Lucas 8

Ja to'oxytyëjktëjkëty mëti'ipë ja Jesús ijty pyutëjkëtyëpën

1Ko jëtu'un y'ëkjajty y'ëkkëpejty, ënät ja Jesús jyëtijty kajpn kajpn mëët ja y'ijxpëjkpëtëjk nimajkmäjtskpë ets ojts tkajpxwä'kxy ja oy aaw oy ayuk mëti'ipë nyikäjpxypën ja Tios ja kyutujkën. 2Näy tam ja to'oxytyëjk jënaakën mëti'ipë ja Jesús ënäty të yajtso'okëtën, Maria, mëti'ipë yajtijpën Magdalena, mëti'ipë ja ku'oypyë ënäty niwëxtujk të tmëët'atyën; 3näjyëtu'un ja Juana, Cuza tyo'oxytyëjk, mëti'ipë jam tuunpën ma ja Herodes y'ëne'emyën; ja Susana ets nimay ja to'oxytyëjkëty ijty pyutëkëtë.

Ja nyi''ijxpät ja nippë

Mt 13:1-9; Mr 4:1-9

4May ja Jesús ojts nyiminyë ja ja'ay mëti'ipë tso'ontëpën kajpn kajpn. Ko ja ja'ay nimay myujktë ënät ja Jesús tu'uk tukmëmëtyaktso'ony ja ijxpäjtën ets y'ënäny:

5Tu'uk ja ja'ay tsyo'ony tsajpmok wëjpë, ko ja tsajpmokpajk twëjjëtijty, ojts tu'kpëky kyä'äy tu'ujotm, ënät yajnaaxkutä'änëy ets ja joon myiintë ets tpiiwmujktë. 6Jatu'kpëky ja tsajpmok ojts kyä'äy tsaajoty. Ko yoony, ënät tyëëtsë'ky jä'äkyëjxm ko ja naax jam kyaxookëty. 7Jatu'kpëky ja tsajpmok ojts kyä'äy äpnyjoty ets mëët yoony ja äpny ets nyiyoonpäjtë tääts tyitsy. 8Jatu'kpëky ojts kyä'äy jë'kxynyaaxjoty, jä'ä ojts yony ets tyëëmpejty, mëko'px ojts pyajk'aty tu'ukpë ja tsajpmok yajnipyën.

Ko ja Jesús myëtyaktaay, tääts mëktä'äky y'ënäny:

Pën ja tyatsk tyukmëtoopy, wä'än tmëtoowkukë.

Tii ko Jesús myëtyä'äky ijxpäjtën mëët

Mt 13:10-17; Mr 4:10-12

9Ënät yajtëëwëtë ja y'ijxpëjkpëtëjk wi'ix nyiwijyën mëti'ipë ënäty të tmëtyä'äkyën ijxpäjtën mëët. 10Tääts ja Jesús y'ëtsoowëtë:

Miits ja Tios të mtuknijawëtë mëti'ipë yu'utsy'ijtpën ma ja kyutujktaknën. E ja wiinkëtypë ja ja'ay, ijxpäjtën mëët yajtukmëmëtya'aktë këtiipë tja'akyukëtëty oy tja'ixtëty, ets ka'ap tmëtoowkukëtëty oy tjamëtowtëty.

