Luka 12
12
Pina'on to Misamangahay
(Matay 10.26-27)
1Itiya i, sa'aloman sa ko finawlan a macacekcek a malariparipa'to a masa'opo. I 'ayawen ni Yis a somowal ko nisawawaan, <<Pina'on kamo to tamod no Farisay a tamdaw, oya pisamangah nangra. 2O tatalahkal a ma^min ko masimeday a maamaan. O mamahapinang a talahkal a ma^min ko nikilifan a dmak. 3Orasaka, o nidokdokan namo a somowal i, o tatalahkal a matngilto no tamdaw. O nihawhawan namo a sowal i loflof i, o mamalkal a mapasowal i fadahong no loma'.
O Cima ko Kakatalawen
(Matay 10.28-31)
4<<Idangaw Ako, sowalen Ako kamo, ano mipatapatay to tireng no tamdaw ko mipatayay a tamdaw i, i ikor nonini ano caayto pakapimaan cingra i, aka ka talaw kamo. 5Pakafana'en Ako kamo to nika cima ko katalawan. Oya citodongay a mipatayay a mifahkolay haca i pisemseman a Kawas ita ko katalawan. Hai, sowalen Ako kamo, deng Cingra ko so'linay a kakatalawan namo.
6<<Talacowa tosa aca a laliping ko 'aca no lima a 'alic, nikawrira, caay ka tawal no Kawas ko ccaccay aca nonini a 'alic. 7Orira a ccay a mimaan, halofokes no fongoh namo a masa'osi no Kawas a ma^min. Orasaka, aka ka talaw kamo. Ikaka no nika limla no Kawas to adihayay a 'alic ko nika limla Ningra i tamowanan.
O Patalahkalay ci Kristoan i Ka'ayaw no Tamdaw
(Matay 10.32-33; 12.32; 10.19-20)
8<<Sowalen Ako kamo, oya patalahkalay i ka'ayaw no tamdamdaw to nika fana' ningra i Takowanan i, o papatalahkalen noya Wawa no Tamdaw i ka'ayaw no coyocoyoh no Kawas ko nika fana' Ningra i cingraan. 9Oya mihakenoay i Takowanan i ka'ayaw no tamdamdaw i, o hahakenoen noya Wawa no Tamdaw cingra i ka'ayaw no coyocoyoh no Kawas.
10<<O milokesay to Wawa no Tamdaw i, ma^dengho a mahpol ko raraw. Nikawrira, o milokesay to Fangcalay 'Adingo a tamdaw i, caay ko mamahpol ko raraw ningra.
11<<Ano kriden no tamdamdaw kamo a patayra i kasa'opoan a loma', ano ^ca mapatayra i ka'ayaw no mikowanay, ano ^ca i tapatapang a maliclic, itiya i aka ka rawraw to maanen niyam ko pa'ading to tireng, ano ^ca o maan ko sasowalen a saan. 12Nawhani o Fangcalay 'Adingo ko mamitoro' i tamowanan to malosasowalen namo itiya,>> han ni Yis.
O Tinako to Maapaay a Cidafongay
13Itiya i, sowal sa ko ccay noya finawlan i ci Yisan, <<Singsiaw, sowalen ko salikaka ako to sapa'isalaw ningra i takowanan to rarocoken niyam a dafong,>> han ningra.
14Pasowal sa ci Yis i cingraan, <<Idangaw, cima ko patirengay i Takowanan a mamisawkit, ano ^ca i, palamamisilsil a pakilac to dafong namo saw?>> han Ningra. 15Saka, pasowal sa ci Yis i 'alomanay, <<Pina'on kamo to masamaamaanay a 'anof. Nawhani ano adihadihay ko dafong no tamdaw i, caay ko dafong ko pi'arawan to so'linay a nika lmed no 'orip noya tamdaw,>> han Ningra.
16Ta patinako sa ci Yis a somowal i cangraan, <<Ira ko ccay a cidafongay a tamdaw. Adihay ko kinaira no omah ningra. 17Safaloco' sa cingra a miharateng, <Maanen ako hakini? Awaayto ko patlian ako to kinaira no omah ako. 18Saka, tastasaw ako ko 'ariri ako. Ta patirengen ako ko tata'angay. Ta i tiraen ako a mina'ang ko panay ako ato dafong ako a ma^min. 19Ta sowalaw ako ko tireng ako. O malmeday a tamdaw kiso. Adihayto ko dafong iso a mana'ang to malokakaenen iso to pinapi:na a mihcaan. Akato pimaamaan. Akato ka roray ko harateng. Kakomaen. Kaacangto kiso,> saan. 20Nikawrira, sowal sa ko Kawas i cingraan, <Kiso o maapaay a tamdaw, anini a dadaya i, o mamaala Ako ko salo'afang iso. Ano hatira i, o malonimato kora nina'angan iso a dafong saw?> han no Kawas.
