Mk 10
10
Ink'a' naru te'xjach rib' li sumsuukeb'
(Mt 19,1-12; Lk 16,18)
1Li Jesus kixaqliik ut koho sa'atqeb' li na'ajej chi xsutam Judea ut toj junpak'al li nima' Jordán. Ke'ch'utlaak wi' chik li tenamit rik'in, ut kixtikib' ajwi' xtzolb'aleb', jo' k'aynaq xb'aanunkil. 2Wankeb' aj Pariseey ke'nach'ok rik'in ut ke'xpatz' re, yal re xyalb'al rix:
—Ma truuq naq li winq tixkanab' li rixaqil? chankeb' re.
3Li Jesus kixsumeheb':
—K'aru kexxchaq'rab'i wi' laj Moisés? chan.
4Eb' a'an ke'xye:
—Laj Moisés kixye naq naru taatz'iib'aaq xhuhil li jachok ib' ut taakanab'aaq li ixq.#10,4 Dt 24,1-4.
5A'ut li Jesus kixye reheb':
—Xb'aan xkawil eejolom kixtz'iib'a leechaq'rab'inkil a'in. 6Ab'an chalen chaq sa' xtiklajik li ruuchich'och' «teelom ut ixq naq ke'yoob'tesiik xb'aan li Yos». 7Jo'kan naq li winq tixkanab' li xna' xyuwa', 8ut junajaqeb' aj chik chi tz'ejwalej te'kanaaq chi xkab'ichaleb'. Chi jo'kan eb' a'an moko wiib'eb' ta chik, junajeb' aj b'an chik chi tz'ejwalej.#10,7-8 Gn 1,27; 2,24. 9Jo'kan utan, li xlaq'ab'ahom li Yos, maajun chik taajachoq re.
10Sa' kab'l eb' li xtzolom ke'xpatz' wi' chik re li Jesus chirix li aatin a'in. 11Ut a'an kixye reheb':
—Ani tixkanab' li rixaqil ut taasumlaaq rik'in jalan chik, tixmux li xsumlajik; 12ut wi li ixq tixkanab' li xb'eelom ut taasumlaaq rik'in jalan chik, tixmux ajwi' li xsumlajik.
Li Jesus ut eb' li kok'al
(Mt 19,13-15; Lk 18,15-17)
13Wankeb' kok'al ke'k'ame'k chaq rik'in li Jesus re naq tixch'e'eb'; ab'an eb' li xtzolom ke'xq'us li ke'k'amok chaq reheb' li kok'al. 14Naq li Jesus kiril a'an, kijosq'o'k ut kixye reheb':
—Kanab'omaqeb' li kok'al chi chalk wik'in ut meeram chiruheb', xb'aan naq li kama'eb' a'an, reheb' li xnimajwal awab'ejihom li Yos. 15Relik chi yaal ninye eere: ani ink'a' tixk'ul li xnimajwal awab'ejihom li Yos jo' junaq ch'ina'al, ink'a' taa'ok chisa'.
16Ut kixq'aluheb' li kok'al, kixk'e li ruq' sa' xb'eeneb' ut kirosob'tesiheb'.
Li Jesus ut li winq b'ihom
(Mt 19,16-26; Lk 18,18-27)
17Ak yo chi elk li Jesus, xik raj re, naq kichalk jun li winq sa' aanil, kolxwiq'ib' rib' chiru ut kixpatz' re:
—At chaab'il aj Tzolonel, k'aru tinb'aanu re naq tweechani li junelik yu'am?
18Li Jesus kixye re:
—K'a'ut naq nakaye chaab'il we? Maajun chaab'il, ka'ajwi' li Yos. 19Laa'at nakanaw li chaq'rab': «Matkamsink, matmuxuk sumlaak, mat-elq'ak, matyoob'ank tik'ti', matb'alaq'ik, chawoxloq'i laana' laayuwa'».#10,19 Ex 20,12-16; Dt 5,16-20.
20Ut a'an kixye re:
—At Tzolonel, chixjunil a'in ak inpaab'ahom chalen chaq sa' insaajilal.
