Jn 17
17
Is txaj Jesús
1Max lajwi yalon Jesús juntzan tu', max aj t'anan bay satcan. Axa yalon axca ti': Mamin, mayal jay tiempoal a tx'oxk'abnen elok, tol miman welapnok ayin a C'ajol in ti', cax ok in tx'oxk'abnen c'apax elok, tol caw wal miman elapnok, 2yujtol ach ak'nej wikbej yiban masanil anima, yet watx' chi je' wak'on k'inalej tol ayc'al yin tojbalk'inal bay eb max ak' ayin. 3A k'inalej yin tojbalk'inal, chi yal elapnok tol chach yojtaknej el eb anima, ach jun c'otan acaw Dios, c'al in yojtaknen el eb, ayin Jesucristo in, tol chekbilintek oj.
4A yet ayin ec' bay yulyibank'inal ti', max in tx'oxk'abnej elok tol caw miman elapnok. A jun mulnajil ak'bilcan wun oj ti', mayal yi ba wuj. 5A yet manto esnelay aj yulyibank'inal ti', ayinxac'alta' ec' etok bay xol co watx'ilal. Axa tinani xin Mamin, cha' in paxaj etok bay xol co watx'ilal tu', axcac'alta' wayji ec' etok.
6A eb max a siq'uiltek xol eb yet yulyibank'inal ti', cax max ak'on eb ayin, max wak' yojtaknej el eb tzetbil wal yoc a nabal. A eb max ak' ayin tu', toc'alta' etc'alta' eb. Max yikej eb a k'anej. 7A tinani', masanilc'al tzet ak'bil oj ayin, yojtak eb tol a ayach max tita. 8A wal a k'anej ak'bil ayin tu', a maxc'al wal bay eb, cax max yaon oc eb yin c'ul. Yuj tu' xan yojtak eb tol yel toni a ayach max in tita. Chi yaoc eb yin c'ul, tol ach cheknejintek.
9Yuj tu xin, chin txajli yuj eb. Axa eb yet yulyibank'inal ti xin, c'am chin txajli yuj eb. Asannej eb max ak' ayin, asan eb tu' chin txajli yuj, yujtol et-xa eb. 10Masanilc'al eb wet, et-xa c'apax eb. Ac'ala' c'apax eb et, wet-xa c'apax yayji eb etok. A ton eb tu' chi tx'oxk'abnen elok tol caw miman welapnok.
11Txenxanej tiempoal ayin ec' yulyibank'inal ti', axa in paxaj etok tu'. A pax eb ti xin, okto can eb jabokxa bay yulyibank'inal ti'. Mamin, caw wal watx' a nabal. Taynej eb yetok ekbej, a ton jun ekbej max ak' ayin, yet watx' junxanejokab nabal eb axca wak'on etok. 12A yet ayin ec' yetok eb bay yulyibank'inal ti', max in taynej eb yetok ekbej max ak' ayin. Yuj tu xan c'am junok eb max c'ayilok, palta asannej nak t'inanc'alta' c'ayilok, yet watx' chi yun tzet tz'ibbilcan yul tx'an Un.
13Ok in pax ayach. Yak'ban wal ayinto ec' jabokxa bay yulyibank'inal ti', chi walcan juntzan ti', yet watx' axcaokab in tzaloj ti', cayokab tu' chi yun tzaloj aj eb yin sic'libil. 14Mayal wal a k'anej bay eb, palta a eb anima yet yulyibank'inal ti', caw wal chi chichon oc c'ul eb yin eb, yujtol manxa yetok yulyibank'inal eb yetok eb. Axca in ton c'apaxok, mayin yetok yulyibank'inal ti'. 15Man lananok walon ayach, tol cheil eb yulyibank'inal ti' yin aymanil, palta tol chin k'an ayach, tol cha taynej eb, yet watx' c'am eb chi etax el yuj nak yelxac'al yob. 16Ayin ti' mayin yetok yulyibank'inal ti'. Ac'ala' c'apax eb, man yetok yulyibank'inal ti eb. 17Cha pojcan el eb, yuj yoccan eb etok, yuj a k'anej tol yel chi yala'. 18Axca max in ot a chekontek xol anima bay yulyibank'inal ti', axca ton tu' max wut in chekon c'apax tok eb xol anima tu'. 19Yuj watx'ilok eb, xan chi wak' in ba ayach, yet watx' chi oc eb etok sic'libil.
20Man asannejok yuj eb chin txajli; palta chin txajli c'apax yuj eb tolto ok yaoc c'ul win yuj tzetak ok yal eb in chekbej ti'. 21Chin k'an ayach xin, tol junxanejokab chi yun nabal eb masanil. Mamin, junnej wayji etok, junnej c'apax ayji wetok. Matawal axca jayji ti', cayokab tu' chi yun eb, junxanej chi yun eb jetok. Axca tu xin, ok yaoc eb anima yet yulyibank'inal ti' yin c'ul, tol ach cheknejintek. 22A a watx'ilal ak'bilcan ayin, a max wak' bay eb, yet watx' junxanej chi yuncan nabal eb, axca wayji etok. 23Ayin ti', ay in oc yin eb, achxa, ayach oc win, yet watx' junxanej ok yun nabal eb. Catatu' ok nachaj el yuj eb anima bay yulyibank'inal ti', tol ach cheknejintek. Ok yil eb tol axca chin ot a camc'ulneni, axca tu' chot a camc'ulnen c'apax eb ti'.
24Mamin, a eb max ak' ayin tu', chi wochej tol a bay ok in ayjok ec'ok, a tu' chi ayji c'apax ec' eb wetok, yet watx' ok yil eb watx'ilal ak'bil oj ayin. Yujtol camc'ulnebil inxa oj yettax c'amto chi tz'unchaj yulyibank'inal ti'. 25Mamin, tojol ton a nabal. A eb yet yulyibank'inal ti', man ach yojtakok eb. A pax in ayin ti', wojtak ach. Axa pax eb ti xin, yojtakxa eb, tol ach cheknejintek. 26Ayin max wak' yojtaknej el eb tzetbil yoc a nabal. Toltax ok wak'c'al yojtaknej el eb, yet watx' axca chin ot a camc'ulneni, axcaokab tu' chot a camc'ulnen c'apax eb. Axa in cajayc'al ec' yin eb tu', ẍi Jesús bay co Mam Dios yin txaj.
Dewis Presennol:
Jn 17: ATBYK89
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Kanjobal (Q’anjob’al) © Sociedad Bíblica de Guatemala 1989