San Juan 9
9
Jesús i-ac-oytamp tu'c winch
1Inas̈ Jesús, i-is̈ tu'c jayau winchic desde ima̱m iguita̱c. 2Mit igui-ucyo'tcau ipʉctampajyat:
—Amayipay, ¿pʉn iwat mal, ayʉ̱́j jayau, ite̱t o ima̱m pa ijajt winchic?
3Jesús ipo'ngʉs̈:
—Igawatu mal ayʉ̱́j jayau, ne ite̱t ne ima̱m, po jat winchic pa Dios ma ajque's̈ ipoder mit je'. 4Itp ti tʉs̈wajtawa'n iyos̈ ayé Dios tʉs̈ajyu'tway mientras itpnaj tiempu en ayʉ̱́j s̈ʉjw, ni'c icutsu'iwa'n, nepʉn caja-oyap iyos̈wat. 5Mientras tʉtsʉ̱napnaj en ayʉ̱́j mundu, tʉnta'cs̈cʉs̈áj jayajwat ayʉ̱́j mundujway.
6Iguinʉjm we'n, tsuj na̱s̈ni'c mit ituwat mo'ts itsujnʉ', mit ayé mo'ts ijajtsau iwini'c ayé winch, 7mit inʉjmau:
—Nʉs̈ nigupújʉ en ayé nʉ'to'y tsʉ̱napay barrio Siloé mit ayé inʉmo'jcʉp Ajyu'ticway.
Cʉs̈ nʉcs̈, mit nigupujʉu, mit ipitujc, e'pnup. 8Cʉs̈ ivecinujat mit jeme igui-is̈caway primeru ni'c wínchigate, inʉmgau:
—¿Caje' ayʉ̱́j ayé jeme tsʉ̱naway pa iyo'twa'n?
9Cʉjtu'c inʉmgau:
—Je' ayé.
Mit japu̱jtat inʉmgau:
—Ique's̈ as̈am je'.
Mit je' inʉm:
—Ʉ̱j ayé.
10Mit iguinʉmgajau:
—¿Nat in-e'pta̱jc?
11Je' ipo'ngʉs̈:
—Ayé jayau inʉ'jyway Jesús iwat mo'ts, mit tʉs̈jajtsau tʉnwini'c, mit tʉs̈nʉjmau: “Nʉs̈ en ayé nʉ'to'y tsʉ̱napay barrio Siloé, mit nigupújʉ.” Mit tʉ-oy, mit tʉnigupujʉu, mit tʉ-e'pta̱c jaran.
12Cʉs̈ iguinʉmgajau:
—¿Jʉm itsʉ̱na ayé jayau?
Mit je' inʉm:
—Tʉngajawip.
Fariseujat i-ucyo'tcap ayé winch jeme oytanway
13Cʉs̈ imunʉs̈cau mam itsʉ̱nga fariseujat ayé jayau jeme tsʉ̱naway winchic. 14Mit wejpu'n po'cs̈ans̈ʉjw cuandu Jesús iguiwajt mo'ts mit igui-ac-e'pta̱jc ayé jayau. 15Cʉs̈ igui-ucyo'tcawatu fariseujat nat i-e'pta̱jc. Mit je' inʉmgʉs̈au:
—Tʉs̈yajcau mo'ts tʉnwini'c, mit tʉnigupujʉu, mit tʉ-e'pta̱c jaran.
16Cʉs̈ una̱c fariseujat inʉmgau:
—Ayé Jesús caminu mam Dios, ni'c igawatp cuenta po'cs̈ans̈ʉjw.
Ja-una̱c inʉmgau:
—¿Po nat tu'c jayau iwatpay mal iguiwatwa'n ayʉ̱́j milagrujat?
Mit catsʉ̱ngawu en acuerdu ayé jayajwat. 17Cʉs̈ inʉmgajawatu ayé winch:
—¿Mi̱j te, ti inyʉmp de ayé jayau is̈ac-e'pta̱cway? Mit je' inʉm ni'c tu'c profeta i-ajyu'tway Dios.
18Po judíujat igacupʉjcawu ni'c je' tsʉ̱nau winchic mit e'pta̱c hasta iguiyá̱s̈cajaj ite̱t mit ima̱m ayé jeme e'pta̱cway, 19mit i-ucyo'tcau:
—¿Inwajyat ayʉ̱́j? ¿Inyʉmgap ni'c winchic i-ijt? ¿Nat i-e'pta̱jc?