21Li Jesus kixka'ya, kixra ut kixye re:
—Toj jun chik maa nakab'aanu: ayu, k'ayi jo'nimal wank aawe ut k'e reheb' li neb'a', ut taawanq aab'ihomal sa' choxa; toja' naq tatchalq ut tinaataaqe.
22Naq kirab'i li aatin a'in, li winq kich'inaak xch'ool, ut koho chi ra sa' xch'ool xb'aan naq naab'al xb'ihomal.
23Toja' naq li Jesus ki'ilok chi xsutam ut kixye reheb' li xtzolom:
—K'ajo' xch'a'ajkilal naq eb' li wankeb' xb'ihomal te'ok sa' li xnimajwal awab'ejihom li Yos!
24Eb' li xtzolom naq ke'rab'i eb' li aatin a'in, sachsookeb' xch'ool ke'kanaak. Ab'an li Jesus ki'ok wi' chik chi aatinak ut kixye reheb':
—Ex walal ink'ajol, k'ajo' xch'a'ajkil li ok sa' li xnimajwal awab'ejihom li Yos! 25Ink'a' ch'a'aj naq junaq kameey taa'ok sa' ru kuux chiru naq junaq b'ihom taa'ok sa' li xnimajwal awab'ejihom li Yos.
26A'ut eb' a'an k'ajo' chik naq ke'sachk xch'ool, yookeb' chi xyeeb'al chirib'ileb' rib':
—Ani put truuq taakole'q?
27Li Jesus kixka'yaheb' ut kixye:
—Chiruheb' li winq ink'a' naru, ab'an chiru li Yos naru, xb'aan naq chixjunil naru chiru li Yos.
Xtaaqenkil li Jesus
(Mt 19,27-30; Lk 18,28-30)
28Toja' naq laj Pedro ki'ok chi xyeeb'al:
—K'e reetal, laa'o xqakanab' chixjunil ut xatqataaqe.
29Kichaq'ok li Jesus ut kixye:
—Relik chi yaal ninye eere: maajun li ak xkanab' rochoch, riitz'in, ranab', xna' xyuwa', ralal xk'ajol malaj ut xch'och' sa' ink'ab'a' ut sa' xk'ab'a' li Chaab'il Esilal, 30taakanaaq chi ink'a' ta tixk'ul o'taqk'aal sa' xb'een a'an sa'eb' li kutan a'in (rochocheb', riitz'ineb', ranab'eb', xna', ralal xk'ajol ut xch'och', rik'in raaxiik'), ut, sa'eb' li kutan chaalel, tixk'ul li junelik yu'am. 31Naab'aleb' li wankeb' chi uub'ej, te'kanaaq chi ixb'ej; ut li wankeb' chi ixb'ej, te'kanaaq chi uub'ej.
Rox sut li Jesus kixye resil li xkamik
(Mt 20,17-19; Lk 18,31-33)
32Yookeb' chi taqe'k, sa' li b'e naxik Jerusalén, k'amol b'e li Jesus chiruheb'; eb' a'an sachsookeb' xch'ool ut eb' li yookeb' chi taaqenk re yo xxiweb'.
Li Jesus kixb'oqeb' wi' chik li Kab'laju ut kixtikib' xyeeb'al reheb' li k'aru tixk'ul: 33“K'ehomaq reetal, yooko chi taqe'k Jerusalén, ut li K'ajolb'ej taaq'axtesiiq sa' ruq'eb' li xb'eenileb' aj tij ut eb' laj tz'iib'. Te'xteneb' kamk sa' xb'een ut te'xq'axtesi sa' ruq'eb' li maawa'eb' aj Judiiy. 34Te'reetz'u, te'xchuub'a, te'xrap chi tz'uum ut te'xkamsi; ab'an sa' rox li kutan taawakliiq chi yo'yo”.
Li k'aru ke'xtz'aama laj Santiago ut laj Jwan
(Mt 20,20-28)
35Ke'jilok chi xk'atq li Jesus laj Santiago ut laj Jwan, ralaleb' laj Sebedeo, ut ke'xye re:
—At Tzolonel, naqaj raj naq taab'aanu li tqatz'aama chawu.
