Ffydd am y Canol

Wyddoch chi, pan fydd rhedwyr sydd o ddifrif yn hyfforddi ar gyfer ras, eu bod yn hyfforddi ar gyfer anelu am y canol? Yn ddealladwy, canol unrhyw ras yw'r rhan anoddaf. Dyma lle mae rhedwr yn dechrau rhedeg allan o egni, cryfder, a'r ffocws meddyliol i ddal ati. P'un a yw e neu hi yn sbrintiwr neu'n rhedwr pellter, os na fyddan nhw’n cyrraedd y canol, fyddan nhw ddim yn cyrraedd y llinell derfyn. Mae'n swnio mor syml, ond mae angen hyfforddiant strategol i lwyddo.

O safbwynt ysbrydol, onid y canol yw’r hyn dŷn ni’n ei hyfforddi am lawer o’n bywydau? Meddylia amdano fel hyn: dŷn ni'n cael ein geni un diwrnod, o siarad yn ysbrydol, ac yna dŷn ni'n cychwyn ar y ras hon, sef ein taith yng Nghrist ar y ddaear hon, i gyd yn y gobaith o groesi'r llinell derfyn ryw ddydd a chlywed ein bod wedi gwneud job dda gyda'r ras wnaethon ni ei rhedeg. 1 Efallai fod hynny'n orsymleiddiad, ond mae'n crynhoi ein bywydau yn dda iawn, yn tydi?

Rhywbryd, pan fyddaf yn gorffen fy ras, dw i am allu dweud fel yr apostol Paul, “Dw i wedi ymladd yn galed, dw i wedi rhedeg y ras i’r pen, a dw i wedi aros yn ffyddlon” (2 Timotheus 4: 7),ond i wneud hynny, mae'n rhaid i mi fynd drwy'r canol yn gyntaf.

I fynd trwy ganol popeth - bydd angen dygnwch arnat ti. Sgwennodd awdur yr Hebreaid, “Rhaid i chi ddal ati, a gwneud beth mae Duw eisiau. Wedyn cewch dderbyn beth mae wedi’i addo i chi! “(Hebreaid 10:36, beibl.net). >

Mae dygnwch yn cael ei ddiffinio’n ffurfiol fel “y gallu neu’r cryfder i barhau er gwaethaf blinder, straen neu amodau anffafriol.” 2 Y gallu i oddef dan amgylchiadau anodd. Y pŵer i wrthsefyll poen neu galedi. Mae'n ddewrder gobeithiol sy'n dyfalbarhau hyd y diwedd. Yn iaith Roeg wreiddiol y Testament Newydd, mae’n hupomone, gair cyfansawdd sy’n cyfieithu “i aros o dan.” 3 Mae'n ansawdd a adeiladwyd trwy aros dan bwysau - rhywbeth y mae ein tuedd naturiol am ei redeg i ffwrdd oddi wrtho - ac mae'n ymddangos ei fod yn ein taro galetaf yn y canol.