Mk 9
9
1Li Jesus kixye ajwi' reheb':
—Relik chi yaal ninye eere naq wankeb' sa' eeyanq li ink'a' te'kamq, toj reetal te'ril chi k'ulunk, rik'in xwankil, li xnimajwal awab'ejihom li Yos.
Li Jesus kilemtz'uno'k xjunxaqalil
(Mt 17,1-8; Lk 9,28-36)
2Waqib'aq kutan chik a'an, li Jesus kixb'oqeb' laj Pedro, laj Santiago ut laj Jwan, ut kixk'ameb' xjuneseb' sa' xb'een jun li tzuul najt xteram. Naq wankeb' aran xjuneseb', kilemtz'uno'k li xjunxaqalil chiruheb'. 3Li raq' ki'ok chi lemtz'unk ut saqpotz'in kikanaak: maajun aj puch'unel arin sa' ruuchich'och' naru chi saqob'resink chi jo'kan. 4Laj Elías ut laj Moisés ke'xk'ut rib' chiruheb', yookeb' chi seeraq'ik rik'in li Jesus.
5Ut kixtikib' aatinak laj Pedro, kixye re li Jesus:
—At Tzolonel, us toowanq arin. Qayiib'aq oxib' chi muheb'aal: jun cho'q aawe, jun cho'q re laj Moisés ut jun chik cho'q re laj Elías.
6Ink'a' naxnaw k'aru taasumenq wi' xb'aan xxiweb'. 7Toja' naq kichalk jun li choql kimuheelank reheb', ut ki'ab'iik jun xyaab' kuxej kichalk sa' li choql: “A'in li walal raaro inb'aan: a'an cherab'ihaq”. 8Ut chi junpaat, naq ke'ilok chi xsutameb', maa'ani chik ke'ril ru, ka'aj chik li Jesus, xjunes, rochb'eeneb'.
Li xk'ulunik laj Elías
(Mt 17,9-13)
9Naq yookeb' chaq chi kub'eek chiru li tzuul, li Jesus kixchaq'rab'iheb' naq maa'ani aj e che'xseeraq'i li k'aru xe'ril, toj reetal naq li K'ajolb'ej taawakliiq chi yo'yo sa' xyanqeb' li kamenaq. 10Eb' a'an ke'xk'uula sa' xch'ooleb' li aatin a'in, yookeb' chi xtz'ilinkil rix chirib'ileb' rib' k'aru xyaalal li “wakliik chi yo'yo sa' xyanqeb' li kamenaq”. 11Ut ke'xpatz' re:
—K'a'ut naq eb' laj tz'iib' neke'xye naq xb'enwa tento taak'ulunq laj Elías?
12Kixsumeheb' ut kixye:
—Taak'ulunq xb'enwa laj Elías ut tolxk'e wi' chik chixjunil sa' xna'aj; ab'anan chan put ru naq tz'iib'anb'il chirix li K'ajolb'ej naq naab'al li rahilal tixk'ul ut taatz'eqtaanaaq? 13A'ut laa'in ninye eere naq ak k'ulujenaq laj Elías, ut ke'xb'aanu re jo'nimal li ke'raj, jo' tz'iib'anb'il chaq resil chirix.
Li Jesus kixk'irtasi jun li aaq xyajel
(Mt 17,14-20; Lk 9,37-43)
14Naq ke'wulak wankeb' wi' li xtzolom junch'ol, ke'ril naab'al li tenamit te'sutuq reheb'; wankeb' ajwi' aj tz'iib' yookeb' chi wech'ink rik'ineb'. 15Chixjunil li tenamit ka'ajwi' ke'ril ru li Jesus, ke'sachk xch'ool ut koheb' sa' aanil chi xk'eeb'al xsahil xch'ool. 16Li Jesus kixpatz' reheb':
—K'aru nekewech'i wi' eerib'?
