo hi. 16Tuaciang keima mama in kei ii hu a, a thuak tu theampo zongh ka lak tu hi,” ci hi.
17Tua ahikom Ananias pai a, Saul tunna inn sungah tum in, a tungah a khut nga hi. “Suapui Saul awng, hi sungah nong pai lai in, lampi ah nang tungah hong kilak — ih Topa Jesus in, khua na mu thei kik natu le Thaa Thiangtho taw na kidim natu in nang kungah kei hong paisak hi,” ci hi. 18Thakhat thu in ngasa hawlip taw a kibang pawlkhat sia, Saul mittangte panin, hong taaksuk a, ama in khuamu thei kik hi. Ama ding a tui kiphum hi; 19Tuaciangin, an a neak zawkciang, a tha hat kik hi.
Saul in Damascus ah Thuhil
Saul sia Damascus ah thu umte taw ni tawmvei sung om tu in taam hi. 20Ama in Jew te ii synagogue ah paisuak a, Jesus sia Pathian Tapa hi ci in thuhil tu in kipan hi.
21A zate theampo in lamdang sa in, “Jerusalem ah Jesus a biate a thatlum bul sia ama hi kana ngawl ziam? Tuaciangin hi lai hong paina thu zongh, thu umte man a, thiampi liante kungah ciapui tu, ngiimna taw hong pai hi ngawl ziam,” ci uh hi.
22Ahihang Saul thuhilna in vaang nei vaial a, Jesus sia Messiah hi ci a, a sonthiangna sia, up huai mama ahikom, Damascus khua ah a teang Jew te in, ama a nial thei bua uh hi.
23Ni tam mama hong kan zawkciang, Jew te kikhawmtua a, Saul sia thalup sawm uh hi. 24Ahihang amate sawmnate, ama tungah kison hi. Ama a thalup thei natu in, sun taw zan taw khuapi kongpite, encik uh hi. 25Ahihang zan khat ciangin, a nungzuite in, Saul sia khuapi luphung vang khat pan bawm khat taw in khiasuk uh hi.#2 Cor 11:32-33
Saul Jerusalem ah Haw
26Saul sia Jerusalem ah pai in, nungzuite pawl sungah tum sawm hi. Ahihang amate in, Saul sia nungzui khat hi, ci in um thei ngawl a kiita uh hi. 27Tuaciang Barnabas in ama panpui a, sawltakte kungah paipui hi. Saul in lampi tungah Topa taw a kimuna thu le, Topa ii ama a paupuina thu teng zongh son hi. Damascus ah hang takin Jesus min taw thu a hil zongh son si hi. 28Tua ahikom Saul sia amate kungah taam a, Jerusalem khuathing bup ah vak kawkoai in, Topa min taw hang takin thuhil hi. 29Ama in Greek kampau Jew te taw zongh, kam kikum in kinialna nei a, ahihang Saul sia amate in thasawm uh hi. 30Thu umte in hi thu a phaw uh ciang, Saul sia Caesaria ah paipui a Tarsus khua ah puak uh hi.
31Tuabangin Judea ngam Samaria ngam le Galilee ngam bup ah pawlpite in ngammuang takin om theina hun khat nga hi. Pawlpi sia Topa min thasiana taw a nuntak bangma in Thaa Thiangtho huna tungtawnin, thakho in pawlpi mi khangto hi.
Peter, Lydda le Joppa ah Khualhaw
32Peter sia mun theampo ah khualhaw a, khatvei sia Lydda ah a teang Pathian mite kungah haw hi. 33Tua munah Aeneas a kici pasal khat taw kimu a, tua pa sia kum liat tawntung a pumzaw ahikom a tho thei bua hi. 34Peter in “Aeneas awng, Jesus Christ in hong damsak hi. Tho in a, na lupna zial in,” ci hi. Tha khat thu in, Aeneas tho hi. 35Lydda khua le Sharon khua a teang mihing theampo in, ama mu uh a, Topa kungah kiheak siat uh hi.
36Joppa khua ah Tabitha kici numei khat om a, ama sia thu um khat ahi hi. (Ama ii Greek min sia Dorcas hi a, “sangai khat” cinopna hi) Ama in a hun nei theampo thupha vawtna le, a zawngte huna in zangh hi. 37Tua hun laitakin ama, a ciina in thi hi. A luang sia kibual a, inn tung doituam khat sungah sial uh hi. 38Joppa sia Lydda panin a khuala bua hi, tuaciangin thu umte in, Peter sia Lydda khua ah om hi ci in a zaak uh ciangin kamtai nii paisak a, “A manlang in hong pai ta'n,” cisak uh hi. 39Tua ahikom Peter kithoai in a samte taw ton hi. Ama a thet ciangin, inn tung doituam sungah paipui a, nupi meingong theampo in bawm hon a, kap kawmin, Dorcas a nuntak lai a, a vawt laktongte le laktong puasilhte theampo lak uh hi. 40Peter in amate theampo inn doituam pua sangah pusuaksak a, khupdin in thungen hi; tuaciang mithi luang maingat in, “Tabitha awng, tho in!” ci hi. Numei in a mit hak a, Peter a mu ciang, hong to hi. 41Peter in a khut thaak a, ama dingsak hi. Tua zawkciang thu um theampo sam a, meingongte zongh kihel in, amate tungah, numei sia a nungta in aap hi. 42Hi thupiang sia Joppa khuazaang ah thang a, mihing tam mama in, Topa um uh hi. 43Peter sia Joppa ah savun vawt ahi Simon kungah ni tam mama taam hi.
Valgt i Øjeblikket:
Sawltakte 9: SCB2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Siyin Chin Bible © Bible Society of Myanmar, 2016