創世記 20
20
亞伯拉罕及亞比米勒
1 亞伯拉罕對遐漸漸徙去尼革夫，寄居佇加低斯及書珥中間的基拉耳。 2亞伯拉罕講到伊的某莎拉的時，攏講「伊是我的小妹」。基拉耳王亞比米勒派人將莎拉導去。 3暝時，佇眠夢中，上帝來給亞比米勒講：「你該死！你導來彼個婦仁人是別人的某。」
4 亞比米勒猶未親近莎拉，就講：「主啊，無辜的人民你嘛欲消滅噢？ 5彼個人豈毋是家己講『伊是我的小妹』？彼個婦仁人嘛講『伊是我的兄哥』。我做此個代誌，是心端正，手清氣。」
6上帝佇亞比米勒的眠夢中對伊講：「我知影你做此個事心端正，所以我阻擋你，才免你得罪我；我不准你摸著伊。 7今，你著將此個人的某還伊。伊是先知，會替你祈禱，互你活啲。你若毋還伊，你著知，你及你所有的人一定會死。」
8 亞比米勒透早起來，召集所有的人臣，將諸個代誌講互𪜶聽；許個人臣攏真驚惶。 9亞比米勒叫亞伯拉罕來，對伊講：「你哪對阮做此款代誌？我叨位得罪你？你竟然互我及我的人民陷落重罪。你無應該對我做此款代誌。」 10亞比米勒閣對亞伯拉罕講：「你是按怎欲做此個代誌？」
11 亞伯拉罕應講：「我想講此所在的人攏無啲驚上帝，會因為我的某的緣故給我刣死； 12閣伊實在是我的小妹，仝父無仝母，後來做我的某。 13當上帝叫我離開老父的家，四界飄流的時，我給我的某講：『以後咱無論去叨位，你著給人講，我是你的兄哥。這是你互我的恩情。』」
14 亞比米勒將牛、羊、僕人、女婢送互亞伯拉罕，閣將伊的某莎拉還伊。 15亞比米勒閣講：「我的地攏佇你的面前，你愛住叨位就通住佇遐。」 16伊閣給莎拉講：「我有互你的兄哥一千塊銀，做我對恁全家的補償，證實你是清白。」
17 亞伯拉罕向上帝祈禱，上帝就醫好亞比米勒、伊的某及女婢，𪜶就會生子。 18因為上主為著亞伯拉罕的某莎拉的緣故，已經互亞比米勒家內的婦仁人𣍐生育。
Dewis Presennol:
創世記 20: TTVH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible Society in Taiwan, 2021