17Kichaq'ok jun reheb' li tenamit ut kixye:
—At Tzolonel, xink'am chaq aawik'in li walal, wank mem aj musiq'ej rik'in. 18Naq jo'q'e nachape'k xb'aan, nakute'k chiru ch'och', nawoqxo'k sa' re, naxk'uxuxi li ruuch re ut chek'aamil nakanaak. Xinye reheb' laatzolom naq xe'risi raj, ab'an ink'a' xe'ruuk.
19Ut li Jesus kixye reheb':
—Ex tenamit tik maak'a' eepaab'aal, jo' najtil chik tinwanq eerik'in? Jo' najtil chik texinkuy? K'amomaq chaq arin.
20Toja' naq ke'xk'am chaq li al rik'in. Li musiq'ej ka'ajwi' kiril li Jesus kixchiq'le chi kaw li al; ut kit'ane'k sa' ch'och', kixtolk'osi rib', yo chi woqxo'k sa' re. 21Toja' naq li Jesus kixpatz' re li yuwa'b'ej:
—Jo'q'e xtikib' xk'ulb'al a'in?
Kixye:
—Chalen chaq sa' xkach'inal. 22Naab'al sut kikute'k sa' xam jo'wi' sa' ha' re naq taakamq; ab'an, wi wank k'aru tatruhanq xb'aanunkil re, tenq'aho, chawuxtaana qu!
23Li Jesus kixye re:
—K'a'ut naq xaye: «Wi tatruhanq»? Chixjunil taaruuq cho'q re li wank xpaab'aal!
24Ak tixjap re li xyuwa' li al:
—Ninpaab'. Tenq'ahin sa' li xmajelal inpaab'aal!
25Naq li Jesus kiril naq yookeb' chi tamk li tenamit, kixq'us chi kaw li tz'ajn aj musiq'ej, kixye re:
—Tz'ap xik aj musiq'ej ut mem, laa'in tintaqlanq aawe: elen ut mat-ok chik rik'in!
26Ut li musiq'ej kixjap re ut kixchiq'le chi kaw li al; toja' naq ki'elk, ut li al chanchan kamenaq kikanaak: jo'kan naq naab'aleb' ke'ok chi xyeeb'al naq xkamk. 27A'ut li Jesus kixchap chi ruq', kixwaklesi, ut a'an kixaqliik.
28Naq li Jesus ki'ok sa' kab'l, eb' li xtzolom ke'xpatz' re xjunes:
—K'a'ut naq laa'o ink'a' xooruhank chi risinkil?
29Kixsumeheb':
—Eb' li musiq'ej a'in maak'a' k'aru te'elq wi', ka'ajwi' rik'in tijok.
Kixye wi' chik resil li xkamik
(Mt 17,22-23; Lk 9,43-45)
30Naq ke'elk aran, ke'nume'k Galilea. Ab'an li Jesus ink'a' naraj naq chinawmanq xb'aan anihaq, 31xb'aan naq yo chi xtzolb'aleb' li xtzolom; naxye reheb':
—Li K'ajolb'ej taaq'axtesiiq sa' ruq'eb' li winq; taakamsiiq ut oxib'aq kutan xkamik taawakliiq chi yo'yo.
32Eb' a'an ink'a' neke'xtaw ru li naxye ut neke'xiwak chi patz'ok.
Ani q'axal nim xwankil
(Mt 18,1-5; Lk 9,46-48)
33Ke'wulak Kafarnaúm ut, naq li Jesus ak wank sa' kab'l, kixpatz' reheb':
—K'aru nekewech'i wi' chaq eerib' sa' b'e?
34A'ut eb' a'an ch'anch'o ke'kanaak, xb'aan naq sa' b'e ke'xwech'i chaq rib' chirix ani reheb' q'axal nim xwankil. 35Toja' naq li Jesus kik'ojlaak, kixb'oqeb' li Kab'laju ut kixye reheb':
—Wi ani naraj wank cho'q xb'eenil, a'anaq li xmaril ut a'anaq laj k'anjel chiruheb' chixjunil.