21<<Saka, o mahaenay a tamdaw koya caayay pisoped to saki no Kawasan, o saki no tirengan a ccay ko nipisoped ningra,>> han ni Yis.
Ti'eren ko Kawas
(Matay 6.25-34)
22Sowal sa ci Yis i nisawawaan Ningra, <<Orasaka, sowalen Ako kamo, o maan ko kakaenen, o maan ko sasariko'en ako, aka ka saan a marawraw ko faloco' namo a miharateng to pakayniay i saka'orip. 23Nawhani ikaka no kakaenen ko nika o kalimlaan ko 'orip. Ikaka no riko' ko nika o kalimlaan ko tireng. 24Nengnengen ko palang hna. Caay pifolsak to sapaloma, caay pilitod, awaay ko 'ariri naira. Nikawrira, pakaenen no Kawas caira. Ikaka no nika limla no Kawas to 'ayam ko nika limla Ningra i tamowanan. 25Ano maroraroray ko cima namo a miharateng to pakayniay i 'orip i, ma^deng cingra a misofac to 'orip#12.25 misofac to 'orip -- ano ^ca i, mitongal to takaraw. ningra to mamamamang aca hakiya? 26Ano oninito a mamangay a dmak i, caay pakafilo kamo. Nawiro maroray kamo a miharateng to romaroma a dmak saw? 27Nengnengen ko lahad no yolinohana hna. Caay ka tayal, caay pisanga' caira to riko'. Nikawrira, sowalen Ako kamo, ano ci Solomonto o tadamaanay ko 'orip i, caay pakapilcad to ccaccay aca nonini a hana ko nika kapah no riko' ningra. 28Oya mamalokasoy i parod anocila a ma'oripayho anini i palapalaan a talod i, madipot no Kawas konini. Mangalef ko nipidipot no Kawas i tamowanan. Aya: ko nika tadanca no piti'er namo to Kawas.
29<<Orasaka, o maan ko kakaenen, o maan ko nananomen, aka ka saan a maroray a misaharaterateng. 30Deng onini a ccay ko nilongocan no mafokilay to Kawas a tamdaw i tini i hkal. Mafana' ko Wama namo to nika cango'ot namo tonini. 31Kapilongoc kamo to sakalahciaw no pikowan no Kawas, ta halonini a saka'orip a ma^min a mapafli no Kawas kamo.
Na'angen i Kakarayan ko Dafong
(Matay 6.19-21)
32<<Kamo o mamangay a kasaflaw aka ka talaw. Nawhani maolah ko Wama namo a pafli i tamowanan to Kitakit Ningra. 33Pacakayen ko dafong namo a malosapalada' i pakoyoc a tamdaw. Sanga'en ko caay ko mamapenay a malopapaysoan namo. Na'angen i kakarayan ko caay ko mamalasawad a malodafong namo. Nawhani caay ko mamaraod no mitakaway, caay ko mamakaen no aayad itira. 34Nawhani ano i cowa ko dafong namo i, itira ko faloco' namo.
O Mapalalayto a Koli
35<<Kararid a mipatala to faloco' namo. Likaten ko dawdaw namo. 36Kamatiya kamo o mitalaay a koli to pinokay no tawki nai pitahkaan i pararamoday. Ta ano minokay cingra a mikongkong to fawahan i, tangsol asa kiso a mifawah to loma' a militmoh i cingraan. 37Ano minokay koya tawki, ano matakop ningra ko pitala noya koli a caay ka foti', o malmeday cangra. So'linen Ako a somowal kamo, o mamikdec koya tawki to safaked ningra. O papatadoen ningra koya koli a papitahka. 38Ano o lafiito ano o kanikaranto ko sapinokay noya tawki ano hatiraay ko nipitala noya koli a caay ka foti' i, o malmeday cangra. 39Kafana' kamo tonini, ano mafana' ko tawki no loma' to nika ano hacowa ko sakaira no mitakaway i, caay ka lipalaw no mitakaway a micomod i loma' ningra. 40Kararid kamo a mipatala. Nawhani, caayay ka harateng namo a tatokian i, itiya a tayni koya Wawa no Tamdaw,>> han ni Yis.
