San Juan 10
10
Borregujat icuentu
1Iyacs̈ta'cway tʉnʉmgʉs̈ap:
—Jeme catʉgʉypay puertani'c curra̱tjugum mam igui-actsʉ̱́nga borregujat, mit tʉgʉyp jatu'c laj, ayé tu'c nu'mpay mit tʉctʉgʉypay. 2Po jeme tʉgʉypay puertani'c, ayé ayé jeme icuida̱tpay borregujat. 3Mit pa ayé jayau igui-awa̱jtsap puertacuida̱tpayna', mit borregujat iguimaraugap icots. Mit cʉs̈wa'n imuya̱s̈cʉs̈p iborregujat inʉ'jyni'jcat mit i-acpichingʉs̈p. 4Mit igui-acpichingʉs̈wa'n nu'pʉjʉn ije', je' nʉcs̈p jʉpm mit iborregujat iguinatspoguigap ni'c iguimaraugap icots. 5Po tu'c jayjayau iganatspoguigáj, mejor icupo'jcáj ni'c igamaraugap jayjayajwat.
6Jesús itumuquips̈ ayʉ̱j cuentu pa je'jat, po igajawigawu ti inʉmo'jcʉp.
Jesús ayé borregu-cuida̱tpay oyway
7Mit cʉs̈ Jesús inʉmgʉs̈awatu:
—Iyacs̈ta'cway tʉnʉmgʉs̈ap: Ʉ̱j as̈am tʉpuerta mam itʉgʉyga borreguwájat. 8Nu'pʉjʉn jeme mingaway antes tʉmijn, ayé as̈am nu'mpajyat mit tʉctʉgʉypajyat, po borregujat igamaraugawu. 9Ʉ̱j as̈am tʉpuerta. Jeme tʉgʉypay mit ʉ̱, nisalva̱jtʉ̱́j, Mit oyáj itʉgʉy mit ipichin mit iguigatogoyáj neti.
10’Tu'c nu'mpay mimp pa inu'mwa'n mit pa i-ago'cwa'n mit pa igui-actogoyda'cwa'n nu'pʉjʉn. Po ʉ̱ tʉmín pa tʉs̈moygʉs̈wa'n vida, mit pa ma aguepca vida jeme siguia̱támpay pa siempre. 11Ʉ̱j ayé tʉborregu-cuida̱tpay oyway, mit tu'c borregu-cuida̱tpay oyway iyacp ivida pa borregujat. 12Po jeme yos̈watpay pa i-actsʉ̱nawa'nu, ayé caje' borregu-cuida̱tpay, mit caje' ije' borregujat. Mit igui-e'pwa'n ni'c mimp tu'c paju, icuyaguigʉs̈p borregujat mit po'cp. Mit ayé paju i-actangʉs̈p mit i-acs̈is̈cada̱cpʉ'mp. 13Jemni'c ipo'c jeme yos̈watpay pa i-actsʉ̱nawa'n ni'c je' actsʉ̱napu, mit igawatp cuenta ayé borregujat.
14’Ʉ̱j ayé tʉborregu-cuida̱tpay oyway mit tʉnis̈capcʉs̈p tʉmborregujat, mit nu'pʉjʉn tʉnje' tʉs̈-is̈capcap 15as̈am tʉnte̱t Dios tʉs̈-is̈cap, mit tʉnis̈capey tʉnte̱t Dios, mit tʉnyacp tʉmvida pa borregujat. 16Tʉnaguepey japu̱t borregujat catsʉ̱ngapay en ayʉ̱́j curra̱t, mit aye'jat itp ti tʉs̈mumingʉs̈wa'n, mit imaraugámpey tʉcots, mit itáj tu'gu borregujuc mit tu'c borregu̱cuida̱tpay.
17’Jemni'c tʉs̈wamp tʉnte̱t Dios ni'c tʉnyacp tʉmvida, mit cʉs̈wa'n tʉnaguepájatu vida. 18Nepʉn tʉs̈cachi'jtap tʉmvida po ʉ̱jyu tʉnyacp. Ni'c tʉnaguep derechu pa tʉs̈yacwa'n,mit tʉnaguepey derechu pa tʉs̈aguepwa'natu, ni'c we'n tʉs̈najau tʉnte̱t Dios.
19Mit cʉs̈ catsʉ̱ngawu-atu en acuerdu judíujat ni'c we'n iguinʉjm. 20Mayo'c inʉmgaway:
—Ijtʉp demo̱nyu mit ayé tu'c loco ¿tini'c is̈márauga?