20Ima̱m mit ite̱t ipo'ngau:
—Tʉnjawigap ni'c ayʉ̱́j tʉnwajyat, mit winchic i-ijt, 21po tʉngajawigap nat i-e'pta̱jc jinap, ne tʉngajawigapey pʉn igui-ac-e'pta̱c. Po ijtʉnup s̈iwit, oyap is̈-ucyo'tca je', mit je'yu is̈nʉmgajáj.
22Ite̱t mit ima̱m inʉmgau wename ni'c ipʉ̱tcau judíujat, ni'c judíujat iwatcaway tu'c acuerdu ni'c te tu'c jayau inʉmp ni'c Jesús ayé Cristu i-ajyu'támpay Dios, itu'mbac-acpichingáj mam i-adora̱tca judíujat. 23Jemni'c iguinʉ́mgaj ite̱t mit ima̱m: “Ijtʉnup s̈iwit, oyap is̈-ucyo'tca je'.”
24Cʉs̈ iya̱s̈cawatu ayé jayau jeme tsʉ̱naway winchic, mit inʉmgajau:
—Oyninʉm Dios ni'c je' is̈ac-oytan. Ni'c tʉnjawigap ni'c ayé Jesús tu'c jayau iwatpay mal.
25Cʉs̈ je' ipo'ngʉs̈:
—Te je' tu'c jayau iwatpay mal, tʉngajawip. Po tu'c cosa tʉnjawip ni'c tʉwínchigate po jinap tʉ-e'p.
26Inʉmgajawatu:
—¿Ti is̈wajtau? ¿Nat is̈ac-e'pta̱c?
27Je' ipo'ngʉs̈:
—Tʉnʉmgʉs̈away po ingawangap is̈márauga. ¿Tini'c inwangap is̈maraugawa'natu? ¿Inwangapey injatcawa'n is̈pʉctampajyat je'?
28Mit iguitucotscau mit iguinʉmgajau:
—Mi̱ je' is̈pʉctampay, po ʉjtsat tʉs̈pʉctampajyat Moisés. 29Ʉjtsat tʉnjawigap ni'c Dios imucots Moisés, po pa ayé Jesús, tʉngajawigap jʉm imijn.
30Mit ayé jayau ipo'ngʉs̈:
—Po ayʉ̱́j nas̈acnigu-épijyʉp ni'c ingajawigap jʉm imijn, mit ʉ̱ tʉs̈ac-e'pta̱c je'. 31Mit najawigap ni'c Dios igamarap jeme iwatcapay mal, po te tu'c jayau ipʉ̱tp Dios, mit iwatp lo que Dios iwampay, ayé imarap. 32Desde ámbanu naganimarap iguinʉ́mga ni'c tambʉn i-ac-e'pta̱cp tu'c jayau ye'cpay winchic. 33Te ayʉ̱́j jayau magami'nate mam Dios, ca-oyapate neti iguiwat.
34Je'jat iguipo'ngau:
—Mi̱ inwat mal desde in-ijt, ¿mit is̈jawi ʉjtsat is̈ajque's̈cajáj? Cʉs̈ itu'mbac-acpichingau mam judíujat i-adora̱tca.
Jeme e'pcapay, ma wínchiga
35Mit imarau Jesús ni'c itu'mbac-acpichingau ayé jayau. Mit iguipa̱jt, inajau:
—¿Incupʉjcap mi̱ Dios iway?
36Je' iguipo'n:
—¿Pʉn ayé, Señor, pa tʉs̈cupʉcwa'n je'?
37Jesús inʉjmau:
—Po in-is̈way mit jeme is̈mucotspay, je' ayé.
38Mit je' iguinʉjmau:
—Tʉcupʉcp, Señor. Mit cʉs̈ i-adora̱t.
39Jesús inʉm:
—Ʉ̱ tʉmín en ayʉ̱́j mundu pa tʉs̈proba̱tcʉs̈wa'n jayajwat te tʉs̈cupʉjcáj ʉ̱, pa jeme ca-e'pcapay, ma e'pca. Mit jeme e'pcapay ma wínchiga.
40Cʉs̈ una̱c fariseujat tsʉ̱ngaway mit je', iguimáraugaj we'n, inʉmgajau:
—¿Is̈jawi ni'c ʉjtsat tʉwínchijcatey?
41Jesús ipo'ngʉs̈:
—Pi tsʉ̱nga-ate winchic, migatsʉ̱ngájate culpa̱tic mit ma̱jlat. Po jinap ni'c inyʉmgap ni'c mi-e'pcap, is̈tangajap ayé mal inwatcapay.
Valgt i Øjeblikket:
San Juan 9: PSNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Popoluca de Sayula © Sociedad Bíblica de México, [1969].
