Lucas 9
9
Ko Jesús tkexy ja y'ijxpëjkpëtëjk ets ja Tios y'aaw y'ayuk tkajpxwa'kxtëty
1Tääts ja Jesús tmëkajpxmujky ja nimajkmäjtskpë ja y'ijxpëjkpëtëjk ets tmooy ja mëk'ajtën, kutujkën ets ja ku'oypyë t'ixkäxtëty ets tyajtso'oktëty ja pa'amja'ay. 2Ojts tkexy ets tkajpxwa'kxtëty ja Tios kyutujkën ets tyajtso'oktëty mëti'ipë pëjkëtëpën. 3Jëtu'un t'ënëmaay:
Ka'ap mnitu'uye'eyëk xykyontëty: këtii xymyënëjkxtëty yë tajk, xuumy, tsajpkääky, meeny; tu'ukyë mwit xymyënëjkxtëty mëti'ipë mwit'ajtëpën, ka'ap myäjtskëty. 4Ko mtëkëtëty tëkoty, itë jam koonëm mtsoontëty kajpnjotm. 5Pën ka'ap mkupëkëtë, pëtsëmtë jam kajpnjotm ets ja pu'uxm xywyinxitëty mtekykyëjxm jëtu'un xytyuk'ixtëty ko pokymyëët wyë'ëmtë.
6Ojts ye'eywya'kxtë ets nyëjkxtë oymyakajpnëty, tkajpxwa'kxtë ja oy aaw oy ayuk ets ja pa'amja'ay tyajtso'oktë.
7Tääts ja yajkutujkpë Herodes tmëtoy'äjty ko ja Jesús yajnimëtyä'äky ets tu'kkë'ëyë mëti'ipë tyuunpyën. Ka'ap y'ëkwinma'anypyatnë, jä'ä ko tap ja ja'ay mëti'ipë ënantëpën ko Juan Yajnëëpäjtpë të jyuukpyiky, 8wiinkpë y'ëna'antë ko ja Tios ja kyäjpxynyajxpë Elías të kyëxë'ëky ets ja wiinkpë y'ëna'antë ko yë'ë nitu'uk ja Tios ja kyäjpxynyajxpë të jyuukpyiky. 9Ënät ja Herodes y'ënäny:
Ëjts ja Juan ojts nni'ënä'ämë ets yajkyo'kpuxëty. ¿Pën ja'ay tääpë mëti'ipës nmëtoy'ajtypyën yajnimëtyä'äky?
Paaty ja Herodes tja'ixany ja Jesús.
Ko Jesús tyajkay ja nimëkoxk mil naxypyë ja'ay
Mt 14:13-21; Mr 6:30-44; Jn 6:1-14
10Tääts ja Jesús ja y'ijxpëjkpëtëjk jatëkok jyajtë ets tukmëmëtyaktë ja Jesús, wi'ixëty ënäty të tuntën winë. Ënät ojts wyoowtsoonëtë ets ëpëky yajnëjkxëtë jam Betsaida kyajpnjotm. 11Ko ja mayjyä'äy tnija'awëtyë, tääts ojts tpanëjkxtë. Jesús kyupëjk ja mayjyä'äy ets tukmëmëtyäky ja Tios ja kyutujkën ets ja pa'amja'ay nimay tyajtsoky.
12Tsu'ujënëp ënätynyë, tääts nyimiinëtë ja nimajkmäjtskpë y'ijxpëjkpëtëjk ets y'ënëmaayëtë:
Wimpakäjxnë yë mayjyä'äy wä'än nëjkxtë jam kajpnjotm ets jya'ajta'aktëty, wä'än nëjkx t'ixta'atë kyääkyëty jyi'kxëty ets mya'atëty pyo'kxtëty, jä'ä ko ka'ap yaa tii.
13Ënät ja Jesús y'ënëmaayëtë:
Yajkaytyë miitsëty.
Tä t'ënëmaaytyë ja Jesús:
Je'eyë tsajpkääky yap mëkoxk ets ja ajkx mäjtsk, ¿ëkë nëjkxës n'ëkjuytyë kääky uuky ets ya'atë mayjyä'äy kyäytyëtyë?
14Nimëkoxk mil ënäty ja ja'ayëty. Tääts ja Jesús t'ënëmaay ja y'ijxpëjkpëtëjk:
Yajnaaxwäätstë yë ja'ay tu'kkëëyi'ikyëty, niwëxtyikxy majkjaty.