Ko Jesús tkajpxtë'kxy ja tsajpmok wëjpë nyi''ijxpät

11Yë ya'atë ijxpäjtën jä'ä nyiwijy: Jëtu'un yë tëëmt ijxtëm ja Tios ja y'aaw y'ayukën. 12Ja tsajpmokpajk mëti'ipë ojts kyä'äyën tu'ujotm, jëtu'un yë'ë ijxtëm ja ja'ayëty mëti'ipë ja Tios ja y'aaw y'ayuk jyamëtoow'ijtëpën; ënät ja mëjku'u pyëjkxëtë ja Tios ja y'aaw y'ayuk ets ka'ap tmëpëktëty, jëtu'un ka'ap nyitso'oktëty. 13Ja tëëmt mëti'ipë ojts kyä'äyën tsaajotm, jëtu'un yë'ë ijxtëm ja ja'ayëty mëti'ipë y'amëtoow'ijtëpën ja Tios ja y'aaw y'ayuk ets jotkujk myëpëjkojtë. Ko ënät wi'ix tkujatëtë tääts t'ëxmatstë. Yë'ë jëtu'un jajtp ijxtëm ja tsajpmokyonën mëti'ipë ka'ap tyiktsk kyëkëtyën. 14Ja tëëmt mëti'ipë ojts kyä'äyën äpny akujky, jëtu'un yë'ë ijxtëm ja ja'ayëty mëti'ipë y'amëtoow'ijtëpën ja Tios ja y'aaw y'ayuk ets tmëpëktë, je'eyëp ko yë'ëty, yë'ë myëjpëjktaktëp ja nyaax kyamëty yaa naaxwiiny ets ja myeenyëty, xiktëp xoontëp; jëtu'unts yë'ë nyaxtë ijxtëm ja tsajpmokyonën mëti'ipë tëtspën ets ka'ap tyëëm'aty. 15Ja tëëmt mëti'ipë ojts kyä'äyën jë'kxynyaaxjoty, jëtu'un yë'ë ijxtëm ja ja'ayën mëti'ipë ja Tios ja y'aaw y'ayuk y'amëtoow'ijtëpën ëmuumtu'ukjot ets tpatuntë, jëtu'unts ja jyuukyajtën tyajtu'uye'eytyë ijxtëm ja Tios tyukmëtsokëtën.

Kutë'kxn nyi''ijxpät

Mr 4:21-25

16Ka'ap pën yë jëën tyajtooypyiky ets tnipe'eny, ëkë maapäjnpa'tke'p tpëjktä'äky. Këjxm ja jëën yajkëxkony ets tkutë'kxëty mëti'ipë tëjkëtëpën. 17Näyjyëtu'un, ka'ap tii yu'utsy y'ity mëti'ipë ka'ap yajnijawëtyën, ka'ap tii yajpëjkë'ëky xëmë mëti'ipë ka'ap yajpaatëtyën.

18Mëtowtë yajxon. Pën may tii myëët'ajtyp, wäänëni'ik jyaak timyajmo'oja'any; pën yiin wäänë tii myëët'ajtyp, yajpëjkëjaanp tu'kë'ëyë mëti'ipë ënäty jyamëët'ajtypyën.

Jesús ja tyaak ets ja myëkä'äxtëjk

Mt 12:46-50; Mr 3:31-35

19Ënät ja Jesús ja tyaak ets ja myëkä'äxtëjk jyajtë ma ënäty jamën, kä'äp tpatë winkon jä'ä ko ënäty ja ja'ay jam jyatëtë. 20Tääts ja Jesús yajtuk'ëwa'anëy:

Tap tëjk ëkë'p ja mtaak ets ja mmëkä'äxtëjk tyänëtë, mijtsëk m'ixanëtëp.

21Ets ja Jesús y'ëtsooy:

Yë'ëjës ntaak'ajtyp ets nmëkä'äx'ajtyp mëti'ipë y'amëtoow'ijtëpën ja Tios ja y'aaw y'ayuk ets tpatuntë.

Ko Jesús tyajnaxy ja mëkpoj ets ja nëë tyajkëëy'awë

Mt 8:23-27; Mr 4:35-41

22Tëkok ja Jesús ja y'ijxpëjkpëtëjk t'ënëmaay:

Oy nja'amëty jamtsow mejypyë'am.

Ënät tyëjkëtyë kepy nëëwinye'epyëjoty ets ojts nyëjkxtë. 23Jam ënäty mejy itkujkm nyëjkxtë ko ja Jesús myaanajxy ets ja mëkpoj myiiny ets ja nëë jap kepy nëëwinye'epyëjoty kyujä'tsëy, mëpaatëp kyiinëtë. 24Tääts tyujxtë ja Jesús ets t'ënëmaaytyë:

Wintsën. Wintsën. Tam nki'ina'anëmë.

Ënät ja Jesús pyëti'ky ets mëk'äämpy twinkukajpxëy ja mëkpoj, ënät ja nëë ets ja mëkpoj myoony ets ja nëë kyiiy'a'awëy. 25Ets t'ënëmaay ja y'ijxpëjkpëtëjk:

¿Tii ko mkamëpëktë?

Tsë'këtëp ënäty ni'ik ja y'ijxpëjkpëtëjk, ets mëjmëtoy tja'awëtë paaty xim yam nyäy'ënanëtë:

¿Pën ja'ay tëy ya'atënë? Pojpaat mejypyaat myëmëtoowënë ko t'ëne'emy?

