LUKA 12
12
Helunglimpungbe kau peireige ’Ntîng ra Peibe
(Mat 10.26,27)
1Changsenângme wang’ndui ze kat-kat je penui kutgetie bambe luage raîlangbe ge pa ne pe gu kenieme je saliachu di de lei, acheu sa ze, “Pharisaime gu ’nduihî je ’ntîng le lau, chize helunglimpungbe lungtak lei. 2Zai mâ de liâ mak ta ra ruichimbe ga lei, zai chî mak ta ra teika’mbaibe du ga lei. 3Kemuibe ge ningnui sagai’ndibe leine kebabe ge seu du lei, zai kilûng nuksing ge ningnui sam ’nsiamgai’ndibe ze heki’mpûm ramme ge sa gai bu lei.
Châu je Hing ra lau
(Mat 10.28-31)
4“Zai a kangme gau, ningnui je I rang lei, mi pum tewchat ze chipau chângge mâ de tewdaichilakme je â hing se lau. 5Kane châu je ningnui hing ra mei be ze ningnui je I ranglia gu lei: pa ne tewchatlube chângge gehenna ge tuâ gai ra rezie bambepeu je hing lau; eu lei, ningnui je I rang lei, pechu hing lau! 6’Ngkînepui mengeu ge poîsa kena ne zua mak ti lau? Zai Hera masuage chiramme ruage katte ’ngngaî me lei. 7Chidaze ningnui peîtam ramme ’nsangdu sei kam lu la lei. Hing se lau; ’ngkînepui ramme misonggabe sua â ningnui â pemî hung’nteu lei.
Krista je Sakkitewbe benai Tuâpatbe
(Mat 10.32,33; 12.32; 10.19,20)
8“Zai ningnui je I rang lei, mi-mige de ziemmename suagene achu chîgaihâbe kau je â Hera gu angelme suagene ziemmena Na ne pechu chîgaihâ gu lei; 9kane mi-mige de ziemmename suagene achu ka’ngkimbe kau je â Hera gu angelme suagene pechu ’ngkim ’ndu lei. 10Zai mi-mige ziemmena Na peireige sakahebâbe kau je â lun gai bu lei; kane Herui Ka’nchibe je sakahebâbe kau je â lun gai be ra mak lei. 11Zai ningnui je ka’nduibeki suage benai kanguame besuitewme zai rezieteime suage penui ne teiwang gai dezai ningnui ’ndaikau sam kak ra mei nune ’ndaigum ze kak ra mei be hangge ningnui ’nninghereu se lau; 12chipau lua sing ge, ningnui ’ndaikau sa ra yi mei be Herui Ka’nchibe ne ningnui je getei gai gu daseu,” ze acheu zeu.
Lungyi ze kemiepeu gu Sam’nda
13Baudime ruage hangkat ne pechu, “Geteiliapeu, a sipeu je a kiheurâ ze ’nzi gai ra rang gai lau,” kacheu de lei. 14Kane pa ne pechu, “Ziemmena gau, châu ne achu ningnai peireige samrampeu hang, zai ka’nzipeu hang sum gai lau?” acheu bei de lei. 15Zai pa ne penui je, “Kadekumbe tak leine gene ’ntîng le lau; ziemmena peheurâ misongga bambe geze pa keringbe bam mak daseu,” ze kacheu de lei. 16Dadege pa ne penui je sam’nda kat salia ze, “Hangkat lungyipeu gu kedei ge perachî misongga ’nchipat ze bam de lei; 17dadege pe runne acheu ze ’nning ze, ‘A gu mâ-himlei ramme gekâm gai ra pebâm hang mâ de ga daze I ’ndaikau tew ra lau,’ ze kacheu de lei. 18Dadege pa ne, ‘Acheu ze I tew ra de lei: A gu ’nseu ramme rakeu lu dibibe ki ramme tew ra de lei; chige a gu chêu benai a gu mâ-mera ramme, zai a gu kerua ramme leine kai ra de lei. 19Dezai a keringbe je, Keringbe gau, nang ne patingkum misongga hangge mâ-mâ ramme maîkie gekâm gai lu de lei; teu ze sak ze ning suiyi’nta ze temichai bam zu lau, ze I acheu gu lei,’ ze kacheu de lei. 20Kane Hera ne pechu, ‘Kemiebe kau! Nemai tingmuî ge nang keringbe ze ning dagene lutat tu lei; nang tewpatkailube ramme ze châu hang chang ra lau?’ kacheu de lei. 21Pe hang runne pe heu gekua ze, Hera lam ge gekua-lemakbe kau â, aigum ze chang gu lei,” ze kacheu de lei.