15Ets jëtu'un tuuntë ets ja ja'ay tyajnaaxwä'tstaaytyë. 16Ënät ja Jesús tkoonë'ky mëkoxk ja tsajpkääky ets ja ajkx mäjtsk, tääts pya'at'ijxy tsajpwinm ets ja Tios tkukajpxëy. Ënät ojts tujkwä'kxy ja tsajpkääky ets tmooy ja y'ijxpëjkpëtëjk ets ja mayjyä'äy tmo'otëty. 17Ojts ja ja'ay ni'ëmukë kyäytyë ku'uxyë ets tpëjkmujktë majkmäjtsk katsy ja tsajpkääky natëkë ets ja ajkx natëkë.
Ko ja Pedro nikäjpxy ko Jesús Yajnitsokpë
Mt 16:13-19; Mr 8:27-29
18Jam ënäty tëkok ja Jesús ja Tios tja'amyetsy nätyu'uk, ënät ja y'ijxpëjkpëtëjk tyajtëëy:
¿Wi'ix yë ja'ay y'ëna'antë, pën ëjts?
19Tääts y'ëtsoowtë:
Tam mëti'ipë ënantëpën ko mijts Juan Yajnëëpäjtpë; wiinkpë y'ëna'antë ko mijts m'Eliësëty, nän tam mëti'ipë ënantëpën ko mijts Tios kyäjpxynyajxpë të jyuukpyiky mëti'ipë tëëyëp juukyajtpën.
20Ets tjaakyajtëëy:
E miitsëty, ¿wi'ix m'ëna'antë, pën ëjts?
Ënät ja Pedro y'ëtsooy:
Mkristë mijts, Tios U'unk.
Ko Jesús tnikäjpxy ja y'o'kën
Mt 16:20-28; Mr 8:30—9:1
21Ënät ja Jesús ojts mëk'äämpy tuk'ëne'emy ja y'ijxpëjkpëtëjk ets ka'ap tnimëtya'aktëty. 22Ets t'ënëmaay:
Yë naaxwiinyëtë ja'ay y'U'unk mëk y'ëyowa'any; ka'ap yë mëjja'aytyëjk, teety wintsëntëjk ets ja tsajptëkotyëtë yaj'ijxpëjkpëtëjk kyupëka'anyë. Yaj'ookantëp, je'eyëp ko kom tëkëëk xëëw jatëkok jyuukpyëka'any.
23Ok ni'ëmukë y'ënëmaayëtë:
Pën tsyojkpy etsës n'ijxpëjkpë'atëty, wä'än kyë'ëm winma'any tja'atyëkoy ets winjëpom ja wyinma'any mëk tpëjkta'akëty ijxtëm tu'uk ja ja'ay ja kyëruuts tpatsëmyën ko ja y'o'kën t'anëjkxë, ënätës xypyaminëty. 24Yë'ë ko pën yajtso'okäämpyën ja jyuukyajtën yajtëkoyäämpy jä'ä; e pën yajtëkoopy ja jyuukyajtën mëët ëjtskyëjxm, yë'ë ja nitsokën pyatäämpy. 25¿Tii ja ja'ay tyajwa'anëty ja jyuukyajtën oy tjamëët'ajta'ay tu'kë'ëyë winë ja naaxwiinypë yajtukjuuky'ätyën, pën kë'ëm nyäyajtëkoyë? 26Pën xytyuktsëtyuumpës ets n'aaw n'ayukës tuktsëtyuunë; näjyëtu'un tyuktsëtyuna'anyë ja naaxwiinyëtë ja'ay ja y'U'unk, ko ënäty myiny mëët ja Tios Teety ets ja wa'ats anklëstëjk ja myëj'ajt y'oyajtën. 27Tëy miits n'ënëëmëtë ko ka'ap nya'ooka'antë jënaakën yë ja'ayëty mëti'ipë tyam yaa yajpatëpën, ënätnëm nëjkx y'ooktë ko t'ixtëty ja Tios ja kyutujkën.
