San Juan 11
11
Nat i-o'jc Lázaro
1Mit wenajpu'n tsʉ̱nau tu'nij tu'c jayau inʉ'jy Lázaro Betaniajway inʉ'jcopacni'jcat María mit ije̱way Marta. 2Mit María jemé ijajtsaway perfume el Señor mit i-actʉ̱jtsaway ita'jnat mit icuajy. Je' ijtʉu ije̱way inʉ'jy Lázaro mit tu'nij itsʉ̱naj. 3Mit Lázaro ije̱wajyat i-ajyu'tcajau razón Jesús ma nʉmgaja:
—Señor, tu'nij itsʉ̱na ayé jeme inwano'cpay.
4Iguimarajw Jesús, inʉm:
—Ayʉ̱́j enfermedaj caje' pa igui-ago'gáj po iguijat we'n pa Dios ma tsʉ̱na mʉjninʉmic, mit we'ney iway ma tsʉ̱na mʉjninʉmic. Jemni'c itu'jnʉj.
5Mit Jesús imuniwangʉs̈ʉu Lázaro, Marta mit María. 6Po iguimarajw ni'c tu'nij itsʉ̱na, je' tan jamechc s̈ʉjw en ayé lugar mam itsʉ̱na. 7Mit cʉs̈ inʉmgʉs̈au ipʉctampajyat:
—Jaga-atu Judeajway na̱s̈.
8Iguinʉmgajau ipʉctampajyat:
—Amayipay, jinapo'cnaj is̈che'ngau judíujat pa is̈pojcajáj mit tsa', ¿mit minʉs̈ájatu jem?
9Jesús ipo'ngʉs̈:
—Ca-oyap tʉs̈watcajap neti. ¿Caje' doce hora ijec tu'c s̈ʉjw? Mit jeme yo'ypay s̈ʉ̱m cacunepip ni'c oyap i-e'p ni'c s̈ʉjw ita'cs̈cʉs̈p jayajwat ayʉ̱́j mundujway. 10Po jeme yo'ypay tsu'm, cunepip ni'c yo'yp chitimicni'c. 11Iguinʉjm we'n, cʉs̈ inʉmgʉs̈awatu: Lázaro na-amigujat ma̱p, po nʉs̈áj tʉs̈acjutuc.
12Cʉs̈ iguinʉmgajau ipʉctampajyat:
—Señor, te ma̱p, oytanáj.
13Po Jesús inʉm we'n ni'c o'guic itsʉ̱na Lázaro, mit je'jat inʉmgapayta ni'c inʉm ni'c ma̱p pa ipo'cs̈wa'n. 14Cʉs̈ Jesús inʉmgʉs̈au pa ma jawiga, inʉm:
—Lázaro o'cway, 15mit ji'cp tʉnjo̱jt ni'c tʉgatsʉ̱nawu jem, ni'c más is̈cupʉjcáj. Jinap jaga mam je'.
16Cʉs̈ inʉm Tomás inʉ'jywayey Gemelo, inʉmgʉs̈au imupʉctampayje̱wajyat:
—Jaga-ey ʉjtsat pa na-o'jca mit je'.
Jesús i-acjutucta̱jcʉs̈p á̱nimajat
17Cʉs̈ icojy Jesús, ipa̱t ni'c cuatro s̈ʉjwanu Lázaro itsʉ̱na á̱nimacʉtʉm. 18Mit Betania tomo'c Jerusalén, como tres kilómetro i-ijtʉ. 19Mit mayo'c judíujat imíngaj mam itsʉ̱nga Marta mit María pa iguiconsola̱tcawa'n ni'c o'guic ije̱way. 20Cʉs̈ Marta iguimarajw ni'c mimp Jesús, pichin pa iguipa̱jtsowa'n, po María tan itʉcmat. 21Mit Marta inajau Jesús:
—Señor, ingatsʉ̱́naj yam, ca-o'cpate tʉnje̱way. 22Po jinap tʉnjawip ni'c nu'pʉjʉn inyo'jtámpay Dios, Dios is̈mo'áj.