Hera je ’Nnumka’mmibe
(Mat 6.25-34)
22Zai pa ne pe gu kenieme je, “Chidaze ningnui je I rang lei, ningnui keringbe hangge ningnui ’ndaikau teu ra mei, ningnui pum ge ’ndaikau kai ze bâ ra mei ze ’nninghereu se lau. 23Hetak sua â keringbe â betâudi-’nteu lei, zai hepaîni sua â mi pum â betâudi-’nteu lei. 24’Nggak ramme je ’nning gai ni lau: penui â helei de ’nruk mak, gat de gat mak, penui gu â hedua benai ’nseu du ga, acheusede Hera ne penui je ’ngkut bei lei; ’ndaizeuge ningnui â ’nruipoine ramme suadu pemîhung lau! 25Zai ningnui ruage châu pe hut peireige ’nninghereu ze sâu kat kaisuâ dui lau? 26Ai kecheibe zat ’nsangdu ningnui tewchi lak tizai â, ’ndaitew mâkedabe hangge ningnui ’nningkahereu lau? 27Lilipâ ramme ’ndaigum chîngchu mei ’nning gai ni lau; tâtew mak, zai kelâng de zui me lei; acheusede ningnui je I rang lei, Solomonbe ’nsangdu pengêudibe leine kai ze lilipâ kat peluiyibe riâ du keru chang mak lei. 28Kane Hera ne hereubang nemai hereuzeu ge bambe ’nchuamai dezai ’mmang ge tuâgai’nderabe kau je bâ gai dizai â, Hei ningnui keneibe chamme gau, ’ndaizeuge ningnui je pa ne bâ’ngkeu gai be ra lau! 29Zai ningnui ’ndaikau teu ra mei zai ’ndaikau sak ra mei be peu se lau, zai ningnui lung du ’nninghereu se lau. 30Heram ramme leine ne airamme ze peu lei; chiramme ningnui ka’nnang lei be ningnui peu ne chî lei. 31Chi suane â, pe gu heguangram ze peu lau, dezai ai ramme ningnui hang chang gu lei.
Tinggîm ge Mi Heu bambe
(Mat 6.19-21)
32“Pebau cheime gau, hing se lau, ningnui peu pe suiyi-kadesangbe ne chi heguangram ze ningnui je pei gu daseu. 33Ningnui gu kebambe ramme zua lu ze kegame je pei be lau; ningnui hangge rangkâng rak hâmkeudaimakbe ze gekam gai le lau, zai siadaimakbe tinggîmram ge ningnui heu gekua gai le lau; mâ-kahega kau wang mak zai ’ngngum ne tew’nsiamakbe gezeu. 34Ningnui heu ’ndaige la mei, chige ningnui lung du bam gu daseu.
Piekua bamme Tâka’ngguame
35“Peize ningnui kia kak’ntip le lau zai ningnui gu hemibung ramme peize tau bam lau, 36zai ziemmename kahegiabe gu luube-bâm gene penui wangpeu wang dai ze ’ngkam gekeu gai dezai luakatne pe hangge latkairabe hang kuâbamme gum ze ningnui kuâ bam lau. 37Heguangpeu wang dezai tâka’ngguame penui jei mak raklaleube heguangpeu ne ngaume paurega gu lei; pelingsing I ningnui je rang lei, pa ne pe runne pekia kak kai lu penui je mâ-teu ra tei’ntau gai gu lei, dezai pa ne wang ze penui hang dekam gu lei. 38Hekêtkaibe hî pakenabe ge mei, nune pakechumbe ge mei ge pa wang ze chigum pa ngau dizai â, chime tâka’ngguame â paurega gu lei! 39Kane aize chî le lau, ’ndaitewbe hî ge mâ-kahegapeu wang gu mei be, heki’mpaupeu chî lu laîzai â pa jei mak rak bam gu lei, zai pe ki tewpânggut ra pa pe ki sâu gai ra mak lei. 40Ningnui du teleukua himchang ra lei; ningnui ’nnummakbe hî ge ziemmena Na wangkeu gu daseu,” ze kacheu de lei.