Ko Jesús tyëkatsy
Mt 17:1-8; Mr 9:2-8
28Tuktujk xëëwëp ënäty ja Jesús jëtu'un myëtyä'äky, ko pya'tëjkëy kopkëjxm Tios mëkajpxpë. Wyoow ja Pedro, Santiagë ets ja Juan. 29Ko ja Jesús ënäty ja Tios jam tmëkäjpxy, tääts ja wyiin jyëjp tyëkajtsy ets janty ajajp atë'kxp ja wyit yaj'ixy. 30Ënät jam nimäjtsk ja ja'ay kyëxë'ktë mëti'ipë mëët myëtya'aktën ja Jesús. Jä'ä ja Moisés ets ja Elías, 31atë'kxtëp yaj'ixtë ets nikajpx nimëtya'aktë wi'ix ja Jesús ënäty y'ooka'anyën jam Jerusalén. 32Nëkooyë ënäty ja Pedro mëët ja myëku'uktëjk mya'ajanëtë. Juuky tsyuunajxtë, ënät t'ijxtë ja Jesús myëj'ajtën jyääntyajtën ets ja ja'ay nimäjtskpë mëti'ipë ënäty jam mëët tyänën. 33Ko ja ja'ay jyëwa'ktë ënät ja Pedro t'ënëmaay ja Jesús:
Wintsën, oy koos yaajëty. N'oytyuntës tëkëëk yë ujts aaytyëjk; tu'uk mijts yë mjä'ä, tu'uk yë Moisés yë jyä'ä ets tu'uk yë Elías yë jyä'ä.
Ja Pedro ka'ap nijawë tii ko jëtu'un y'ënä'äny. 34Tyam jëtu'un y'ënä'äny ko ja yoots yajnitujkëtë ets tsyë'këtyë. 35Ënät tmëtoowtë yootsjoty tu'uk ja ayuk:
Ëjts ya'atë n'u'unk, mëti'ipës të nwin'ixyën. Mëtoow'itë wi'ix y'ënä'änyën.
36Ko tmëtoowtë ja ayuk, tääts t'ijxpatë ko ja Jesús nätyu'uk jam. Yu'utsy tyaj'ijtë, ni pën tkatuk'ëwa'anëtyë ko ënäty jëtu'un të t'ixtë.
Ko ja Jesús tyajtso'oky tu'uk ja yä'äy ëna'kpë mëti'ipë ku'oypyë myëët'ajtypyën
Mt 17:14-21; Mr 9:14-29
37Komjëpom, ko tsyo'ontë jam kopkëjxm ënät ja mayjyä'äy tnimiintë ja Jesús. 38Ets tu'uk ja ja'ay mëktä'äky y'ënëmaayë:
Wintsën, ëk'ijxkës yë n'u'unk. Yi'iyës tu'ukyë n'u'unk'ajtyp. 39Xëmë ku'oypyë myätsyë ets yajyä'äxy yajjokyë, mootyë pa'am myëët'ajtyp, yaxon o'pyk jyänty pyëtsimy y'aawjoty, o'ktëy jyäty kyëpety, ka'ap y'ëk'ëxmatsanënë. 40Tëës njamënu'kxtä'äky yë m'ijxpëjkpëtëjk ets jeexyë tyajkpëtsëmtë yë ku'oypyë ka'ap të myäyëtë.
41Tääts ja Jesús y'ënäny:
Miits, ja'ayëty, ka'ap mmëpëktë ets ka'ap tyiyëty mëti'ipë mtuuntëp mkajpxtëpën. Jekyës yam njayajpatkojy mëët miitsëty ¿tii ko ka'ap mëpëktë? Yaa m'u'unk yajmin.
42Ko ja yujkyeeky ëna'k tyajmiintë, ënätyë ja ku'oypyë yajkëtaawë ets pyätë ja mootyë pa'am. Ënät ja Jesús twinkukajpxëy ja ku'oypyë ets tyajtsoky ja yujkyeeky ëna'k ets tukë'ëtëjkëy ja u'unkteety. 43Mëj'ixy ja ja'ay t'ijxtë ko ja Tios ja myëj'ajtën tyajwinkëxë'ëky. Tam ënäty ja mayjyä'äy mëj'ixy t'ixtë mëti'ipë tyuunpyën ja Jesús, tääts ja Jesús ja y'ijxpëjkpëtëjk t'ënëmaay:
Ko Jesús tnikäjpxy mëmäjtsk ok ja y'o'kën
Mt 17:22-23; Mr 9:30-32
44Mëtoow'itë ya'atë aaw ayuk mëti'ipë yam ntukmëtowantëpën. Yajkë'ëyakaanp yë naaxwiinyëtë ja'ay yë y'U'unk ma ja'ayëtyën.
45Ja y'ijxpëjkpëtëjk ka'ap tja'akyujkëtyë ko jëtu'un y'ënä'äny, jä'ä ko ka'ap ënäty ja wijyajtën yajmo'otënëm ets tja'akyukëtëty; tsë'këtëp näjyëtu'un paaty ka'ap ja Jesús tyajtëëwtë tii jyatijäämpyën.