36Ut a'an kixye reheb':
—K'aru teeraj tinb'aanu eere?
37Ke'xsume:
—Chak'e qe naq took'ojlaaq, sa' xkutankil laanimal laaloq'al, jun sa' laanim uq' ut jun sa' laatz'e, chankeb'.
38A'ut li Jesus kixye reheb':
—Ink'a' nekenaw k'aru yookex chi xtz'aamankil. Ma truuq teeruk' xsa' li sek' nin'uk'ak wi' laa'in, malaj truuq teek'ul li kub'iha' nink'ul laa'in?
39Ke'chaq'ok:
—Tooruuq, chankeb'.
Kixye li Jesus reheb':
—Li xsa' li sek' twuk' laa'in, yaal naq teeruk'; jo'kan ajwi' li kub'iha' li tink'ul laa'in, teek'ul ajwi' laa'ex.#10,39 Naraj naxye naq laj Santiago ut laj Jwan te'tz'aqonq sa' xrahilal li Jesus. Li kub'iha' tixk'ul li Jesus jo'wi' li sek' taa'uk'aq wi', a'an reetalil li nimla rahilal chalk re sa' xb'een. 40Ab'an li k'ojlaak sa' linnim uq' malaj sa' lintz'e moko laa'in ta yaal we xk'eeb'al, a'an b'an reheb' li ak k'uub'k'u wi' chaq.
41Naq ke'rab'i a'in li lajeeb' chik, ke'po'k sa' xb'een laj Santiago ut laj Jwan. 42Li Jesus kixb'oqeb' ut kixye reheb':
—Nekenaw naq eb' li neke'xk'ab'a'in aj jolominel reheb' li tenamit neke'numtaak sa' xb'eeneb', ut li xninqaleb' ru winq neke'xrahob'tesiheb' rik'in li xwankileb'. 43Ab'an moko jo'kanaq ta sa' eeyanq laa'ex: ani naraj naq nimaq xwankil sa' eeyanq, a'anaq laj k'anjel cheru, 44ut li naraj wank cho'q xb'eenil sa' eeyanq, a'anaq li moos chiruheb' chixjunil. 45Xb'aan naq chi moko li K'ajolb'ej xchalk chi k'anjelaak ru, re b'an k'anjelak ut re xk'eeb'al li xyu'am re xkolb'aleb' rix chixjunileb'.
Li mutz' aj Jerikó
(Mt 20,29-34; Lk 18,35-43)
46Ke'wulak Jerikó ut, naq yo chi elk aran li Jesus rochb'eeneb' li xtzolom jo'wi' naab'al chi tenamit, jun li mutz' aj lemoox, a' li ralal laj Timeo (aj Bartimeo xk'ab'a'), wan chaq chi chunchu, chire li b'e. 47Kirab'i naq a' li Jesus aj Nazaret yo chi nume'k, ut ki'ok chi xjapb'al re:
—At Jesus, ralalat laj David, chawuxtaana wu.
48Naab'aleb' ke'q'usuk re, re naq tixkanab' choqink; a'ut a'an q'axal kaw chik kixjap re chi xyeeb'al:
—At ralal laj David, chawuxtaana wu.
49Kixaqliik li Jesus ut kixye:
—B'oqomaq chaq.
Ke'xb'oq chaq li mutz' ut ke'xye re:
—Kawaq aach'ool. Xaqlin, yo chab'oqb'al.
50Ut a'an kixkut li xb'atb'al, ak taapisk'oq, kichalk rik'in li Jesus.
51—K'aru taawaj tinb'aanu aawe? chu'uxk re xb'aan li Jesus.
Kichaq'ok li mutz' ut kixye:
—At Tzolonel, chin'iloq ta.
52Li Jesus kixye re:
—Ayu, laapaab'aal xkolok aawe.
Ut chi junpaat ki'ok chi ilok ut kixtikib' xtaaqenkil li Jesus sa' b'e.
Dewis Presennol:
Mk 10: QQC
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Q'eqchi DC Bible © Bible Society in Guatemala, 2005.