Lungsangtewbe benai Tewmakbe
(Mat 24.45-51)
41Zai Peterbe ne, “A Wang gau, aipau sam’nda ze anui hang runne nang rang mei, nune ’nteumena hangge rang lau?” kacheu de lei. 42Dadege Heguangpeu ne, “Acheuzai, châu ze pehî-hî ge penui teu-ze-sak ra penui je pei ra pe Wangpeu ne pe kilûngkang ze pe ba ge peigairabe lungsangtewbe benai kaningchingbe kau tiâkela’mpeu lau? 43Tâka’ngguabe kau, pe pau wang dezai aigum tewlaleube pechu ngaurabe kau ze paurega gu lei. 44Pelingsing ze ningnui ze I rang lei, pa ne pe gu kebambe leine peireige besuitewpeu hangge pechu sum gai gu lei. 45Kane chi tâka’ngguapeu zene pe runne pechu, ‘A Wangpeu wangrî gu lei,’ acheu ze, tâka’ngguame ’mpeumi ’mpuimi ramme je bêu ze, zai teu ze sakmeneu ze bam dizai â 46pe pau wang ra pa heguîkuabe mai ge, zai pa chimakbe hî ge pe pau ne wang ze pechu tewsâ gu lei, zai lungsangtewmakme dage pechu kai gu lei. 47Zai chi ka’ngguapeu ze pe wangpeu ’nningtak chikâ lu ze kedâ’ntua mak, zai pe suî’nning luigum tewmakbe kau je â lak’nteukala gai gu lei. 48Kane mi-mige pa ne chî mak ze lak kai ra kakezeibe tâ tewgai’ndipeu je â kecheîne runne lak ku lei. Pei’ngkiegaibeime leine dage lu’ngkie gu lei; zai ziemmena ne peipat ’ngkiegai’ndime dage penui ne kie’ngkie gu lei
Isua Pebau Tewchâmpatpeu
(Mat 10.34-36)
49“Kedeirei ge hemi tuâ gai ra I wangkeu lei, zai chize kenûge tau’ndi laîzai yi ra de lei! 50Achu baptistewgairabe a gu a dage baptisma la lei; chize tewpui mak tâne a lunghereu-desang lei! 51Kedeirei ge desieyibe pei ra I wangkeube hangge ningnui ’nning gai mei? Mak lei, ningnui je I rang lei, pebau tewchâm gai ra hangge lei; 52chuna gene seu ze hangmengeu kilûng kat gene ’nzipângpat tu lei, hangchum ne hangna je ’nggi, zai hangna ne hangchum je ’nggi zeu; 53penui ’nzipângpat tu lei, bepeu ne pe na je ’nggi zai pe na ne pe peu je ’nggi, bepui ne pe na ’mpuimi je ’nggi zai pe na ’mpuimi ne pe pui je ’nggi, pe nai ne pe mupui je ’nggi zai pe mupui ne pe nai je ’nggi zeu,” ze kacheu de lei.
Pehî Chirabe
(Mat 16.2,3)
54Pa ne baudime dage du sa ze, “Tingrun ’mbe kemâu chube ningnui ngau dege, luakatne ningnui, ‘Tingsim dibe wang gu de lei,’ ze kacheu de lei; zai chigum ze chang di lei. 55Zai tingpî ’mbe tingkaiguibe ningnui ngau dege, ningnui ne, ‘Tingchiê teu-desang gu de lei,’ ze kacheu de lei; zai chize chang de chang lei. 56Ningnui helunglimpungme! Kedei benai tinggîm je ningnui ’nchetchi lu lei; kane ’ndaitew ze henaiting kebambe tak ningnui ’nchetchi lak lau?
Ka’nggipeu dage Desieyibe Tewrabe
(Mat 5.25,26)
57“Zai ’ndaitew ze ningnui runne ka’nzeibe tew ra ningnui ’nning mak lau? 58Zai samrampeu dage ning hegeipeu je nang nguatatbe luage, ’mpuîki ge pe dagene nguasuikattew le ra hangge peu le lau, makchai â, samrampeu dage ningchu zu gai gu lei, zai samrampeu ne ningchu saibe dage pei gai gu zai saibe ne ningchu kebangki ge bang gai gu lei. 59I ningnui je rang lei, poîsa kat te nang ruî’nzâuchiak mak tâne â mâtew-tewsedu chigene nang zuapat ra mak lei,” acheu bei de lei.
Valgt i Øjeblikket:
LUKA 12: ZEMEBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
