Mk 8
8
Naq ke'wa'ak li kaahib' mil
(Mt 15,32-39)
1Sa'eb' li kutan a'an wankeb' wi' chik naab'al li tenamit ut maak'a'eb' xwa. Li Jesus kixb'oqeb' li xtzolom ut kixye reheb':
2—Nintoq'ob'a ruheb' li tenamit a'in, xb'aan naq ak oxib' kutan xchalikeb' wik'in ut maak'a'eb' xwa. 3Wi teb'intaqla sa' rochocheb' chi maji' neke'wa'ak, te'lub'q sa' b'e; ut sa' xyanqeb' a'in wankeb' ajwi' li xe'chalk chi najt.
4Ab'an eb' li xtzolom ke'chaq'ok ut ke'xye:
—Chan raj ru truuq xtawb'al xwaheb' arin, sa' junesal na'ajej, re xk'ojob'ankil xch'ooleb'?
5Ut li Jesus kixpatz' reheb':
—Jarub' chi wa wank eerik'in?
—Wuqub', chankeb'.
6Toja' naq kixtaqlaheb' li tenamit chi hilank chiru ch'och'; kixchap li wuqub' chi wa, kiyoxink, kixjachi ut kixk'e reheb' li xtzolom re naq te'xjek'i: ut eb' a'an ke'xjek'i reheb' li tenamit. 7Wankeb' ajwi' kach'in li kok' kar rik'ineb': kiyoxink sa' xb'een ut kixtaqlaheb' chi xjek'inkil. 8Ke'wa'ak ut ke'k'ojlaak xch'ool; ut ke'xxok li rela' li wa: wuqub' ninqi chakach. 9Wankeb' tana kaahib'aq mil li ke'wa'ak.
Chirix chik a'an li Jesus kixchaq'rab'iheb'; 10tikto kitaqe'k sa' li jukub' rochb'eeneb' li xtzolom ut koho sa' xsutam Dalmanutá.
Eb' laj Pariseey ke'xpatz' junaq eetalil taachalq sa' choxa
(Mt 16,1-4; Lk 12,54-56)
11Ke'elk chaq eb' laj Pariseey ut ke'ok chi xwech'inkil li Jesus: ke'xpatz' re junaq eetalil taachalq sa' choxa, yal re xyalb'al rix. 12Toja' naq li Jesus kixjiq'jiq'i xch'ool ut kixye:
—K'a'ut naq li tenamit a'in naxsik' jun li eetalil? Relik chi yaal ninye eere naq maajun eetalil taak'ehe'q re li tenamit a'in.
13Ut kixkanab'eb'; ki'ok wi' chik sa' li jukub' ut koho junpak'al li palaw.
Li xch'amaleb' laj Pariseey ut laj Herodes
(Mt 16,5-12)
14Ke'sachk sa' xch'ooleb' li xtzolom xk'amb'al xwaheb' ut maak'a' wank reheb' sa' li jukub', ka'ajwi' jun li wa. 15Ut li Jesus kixjultika reheb':
—Chek'ehaq reetal, chekolaq eerib' chiru li xch'amaleb' laj Pariseey jo'wi' laj Herodes.
16Eb' a'an yookeb' chi xyeeb'al chirib'ileb' rib' naq maak'a'eb' xwa.
17Li Jesus kixk'e reetal a'an ut kixye reheb':
—K'a'ut naq yookex chi xyeeb'al cherib'il eerib' naq maak'a' eewa? Ma tik kawujenaq leech'ool? 18Wank xsa' eeru ut ink'a' nekex'ilok, wank eexik ut ink'a' nekex'ab'ink?#8,18 Jr 5,21; Ez 12,2. Cf. Mk 4,12. Ma ink'a' wank sa' eech'ool 19naq xinjachi li oob' chi wa reheb' li oob' mil?#8,19 Cf. 6,30-44. Jarub' chakach li rela' xexok?
Ke'xsume:
—Kab'laju.
20—Ut naq xinjachi li wuqub' chi wa reheb' li kaahib' mil, jarub' ninqi chakach li rela' xexok?
Ke'xye:
—Wuqub'.
21Toja' naq li Jesus kixye reheb':
—Ma toj maji' ajwi' neketaw ru?
