Lucas 10

Ko Jesús tkäjxwä'kxy ja nitëkë'px majkmäjtskpë ja ja'ay

1Ko jëtu'un y'ëkjajty y'ëkëpejty, ënät ja Wintsën Jesús twinwijtsy nitëkë'px majkmäjtsk ja ja'ay ets tkejxy nimäjtskjaty kajpn kajpn.

2Ets t'ënëmaay:

Janty may ja pëjktä'äky pyëtë'ëka'any, je'eyëp ko ka'ap ja tuunpë myäyëty. Paaty miits xy'amëtowtëty ja pëjktä'äky ja nyiwintsën ets nyëjkxtëty ja tyuunpë ets ja pëjktä'äky pyëtë'ëkëty. 3Nëjkxtë. Ëjts miits nkäjxtëp ijxtëm ja kupixyny nyëjkxtë pa'uk akujky. 4Këtii xywyitstëty yë mxuumy, meeny apëjkën, ni wiinkpë mkë'ëk; ets ka'ap pën mëët jeky mëtya'aktëty ko pën xykyajpxpo'kxtëty tu'ujoty. 5Ko muum mja'ajtakn xy'amëtowtëty, jëtu'un ja ja'ay xykyajpxpo'kxtëty: Wä'än jotkujk'ajtën tyajpaaty ma ya'atë tëjkën. 6Pën jap ja ja'ay yajpaaty akujk jotkujk, akujk jotkujk mëët mwë'ëmtëty; pën ka'ap, mëwë'ëmtë ja akujk'ajt jotkujk'ajtën. 7Jam wë'ëmtë ma tääpë tëjkën, mkaytyëp m'uuktëp pën tii ja ja'ay mmooyëtëp, jä'ä ko ja tuunpë paat'ajtëp myëju'uyën. Ka'ap winjëën wintëjk mjëtitëty. 8Ko oymyakajpn mja'tëty ets myajkupëktëty, mkaytyëp m'uuktëp pën tii jam myajmooytyëp. 9Yajtso'oktë ja pa'amja'ay mëti'ipë jamëtyën ets xynyëëmëtëty: Tää ja Tios ja kyutujkën mmëwinkonëtë. 10Ko ma kajpn mja'tëty ma ka'ap myajkupëktën, pëtsëmtë jam ets m'ëna'antëty: 11Yë'ëpaat yë pu'uxm mëti'ipë jam ma ëëts yë ntekyëtyën nwinxitës ets xymyëwë'ëmtëty ja mpokyëty. E nijawëtë ko winkon ja Tios ja kyutujkën yajpaaty ma miitsëtyën. 12Jëtu'un miits n'ënëëmëtë ko nëjkx ja naaxwiinyëtë ja'ay yajpaye'eytyë, wäänë mëk yë ja'ay jëtu'unpë nëjkx yajtëytyuntë këtiinëm ja ja'ayëty mëti'ipë jam Sodomë kukajpn'ajtën.

Kajpn mëti'ipë ka'ap kyäjpxykyupëktën

Mt 11:20-24

13Miitsëty, Corazín ja'ayëty mon tuk myajpaatë ets miits Betsaida ja'ayëty mon tuk myajpaatë. Jä'ä ko jeexyë mëj'ajtën të yajtuny jam Tirë ets Sidón ijxtëm të yajtunyën ma miitsëtyën, wintiixyëp jeexyë ja u'kxywyit tmë'u'unyäänyëtë kuyjaamjoty, jëtu'unts jeexyë të tyajknikëxë'ëktë ko të jyootwinpitë. 14Ko nëjkx ja naaxwiinyëtë ja'ay yajpaye'ey, wäänë mëk miits nëjkx myajtëytyuntë këtiinëm ja Tirë ja'ayëty ets ja Sidónja'ayëty. 15Ets mijts Capernaumëtë ja'ay, ¿jëtu'un may mtajy ko tsajpjotm myajmënëjkxa'anyë? Niwi'ix'äämpy, wäänë pa'tkë'p mijts mnëjkxa'any ëyoowtaknjoty.

