創世記 19
19
所多瑪的罪惡
1黃昏的時，彼兩個使者來到所多瑪；羅得坐佇所多瑪的城門口。羅得看著𪜶，就起來迎接，仆佇土腳， 2講：「我的主，請斡來僕人的厝歇暝，洗腳；明仔載較早起來，才閣繼續行。」
𪜶講：「毋免。阮欲𫢶城門口的廣場過暝。」
3 羅得堅決給𪜶邀請，𪜶才越轉身入去伊的厝。羅得為著𪜶準備腥臊，烘無酵餅，𪜶就食。
4𪜶猶未去睏，城內所有的所多瑪人，對老到少年，來圍羅得的厝， 5給伊喝講：「下昏暗來恁遮的人佇叨位？叫𪜶出來，阮欲及𪜶交合。」
6 羅得出來門外，將門關啲，去眾人遐， 7對𪜶講：「朋友啊，請恁做此款歹代誌。 8我有兩個查某子，猶是在室女；我導𪜶出來，出在恁對待𪜶。毋拘此兩個人，𪜶是我的人客，請恁毋通對𪜶做此款代誌。」
9許個人講：「你閃開。」閣講：「你此個外族人來住阮遮，煞欲做阮的審判官！今阮欲害你比害𪜶閣較慘。」𪜶就向羅得衝去，欲挵開門。 10毋拘彼兩個人給羅得扭入去，將門關起來； 11閣互門外的人，對大到細，目睭霧，看𣍐著，尋無門。
羅得離開所多瑪
12彼兩個人對羅得講：「你佇遮猶有什麼人？無論是後生、查某子、子婿，以及城內所有的親族，你著導𪜶離開此個所在。 13阮欲剿滅此個城，因為控告𪜶的聲真大，上主有聽著；伊差阮來剿滅此個城。」
14 羅得出去，對伊的子婿講：「恁趕緊離開遮，因為上主欲剿滅此個城。」伊的子婿掠做伊是啲講笑。
15天光早，上主的使者催迫羅得，講：「起來，趕緊導你的某及兩個查某子出去，才免因為此個城的罪惡受剿滅。」 16羅得躊躇；彼兩個人因為上主憐憫羅得，就牽伊、伊的某，及伊兩個查某子的手，將𪜶導出去城外。 17導𪜶出去了，其中一個使者給羅得講：「趕緊逃命！毋通越頭，嘛毋通住佇平原；著走去山裡，才免受消滅。」
18 羅得講：「我的主，毋通按呢。 19你的僕人已經對你得著恩典，你嘛對我顯出極大的仁慈，救我的性命；我走𣍐到山裡，驚了猶未走到遐，災禍就臨到我，我就無命。 20看咧，無偌遠的所在有一個小城，我走會到；請互我走去彼個小所在，保全我的性命。」
21使者對伊講：「我答應你；彼個城我𣍐給伊毀滅。 22緊走！你猶未到遐，我𣍐當動手。」
因為按呢，彼個城叫做瑣珥#19.22 「瑣珥」意思是「小」。。
所多瑪及蛾摩拉受毀滅
23 羅得走到瑣珥的時，日頭已經出。 24彼時，上主將硫磺及火，對天頂上主遐降落佇所多瑪及蛾摩拉， 25將許個城、歸個平原、城內所有的住民，以及地上生長的物攏毀滅。 26羅得的某佇後面，一下越頭看，就變做一支鹽柱。
27 亞伯拉罕隔日透早起來，到伊以前徛佇上主面前的所在， 28向所多瑪、蛾摩拉，及平原的方向看，看著彼所在火煙淐高，親像火爐的煙。 29上帝消滅平原諸個城，毀滅羅得徛起的城的時，伊帶念亞伯拉罕，救羅得脫離死亡。
摩押人及亞捫人的起源
30 羅得毋敢住佇瑣珥，就及伊兩個查某子徙去山裡，住佇山洞。 31大查某子對小妹講：「咱老父老啦，此所在閣無查甫人通照禮俗及咱結合。 32咱著互老父飲酒，及伊做夥睏，通對伊得著囝仔。」 33彼暝𪜶互𪜶的老父飲酒；大查某子就入去及伊做夥睏；大查某子什麼時去睏，什麼時起來，老父攏毋知。
34隔日，大查某子給小妹講：「我昨暝及老父做夥睏；今暝咱閣互伊飲酒，你通入去及伊做夥睏。按呢，咱通對老父得著後代。」 35彼暝，𪜶閣互老父飲酒，細漢查某子入去及老父睏；查某子什麼時去睏，什麼時起來，老父嘛攏毋知。 36按呢，羅得兩個查某子攏對𪜶的老父懷孕。 37大的生子，給伊號名摩押#19.37 「摩押」意思是「對我的老父」。，就是現今摩押人的祖先。 38細的嘛生子，給伊號名便‧阿米#19.38 「便‧阿米」意思是「我親人的子」，及希伯來語「亞捫人」發音接近。，就是現今亞捫人的祖先。
Dewis Presennol:
創世記 19: TTVH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible Society in Taiwan, 2021