23Jesús inʉjmau:
—Inje̱way jutucta'gáj.
24Po Marta iguinʉjmau:
—Tʉnjawip ni'c jutucta'gáj po hasta últimu s̈ʉjw ijutucta̱jcawa'n á̱nimajat.
25Po Jesús inʉjmau:
—Ʉ̱j ayé tʉnacjutucta̱jcʉs̈pay á̱nimajat mit tʉnmoygʉs̈p vida. Jeme tʉs̈cupʉgámpay ʉ̱j, maja i-o'cwa'naj jutucta'gáj. 26Mit nu'pʉjʉn jeme tsʉ̱napnajway mit tʉs̈cupʉcp, ca-o'gáj nunca. ¿Incupʉcp ayʉ̱́j?
27Iguinʉjmau:
—Jo̱, Señor, tʉncupʉcp ni'c mi̱j ayé miCristu Dios iway, mit minʉmic pa inmi'nwa'n en ayʉ̱́j mundu.
Jesús jʉyp mam ini'pigui Lázaro
28Cʉs̈ iguinʉjm we'n, nʉcs̈ mit iya̱s̈ ije̱way María, inajau anu'mu:
—Yam itsʉ̱na Amayipay mit is̈ya̱s̈p.
29Iguimarajw we'n María, ca's̈ʉ'c jaran mit min iguipa't. 30Mit Jesús canicoyp nʉ'jcopacni'c, po tsʉ̱naunaj en ayé lugar mam iguipa̱t Marta. 31Cʉs̈ judíujat tsʉ̱ngaway itʉcm pa iguiconsola̱tcáj, igui-ís̈caj ni'c María ca's̈ʉ'c jaran mit pichin, inatspoguigau ni'c inʉmgapayta ni'c nʉs̈p mam ini'pigui ije̱way pa Iguinijʉ'wa'n.
32Icojy María mam itsʉ̱na Jesús, igui-is̈, nicos̈atenda̱jcʉu ita'n-á̱m, inʉjmau:
—Señor, ingatsʉ̱́naj yam, ca-o'cpate tʉnje̱way.
33Cʉs̈ Jesús igui-is̈ ni'c jʉyp, mit jʉygapey judíujat jeme iguicumpaljátcapay, je' s̈ajtogojyʉu mʉgʉc ijo̱jtugum mit tu'n ijo̱jt. 34Mit inʉmgʉs̈au:
—¿Jʉm is̈comga je'? Mit iguinʉmgajau: Señor, mi'n e'p.
35Mit Jesús jʉy. 36Cʉs̈ inʉmgau judíujat:
—¡E'pca ni'c iwano'cp Lázaro!
37Mit una̱c je'jat inʉmgau:
—Ayʉ̱́j ayé i-ac-e'pta̱cway ayé winch. ¿Is̈jawiga ca-oyapate-ey iguimajyi Lázaro maga-o'c?
Lázaro jutucta̱cp
38Mit Jesús tu'no'gatu ijo̱jt, min mam i-it ayé á̱nimacʉt. Ayé tu'c cʉt pactajicway, mit tu'c mʉjway tsa' itu-atujcau. 39Inʉm Jesús:
—Chi'tca ayé tsa'.
Po Marta jeme o'cway ije̱way, iguinʉjmau:
—Señor, s̈u'cnup ni'c ijtʉnup cuatro s̈ʉjw i-o'jc.
40Jesús inʉjmau:
—¿Tʉganajap ni'c te incupʉcp, in-e'páj nat Dios itsʉ̱na mʉjninʉmic?
41Cʉs̈ ichi'tcau ayé tsa' itu-atujcaway mam itsʉ̱naj á̱nima. Mit Jesús iyuc-e'jp pa yucm, inʉm:
—Padre, tʉnʉjmap ni'ctiyu̱s̈ ni'c is̈maraway. 42Ʉ̱ tʉnjawip ni'c is̈marawí̱cp, po tʉnyʉm we'n pa ma marauga ayʉ̱́j jayajwat tsʉ̱ngapay yam, pa ma cupʉjca ni'c mi̱ is̈ajyu't.