16Ënät ja Jesús t'ënëmaay ja y'ijxpëjkpëtëjk:

Pën myëtoow'ijtëp mëti'ipë miits mnimëtyaktëpën, nän ëjts ënäty xymyëtoow'ijtëp; pën kyamëtoow'ijtyp mëti'ipë ënäty miits mnimëtyaktëpën, nän ëjts ënäty xykyamëtoow'ijtp; pën xykyakupëjkpës, näjyëtu'un ja nteetyës ka'ap tkupëky mëti'ipës të xykyexyën.

Ko wyimpitë ja nitëkë'px majkmäjtskpë ja'ayëty

17Tääts ja nitëkë'px majk mäjtskpë ja'ay ojts jotkujk jya'ajnëtë ets y'ënantë:

Wintsën, ku'oypyë paatës të xymyëmëtowtë mijts mxëëwkyëjxm.

18Ets ja Jesús y'ënëmaayëtë:

Jëtu'un, tëëjës n'ixy ko ja mëjku'u kyuka'anaxy tsajpwinm ijxtëm ja wëtsuk nyaaxkëtä'äkyën. 19Ëjts miits të nmo'otë ja kutujkën ets ka'ap wi'ix mjatëty oy xyjyatukwa'kpätëty ja tsa'any ëkë ja kä'py ets xymyëmëta'aktëty miits ja mmëtsip, ka'ap wi'ix mjatëty. 20Je'eyëp ko këtii yi'iyë xytyukxoonta'aktëty ko ja ku'oypyë mmëmëtowëtëty, yë'ë mtukxoonta'aktëp ko ja Tios të tuny ja mëyajtën ko mxëëw jap kuja'ay y'ijnëtë tsajpjotm.

Yi'iyë Jesús nyija'ap pën Teety'ajtp

Mt 11:25-27; 13:16-17

21Näy jää it ma ja Jesús ënäty jotkujk nyäjyawëtyën mëët ko ja Kënu'kxymyëkajtën ënäty të tyuktëkëty, ënät y'ënäny:

Tios Teety, Wintsën tsajpjotmëpë ets naaxwiinypë, nmëjja'ap njaantyjya'ap mijts, jä'äkyëjxm ko ja ja'ay mëti'ipë yu'unk naxym ja'ay'ajtëpën, tëë xytyuk'ixy xytyuknijawë mëti'ipë të xytyukwinkuyu'tsyën ja wijyjyä'äytyëjk. Jëtu'un, Tios Teety, jä'ä ko jëtu'un mijts të xytsyoky.

22Tääts ja Jesús y'ënäny:

Aak ëjts ja Tios Teety të xymyooytyä'äy tu'kë'ëyë winë. Ka'ap pën tnijawë pën Tios u'unk'ajtp, Tios Teety nätyu'uk nyija'ap; ni pën tkanijawë pën ja Tios Teety, Tios U'unk nätyu'uk nyija'ap ets tyuknijawëp ja ja'ay mëti'ipë ënäty tyuknijawëjäämpyën.

23Tääts ja y'ijxpëjkpëtëjk twin'ijxpejty ets t'ënëmaay aak ayi'iyë:

Akujk jotkujk ja ja'ay yajpaatë mëti'ipë y'ijxtëpën ja tyampë miits xy'ixtën. 24Jä'ä ko jëtu'un miits n'ënëëmëtë, may ja Tios ja kyäjpxynyajxpë ets may ja yajkutujkpë tja'ixantë mëti'ipë miits tyam m'ijxtëp mmëtoowtëpën ets kä'äp t'ijxtë tmëtoowtë.

Samaariëtë ja'ay, oyjyä'äypyë

25Tu'uk ja tsajptëkotyëtë yaj'ijxpëjkpë wya'kujkëy ets tkäjpxywyitsa'any ja Jesús ets tyajtëëy:

Wintsën, ¿tiis ntunëp ets npaatëtyës ja juukyajtën xëmëkyëjxmëpë?

26Ets ja Jesús y'ëtsoowinpijtë:

¿Wi'ix ja Moisés ja y'ënä'ämën kyëxja'ayëty? ¿Wi'ix jap xykyäjpxy?