Gerasa ja'ay mëti'ipë ja ku'oypyë myëët'ajtypyën

Mt 8:28-34; Mr 5:1-20

26Ënät jyajtë Gerasa y'itjotm, mëti'ipë jamtsow nëë'awinm wë'ëmpën wintuuytsyow ma Galilea yajpaatyën. 27Ko ja Jesús pyëtsiimy kepy nëëwinye'epyëjoty ënät nyimiinë tu'uk ja kukajpn mëti'ipë ku'oypyë myëët'ajtypyën. Tëëyëp ënäty ja wyit t'ixjäänë, ni kyatsëënë tëkoty, jam tsyëënë ma o'kpë yajpëjkë'ëktën. 28Ko t'ijxpaty ja Jesús ets twinkoxtënaay, tääts y'ënäny ayaxp ajojkp:

Jesús, Tios ni'ik këjxmëpë y'u'unk, ¿tii mtsojkpy mëët ëjts? Tun ja mëyajtën, këtiis xyajjotkëxy.

29Yë'ë kyu'ëna'anëp ko ja Jesús ja ku'oypyë t'ëne'emy ets ja ja'ay t'ëxmatsëty. Kanaak'ok ënäty ja ku'oypyë të tsyäätsytyunyë. Ko ja pujxntejpxy jyayajtuktsumy ma kyë'ëjën ma tyekyën ets ka'ap maa nyëjkxëty, yë'ë tyukpojtëtyääpy ënätyë ets nyijkxy jam muum të'ëts'itjotm. 30Ënät ja Jesús tyajtëëy:

¿Tii mxëëw'ajtyp?

Ets y'ëtsooy:

Legionkës nxëëwajtyp.

Paaty jëtu'un y'ënäny, jä'ä ko nimay ënäty ja ku'oypyë jap të tyëkëtë ma ja ja'ayën. 31Ënät ja ku'oypyë t'ënëmaaytyë ja Jesús ets ka'ap kyäxëtëty ma ja ëyoowtaknën. 32Jamts ënäty ja may ëtsëm yuunpëtë kopkwinm ets ja ku'oypyë nyu'kxtaktë ets ja ëtsëm tuktëkëtëty. Yajkutujk ja Jesús. 33Tääts ja ku'oypyë pyëtsëëmtë ma ja ja'ayën ets tuktëjkëtyë ja ëtsëm. Ënät ja may ëtsëm kyupëyë'knajxtaaytyë ja'awjoty ets nëëjoty kyëtaktaaytyë. Japts jyi'kxtaaytyë.

34Ja ja'ayëty mëti'ipë ënäty jam ëtsëm këwent'ajtëpën, ko jëtu'un t'ijxtë tyunyë jyätyë, ënät kyäktaaytyë ets ojts nyëjkxtë jam kajpntum ets nimëtyaktë. 35Ojts ja ja'ay tnitsoontë ets t'ixa'antë tii të tyuny të jyätyë; ko jyajtë ma ja Jesús jamën ets t'ijxpatë ko tam ja ja'ay y'u'unyë mëti'ipë ënäty ja maykyu'oypyë të tmëët'atyën, wijy kejy, xoxy pëky; ënät ojts tsyë'ëkëtë. 36Ets ja ja'ay mëti'ipë ënäty të t'ixtën, yë'ë nyimëtyaktë wi'ix ënäty ja ja'ay ja ku'oypyë të y'ëxmatsyën. 37Jä'äkyëjxm ja Gerasa ja'ayëty ni'ëmukë tmëpëjktsoowtë ja Jesús ets jam tsyoonëty, tsë'këtëp ja ni'ik. Ënät ja Jesús kepy nëëwinye'epyëjoty tyëjkëy ets tsyo'ony. 38Ja ja'ay mëti'ipë ënäty ja ku'oypyë të y'ëxmatsyën, ojts mëk'äämpy tmënu'kxtä'äky ja Jesús ets mëët nyëjkxëty kepy nëëwinye'epyëjoty. E ja Jesús jëtu'un y'ënëmaayë ets wyë'ëmëty::

39Nëjkx ma mtëjkën, jamts xynyimëtya'akëty wi'ix ja Tios të mputëkëtyën.

Ojts ja ja'ay nyijkxy ets nimëtyäky wi'ix ënäty ja Jesús të yajtso'okyën.