43Mit iguinʉjm we'n, cots mʉgʉc mit inʉm:
—¡Lázaro, pichin pe'ta̱m!
44Cʉs̈ jeme o'guicwayate pichin, mit tsumic icʉ' mit ita'n mit venda, mit iwindugʉt cutucmo'nic mit jamuc. Jesús inʉmgʉs̈au:
—Quéjca mit tsac ma nʉcs̈.
Iche'ngajap ilaj pa igui-ago'jcawa'n Jesús
45Cʉs̈ mayo'c judíujat jeme mingaway pa iguicumpaljatcawa'n María, igui-ís̈caj lo que iwatway Jesús, icupʉjcau je'. 46Po ja-una̱c je'jat nʉs̈cau mam itsʉ̱nga fariseujat mit inʉmgajau lo que iwatway Jesús. 47Mit judíujat imʉjpa̱nijat mit fariseujat ni-apʉcmujcʉjʉu mit judíujat ijefejat, inʉmgau:
—¿Ti nawatcáj? ni'c ayé Jesús mayo'ganu milagru iguiwat. 48Te namoygap laj ma siguia̱t, nu'pʉjʉn jayau icupʉjcáj je', mit mingáj Romajatway, mit i-actogoyda̱jcáj natemplujat mam na-adora̱tca mit nanʉs̈cáj s̈is̈cada'guic.
49Cʉs̈ Caifás tsʉ̱nau mit je'jat, mit je' mʉjpa̱nij ayé s̈iwit, inʉmgʉs̈au:
—Mijchat ingajawigap ayʉ̱́j asuntu. 50Ne ingajawigap ni'c más oy pa ʉjtsat tu'c jayau ma o'c mit caje' nu'pʉjʉn itogoygawa'n. We'n iguinʉjm Caifás.
51Mit ayé inʉmway, ayé caje' je'yu ipensa̱t, po como je' mʉjpa̱nij ayé s̈iwit, jemni'c Dios igui-actunʉm jeme jatámpay, ni'c Jesús o'gáj pa nu'pʉjʉn Israelway jayajwat, 52mit je' o'c caje'yu pa Israelway jayajwat, po we'ney je' o'c pa nu'pʉjʉn jayajwat iguicupʉjcámpay, mit jatcáj as̈am tu'gu jeme Dios iwayjatcʉs̈ámpay, jeme tsʉ̱ngapay s̈is̈cada'guic. 53Mit cʉs̈ judíujat ijefejat desde ayé s̈ʉjw ni-acochigʉjʉu pa igui-ago'jcawa'n Jesús.
54Jemni'c Jesús cajayo'yu mam igui-e'pcáj judíujat, po pichin jem mit nʉcs̈ en tu'c nʉ'jcopac inʉ'jyway Efraín, mit jem itajn mit ipʉctampajyat, mit yajyʉ'n de ayé nʉ'jcopac ca-itu tʉjcat.
55Mit tomo'c ayé ma̱s̈ʉjw pascua itsowí̱jcapay judíujat, mit mayo'c jayau ayé lajatway nʉs̈cau pa Jerusalén antes de ayé ma̱s̈ʉjw pa inilimpia̱tcʉjʉwa'n as̈am igui-acostumbrá̱tcaj. 56Mit iche'ngau Jesús, mit jeme tsʉ̱ngaway templuni'c ni-ucyo'tcʉjʉu je'jatu:
—¿Nat is̈jawiga? ¿Cami'námpa'p ma̱s̈ʉuni'c?
57Mit judíujat imʉjpa̱nijat mit fariseujat iyajcau orden ni'c te tambʉn ijai am itsʉ̱na Jesús, ma ajquigui-actangawa'n.
Valgt i Øjeblikket:
San Juan 11: PSNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Popoluca de Sayula © Sociedad Bíblica de México, [1969].
