LUKA 13
13
Nang Hemui gene Heli ra mei Chai ra mei
1Chipau lua sing ge hanggesame bam de lei, Pilatbe ne penui gu herâtewbe ramme ge Galilime jai kebut’mpamgaibe rasam pechu paugaime zeu. 2Zai pa ne penui je kak ze, “Galilime ne chigum hereuliebeibe ziegene kêdame Galilime leine suadu hemuika’ngkeume hangge ningnui ’nning gai mei? 3Ningnui je I rang lei, Mak lei; ningnui lung heliwang dai makchai â, chime gum ze ningnui du ’ngga gai kam gu lei. 4Zai ziemmena hangkereu ze desat peireige Siloam ge heki kehube kâukeu ze kapchat’ndibe ze, Jerusalem ge kêdame bamme leine suadu chime â siaka’ngkeume hangge ningnui ’nning gai mei? 5Ningnui je I rang lei, Mak lei; kane ningnui lung heliwang dai makchai â, chime gum ze ningnui du ’ngga gai kam gu lei,” acheu bei de lei.
’Mbeuchî bang Pechî ’nchimakbe gu Sam’nda
6Zai chipau sam’nda pa ne salia de lei: “Mige ne grepchî merie ge ’mbeuchîbang kat tau gai lei; zai chipau bang ge pechî pa peuwang dege, pechî mâ de ngaudau mak lei. 7Dadege pa ne grepchî merie kateleupeu je ‘Ni, kum chum pechî I peuwang de lei, zai mâ de ngau mak lei. Kuîkau ne lau; ’ndaitew ra kedei ze tewhekakga ra lau?’ kacheu de lei. 8Dadege pa ne pechu kak ze, ‘A Wang gau, peize acheu lau, henai kum â peize bam gai rî lau, I ne pebangpî maguâ ze kedeihûp kebau ze teleu gai gu rei lei. 9Mâkum ge pechî ’nchi bei zaine â yisang de lei; kane ’nchi makchai â, nang ne kuîtua dui de lei,’ kacheu de lei,” ze acheu zeu.
Tatchilakpui je ’Ntakbambe Mai ge Tewka’mmibe
10Chunage ’ntakbambe mai ge ka’nduibeki kat ge pa mâ-geteilia bam lei. 11Zai ’mpuimi hangkat pechu herui ne kum kereu ze desat peran tew’nggaibeipui bam lei; chipaupui ze â ’ngkuairuai ze pe runne sap’ntachu lak lei. 12Zai Isua ne pechu ngau lu dege kûwang lu ze, “A pui gau, nang chuakanibe gene ningchu heipat kai ’nde lei,” kacheu de lei. 13Dadege pa ne pe ba kena pe peireige die gai de lei, dadege luakatne pechu tew’ntatui gai bei de lei, zai pa Hera je toa ze bam di de lei. 14Zai Isua ne ’ntakbambe mai ge tew’mmibeibe ziegene ka’nduibeki ge pemuitewpeu pe râta-desang di ze, baudime je, “Tâtewrabe mai hang hezie seruk lamui lei; chipau hezie seruk ramme ge wang ze ningnui je tew’mmi le lau, ’ntakbambe mai ge â mak zeu,” ze kacheu de lei. 15Dadege Heguang ne pechu kak ze, “Ningnui helunglimpungme! Ningnui ruage mi-mige ’ntakbambe mai ge pe gu getumsei mei, nune hekunmerângne mei ze pe ki gene heipat lu ze hedui sak ra ningnui nguatat ka’nsui mak ti lau? 16Zai ai a pui Abrahambe na, kum kereu ze desat satan ne pi nan ze bambepui je ai pi’ndibe gene ’ntakbambe mai ge heipat kai mak ta ra semei?” ze acheu bei de lei. 17Aipau sam pa ne sa gai bei dadege, pechu ka’nggime ’ngngam kam di de lei; zai pa ne tâ pengêudibe ramme tewgaibeibe ge haimena ne hesuiyi kam di de lei.
’Nzeyichêu gu Sam’nda
(Mat 13.31-32; Mrk 4.30-32)
18Chipauziegene pa ne, “Hera gu heguangram ze ’ndaikau helî gum lau? Zai chize ’ndaikau je I ne teikeda gai ra lau? 19Chize â ’nzeyichêu kat hangkat ne pe gu merie ge sâugaibe gum lei; zai chize chîngchu ze hingbang hang chang di de lei, dadege ’nruine ramme ne chipau bang keî ramme ge penui chippua gai de lei,” kacheu de lei.