O Nga'ayay ato Tatiihay a Koli
(Matay 24.45-51)
41Saka, sowal sa ci Pitiro, <<Tapangaw, kami ko nisowalan tonini a tinako haw? Ano ^ca i, o 'alomanay haw?>> han ningra.
42Paca'of sa ko Tapang, <<Ano hatira, cima koya karahkeran citanengay a misimaway to loma' saw? Oya nipatirengan no tawki a papisimaw to loma' a papirocek a pafli to kakaenen i kolikoli. 43Ano minokay koya tawki, ano ma'araw ningra ko nika haen no dmak noya koli i, o malmeday cingra. 44So'linen Ako a somowal kamo, paconoh wa han noya tawki cingra a papisimaw to dafong ningra a ma^min. 45Nikawrira, <Latek, caay ko raranikay a minokay ko tawki,> ano saan ko faloco' noya koli, ta mipalo cingra to fa'inayan ato fafahiyan a roma a kolikoli, ta komaen, mita'owak, malasang cingra. 46Yo caay pisaharaterateng cingra to pinokayan no tawki a romi'ad atoya tatokian i, itiya a ira a minokay koya tawki. Itiya i, caay ko sasamadahen#12.46 caay ko sasamadahen -- ano ^ca i, o fahfahen cingra a milaplap. noya tawki cingra a mipekpek a mipalo a palcad to nika tfoc no caay ka so'lin ko tayal a koli.
47<<Ano mafana' to nafaloco'an no tawki ningra ko ccay a koli i, ano caay pipatala, caay pido^do to nafaloco'an no tawki ningra koya koli i, caay ko sasamadahen ko nipisti' cingraan. 48Nikawrira, o caay ka fana' to nafaloco'an no tawki ningra a koli i, ano o sastisti'en cingra i, caay ka hakowa ko nika sti' ningra. Orasaka, o mapafliay no Kawas to adihayay i, adihayay ko aayien i cingraan. O mapatoroday no Kawas to adihayay i, adihayay ko lalongocen i cingraan.
O Lalngatan no Saka Lacinowas
(Matay 10.34-36)
49<<O sakatayni no Mako i, o sapiilohaw to hkal. Nanay mailohto saan ko longoc Ako. 50Ira ko lalayapen Ako a ino'. Tangasa i kalahcian nonini i, caay ko kakahmaw ko pades Ako. 51O sakatayni Ako i, o pararihadayay to hkal aka ka saan ko harateng namo. Sowalen Ako kamo, caay ko pararihadayay Kako, o palacinowasay ko sakatayni Ako. 52Misatapang anini, ano lalimaay ko paro no ccay a loma' i, oya tatoloay i, o mamipacoli ko tatosa nangra toya tatoloay. O mamipacoli ko tatolo toya tatosaay. O hahatira ko nika lacinowas nangra. 53O mamacacoli ko mama ato fa'inayan a wawa ningra. O mamacacoli ko ina ato fafahiyan a wawa ningra. O mamacacoli ko fafahiyan a kadafo ato ina no fa'inay ningra,>> han ni Yis.
O Pihapinang Tonini a Hkal
(Matay 16.2-3)
54Miliyaw a somowal ci Yis to finawlan, <<Ano ma'araw namo ko nipiciro' no to'em i ^tip i, tangsol sa a somowal kamo <O mama'oradto,> saan kamo. Mahaenayto a malahci. 55Ano masafalat ko fali i, <O fafa^detto ko romi'ad,> saan kamo. So'linayto a malahci. 56Kamo o misamangahay ko dmak a tamdaw, mafana' kamo a mihapinang to pinangan no sra ato kakarayan i, nawiro mafokil kamo a mihapinang to dmak nonini a hkal saw?>> han ni Yis.
Kalali'ay ato 'Ada
(Matay 5.25-26)
57<<Nawiro caay pihapinang kamo to nika o maan ko matatodongay a dmak saw? 58Ano ira ko mipakokotay to dmak iso a pacakat i pilaocan i 'ayaw no nika liclic namo i, kilimen ko sakanganga'ay namo a malali'ay. Ano caay haenen iso i, latek tengtengen ningra kiso a patayra i misawkitay. Ta patoroden no misawkitay kiso i mirofoay, ta rofoen ningra kiso. 59Sowalen Ako kiso, ano caay ka lpon iso a pasadak ko ccay a laliping to sapatfoc a ma^min i, caay ko mamasadak kiso nanitira,>> han ni Yis.
Dewis Presennol:
Luka 12: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019