Pën ni'ik mëj'äämpy
Mt 18:1-5; Mr 9:33-37
46Tääts nyäyajtëwëtë nixim niyam ma yë'ëjëtyën, pën ni'ik mëj'äämpy. 47Ko ja Jesús tnija'awëy wi'ix y'ëna'antën, ënät tyaxëy tu'uk ja pi'k ëna'k ets tpëjktäky pyë'aay, 48ets y'ënëmaayëtë:
Pën ya'atë pi'k ëna'k kyupëjkpy ëjtskyëjxm, nän ëjts ënäty xykyupëjkp ets pën xykyupëjkpës, yë'ë näjyëtu'un kyupëjkpy mëti'ipës xykyäjxpën. Pën mutsk näpyëjktakëp ma miitsëtyën, yë'ë mëj najxp.
Pën ka'ap xymyëtsip'ajtëm, ëëtsajtëm mëët yë'ë yajpaaty
Mr 9:38-40
49Tääts ja Juan t'ënëmaay ja Jesús:
Wintsën, tëëjës n'ixy tu'uk ja ja'ay mëti'ipë mijts ja mmëkajtën yajtuumpyën ets ja ku'oypyë t'ixkexy. Yë'ë ko ka'ap ëëtsajtëm xypyajëtijtëmë, tëëjës nja''akajpxtuka'antë.
50Ënät ja Jesús y'ënäny:
Ka'ap xy'akajpxtuktëty. Pën ka'ap xymyëtsip'ajtëmë, ëëts mëët yë'ë nyajpatëmë.
Ko Jesús t'ojy ja Santiagë ets ja Juan
51Ko ja xëëw po'o ënäty tpatnë ma ja Jesús pya'tëkëjanën tsajpjotm, tääts ojts amëk jotmëk nyijkx Jerusalén. 52Ojts jëwyiin tkexy ja kyäjpxynyajxpë. Ko jyajtë ma tu'uk ja mutsk kajpnën Samaria y'itjotm, ënät t'ixtaaytyë ja ja'ajtakn. 53Ka'ap ja Samaria ja'ay kyupëjkëtë, jä'ä ko tnijawëtë ko Jerusalén nyijkx ja Jesús. 54Ko ja Santiagë ets ja Juan jëtu'un tmëtoowtë, ënät t'ënëmaaytyë:
Wintsën, ¿Myajkutujkpy mijts etsës n'amëtowtëty ja jëën tsajpjotm, wä'än yë ja'ay tkutëkoytyë?
55Tääts ja Jesús wya'akwinpijty ets twinkukajpxëy. 56Tääts tsyo'ontë ets ojts nyëjkxtë ëpëkykyajpn.
Pën ja Jesús pyanëjkxantëp
Mt 8:19-22
57Ko ënäty tyu'uye'eytyë ënät ja Jesús tu'uk ja ja'ay y'ënëmaayë:
Wintsën, mpatsonäämpy mijts ma mnëjkxyën.
58Ënät ja Jesús y'ëtsooy:
Nikë tää yë wax yë jyut ets joon tää yë pyä'än; yë naaxwiinyëtë ja'ay yë y'U'unk ka'ap tmëëtëty ma kyëpajk tkëxkonëtyën.
59Tääts ja Jesús ja ja'ay wiinkpë t'ënëmaay:
Pamiinkës.
Ënät ja ja'ay y'ëtsooy:
Wintsën, minës nëjkx jëwyiin ja nteety n'ëkyajnaaxtëkë.
60Ënät ja Jesús y'ëtsooy:
Wä'än yë ja'ay tyajnaaxtëkëtë yë y'o'kpë mëti'ipë näjyëtu'un ookantëpën; mijts minmës ets xykyajpxwa'kxëty ja Tios ja kyutujkën.
61Jëtu'un ja wiinkpë y'ënëmaayë:
Wintsën, mpatsonäämpy mijts, je'eyëp ko nëjkxës jëwyiin n'ëknäjyëjpkäjpxyë maas yë ntëjkën.
62Tääts ja Jesús y'ëtsooy:
Mëti'ipë ja'ay yajtsajpkaayuupën ets janaam jatsojk y'ijxwinpity, ka'ap jëtu'unpë tsyokyë ma Tios yë kyutujktaknën.
Valgt i Øjeblikket:
Lucas 9: QUETZMIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