27Tääts ja tsajptëkotyëtë yaj'ijxpëjkpë y'ëtsooy:

Tsok ja Wintsën mëët tu'kë'ëyë ja mja'awën, mëët tu'kë'ëyë ja mjot mwinma'any, mëët tu'kkë'ëyë ja mmëkajtën ets tsok yë mmëku'uk ijxtëm kë'ëm mnätsyokyën.

28Ënät ja Jesús y'ënëmaayë:

Tëy m'ëna'any. Pën mpatuunpy jëtu'un, mpaatëp ja juukyajtën xëmëkyëjxmëpë.

29E ja tsajptëkotyëtë yaj'ijxpëjkpë mëj nyäyajnaxa'anyë paaty tjaaktimyajtëëy ja Jesús:

¿E pën jëtu'un nmëku'uk'ajtypës?

30Tääts ja Jesús y'ëtsoowë:

Tu'uk ja ja'ay ënäty tsyoony Jerusalén ets jya'ta'any Jericó. Jamts ënäty kyëtä'äky tu'ujotm, ko ja mä'tspë pyätë ets tu'kë'ëyë winë yajmä'tstaay, wyitpaat ojts yajpëjkë ets yajwinwojpy yajjëjpwojpy, o'ktso'oky yaj'ëxmajtsy. 31Ënät jam nyäjxy tu'uk ja teety, oy tja'ixy, je'eyë ojts tnaye'ey ets nyäjxy. 32Näyjyëtu'un tu'uk ja Leví ja'ay jam myiiny. Ko t'ijxy, ojts tnaye'ey ets nyäjxy. 33E ko tu'uk ja samaariëtë ja'ay kyëtäky ets t'ijxy, tääts tpa'ëyooy. 34Ënät ojts tmëwinkony ja tsëtyutja'ay ets tyajtsooypyejty mëët ja olivë on mëët ja tsatsym nyëë, tääts tnimojtsy. Ënät ojts tyajpety jyëyujkëjxm ets ojts tyajnëjkxy ma tu'uk ja ja'ajtaknën ets jam tpa'am'ijxy. 35Komjëpom, ko ja samaariëtë ja'ay tsyoonanë ets tju'ty mäjtsk ja denario meeny ets ja kutëjk tmooy ets t'ënëmaay: Kwent'at ya'atë ja'ay, mo'o pën tii y'amëtoopy; pën ka'ap yë meeny myëtä'äky mëti'ipë yam nmoopyën, yajtun mkë'ëm meeny, jääjës nkëpätëty koos nwinpitëty jatëkok. 36E nikajpx, ¿pën mijts mnajtsja'ap myëku'uk'ajtyp mëti'ipë ja mä'tspë yajtsëtyujtaayë?

37Tääts ja tsajptëkotyëtë yaj'ijxpëjkpë y'ëtsooy:

Jä'ä mëti'ipë pa'ëyoowën.

Ënät ja Jesús y'ënëmaayë:

Nëjkx ets näjyëtu'un xytyunëty.

Jesús yajpaaty ma Marta ets Maria tyëjkën

38Tääts ja Jesús jyëtijty ets jyä'äjty ma tu'uk ja kajpnën. Jamts ja to'oxytyëjk tu'uk, mëti'ipë Marta xyëëwajtypyën, yë'ë ojts yajja'tyë ma tyëjkën. 39Ets ja myëkä'äx tu'uk, Maria xyëëwajtyp; yë'ë ojts Jesús wyintum nyaaxweetsy ets tmëtoow'ity wi'ix y'ënä'änyën. 40E ja Marta yë'ë jam y'oytyuunpy ja kääky tojkx ets tnimiiny ja Jesús ets t'ënëmaay:

Wintsën, ¿këtii xy'ixy koos yë n'uty nätyu'uk xytyuktuunta'ay ya'atë tuunkë? Ënëëmë etsës xypyutëkëty.

41E ja Jesús jëtu'un y'ëtsooy:

Marta, Marta, yë maypyë tuunk mijts mmëmääpy mmëtäjpy. 42Je'eyep ko tu'ukyë je'eyë mëti'ipë kopkpëkyën. María yë'ë të twin'ixy mëti'ipë ni'ik kopkpëkyën ets ka'ap tjëkyepy pën pyëjkxëtëty.

Valgt i Øjeblikket:

Lucas 10: QUETZMIXE

Markering

Del

Kopiér