Li Jesus kixk'irtasi jun li mutz' aj Betsaida
22Naq ke'wulak Betsaida, ke'xk'am chaq rik'in li Jesus jun li mutz' ut ke'relaji naq chixch'e'aq. 23Li Jesus kixchap chi ruq' li mutz', kirisi sa' li tenamit, kixchuub'a xsa' li ru ut kixk'e li ruq' sa' xb'een, yo chi xpatz'b'al re:
—Ma nakat-ilok b'ayaq? chan re.
24A'an kixtaqsi li rilob'aal ut kixye:
—Nawileb' li winq chanchaneb' li che', yookeb' chi b'eek.
25Chirix a'an li Jesus kixk'e wi' chik li ruq' sa' li ru, ut li mutz' ki'ok chi ilok chi chaab'il, ut kik'iraak: saqenk chik na'ilok toj chi najt. 26Toja' naq li Jesus kixtaqla sa' rochoch ut kixye re:
—Chi moko sa' li tenamit tatnume'q.
Li xpaab'aal laj Pedro
(Mt 16,13-20; Lk 9,18-21)
27Moqon koho li Jesus rochb'eeneb' li xtzolom sa'atqeb' li k'aleb'aal sa' xteepal Cesarea re Filipo. Ut sa' li b'e kixpatz' reheb' li xtzolom:
—Anihin laa'in naq neke'xye li tenamit?
28Ke'xye:
—Wan neke'yehok naq laa'at laj Jwan aj kub'sihomha'. Wankeb' chik neke'yehok naq laa'at laj Elías, ut wankeb' wi' chik neke'yehok naq laa'at jun reheb' li propeet.
29Toja' naq kixpatz' reheb':
—Ut laa'ex, anihin laa'in naq nekeye?
Kichaq'ok laj Pedro ut kixye:
—Laa'at li Kriist.
30Ut li Jesus kixchaq'rab'iheb' chi kaw naq maa'ani aj e che'xye a'in.
Li Jesus kixye resil li rahilal tixk'ul
(Mt 16,21-23; Lk 9,22)
31Li Jesus kixtikib' xtzolb'aleb' naq li K'ajolb'ej tento tixk'ul naab'al rahilal, tento taatz'eqtaanaaq xb'aaneb' li cheekel winq, li xb'eenileb' aj tij ut eb' laj tz'iib', taakamsiiq ut taawakliiq chi yo'yo sa' rox li kutan. 32Naxye a'in chi kutankil.
Toja' naq laj Pedro kirisi xjunes li Jesus ut ki'ok chi xq'usb'al. 33A'ut a'an kixsutq'isi rib', yo chi xka'yankileb' li xtzolom naq kixq'us laj Pedro:
—Elen chiwu, at aj tza, xb'aan naq laak'a'uxl moko re ta li Yos, reheb' b'an li winq, chan.
Chanru xtaaqenkil li Jesus
(Mt 16,24-28; Lk 9,23-27)
34Kixb'oqeb' li tenamit rochb'eeneb' li xtzolom ut kixye reheb':
—Wi ani naraj intaaqenkil, mixra rib', chixchapaq li xkrus ut chinxtaaqehaq. 35Xb'aan naq ani naraj xkolb'al li xyu'am, taasachq chiru; a'ut li taasachq li xyu'am chiru sa' ink'ab'a' ut sa' xk'ab'a' li Chaab'il Esilal, a'an tixkol li xyu'am. 36K'a' put ru tixra junaq winq naq taareechani chixjunil li ruuchich'och', wi taasachq li xyu'am chiru? 37K'aru truuq tixk'e cho'q reeqaj li xyu'am? 38Xb'aan naq ani taaxutaanaq sa' ink'ab'a' ut xb'aaneb' li waatin chiru li tenamit a'in aj muxunel ut aj maak, taaxutaanaq ajwi' li K'ajolb'ej xb'aan a'an, naq tol'elq sa' li xnimal xloq'al li xYuwa' rochb'eenaqeb' chaq li santil ánjel.
Dewis Presennol:
Mk 8: QQC
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Q'eqchi DC Bible © Bible Society in Guatemala, 2005.