’Nduihî Sam’nda
(Mat 13.33)
20Zai pa ne sa gai dai ze, “Hera gu heguangram ze I ne ’ndaikau je teikeda gai ra lau? 21Chize â ’mpuimi hangkat ne ’nduihî lu lu, dekuî keluang kechum ge zuktui mak tâne ’nduihî ’mpumgaibe gum lei,” kacheu de lei.
Kemuiki Kecheibe
(Mat 7.13,14,21-23)
22Pa Jerusalem ’mbe tebeîtewzua ze, namdi ge benai namchiau ge tat kai ze mâ-getei zutza ze tat lei. 23Dadege hangkat ne pechu, “A Wang gau, tew’nringgaime â gechâmne runne mei?” kacheu de lei. Dadege pa ne penui je, 24“Kemuiki kecheibe ge gut ra rankai lau; ningnui je I rang lei, misonggame ne gut ra peu gu, zai penui gutchi ra mak lei. 25Heki’mpaupeu ne chu ze ’ngkam kainam nan dezai ningnui hela ’mbene sap lu ’ngkam gekeu ze, ‘Heguang gau, anui je ’ngkam lat kai lau,’ ze ningnui acheu chu gu lei. Pa ne ningnui je kak ze ‘Ningnui ’ndai’nggene wangbe kau mei be I chî me lei,’ ze acheu gu lei. 26Chidezai ningnui ne, ‘Ningchu ngua lu ze anui teu-ze-sak ze bam da, zai anui ram keloaning ge nang ne mâ-geteilia ze bam de zeî lau,’ ze acheu chu gu lei. 27Kane pa ne, ‘Ningnui je I rang lei, ningnui ’ndai’nggene wang mei be I â chî me lei; ningnui tâ-kesiabe tewme nung gau, a dagene tatrimna de lau!’ ze acheu gu lei. 28Chige Abrahambe zai Isaakbe zai Jakobbe zai kemeume ramme Hera gu heguangram ge bambe ngau zai, ningnui je â tuâpat kai bei ze bambe ningnui ngau dezai ningnui â ningnui geukegit ze hap ku de lei. 29Zai tingbia benai tingrun zai tingpeî benai tingpî ’mbene ziemmename wang gu lei, zai Hera gu heguangram ge penui ’ntau lu teseu teu ze bam gu lei. 30Zai pie le lau, kenâme ne raî dai gu, zai keraîme ne nâ dai gu lei,” ze acheu bei de lei.
Isua Jerusalem je Hungbe
(Mat 23.37-39)
31Zai chipau lua sing ge, Pharisaime hanggesame wang lu ze, pechu, “Aigene tat te lau, Herodbe ne ningchu tewchat nei la de lei,” kacheu de lei. 32Dadege pa ne penui je, “Chi munserung (Herodbe) je aipau sam ze tat ze rang gai be lau, ‘Pie le lau, nemai du ’nchuamai du herasiabe ramme je I kelitua ze, keteu-keneube ramme je tew’mmi la lei, zai pakechumbe mai dezai a tâ I tew’nsang gu lei. 33Acheuleusedu nemai du, zai ’nchuamai du, zai nâmai du a ’mpuî luî I tat himchang gu lei. Jerusalem gene hela ’mbe â kemeume â chaigaichi lak daseu,’ ze kacheube sam zeu. 34Hei, Jerusalem gau, Jerusalem gau, kemeume je tewchat ze ning dage wanggaibeime je tingchu ne tuabe kau! ’Nruipui ne pe poine ramme je gekumwang lu pe kan kang gene gûmbe gum ze ning name je I ne lua daikie gekumwang’ndui gai be ra lau, zai ningnui nei mak tai de lei! 35Pie le lau, ningnui ki sâudiak kai ’nde lei. Zai ningnui je I rang lei, ‘Tingwang ji gene wangkeupeu je peize yi lau,’ ze ningnui acheu mak tâne ningnui achu ngau ra mak lei,” kacheu de lei.
Valgt i Øjeblikket:
LUKA 13: ZEMEBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