21Japu̱t inʉmgau:
—Tu'c jayau inʉmpay wename ca-ijtʉp tu'c demo̱nyu. ¿Is̈jawiga tu'c demo̱nyu oyap igui-ac-e'pta̱jcʉs̈ winchat?
Judíujat igapʉctsougap Jesús
22Meru-ate iguitsóuga Jerusalén ayé ma̱s̈ʉjw cuandu iguidedicá̱tcaj ayé templu. Mit wejpu'n itiempu payic. 23Mit Jesús yo'y templu-á̱m mam i-it ayé corredor inʉ'jyway Salomón. 24Mit judíujat igui-apitucje̱jcau mit iguinʉmgajau:
—¿Hasta jutim is̈caja-acpensa̱tcáj? Te mi miCristu i-ajyu'tway Dios, nʉmgajac jaran pa tʉjáwiga.
25Jesús inʉmgʉs̈au:
—Tʉnʉmgʉs̈away mit ingacupʉjcap. Tʉnwatp nu'pʉjʉn tʉs̈manda̱tpay tʉnte̱t Dios, mit nu'pʉjʉn tʉnwatpay is̈actujawigap ni'c Dios tʉs̈ajyu't 26Po mijchat is̈cacupʉjcap ni'c migaje'jat tʉ̱borregujat, as̈am tʉnʉmgʉ́s̈aj. 27Tʉmborregujat tʉs̈maraugap tʉs̈mucotscʉs̈, mit tʉnis̈capcʉs̈p, mit tʉs̈natspoguigap, 28mit tʉnmoygʉs̈áj vida cacʉs̈ámpay, mit catogoygáj nunca, mit nepʉn tʉs̈cachi'tcʉs̈áj tʉncʉ'jugum. 29Tʉnte̱t Dios jeme tʉs̈moygʉs̈way más ijtʉp poder que nepʉn, mit nepʉn ca-oyáj iguichi'tcap tʉnte̱t icʉ'jugum. 30Ʉ̱ mit tʉnte̱t Dios tʉnije'jatu.
31Cʉs̈ judíujat ipʉjcawatu tsa' pa iguipojcajawa'n. 32Jesús ipo'ngʉs̈:
—Mayo'gap cosa oyway tʉnte̱t Dios tʉs̈actuwatway pa pi e'pca, ¿jʉmay ayé is̈cagusta̱tcapay pa is̈pojcajáj?
33Judíujat iguipo'ngau:
—Tʉgapojcajap ni'c inwatp oy po ni'c ingarespeta̱tp Dios, ni'c mi̱ mijayau mit miniwajtʉp Dios.
34Jesús ipo'ngʉs̈:
—Tsʉ̱nap ja'yic inleyni'jcat: “Inʉmp ni'c mijchat as̈am midiosat.” 35Inʉm ni'c as̈am diosat ayé jeme Dios imucotscʉs̈way, ni'c nu'pʉjʉn tsʉ̱napay ja'yic Dios ilibruni'c naganʉmwit ni'c caje' iyacs̈ta'cway. 36Mit te tʉnte̱t Dios tʉs̈aparta̱t mit tʉs̈ajyu't en ayʉ̱́j mundu, ¿tini'c mijchat is̈nʉ́mga ni'c tʉngarespeta̱tp Dios, ni'c tʉnyʉm: Ʉ̱j ayé Dios tʉs̈wáy? 37Te tʉngawatp tʉnte̱t Dios iyos̈, camcupʉjcac. 38Po te tʉnwatp ayé yos̈, maja is̈cacupʉjcámpaj lo que tʉnyʉmpay, po cupʉjca lo que tʉnwatpay pa pi jawiga mit pi cupʉjca ni'c tʉnte̱t Dios tsʉ̱nap mit ʉ̱, mit ʉ̱ tʉtsʉ̱nap mit tʉnte̱t Dios.
39Iwangawatu igui-actangawa'n, po je' pichin icʉ'jugujmat.
40Mit nʉcs̈atu tuganʉ-ájw Jordán mam inʉ'gutejm Juan, mit jem itajn. 41Mit mayo'c mingaway mam je', mit inʉmgau:
—Iyacs̈ta'cway Juan igawatu nejʉmay milagru, po nu'pʉjʉn inʉmway Juan ti iwatámpay Jesús, pichin iyacs̈ta'cway.
42Mit mayo'c iguicupʉjcaway jem.
Valgt i Øjeblikket:
San Juan 10: PSNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Popoluca de Sayula © Sociedad Bíblica de México, [1969].