Jairo nyëëx ets ja to'oxytyëjk mëti'ipë Jesús wyit tyoonën

Mt 9:18-26; Mr 5:21-43

40Ko ja Jesús jyä'äjty jatëkok mejypyë'am, pëk paat ja ja'ay jam jya'awëyë, janty aak ëwxijtëtëp ënäty ja ja'ay jam. 41Tääts tu'uk ja ye'etyëjk jyä'äjty mëti'ipë xyëëwajtypyën Jairo, wintsën'ajtp jam tsajptëkotm. Ënät naaxkëjxy nyäkyoxtënaaytyakë Jesús wyintuuy ets tmënu'kxtäky ets mëët nyëjkxëty ma tyëjkën. 42Ookanëp ënäty ja nyëëx, tu'kpajkpë t'u'unk'atyën, majkmäjtsk ënäty ja jyëmëjt.

Ko ja Jesús ojts nyijkx, may ja ja'ay pyanëjkxë. 43Jamts tu'uk ja to'oxytyëjk mëti'ipë majkmäjtsk jëmëjt ënätynyë ma ja pyo'omayë pyatënën ets ka'ap tyajxmony; kanu'unpë ënäty meeny të tyajtuunë ko ja tsooy tjuy ets ja yajtsooypyäjtpë jyayajtsooypyetyë, ets ni pën tkajaty yajtso'okëtëty. 44Tääts ojts tpanëjkxy ja Jesús ets ja wyit pa'a ojts toonë ets ja pyo'omayë ënätyë tyajxmoony. 45Ënät ja Jesús tyajtëëy:

¿Pënës të xytyony?

Ko ni pën tkakupëjky ets ja Pedro y'ënäny:

Wintsën, jëtu'unyë ja'ay m'atij m'akotëty.

46Tääts ja Jesús y'ënäny:

Tëës ja'ay xytyony, tëëjës njawë koos yë nmëk'ajtën të xytyukpëtsëmy.

47Ko ja to'oxytyëjk t'ijxy ko ka'ap y'oyëty tkuyu'utsëty mëti'ipë të tunyën, tääts ojts nyäkyoxtënaaytyä'äkyë ma Jesús tyeky'ëjxën ets tuk'ëwa'anëy mayjyä'äy wyintum ko yë'ë ënäty të tony ja Jesús ets ënätyë të tsyo'oky. 48Ënät ja Jesús y'ënëmaayë:

Nen, jä'äkyëjxm të mtso'oky koos të xymyëpëky. Nëjkx akujk jotkujk.

49Tam ënäty ja Jesús jëtu'un y'ënä'änyëm ko jyä'äjty tu'uk ja ja'ay mëti'ipë tso'onpën ma ja Jairo tyëjkën, ënät t'ënëmaay ja tsajptëjk wintsën:

Tëë ja mnëëx y'o'knë, këtii nëkoo xyajjotkëxy yë Wintsën.

50Ko ja Jesús jëtu'un tmëtooy, ënät t'ënëmaay ja Jairo:

Këtii mtsë'ëkë, je'eyë mëpëk ets mnëëx tsyo'okëty.

51Ko jyajtë ma ja Jairo tyëjkën, ka'ap ja Jesús tkupëjky ets pën pyatëkëtëty, yi'iyë wyoow ja Pedro, Santiagë, mëët ja Juan ets ja u'unktaak u'unkteety. 52Nimay ja ja'ay ja kiixy u'unk tnijë'ë tniya'axtë ets ja Jesús y'ënëmaayëtë:

Këtii mya'axtë, ka'ap yë kiixy u'unk të y'ooky, maap je'eyë.

53Ets ja Jesús tukxiktë, nyija'awëtëp ko tëë ja Jairo ja nyëëx y'o'knë. 54Tääts ja Jesús tmajtsy kyë'ëkëjxy ja kiixy u'unk ets mëk t'ënëmaay:

Kiixy u'unk, pëtë'ëk.

55Ets jyuukpyijky. Ënätyë pyëti'ky ets ja Jesús y'ënäny ets tyajkaytyëty. 56Mëj ixy ja tyaak tyeety t'ijxtë. Tääts ja Jesús y'ënëmaayëtë ets ka'ap pën tuk'ëwaanëtëty ko jëtu'un të tyuny të jyätyë.

Valgt i Øjeblikket:

Lucas 8: QUETZMIXE

Markering

Del

Kopiér