36Kixchap jun li ch'ina'al, kixk'e sa' xyiheb', kixq'alu ut kixye reheb':
37—Ani taak'uluq re junaq ch'ina'al jo' a'in sa' ink'ab'a', laa'in tinxk'ul; ut li taak'uluq we, moko laa'in ta tinxk'ul, a' b'an li kitaqlank chaq we.
Roksinkil li xk'ab'a' li Jesus
(Mt 10,42; Lk 9,49-50)
38Laj Jwan kixye re:
—At Tzolonel, xqil jun li winq yo chi isink maa'us aj musiq'ej sa' aak'ab'a', ut ink'a' nokoorochb'eeni. Xqayal xramb'al chiru xb'aan naq ink'a' nachalk chiqix.
39A'ut li Jesus kixye:
—Meeram chiru, xb'aan naq maa'ani taab'aanunq junaq sachb'ach'oolej sa' ink'ab'a', ut moqon taa'ok chi xyeeb'al ink'a' us chiwix. 40Ani ink'a' xik' nokooril, a'an na'okenk chiqix. 41Ani taak'ehoq jun sek'aq ha' cheruk' xb'aan naq laa'ex re li Kriist, relik chi yaal ninye eere naq ink'a' taakanaaq chi maak'a' ta xq'ajkamunkil.
K'aru naluktesink ch'oolej
(Mt 18,6-9; 5,13; Lk 17,1-2; 14,34)
42“Ani taaluktesinq xch'ool junaq reheb' li kok' a'in li neke'paab'ank, jwal us raj cho'q re naq te'xk'e chi xkux junaq xpekul li ke'leb' li neke'xsurisi eb' li b'uur, ut te'xkut sa' palaw. 43Ut wi laawuq' nak'ehok aawe chi maakob'k, yok': us cho'q aawe naq tat-ok sa' li yu'am chi ch'otol laawuq' chiru naq tatxik sa' xb'alb'a, sa' li xam li ink'a' nachupk, chi wanq xkab'ichal laawuq'.#9,43 Li raqal 44: Aran li xmotzo'il ink'a' nakamk ut li xam ink'a' nachupk, moko tz'aqal xcha'al ta li Evangelio, a'an b'an yal xtiqb'al aj chik li raqal 43 sa' xk'ab'a' 9,48. 45Ut wi laawoq nak'amok aawe chi maakob'k, yok': us cho'q aawe naq tat-ok sa' li yu'am chi ch'otol laawoq chiru naq tatkute'q sa' xb'alb'a chi wanq xkab'ichal laawoq.#9,45 Li raqal 46: Aran li xmotzo'il ink'a' nakamk ut li xam ink'a' nachupk, moko tz'aqal xcha'al ta li Evangelio, a'an b'an yal xtiqb'al aj chik li raqal 45 sa' xk'ab'a' 9,48. 47Ut wi xsa' laawu nak'ehok aawe chi maakob'k, isi: us cho'q aawe naq tat-ok sa' li xnimajwal awab'ejihom li Yos chi junaq xsa' laawu chiru naq tatkute'q sa' xb'alb'a chi wanq xkab'ichal xsa' laawu. 48Aran li xmotzo'il ink'a' nakamk ut li xam ink'a' nachupk.#9,48 Is 66,24.
49“Xb'aan naq chixjunileb' te'atz'amiiq rik'in xam.#9,49 Li xam te'atz'amiiq wi' chixjunileb' a'an reetalil li yalok ix (qayehaq: li rahilal, li raqb'a aatin, li rahob'tesiik) li tento te'xk'ul eb' li xtzolom li Jesus re naq te'kanaaq chi yo'yookil mayej, saq ru, nawulak chiru li Yos (cf. Lv 2,13). 50Chaab'il li atz'am; ab'an wi li atz'am taasachq xsahil, k'a' chik ru taa'atz'amiiq wi'? Chiwanq eeratz'amil ut wanqex sa' tuqtuukil usilal cherib'il eerib'”.
Dewis Presennol:
Mk 9: QQC
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Q'eqchi DC Bible © Bible Society in Guatemala, 2005.